Post ka submit hnuhnun ber atang khan kum a liam dawn hial tawh ang em aw? Kan rawn thai kual ve leh mai mai teh ang. Mahni inhmangaih chungchang ziak daih teh ang. Bible thu nen chuan a inmil lo ngawt ang!
Nu leh Pa, mahni fate hmangaih lo chu an vang viau ang. Mahse, Mizo te hi chuan kan ti lutuk em aw ka ti. Mahni pawh inhmangaihna chang hrelo leh hun pawh neilo in, kan fate kan hmangaih leh duat lutuk hi an puitling theilo ni ber in ka hria. Khawthlang hnamfing leh upa ho khu chuan an fate kumtling an nih chuan an kutah mawhphurhna an dah ngam a, anmahni inenkawl turin an phut tlat a. Nu leh pa in mawhphurhna fate kuta an dah ngam tlat chuan naupang tan pawh mahni kuta din tumna a lian ngei ang.
Mizo te ve hi le – kan fate phaiah leh phai lo ah te lehkha zir turin kan dah a, nuamsa takin. An rawn zirchhuak a, a then phei chuan an rawn zirchhuak mumal hlei lova! Hna a vang tawh si a thalai lehkhathiam tamtak, hna neilo, hna zawng peihlo, nuamsa laklawh, nu leh pa neih chen a tal mai mai kan hung teuh tawh anih hi.
I fa kha ring ngam rawh. I rin tlat chuan a rinawm ang. I rin tlat a a kuta mawhphurhna, in chhungkaw sumdawnna emaw te pawh i dah ngam a mi pangngai fa i nei anih chuan thatakin a mawhphurhna a hlen ang. I ring tlat chung pawha a ho hle reng anih chuan i vanduai tihna.
Rim takin hna i thawk a, i fate tan i ti a. Fate tan a thil tih hi a chintawk a awm a ngai. I kum a tam luat hma hian khawvel hi nuam takin hmang zawk rawh. I thawmhnaw awh zawng lei la, i ei chak zawng lei la, i zin chakna ah zin rawh. Kohhran ah leh khawtlangah te inhmang la. Tun atanga kum 20 a liam meuh chuan eng thuam pawh inbel la i mawipui tawh lovang a, i thil ei pawh a tui tawh lo mai thei. Zin tur phei chuan chak a ngai ania.
Mizo zinga ka mi ngaihsan te zinga pakhat titi ka hrereng thin. Tihian a tia lawm ” Ram pakhat a kan zinna ah beach nuam tak ah kan kal a, nula leh tlangval, thalai an zi huai huai mai a. Hmun pakhatah hian sap nupa hi an lo thu dun a, mi chevel chu an thlir ngawih ngawih mai a. An bulah ka va kal a, an chanchin te ka va zawt a. Pawisa an khawl theih veleh khawvel fang a an zin thu te min lo hrilh a. Mahse an hmel kan en thin, an kum a tam tawh si, han zin kual chiam mahse eng thil mah an enjoy thei tak tak tawhlo a” a ti a. Chuvang chuan kan thatlai ngei hian mahni inhmangaih a, nun hi a tha zawnga kan enjoy ve te hi a tul asin.
Mi zawng zawngah he thil hi apply a remlo mai thei, i chhiar ang a nangmah ah hmehbel a rem anih chuan han ti ve chhin teh!!
Similar Posts:
- Eiruk – Nangmah vang em ni le?
- Zirtirtu Faktlak A Ni Em??
- Hmangaihna – Naupang ah
- Cheng 400 (500?) luanral thu…
- Min ngaidam ang che
March 10th, 2014 at 8:06 pm
Mizo Tawng ziah danah sawi tur a awm nual a, mahse kan subject ber a ni lo bawk a, ka sawi lo ang.
Ngun takin ka ngaihtuah a, i sawi dik khawpin a lang. Hnial duhtute erawh chuan an hnial fê duh bawk ang. Post tha tak a ni e…
Report this comment
March 10th, 2014 at 8:08 pm
Ka post hlui ka’n en leh thin a
Mizo Tawng ka lo ziah dik loh thinzia ka hmu chhuak 
Report this comment
March 10th, 2014 at 9:10 pm
@lr hlawnchhing, ka lawm e. I sawi dik ang. Mizotawng ziah dan dik hi chu ka thiamlo chiang tih ka hria. Lo en liam mai mai teh u
Ka post thu laimu erawh I sawi ang khian inhnial theihna tur tak ani tih chu ka hria. Mahse ka ngaihdan diktak ani ve tlat. Thenkhat chuan mahni hmasial min ti mai thei e.
