AMERICAN LIFE by Michael Mizo

January 26th, 2014 8:33 pm by Zonunsanga11511

Zofate zinga US Airforce hmasa ber leh kan neih chhun, MBA leh  US Treasury a hna tha vawng kan neih chhun Michael a article hi khawvel hrang hrang a kan Mizo thalai ten kan tangkai pui ngei beisei in ka rawn post chhawng leh ani e.

Kan Mizo thalaiten lehkha ziak tura min tih hian enge ka ziak ang aw tih ka ngaihtuah a, tichuan ka rilruah “American Life” tih hi a lo lang a. “American Life” chu han ziak vek dawn ila lehkha bu tamtak a ziah theih ang a, mahse chung chu ziak vek lovin, keima experience American life leh thalaite tana tangkai tura ka rinte chauh ka rawn tar lang zawk dawn a ni.

America hi khawvelah ram nuam ber a ni a, a chhan chu a ram a hausak bakah dan hi a that em em vang ni. Civil Rights Act of 1964 hian mi hring inhmuhsit (Discrimination) reng reng hi a phal lova: khawi ram atang pawha lo kal ni mah la, eng sakhua pawh bia mah la, a inhmuhsit theih loh a ni, danin a phal lo. Midang i hmuhsit chuan racist i ni mai. Miin an hmuhsit che chuan court ah i khing thei a, pawisa tam tak i chawitir thei a ni. Hetianga dan tha hi ram dangin an neih ve loh avangin America hi vanram no-te an ti hial thrin. He mi dan avang hian tuna kan president Obama pawh hi president a ni thei a, Obama pa chu Kenya, Africa-a mi a ni a, US-ah University a rawn kai a, Obama nu, American nula nen an innei a, Obama a piang a, chuan a nu nen an inthena Kenya-ah a haw leh daih a, US citizen pawh a ni lo. A fapa chu US president a ni ta daih mai. Hetianga Kenya pa fapa mah US president a nih theih chuan keini Mizo pawh engati nge US president chu kan nih theih loh bik ang! Mizo thalaiho tan i la ang u.

America ka thlen hlim hian American life hi research ka bei a, a chhan chu US-ah kum tluana awm theihna visa ka nei a, American-ho angin chance tha ka nei a, engtinnge American ho hi an nun tih ka hre chak a ni. Khang  lai khan internet te a la that tawk loh avangin library-ah lehkha bu chhiarin research ka nei thin a,  ka research tih naah chuan American thalaiten high school an zawh hnuah College kalna pawisa an neih loh chuan, College kal man tuak turin sipai-ah an lut thin a ni tih ka hmu chhuak a. United State (US) Sipaite tan chuan College a thlawnin an kai thei a, chu bak ah “GI bill” an tih scholarship pawh an nei thei a, sipai atanga an ban hnuah hna awlsam takin an hmu thei  a, benefit dang dang a tha bawk a. Chuvangin American thalaite hi Sipaiah an tang thrin a ni. Kei pawh US ah kum tluana ka awm dawn chuan he ram education neih ngei ka duh a, college kai nan pawisa ka nei bawk si lova, US sipaiah tan ka tum ve ta a. Sipai (Air Force, Army, Navy, Marine) ah hian eng sipai nge tha ber ang tih kan han en leh a, Airforce hi a sang bera, luh pawh a harsa ber bawk. A lutte pawh an changkang ber a, pilot tih loh chuan ral an do lo tih ka hriat hnuah US Airforce-a luh ka thlang ta a ni.

