M.A. Nula A Ţul Tlat Mai! Tlat Mai A!

January 26th, 2014 7:51 am by Dr John

Hun Ava Tlêm Êm Ve Le!
Krismas Ni, December 25, 2013-a kan Inkhawm chu kan rei ang reng hle a, Dâr 3:00pm aţanga kan inkhawm chu Dâr 5:00pm ah kan bâng thei ţawk a. Refreshment tuihnai tak an buatsaih chu ei turin kan chhuak sang sang a. Dâr 7:00pm chu Ruai kil hun atana ruat a nih avangin, luhkhawm a, han zai leh nân hun chu a awm lo achha hi a ni ber mai. Tichuan, kan ti nek nek a, dâr 6:45pm ah chuan mi tlêm-te chauh la lut-khawm rih mahila, zai chu kan ţan ta hrâm a. Hla 3 vel ka sa hman tih-ah chuan Receptionist a lo lut a, Lêngkhawm Hruaitu hnenah kalin a beng bulah thil a hril ru sa sa a. Ka rilru chuan, tawpna a siam tawh dawn ni maw, ka lo ti a. Mahse, hla a tawp chuan a rawn dingchhuak a, “Hei, ruai an la peih lo tlat mai a. Kan zai chhunzawm zel dawn nia. Fatu lam an inpeih hunah min rawn hrilh mai turah ngai ila…” a rawn ti ta daih mai a!

Kan Zai Tui Ta Phian! Mahse, Tawp A Ţul Ta Si!
Kan zai chho ta zel a. Pathian malsawmna changin kan zai tui ta phian mai a! A karah Thuchahtawi vawi 2 lai kan ngaithla hman bawk a. Zai kha kan kham lo tih a hriat hle. Kan Pastor-te leh Nu & pa lam chu an lâm chhuak ta nual a, Haleluia Amen! thawm pawh a ring ţan hle a. Chung zingah chuan Nula lian thelh-thawlh, hmel chhe vak lo, hmaifang ţha tak pakhat chu Chêtna chang engemaw zat zingah chuan a tel ve tih ka va hmu thei a. Dâr 7:40pm a ri ta! Receptionist kha a lo lang leh a, ruai an peih tawh thu chu kan Lêngkhawm Hruaitu hnenah chuan a rawn hrilh ru leh ta sa sa a. Tichuan, kham lo tak chungin Hruaitu chuan Pastor chu ţawngţai turin a sawm a. Lêngkhawm chu a ti tawp ta a ni.

M.A. Nula a Ţul Ta Tlat Mai!
Mi tam zawk chu Ruai ei turin tlai hlau takin an chhuak nual tawh a. Mahse, Chêtna nei zinga Nula kha a ţul ta tlat mai a! Ţawng hriat loh leh chêtna nen, thawm neiin, Biak In chhungah chuan a vei kual ta sek mai! Pastor leh Hruaitu ţhenkhat-te an lo bengvâr a, hawnsan mai a rem lo tih an hriat avangin kan ţhufual ta hlawm a. Pastor-in “Ţul engnge awm? Sawi ţul leh lang-te a awm a nih chuan, I ngaithla ang u,” a tih pawh chuan, thildang a rawn tlazep mai silova, Pastor chuan, “Zai ala ţul zawk a ni ang e. I zai chhunzawm leh rih mai ang u,” a ti ta a. Zai chu kan ţan ţha leh ta a ni.

Kan zai zel a, dâr 8:06pm a rik chuan Receptionist bawk kha a lo lang leh a, Chaw vel leh thildang senghawi a ngaih avangin chaw ei ngei ngei a ngaih tawh thu a rawn sawi a. Pastor chuan thil awmzia hrethiamin, ţawngţaina-in tawpna a siam ta a. Pastor-in tawpna a siam hnu hian min.15 vel chu inchhungah leh pawnah kan la in-buaipui a, chumi hnu-ah chuan chaw-eina lamah a rawn kal ve thei ta a ni. Hetia kan in-buaipui lai hian a chanchin ka lo zawt a. He Nula fel tak hi Bangalore University-a M.A. zirlai a lo ni a! Ka ngaihtuahna a kal thui hle.

