MIZO TAWNG ZIAK LEH SAWIA HNAM DANG TAWNG HI

November 23rd, 2013 4:37 pm by rlchhana

Naisingpara, Tripura-ah Mizoram Bru raltlante an Biakin kang an sak that hawng turin hotute hnung zuiin ka kal ve a, inkhawm banah an Kohhran hruaitute’n mi an kawm fal a. Mizoram Bru tawngin thu an han sawi tak tak mai a, Bru tawngah khan Mizo tawng hi namen lovin an zep tel a -a chepakaiin, a chhipchhuakin, a bul hrumah chuan, adt. – ka nuih an ti za ru viau mai a, mahse ka inhmuchhuak rang khawp mai. Zawngin a ngumkhak a hmu lova, a thiante ngumkhak a nuihzat tih ang chauh kha ka ni tih ka inhrechhuak a. E!!! a ni dawn tak keini pawh kan thuziak leh sawiah hian hnam dang tawng namen lovin kan pawlhsawp a ni tak maw tiin ka har chhuak hlawl mai.

Mizo tawng zir kan ni bawka kan ti rau rau a nih chuan kan thuziak leh sawiah hian hnam dang tawng tel lo thei ang berin ziah emaw sawi emaw i tum ang u khai. Entirna’n – Mi thi tawh hming kan ziaka Lalroherha(L) tiin hei ai chuan Lalherha(F) tiin ziak ila, a hmasa zawkah khian sap tawng a tel a, a hnuhnung zawk erawh khi chu (F)=Fam tihna a ni. Chutiang zel chuan Pi Chhiarkawpi w/o Rophira tia ziak aiah Pi Chhiarkawpi a pasal Rophira ti mai ila, leh adangte tihna’n etc. kan hman thin pawh hi etc.=adt. ti hlirin ka hmang tawh. Kei chuan heng ang hi keima thu leh duh danin ka hmang hnem hle tawh a, min thlawptu leh tha titu pawh an tam hle.

Hawh u Zofate hian kan hnam kan tawng leh sakhua hi a humhim tur zawngin tan i la ang u.

Lalchhanhima Renthlei

Similar Posts:

Recent Posts:

5 Responses to “MIZO TAWNG ZIAK LEH SAWIA HNAM DANG TAWNG HI”

  1. 1
    Borat Says:

    Kan la inzir mek anih hi,Internet tawngkam bungrua hmang an awm leh zauh tih loh chu.

    Thalai thenkhat hian spelling diklo hman an ching bawk. “Ka naupang lai chuan zu ka in ngai re re lo” tia ziah pawh hi an sim ve tial.

    Nupui pasal sawi nan w/o tih pawh ching ila Rokunga (L) ti lova Rokunga (fam) tih hman te hi tha ka ti.

    Infrastructure tih aia “hmunhmarel” tih siam chhuak tute hi ani ka fak.

    Report this comment

  2. 2
    Kawhterenga Says:

    Hmunhmarel…….a tha ka ti khawp mai…

    Report this comment

  3. 3
    lushai_er Says:

    Sap-tawng kan tih pawh hi tawng hrang hrang lak khawm a ni ve tho mai. Indian origin, french origin, Greek origin, etc., atanga an phuah khawm a tam mai.

    Tin, a thu hrimah tawng hi in communication atan a ni a, khawvel pum hian tawng chi khat chiah hmang ila tih lo rilruk nak lai a hetiang a thliarkar rilru put hi a tha lo. Dik tak chuan Mizo tawng kan tih pawh hi Pawih, Paihte, Ralte, Hmar, Lusei tawng atanga lo piang a ni a, Tuikuk leh Chakmate pawn an lo thiam ve hi a lawmawm em em zawk a ni.

    Global village te kan sawi kan sawi thin a, a tak ram hi chu kan la hlat deuh zawng anih hi. Cell phone/Mobile phone i ti tho thoin ka ring tlat. Top up thun a ngai tho tho ang. Khawlthluaknei tih ai chuan computer tih hi a nuam fe zawk ka ti. Hard disk capacity chu 1 terabyte a ni tih hian kan chiang em em.

    Amah Rev.Zairema [L] tih dan takin tun kum 50 lo awm leh turah hi chuan Mizo tawng pawh hi a awm tawh bar lovang.

    Report this comment

  4. 4
    muansakhi Says:

    Saptawng hi kan lo use leh mauh thin a nih hi maw.

    Mizo tawng hi tihhausak a tha kan ti daih teh ang. Entirnan: Zoram Mizo tawnga ‘Thlawhtheihna’ hi chuan khawl thlawkthei zawng zawng hi huam ta se. Khualzin phur chi sawi nan khawchhak lam unate sawidanin “Vanzamleng” han ti deuh dalh ila, indo thlawhna sawi nan chuan thlawh chak hmel deuh Hmar unaute tihdanin “Vungna” han ti leh hraih ila.

    Hetianga kan tawng a hausak chuan saptawng use zeuh zeuh kan chin hi a reh deuh ngei ang.

    Report this comment

  5. 5
    lr hlonchhing Says:

    I sawi ang khian ka hmang ve fo thin a, hman zel pawh ka tum…

    Report this comment

Leave a Reply

You must be logged in to post a comment.