US sipai-ah ka lut dawn tih ka thiante kan han hrilh chuan, threnkhatin min lawmpui laiin, thren khat in min duhpui lo va. Mizo tumah tang an awm si lo va, a hreawm dawn lutuk an ti a, chubakah ka hnathawhnaa ka boss te pawhin “Hna i nei tha sia enga ti nge sipaiah chuan luh i duh, sipaite chu hna nei lo-ho tih tawk alawm” min ti a, hna ka bang tur chu min ui der ve em em bawk a ni. Khang lai khan Bank of America-ah leh Engineering survey office-ah hna pahnih thawkin ka awm a, pawisa pawh ka siam tha ve tawkin, in lei hial pawh  ka tum ve lawk a. Kha tih lai khan pawisa leh hausakna  ringawt chu ngaihtuah ila chuan sipaiah ka tang miah lo vang. Mahse hun lo la kal tur (future) ka ngaih tuah a, sipaia ka luh chuan America ram mi nihna hi  a nghet lehzual dawn a ni tih ka hria a. Tun ah pawh hian ka kalna apiangah US Airforce-a lo tang tawhte  chuan min nel nghalin, mi hrang angin min en tawh lo va. Tin, ka boss te leh, ka hna thawhpuite pawhin sipai bang ka nih avangin min zah der a. Chuvangin sipai bang nih chu America-ah chuan a nuam ve ang reng khawp mai. Chu lovah Sipaia luh chu US sorkar  kan ti lawm a, kan tan pawh a tha bawk a, a lut ve duhte pawh kawng kan kawhhmuh thei  bawk a ni. Sipai-a lut lo tura thurawn nasa tak dawng chunga, US Airforce-a ka lo lut kha ka inchir lo hle mai.

USA hi kan pianna ram a ni lo nain, US sorkarin an ramah awm phalna leh citizenship nih theihna te min pe in – a ram mi ang chhiaha chance min pe hi a lawmawm em em a, US sorkar hnena lawmthu sawi hi kan bain, US sorkar tan thil tha tih sak ve hi a tulin ka hre bawk a. Sipaia tan hi US sorkar hnena ka lawmthu sawi ve dan pakhat chu a ni deuh ber mai. Amaherawh chu US sorkar hnena lawmthu sawi dan a dang dang a awm thei ang a, sipaia  tang lo pawhin volunteer emaw- thil dangin lawmthu a sawi theih a ni. Hna ka interview-naah  “Enga tinge US Airforce ah I luh” tih zawhna ka dawn te hian, “He ram hi ka hmangaih a – America mipui tan thil tha tih ka duh vangin, US Airforceah ka lut a ni” tia ka chhan hian interview tuten min duh sak telh telh thrin a ni. Ram dang atanga lo kal kan nih vang hian, kan interview-na azirin US fak hi a tul a, company hna ni lova sorkar hna tak tak kan dil (apply) chuan US sorkar fak tel hi a tangkai thrin a ni.

MBA hi 2010 khan ka zo va, hna har lai tak a ni nain ka graduate ve leh hna ka han hmu nghal mai chu ka professor te pawhin mak an ti a. Ka hna chu kum hnih chuang ka thawk a, ka thawh chhungin sorkar hna dang hmun sawm velah  sawmna ka dawng a, ka thawk lo zel a, tuna ka hna hi  ka thlang ta a ni.Tuna ka hna ka thawh hma hian online atangin research ka bei a, mi tam tak ka zawt bawka. Chung ka mi zawh American ho chuan he hna kan hmu chu mak an ti ve a, “eng tin nge I hmuh theih bik,kei pawhin ka dila min la lo” an ti hlawm a, kei chuan “Malsawmna a ni e” ka tihsan mai a. Ka hna hluia ka thawh puite leh ka boss ngei te pawhin  mak an ti a, “Hna I va hmu thei em em ve, enge I thuruk (secrect)” min ti hial thin a ni.  Engmah thuruk ka nei lova, kartin deuh thaw bei dawng miah lova hna ka zawn vang a ni deuh ber mai. Ka thian then khat te chu interview vawi hnih-thum an kal a, hna an duh zawng an hmuh loh chuan an bei dawng nghal a, kei chu interview sawm tel in ka kal a, duh ang ka hmuh hma loh ka zawng zel a, a tawpah chuan hna tha tak ka hmu ta a ni. Tuna ka thawhna US Treasury ah hian ka rin aiin min lo welcome tha a, thla khat ka thawh khan private office min pe a, ka hlawh min pun nghal a, kum tin a pung zel dawn bawk a ni. Ka thawhpui leh kan boss-te hi thawhpui an nuam em em a, hna thawk tura kal hi a nuamin, a hlimawm em em thin a ni. Kan Mizote hi US Treasury ah hian mi dumte, mingote ang hian thawk ve teuh ila a va’n nuam dawn e, tih hi nitin hian ka suang tuah thin a, kan thawh theih hun te pawh a la awm mah na. Hna nuam lo thawh chu a hre awmin, zing thawha hna kal  pawh tha a tho thei lo a ni. Pathian malsawmna nasa takin ka dawng  tak meuh a ni.