Report this comment
March 10th, 2014 at 11:20 pm
Hetiang post te hi khel luai luai awm tak a ni asin mawle! Engatinge an reh duk le..? Ani lo lamah hian an peng zo ta vek emaw ni le..kei chu misual.com tan ka la rinawm tlat ania
Sheldon sawi hi tunlai ka thupui a nia, nu leh pa tan deuha post ni mah se ka nunah ka inhmehbel thei tho…mahni hmasial dan dik hi a awm, mahni kan intanpui phawt loh chuan midang kan tanpui thei tak tak lo.
Mahni engmah nih hmaa midang (kohhran/khawtlang/chhungkhat laina) tana inhman zawh thak hi morally chuan thil tha leh ropui tak ni angin lang mahse a tawpah chuan “Tunge ka nih? enge ka tih theih? eng dinhmunah nge ka awm?” tih bawk hi a pawimawh leh tho thin. Mahni kea din hmasak phawt a tha ber.
Report this comment
March 11th, 2014 at 1:08 am
1. Fate hi anmahnia inhai kaw thei tura rin ngam a har khawp mai. Anmahni tan a tha zawk ang tih ring reng chung pawhin an kuta mawhphurhna dah ngam a har chang a tam thei – hmangaih vang te, khawngaih vang te, an ti thei tak tak lo palh ang tih hlah vangtein.
2. Hmanni lawk khan ka u nen phone-a kan inbiakin an fapa tlangval, Group A officer tan inhmun lei an tum thu min hrilh a.”A va tul lo em aw, nangmahni duhzawng atan pawisa chu hmang zawk ula, zin ula” ka’n ti thla ngawt a. Sheldon-i ngaihdan ka tawmpui vang a lo nih lek hi ka ti ta.
Report this comment
March 11th, 2014 at 3:20 am
A dik ka ti. ‘I have to eat before I can feed’ tih hi ka thupui a ni. Bible-a Isua thusawi thenkhat nen chuan inmil lo lai chu a awm deuh nual nachungin a practical berin ka hria. Mahni inhmangaih phawt loh chuan midang hmangaih a har ang ka ring.
Report this comment
March 11th, 2014 at 9:37 am
@Charice, a dik chiah. Thu leh hla han chai laih laih tham pawh hi kan awm tawhlo anih hi. Facebook lamah an tlanbo zo tawh aniang. I sawi ang khian mahni hmasial dan dik a hmasial a tul tawh. Nu leh pa tan ang deuh a ziah chu a nia, mahse tu tan pawh a in hmehbel theih ang chu, a duh tan chuan.
Report this comment
March 11th, 2014 at 9:39 am
@hlatekhua, ka ngaihdan min lo tawmpui ve a ka lawm e.
@bbney, i sawichhuak thiam hle mai. Bible thu tam tak hi chu a practical lo ve bawk a, mihring nuna seng luh tak tak harsa a tam mai.
Report this comment
March 11th, 2014 at 2:38 pm
Ka pawm zawng tak a ni mai a..
Mahni rila rah an nih hian a dan a dang bik nge ni? (la tawng ve hek lo i..
) Mizo mipa thenkhat, lehkha zir laia nupui an han nei ngawt mai te (vanduaina vang- rin loh taka chetsual emaw chhungte induh tawn loh vang, ladt chu a tam lem lovang) hi ka tha a lo na ve thin. Nu leh Pate tana phurrit belhchhahtu an ni si. Tin, kan social life leh activities bakah kan value system hian kawng tam takin min hruai ve bawkin ka hria… (comment ril ve hmel lutuk.. hehe)
K’u Sheldon ngaihdan ka tawmpui vang hi alawm, tlangval lai kan chen hmasak phawt ni..
Report this comment
March 11th, 2014 at 3:26 pm
Tha khawp mai
Report this comment
March 11th, 2014 at 3:34 pm
he thufing tawi hi ka rilruah a riak reng thin….
“..I fa chu i rinngam hma chu a rintlak lovang..”
Kum 3 an nihin ka riah hran tir a, (an riah hran hmasak ber zan hi chuan a nu hian an khum bula thuin mittui nen a veng tlaivar thak zel..haha..)
thenawmte lainat khawpin ka chhawr hma…
An puitlingin an rintlak viau chuang hlei lova…haha..
Report this comment
March 11th, 2014 at 3:53 pm
@Mahminga, he thu hi tlangval tan pawh a ni tho alawm, in chhungkua a i dinhmun a zirin. Nang hi chu i ngaihtuahawmloh, nupui i neih hun ah min sawm dawn nia
Report this comment
March 11th, 2014 at 3:55 pm
@saint sammoo, a dik chiah tiraw? Min ring ngam tlattu hi chu mi pangngai tan chuan bum an har tlat asin. In fate in riah hrantir a a nu awmdan chu ka va hrethiam tak em!