Rawngbawlna Langsâr Lo, Mahse Pawimawh Lutuk Si!
Ka ngaihtuahna thui tak min sentirtu chu… he M.A. zirlai Nula hian a chêtna chan hi hrehawm ava ti dawn êm! M.A. lai zir pha ve si, khatianga a han awm kha, a zak-in, insum hrâm hrâm a tum ngei awm sia, mahse, Thlarau Thianghlimin a hman duh dân a nih miau avang leh Pathian kohna leh Lalpa’n tih tur a pek chu tlânsan a hreh si a, zak êm êm leh duhlo chung chungin a Kotu thuawih vang zawkin khatiang khan a awm chu a ni si a! tiin ka ngaihtuah-zui neuh neuhva.

Mi tam tak chuan, Pastor-te tan lâm leh kut-ben a mawi lovin an hria a. Officer leh Lehkhathiam (Ph.D/M.A/M.Th)-te tan pawh mite ang a, lâm duai duai emaw, rawngbawlna langsâr lo, ho te te chelh leh mawhphurhna neih te hi a mawi lovin kan hre ţhin. A lang-a-pauvin sawichhuak lo mahila, kan rilru-ah ţha tih lohna kan nei lian hle tih hi thil chiang tak a ni. A chunga M.A. Nula chêtna chang pawh khi, amah chauhvin hrehawm tiin a zak dawn lova, a zir-pui te, a ţhian ţha-te, a chhungte pawhin an zahpuiin, a awmdân khi an duhsak dân zawng a ni hauh lovang le!

Zaihruaitu pakhat chu, a chhungte leh ţhian hnaivai tak-te hian vawi engemaw zat chu, zilh ti-tih, hrilhfiah ti-tih hian, “Zai hruai tawh suh. Khuang phei chu vaw tawh suh. Lehkhathiam i nih kha aw. Khuang vaw awm tawk leh Zai hruai awm tawk hi an awm. Ti tawh miah suh,” tia an hau bawng bawng lai hi ka hre fo a!!! Chêtna chan te, Zai hruai te, Hla chang sawi te, Thuhrilh te hi ‘duh leh châk êm êm chu an lo awm ve’ mahna. Mahse, mi ţhenkhat tân chuan an châk loh êm êm leh an duh loh êm êm kha an chungah a tlû a, mawhphurhna pêk an ni tlat si a ni!

Engtin Nge Ni Ang Le? Engnge I Ngaihdân?
Tun thlenga Zawhna duhthusama a Chhanna ka la dawn loh chu, “Lehkhathiam leh Officer bîk-te tan, Kohhran hruaituten Zai hruai rawngbawlna leh mawhphurhna tê-nau an pek thuawih taka an lo hlen kha… an ti fuh nge, an lo hnar mai lo kha… an tisual zawk?” tih hi. Chhiartuten ngaihdân rawn share turin ka ngen a che u. Rawngbawlna hrim hrimah hian kan tih-tur awm bîk leh a mawihnai deuh bîk hi Pathian ngaih hian a awm-in kan hria em?

Pastor-in a tih-awm bîk te, theology & secular lama Lehkhathiam bîk (Ph.D/M.Th/M.A. etc.) leh Officer-ten an tih-awm bîk rawngbawlna te, Kohhran member pangngai-ten an tih-awm bîk rawngbawlna-te hi a awm hrang reng em? Engti anga ngaih tur nge ni ang? Pathian Thu (Bible) leh Kohhran History lamah hetiang ngaihdân hi engang in nge an lo neih ve? Mizo Kohhran bikah hian Engtia ngaih leh pawm tur nge ni ang?

16 Responses to “M.A. Nula A Ţul Tlat Mai! Tlat Mai A!”

1
Sangpuiipa Says:
January 26th, 2014 at 8:08 am
A van tha tak em. Mi lian tak kan ni emaw, mi tê ber pawh ni ila, rawngbawlna kan ko a tla hlen mai hi kan tih tur a ni. Kan kohhran ah chuan Pastor te, kohhran upa te pawh an lam durh durh thin.

Report this comment
2
matea_tmj Says:
January 26th, 2014 at 10:34 am
A van tha tak em.