Thalaite ka chah duh chu, tunah hna in nei a, in hlawh pawh a tha a ni mai thei, mahse in future hi thui tak in ngaihtuah ka duh a ni. A bik takin zirna lam hi ngaih pawimawh a thain ka hria. Hun hi a kal chak em em a, eng vak ti lova hun hman ral hi a awl em em a ni. Las Vegas a ka awm lai khan, Hotel casino hi a tam em em a, Hotel vel a “house-keeping” hna thawk ho zingah Spanish an tam avangin, nuihza siam thiam (Comedian) ho chuan  “Kei chu Spanish ngaih zawng ka nei a, ‘house-keeping’ lam pang chu ka buai ve lo” tiin nuihza siam nan an hmang  thin a, kan hriat theuh angin Spanish ho chu music ring deuh nena party hi an uar a, lehkha zir lam pang hi an tui vak lo ani. Chutianga  hnam dangin nuihza siam nana min hman kan duh loh chuan, theih tawp chhuahin zirna lamah tan I la ang u tiin ka inchah duh a ni. A rah sengtu chu keimahni bawk kan ni dawn si a.

Hriat tur pawimawh pakhat chu sipaiah I tang emaw, University-ah fulltime-in I kai emaw, hna fulltime-in I thawk emaw a nih chuan, I hun leh I ngaih tuahna zawng zawng I hman dawn avangin thil dangah I bahlahngei dawn a ni. Khawvela lar em em mi fing, lehkha thiam hming thang “Albert Einstein” a chuan, a phei khawk hrui a suih thiam lo a ni. Hna thawk lo, school pawh kai lo chuan nileng zan khuain pheikhawk hrui suih dan zirna hun a ngah lutuk kan ti a ni mai thei. Amaherawh chu Albert Einstein-a anga lehkha at chilh kha chuan thil dangah hun a nei dawn lo tih kan hriat a tul. “Albert Einstein a hi mahni phei khawk hrui pawh suih thiam lo, a va han nikhua lo ve” titu kha chu ngaihtuah a nei tam vak lo tih a hriat mai a ni. Mi zawng zawng hian ni khat ah darkar 24 chauh hun kan nei si a. Nang chu I awl em mai, darkar 12 chauh nei la, kei chu ka buai sia I darkar 12 kha ka lo nei ange a tih theih si loh va. Chuvangin khawvel a lehkha thiam hming thang a nih vang ngawtin thil engkim a hre kher dawn lo a ni.

Tahana seilian- Tahana high school graduate ka ni a, Tahan school kan kai lai chuan –pawl nga (kumsawm) kan nih chauhin A,B,C kan zir tan a, Saptawng lamah kan hnu fual em em a ni. Tin, Tahana school kan kai lai kha chuan zirna hi an ngai pawimawh lo a, school zirtirna a chhe bawk nen, zirna lamah kan hnu fual em em a ni. Ka nu leh ka pa hi fak thu lovah an fel a, zirna an lo ngai sang hram a, abik takin ka nu hian taima takin zantin lehkha min zirtir thin a, kan college kaina tur pawisa an zawng a, school tha lo deuh atangin high school zo mah ila nu leh pa fel tak ka neih azarah US a University-ah kaiin graduate thei ka lo ni ta a ni. Ka nu leh ka pain kan tette atangin zirna min lo ngaihsanpui em avangin tunah a rah kan seng ta a, ka nu leh ka pa chungah ka lawm tak meuh a ni. Fate kaihruaitu atan Nu leh Pa hi an lo pawimawh tak meuh a ni.

US ka thlen tirha US AirForce-a luh ka han tum ve ringawt kha chu, Pathian tanpuina tel lo chuan ngaih tuah ngam chi pawh niin ka hre lo. Harsatna tam tak kal tlangin Pathian tanpuina azarah US Airforce chu kumli tangin “Honorable” in ka zo va, US University atangin degree pathum ka la a, ka degree te chu Bachelor of Science (BSc) – Management, Bachelor of Science( BSc) – Accounting leh Master of Business Administration (MBA) –Accounting te an ni.