Report this comment
March 11th, 2014 at 9:01 pm
Bible pawhin “Nangmah i inhmangaih angin i vengte i hmangaih tur a ni” a ti a, “nangmah i inhmangaih angin…” a ti, mahni inhmangaih hi a Bible thu em em a ni
Report this comment
March 11th, 2014 at 9:18 pm
I veng te i hmangaih angin nangmah pawh i inhmangaih tur a ni..
Report this comment
March 11th, 2014 at 10:51 pm
Misual hian ka lung a len thar leh tawh a kei chu…
Report this comment
March 11th, 2014 at 10:53 pm
Pu Pk Fanai comment ka hrechak asin. A rawn lang khat ta.
Report this comment
March 12th, 2014 at 1:03 am
Mahni hi chu kan inhmangaih hlur sa vek a ni lo’m ni? ka lo ti deuh mai a. Nu leh paten an fate an hmangaihnaa lakluh chuan i sawi hi a pawmawm. Chumi pawnlamah erawh, comment thenkhatin sawi mah se, ka pawm lem lo thung. Comment thenkhat ka en hian thuk takin individualism hian Mizote pawh min ei ve ta niin ka hria. Sawi zui teuh tur a aw, theology te pawh sawi kai theih a ni a. Kan tribal ethos hrim hrim nen pawh a inmil lo.
Report this comment
March 12th, 2014 at 8:08 am
Tunlai khawvel ah mahni in hmangaih tluk a tha a awm tawhlo.
Report this comment
March 12th, 2014 at 9:06 am
Pathianni tlai thalai fellowship-a kan thianpa fuihna thusawi kha tha ka ti khawp mai a. Ani hi theologian a ni bawk nen, ka pawmpui khawp mai..
Hetiang deuh hian – Hmangaihna kan sawi hian Agape (Pathianin mihring te min hmangaihna?) hi kan sawi uar viau a, Eros (mihring inkara hmangaihna). Eros pawh hi kan sawi nep thei lovang, mahni mihringpui pawh hmangaih thei lo chuan engtinnge Pathian a hmuh ngai miah loh chu a hmangaih theih teh lul ang ni. Mihringpuite hmangaihna atangin Pathian min hmangaihna a hrethiam theiin, a fapa nun hlan meuh a min tlann hlu chu kan hre chiang thei zawk ang.. tiin. Sawi ve duah a, a fiah em aw?
Report this comment
March 12th, 2014 at 9:50 am
Chawngthupa@18, I sawi khi a pawmawm khawp mai. Tu pawn individualism hi chu kan pianpui a, kan pi leh pu te kha an inthup thei deuh a. Tunlai ah erawh chuan mahni hma chu kan sial tlang ta deuh chu a ang. Kan sawi erawh hi chu chhungkua a hmangaihna, mahni in theihnghilh thak khawpa fate tana inpe, fate pawh puitling hlei theilo a siam kan tam ta in a lang.
Individualism hi chu a awm ang a, egoism erawh ka sawimawi lo thung.
Report this comment
March 12th, 2014 at 4:39 pm
Sheldon, ka hrethiam alawm (Big Bang Theory ka’n hriatchhuah thut chu! Sheldon han tih chuan). Nu leh pate hmangaihnaa lakluh chuan a pawmawm…ka ti reng a nih kha. Hei pawh hi culture a ni. Khawthlang culture nen chuan a inpersan hle awm e. Mizote chauh ni lovin kan chhehvel hnamte hlei hlei hi a nasa an ni awm e a. Vaiho te hian asin fate tana inpekna chu uar ni. Nursery an nih atangin an nuten an hruai a, an nghak a, ei rur tha tinreng nen. An fate hi an investment a ni tak meuh mai.
Mizo nu leh pate hian hei ai hian an fate hi hmangaih se ka duh, ka la ti hram teh ang. Mahse, chu hmangaihna chuan an fate chu tino lo se, rintlak, chhawrnahawm leh innghahnatlak ah chhuah thung se, ka ti a ni. Kan economy hi a tha lo em mai a, nu leh pate rinchhan lova lehkhazir hi a la harsa hrih ve bawk atin ni.
Report this comment
March 12th, 2014 at 7:23 pm
@Chawngthupa, a dik alawm. Kan fate hi kan asset hluber an nia. Investment pawh kan risk sang hlawm teh ania anmahni ah hian. Tisual fe fe chu kan awm reng ani. Enkawl hun kum a pelh hun hi kan hriat a ngai ka la ti fan
I sawi ang khian vai ho te hi aw ka ti. An fate hi zirlai an nih lai hi chuan an buaipui nasa reng ani. An zirna Institution ah te a nei phei chuan an donate hnawk zel. Kan pu pakhat pawn a fanu zirna School ah a donate teuh mai. Mahse, anni chuan puitlin hun an nei a, hnam upa ho nge nge chu ka ti rilru thin.