Report this comment
3
Sihtea Says:
January 26th, 2014 at 12:00 pm
Vawi ni thleng a Israel mi ten a an ngaih san tawp theih miah loh,
Lal Davida kha a chhiahhlawh te bul a Pathian fak a a lam durh durh lai khan, a ni ang Lal ropui lutuk leh mi te ngaih san vawr tawp ni si, kha ti a a han lam durh durh si kha, a NUPUI in a sawisel a. Kha ti’ang tho khan, Pathian ring tu in ti ve tho si, mihring mifing in ti, mi changkang, mi chung a leng in ti te chuan, Pathian thlarau hna thawh an hre thiam duh lo mai ni lovin, a hmuh in an hmusit thin.

Report this comment
4
Sony Says:
January 26th, 2014 at 1:28 pm
Nia, officer nih vanga Pathian hre lo zinga tel kher tur ani lo. Multi millionaire pawh piangthar aawm nawk asin. Chief Secretary hlui Pu Vanhela pawh Myanmar lama rawngbawltu Pu Zalawra lehkhabu introduction a ziahna ka hmu alawm, ringtu dik tak tawngkam chiah chiah.

Report this comment
5
PKfanai Says:
January 26th, 2014 at 2:03 pm
Mi ten mi tak tak china an ngaih, tider hauh lo tura an ngaih chin ten an ka an han an ve te, an han chan ve te hian, mi ten an rin phah a, a thawk na bik thin. Zosap missionary te kohhran phun 2 Baptist leh Pres hruaitute an lo chesual tawh a, Mizoramah tual to kohhran a pian vak phah a ni. Tunah chuan an harhchhuak tawh a, an zinga tel ve a, luhchilh a, kawng dik kawh hmuh an ngai tih an hre tawh. I Pastor sawi pawh khi Pastor fel tak anih dawn khi. Taksa chetna hi ka la chang lova, chan ka inhuam chiah em? tih pawh ka hrethiam chiah lo.

Report this comment
6
H.Vangchhia Says:
January 26th, 2014 at 7:07 pm
Suahsual kawng lam ni lova mahni mawhphurhna chan mek apiang hlen zel kan tum hi Pathian rawngbawl kan nihna niin ka hria.

Mihring zawng zawng a lang a pau a Pathian rawngbawl theih ngawt a ni lo. Mipui tan a a lang a kohhran lam emaw a Pathian rawngbawl an awm ang a, chutiang nilo, ram enkawlna lam emaw thil dangah mawhphurhna neite pawh an ni ang. Mahni tih tur theuh a theih tawp a tha chhuah hi Pathian tan a rawngbawlna niin ka hria. Kohhranah ngawt rawngbawlin khawvel a kal thei lo a ni. hairehai

Kan M.A. nula chu lo lam ve dirh derh sela, a tih tur apiangah rinawm takin thawk se….keini M.A. lo pawh kan lam dir derh theih chuan M.A. lam phei chu a ropui ngawt a lawm, kohhran emaw a inpe a rawngbawltu a nih loh erawh chuan a hna thulh phah lo sela, chu chu a ni mai

Report this comment
7
Zoram Fapa Says:
January 26th, 2014 at 11:18 pm
Rinawm takin a hnathawhna leh eirawng a bawlna ah tui se la. Lam tawh rawh se…hihiiii

Report this comment
8
Dr John Says:
January 27th, 2014 at 8:43 am
#1 Sangpuiipa & #2 matea_tmj Thanks

#3 Sihtea, i sawi hi a nih duh hmel khawp mai. Mi inti-changkang (changkang tak tak lo ho) hi an che buai duh a, an che Sawh-chiar duh viau-in ka hre ve.

#4 Sony, Pu Zalawra kha a ngaihsanawm khawp mai.

#5 Pu PK, i sawi dik khawp mai. Kum 1989 vela Zoram Kohhran-te Taksa Chetna-in min rawn nuai tan tirh khan, Hmar lamah chuan Hruaitu an neih that loh vang nge, an hlawk-pui vak lova. Chhim lamah chuan Hruaitu Pastor ngat kan nei a. Rev. T.C. Laltlawmlova khan a lo thlen phat khan, a chhungah luh-chilh-in an Nupa-in an buaipui chho ta a, kan Hlawkpui nasa ta ni pawhin ka hria. I sawi ang chiah khian, Harsatna leh Thiltha engkim hi ‘pawnlam landan’ atang ringawt lova, ‘a chhungah ngei luh-chilh’ ngei hian a lo fiah a, tanpui dan tur, enkawl dan tur leh hmasawn dan tur pawh a lo lang-chiang nge nge thin.