Bachelor of Science– Management -a ka graduate hian IRS (Internal Revenue Serivce) ah “Tax Specialist” hna ka thawk nghal a, nitin tax return ka ti a, IRS atanga ka experience tax return hna hi ka chhawr tangkai hle a ni. America-ah I awm a, hna I thawh a- income I neih chhung chuan tax return tih a tul dawn a, Tax hi American life-ah chuan pawimawh ve tak a ni. Tax refund I duh chuan tax return I file tur a ni. Tax refund claim loh hi kumtin billion dollar vel a awm a, IRS pawhin tax return an file loh avangin thawn chhuahna tur an hre lo a ni.

Tax return experience atangin – tax refund a tam thei ang bera dawng duh deuh vek kan ni a, pawisa hi chu duh lo kan awm  lo a ni. Tunah hian US Treasury – US dollar siamna hmunah hna ka thawk leh a, America president Obama-an thu a rawn sawi pawhin,  “Dollar siamna-a lo kal  hi chu kan phur thei lutuk – a chhan chu pawisa duh lo kan awm loh vang a ni.” a ti a, a dik khawp mai, pawisa duh lo kan awm  lo a ni. Ka hna thawhna (dollar siamna) hi mipui en theih a ni a, nitin hian entu tur intlar hi an awm reng a, ruah sur leh vur tlak ni pawhin an intlar reng thin a ni. Heti khawpa dollar siamna hmun an rawn en nasat dan atang hian, pawisa hi chuan kan rilru a luah deuh theuh niin ka hria.

Tax return tih pawhin refund tam apiang kan duh deuh vek niin a lang a, refund tlemte min pe rawh titu hi ka la tawng ngai lo. Ti duh ilang chuan Mizo ho zawng zawng hi million dollar refund nei vek turin a chawh chhuah theih a, mahse sorkarin an rawn audit leh chuan a buaithlak dawn a ni.  Nikum ah Oregon nu kum tluan a singkhat vel siam khan 2million refund ngah turin a inziak a, sorkarin a man chhuak leh si a, lungin tan te hial a tul ta a ni. A then chu job expense tam deuhin an inziak a, tax refund an dawng teuha, sorkarin a rawn man loh pawhin, in lei an han tuma bank-a pawisa an han puk dawn hian – an tax return en a lo tul ta a, tax return ah – expense a tam a, income a tlem chuan  in lei  a har thrin ani. Chuvangin tax chungchanga  hriat tur pawimawh chu, tax refund hi a tam tam kan duh theuh nain, dik lo taka refund kan dawn tam poh leh sorkarin an rawn audit na chance a tam a, sorkarin a rawn man leh loh pawhin in lei tum hunah  a buaithlak leh thin ani. Chuvangin ringtu kan nih ang bawkinTax return dik taka tih hi a pawimawh hlein ka hria. Rilru a hlimin zan mut te pawh a tui thei zawk a ni.

Thalaite zirna lama tih phurna kawng khat tal a awm beiseiin Pathian zara ka hlawhtlinna awm chhunte leh ka mimal chanchinte ka ziak tel nual a, chhiartu zawng zawng hnenah ka chapo vangah min ngai lo turin ka ngen duh che u a ni. Mi pakhat talin he ka article tlawm tak hi tangkaipui nana a lo hman hlauh chuan a lawmawm hle ang. Ka article tlawmte min chhiar sak avangin ka lawm e.

Similar Posts:

Recent Posts:

21 Responses to “AMERICAN LIFE by Michael Mizo”

  1. 1
    H.Vangchhia Says:

    A hlawhtlinnaah a lawmpui awm e.

    Midang hriatthiam theih turin: US a mi tam takten “Spanish” an tih maite hi Spain ram chhuak ni lovin, Spanish tawng hmang South American emaw, Central America lam mi Hispanic/Latino te sawina a nih hmel e. ;)

    Report this comment

  2. 2
    Zoram Fapa Says:

    (Y)

    Report this comment

  3. 3
    Sony Says:

    “America hi khawvelah ram nuam ber a ni a”
    Ka va ring chiah lo em!