Report this comment
March 12th, 2014 at 8:06 pm
Ka pa hian min ring ngam khawpin ka hria, a tan a rin tlak nih ka tum deuh deuh phah. Ka fate erawh Mizoram lam a kan enkawl danah hian mahni ke a ding tur a chherna hi a lo tlem deuh em mai a, an kum phu lovin an ngaihtuahna a naupang mai a, tan lak a ngai nasa hle mai.
Report this comment
March 12th, 2014 at 11:03 pm
Hv@24, I pa in a rinngam che avangin rintlaka nun I tum reng bawk a. Heihi a pawimawh ka ti. Misual ho zingah hian rinna nghah ngamna tamtak an awm ka ring. Thenkhat phei chu zirlai ni chunga mahni inenkawl thei te pawh an awm ania. A ropui ka ti.
Report this comment
March 13th, 2014 at 9:32 am
Chhiar dawn ang.
Report this comment
March 13th, 2014 at 7:58 pm
I ngaihdan khi ka tawmpui khawp mai che. Keipawh zin hi ka hobby khawp mai. Ka’n tluang lo thei khawp em em lehnghala; thil erawh ka hriat phah ve phian. Mahse, bible a a lan angin chintawk hriat erawh a fuh ang.
Report this comment
March 13th, 2014 at 8:22 pm
Thu ziak tha tak a ni. A dik chiah, nu leh pate hian fate hi min ring ngam se tun ai hian thalaite hian hma kan sawn ngei ang.
Report this comment
March 14th, 2014 at 7:53 am
I sawi tha pap pap hle mai. Engkim ah hian chintawk neih thiam a tha. Mahni inngaihsak loh lutuk a that loh laiin, nupui-fanau nei nih intheihnghilh thaka mahni nawmna zawnga tlan erawh an awm fo. A tawk chin hriat hi a lo pawimawh khawp mai.
Report this comment
March 14th, 2014 at 9:42 am
Report this comment
March 14th, 2014 at 12:56 pm
Kei pawh hei Comment ka pek hnuhnun ber atang khan kum hnih dawn a liam ta in ka hria. I Post tha bawk a,comment pek ve ngei ka duh tih a chiang e
Report this comment
March 17th, 2014 at 12:04 am
Va tha ve aw. Rin ngam hi an har chuan ka ring. Pa aiin nu lam hian an enkawl thiam zawkin ka hre mah ta…nge kei chauh hian nupuite ka lo tluk lo. An tih theih tawk pawh hi ka tihsak leh mai thin.
Misual hi notification a lang ve thei hian in mention-na awm ve se tha ngawt ang.
Facebook lamah kan tal tlang a ni ber e lung erawh a leng veng veng.
Report this comment
March 18th, 2014 at 3:27 pm
Misual kalphung hi upgrade ve hret hret nise a tha ngawt ang Vakul sawi ang deuh khian,fb lam an tang si a notification leh a kaih hnawih a then a zar tih danglam ve hret hret ni se a tha khawp ang…..
Report this comment
March 19th, 2014 at 7:08 pm
Sheldon post ka hmu a ka rawn let leh zuaih
Mahni inhmangaih hi a tha, chutih rualin Discipline neih loh a awl 
Report this comment
March 19th, 2014 at 9:40 pm
@Aste, I van ti lawmawm tak. Misual member hlun ho kha lo let leh sup sup teh u.
Report this comment
March 26th, 2014 at 1:31 pm
A va tha ve k’u Sheldon
Hei hlei2 hi, ka duhzual; “I kum a tam luat hma hian khawvel hi nuam takin hmang zawk rawh. I thawmhnaw awh zawng lei la, i ei chak zawng lei la, i zin chakna ah zin rawh. Kohhran ah leh khawtlangah te inhmang la. Tun atanga kum 20 a liam meuh chuan eng thuam pawh inbel la i mawipui tawh lovang a, i thil ei pawh a tui tawh lo mai thei. Zin tur phei chuan chak a ngai ania.” Helai te hi ka chhinchhiah kiau ang 
Vawiin chu recent comment ah ka lang tlut2 mai.
Nilengin ka misual 
Report this comment
March 26th, 2014 at 5:35 pm
I ziak tha hle mai. Mizo te hian a nawlpuiah chuan kan fa te hi a daut in kan duat a. In duat hi hmangaihna lanchhuahna ni mahse duat dan chintawk neih hi thiam a ngai khawp mai. Tun a i thu chhawp chhuah hi sawi tham fe a tling. Fa-te kan hmangaih dan hi zir chian a va ngai em! Bible lam i kalhna awm reng reng ka hmu lo. Mihring hian amah ai a tha leh rintlak zawk mihring a chher chhuak tur a ni tih i sawi tum hi ka pawm zawng tak a ni.
Report this comment
April 3rd, 2014 at 9:00 am
A tha thin mang e….
Report this comment