I sawi ang khian kan Pastor hi a fel ang reng khawp mai.

#6 Pu HV meuh pawhin Pathian Thu leh Rawngbawlna lam hawi ka Post a lo komen ve tlat mai!!! Thank you Pu HV.

#7 Zoram Fapa komen chuu… tha lutuk

Report this comment
9
H.Vangchhia Says:
January 27th, 2014 at 8:45 am
#8 Ka tihawm reng ka ti niin ka hria hairehai

Report this comment
10
Sihtea Says:
January 27th, 2014 at 10:52 am
In comment na ho hi chhiar a man hla in’ ka hlawk pui khawp mai.

Report this comment
11
Charice_mizo Says:
January 27th, 2014 at 4:22 pm
Kan kohhranah chuan M.A, M.Phil, LLb etc in thlarau tulna an changa, mak leh awm ang lo emaw, zahthlak ang zawngin kan lo ngai hauh lo asin. Thlarau min pe tu Pathian lam kan en chuan helai M.A, Doctor, Officer, MLA tih vel kha chu a nep teih teih, riau in ti ve lo maw? Min siamtu hian kan degree leh nihna te ai chuan thinlung taka amah kan faka chibai kan buk leh buk loh a ngaipawimawh zawk ngei ang le.

Report this comment
12
chhana Says:
January 28th, 2014 at 6:52 pm
Kan nihna azirin kan tih awm chu a awm ngei mai. Mahse, Thlarau Thianghlim chungchangah kher hi chuan a dawng awm leh awm lo an awm chuanglo. Mi thiamin an chan san deuh phei chuan kohhran pum a hlim thina, a tha phian zawk.
An nihna a san avanga hetiang thil an ti hreh a nih chuan khawvelthila fing tak leh sum nei am chungin an la kang sen zuai zuai mai ang.

Report this comment
13
Dr John Says:
January 28th, 2014 at 7:28 pm
#10 Sihtea, nangma komen alawm kan hlawk-pui thin. Lo komen tam deuh thin teh, i komen tawi thei em mai

#11 Charice_mizo, in Kohhran chu in va awh-awm ve. In Kohhran-a rawn lawi ve a chakawm ngei mai. Lalpa’n a ropui nan a hmang zel ngei ang che u.

#12 chhana, i sawi dik khawp mai. Mithiam leh khawsa thei, Pathian & rawngbawlna lama inpe tak, inngaitlawm bawk ten Kohhran-a tihtakzeta thahnem an ngaih chuan chu tluka Lalram zauna tur atana hnathawk chak tur chu vang deuh tur a ni. Hei hi Tirhkoh Paula Policy pawh kha niin alang. Khaw lian leh Langsar a Target char char dan atang khan, a thiltum hi a hriat khawp mai.

Ni e, i sawi ang khian, Nihna te, Dinhmun avang-te, Nu & pa leh Thian-te (ngaihzawngte) avang emaw-a “Pathian kohna chhang duh lova, hnawl-tute” leh khawvel nawmsakna thlang zawk-tute hian an tifuh hauh lovang tih hi chu a chiang tawk hle a ni.

Report this comment
14
H.Vangchhia Says:
January 29th, 2014 at 3:07 am
#11

Report this comment
15
Awmtea Leo Khiangte Says:
January 30th, 2014 at 10:25 am
Rawngbawlnaah hi chuan te bik leh lian bik a awm lovin ka hria. Academic lama eng anga sang pawh ni se, Pathian mithmuhah chuan kan inang vek a. Pastor leh Upa te tihtur bik erawh a awm ngei e.

Report this comment
16
Dr Mahminga Sailo Says:
January 30th, 2014 at 2:58 pm
Post tha tak a nih hi; tin comment pawh a tha hlawm tlat.. (Y).

Ka’n tui hnih ve mai mai ang a, Pathian thlarauvin a pawl a nih chuan mihring finna emaw thiamna leh dinhmun avanga an tih emaw tih loh tura kan lo ruat ve ngawt chu a dik ber lovang. Tirhkoh Paula nunah khan sawi nawn ngai lovin a chiang khawpin ka hria..

Report this comment