    Report this comment

  4. 4
    H.Vangchhia Says:

    #3 A nuam ve vei riau asin :P , mahse, “Khawvel a nuam ber ” tih chu a fuh chiahin ka ringlo keipawh. World happiest countries listah pawh a chang sang ber lo tlat :)

    Report this comment

  5. 5
    H.Vangchhia Says:

    World happiest countries 2013 lists:

    https://www.huffingtonpost.com/.....47347.html

    Report this comment

  6. 6
    Dr John Says:

    (Y) Post a BVT khawp mai

    Report this comment

  7. 7
    Sihtea Says:

    Chhiar man hla tak a ni. Kei chuan hmangaih ber te nen a, hlim tak a kan chen theih na hmun a piang hi ram nuam ber leh hmun nuam ber ah ka ngai mai.

    Report this comment

  8. 8
    Thangpasaisira Says:

    A lawmpuiawm hle mai,”Retheia piang chhuak theuh kan ni a indem thei kan awm lo Amah erawh chu retheia kan thi a nih chuan kan thiam loh ani-Albert Einstein” (Y)
    Retheih hreawm zia hi chu awwwwwwwwwwwwwwww

    Report this comment

  9. 9
    jonapalian Says:

    Chhiar hmanhla hle mai. US-a awm ve hi ka chak, mahsela highly skilled tan lo chuan a har hmel e. Refugee anga kan tumve ngawt te anih loh chuan. A fair chiahin k hre bok siloa refugee anga in ziahluh chu :-p

    Report this comment

  10. 10
    chhana Says:

    A bengvarthlakin i thil thlir dan a fing hle mai. Obama president nih theih dan i sawi ang khi ka thlahah pawh an awm theih zia ka suangtuah fo thin.
    Sipai hi khawr sorkarah pawh an lal ber niin ka hria, theihloh anga langah pawh an tlang zar zar a, mi zah pawh an kai bik thin. New Delhia ka zin tumkhat chu sipai hi min pui turin kan hruaia, kori a tu khawp mai.
    Israelramah chuan Zoram ngaiin Public Phone kan hmang nasa thin khawp mai. Kan hmel a lo Asian bawk nen zah kan kai lo thinin kan hman rei deuh phei chuan min vin leh khur khur thin. Sipai ka nih anga uniform ha chunga ka hman erawh chuan rei ngial pawh min nghak mai.

    Report this comment

  11. 11
    MissPuii Says:

    A bengvarthlakin, article changkang khawp mai. Mizo thalai ho zawng zawng in chhiar ngei ngei chi ani. Mizo thalai ho in tih phur na tan chuan a tha khawp mai. Education hi chu a pawi mawh ber tih hi in hrilh mawlh mawlh hi a pawi mawh.

    Rethei, saptawng thiam vak lova, American Airforce entrance exam han chhan tur ve, Airforce luh hnu ah pawh test tam lutuk pass tur te leh, American ho kara sipai tan chu, tum ruh ve tak chu a tul dawn ani.

    USA hi chu mi ho kal chak na ber, khawvela ram nuam chu ani. Forbes.com a ‘world happiest’ ram (Norway, Switzerland, Sweden etc.) a Mizo awm ho hian a nuam an ti lo reng reng, USA bawk ani rawn kal an chak. An ram mi mingo ho tan chuan a nuam mai thei, kei ni Mizo tan chaun hnam in thliar na a nasa lutuk. Kan pian na anih loh vek chaun, America tluk hi chu keini Mizo tan chuan a awm lo ani.

    Good Job…

    Report this comment

  12. 12
    ZoramThanga9 Says:

    He article chu a ropui hle mai, Ziaktu hi lehkha thiam, mifing, mifel tak ani tih chu hai rual ani lo ani. Zofate zingah US president kan la ni lo ang tih a sawi theih miah lo ania. A ropui in Mizo thalai ho chhiar atan a duh awm khawp mai. A hmasa berah chuan leh kha zir thiam hi chu a lo pawi mawh ber chu ani.

    Zofate zing a US Airforce a tang an awm tawh hrim hrim hi an chhuan awm khawp mai. America sipai chu a nuam viau ang, khawvel an awp deuh tho ani mai sia, khawvel ah chuan power an nei em mai.

    World happiest chungchang ah chuan, top list a tel Norway, Switzerland, Sweden tih te hi an ram mi ( mingo) nih ve lo chuan a nuam lo tih chu ka hre chhiang khawp mai, abikin kei ni Mizo tan chuan a nuam hran pa lem lo ani. USA hi chu khawvela ram nuam chu ani tho tho. ‘world happiest’ ram antih Norway, Switzerland, Sweden te hi ka kal tawh a, heng ram a kan Mizo awm ho te hi USA kal an chhak zia thu ringawt min hrilh. An ram tawng thiam a tul a, an racist bawk si, tih chi loh lutuk. America a awm kan zofa te chu mahni ram ang chhiah in zalen takin an awm thei a, kan mizo ho choh lo pawh a awm apiang ( chinese, Korean, African, indian, Russian etc…) ho hi an zalen hlawm khawp mai. Kan article ziak tu sawi angin khawvel ah chuan vanram nen a in hnaih ber chu ani in ka hria.

    US a awm hi chu highly skill a tul chuang lo. Refugee te pawh millionaire, billionaire an ni in politic ah pawh a sang thei khawp mai. President Bill Clinton a secretary of state Madeleine Korbelová Albright i hi refugee angin an sawi a, refugee nih vang hian America ang ah chuan engmah disadvantage na a awm lo reng reng.

    Report this comment

  13. 13
    MamawiiF Says:

    Forbes.com a 2013 “The World’s Happiest” ram Norway a refugee awm ka nia, A hma a lo post ho sawi ang in – keini ho tan chuan a nuam em em lo. USA awm theih na chance nei ilang chuan ka kal daih ang. Europe reng reng chu mingo (white) nih loh chuan inhmuhsit na a la nasa lutuk. Neo Nazi ho hi an buai thlak in immigrant ho tan hian a hre awm. Ameria chu “land of immigrant” ani tlat mai a, tutan pawh zalen takin a awm theih ani.

    Report this comment

  14. 14
    Puii Says:

    Michael chu a hlawhtlinnaah a lawmpui awm ngei mai…. (Y)

    amah ang hi Mizote hi USah chauh ni lo,khawvel ram hrang hrangah lo pung deuh deuh rawh se….

    Report this comment

  15. 15
    Malsawmi5 Says:

    Michaela chu a chhuan awm hle mai. Amah ang hi ni vek I lang chuan, Mizo hnam hi Koreate, Japante angin kan in chhuang ve hle ang.

    Shortcut a (eiruk emaw, sum dawngna tha loa) kum hnih thum chhung a hausak ( millionaire, billionaire ) phut aichuan dik tak a Michaela ang a hlawh tling hi an ropui zawk ani.

    Report this comment

  16. 16
    Siami9 Says:

    US hi khawvel ram nuam ber nilo ti ho hi chu Michael a sawi ang in ngaihtuahna an nei tam vak lo ani mai thei kkkk

    Report this comment

  17. 17
    Awmtea Leo Khiangte Says:

    Ngaihnawm hle mai.

    Report this comment

  18. 18
    MissPuii Says:

    Michael an a US ram nuam na chhan a hrilh fiah hnua la pawm lo ho hi chu, khawvel mifing Albert Einstein an phei khawt hrui suih thiam lo vang a sawiseltu te a teh khin dan nen an in ang duh in ka hria.

    Report this comment

  19. 19
    Siami9 Says:

    Norwayte, Swedente, German etc ho hi chu an mahni tawng hi zir atula, ahar sia- nuam tih lam ai chuan “ka lo kal palh palh” tia inchhir ho kan tam khawp mai.

    Report this comment

  20. 20
    Siami9 Says:

    Mah seng he Article hian ka bei dawng na zawng zawng a la kiang a, kan hma a lo kalte an tuar chhel zia leh an lo tum ruh zia min ti hria a, chakna thar ka dawng ani. Ka lawm lutuk.

    Report this comment

  21. 21
    Siami9 Says:

    ngaih sang u om

    Report this comment

Leave a Reply

You must be logged in to post a comment.