mi(sual).com

National Footbal Championship for Santosh Trophy Champion Team Captain, goal 9 thuntu Zico hi tunge a nih chiah le?

MPL 2nd phase khelh leh tura Dinthar player ni tur, Southern Sammity atanga an koh let Zico-a hian MPL-ah Dinthar a lo champion-pui tawh thu leh kum 2008 daih tawh khan he team hi MFA cup-ah a lo champion-pui tawh tih sawi hmasa bawk ila. Tuna Captain a nihna tournament Santosh trophy-a mikhual lo tak, tum thum(Kum 2014 telin) zet Mizoram tana lo khel tawh leh Meghalaya tana tum khat lo khel tawh hi i han bih chiang teh ang.

Zico Zoremsanga (Zico ) hi Pu F Lalvulliana leh Pi Lalchhingpuiite fa panga zinga a upa ber dawttu niin Ni 9.10 198__ khan a lo piang a. An chhungkua hi Football ngaina chhungkua an ni a. Kum 4 mi vel  a nih atangin football, Ball Boot leh Jersey te leisakin bul an lo tanpui  tawh. In chhung leh tualzawl velah te an pafa-in an lo pet dun tlauh tlauh tawh thin a ni. Primary leh Middle School a kal lai atangin Sport-naah an School aiawhin item hrang hrangah leh Football-ah te a chhuak thin a, Zirtirtu pawhin thiam an tiin an lawm thei hle thin.

Kum 1999 khan Khuangleng High School chu Tuipuiral H/S Zonal Sports Bungzunga neih tumin Football-ah a lo  Champion-pui der tawh a . Tichuan a kum leh 2000 atangin Govt. Champhai H/S-ah a lut leh a. Govt Champhai H/S-a a kal chhung hian  Inter H/S Sport/Zonal Sports-ah te an School aiawhin a chhuak thin a, lawmman engemawzât a lakpui a. Champhai H/S-a a kal lai hi a Football Career intanna a tih theih hial awm e.

An thian hovin Champhai Football Club (CFC) an din a, CFC hi Champhai leh a chheh velah chuan an lar hle. Champhai Paho ti ti an tling thin. Cup/Trophy pawh engemawzat an la a, Zico pawh hi an Club innghahna ber (Key player) niin CFC tan hian Cup/Trophy pawh engemawzat a lakpui a ni.

Khuangleng GSA tan:
Khuangleng GSA/Khawtlang tana a khelh hmasak ber (Debut Game) chu Kum 2002 Bungzunga Tuipuiral Annual Meet kha a ni a, mahse hemi kum hian vanduaithlak takin an thleng sang ta lo hlauh. Kum 2003-a Khawbung leh Kum 2004 Dungtlanga Tuipuira Annual Sports Meet(Mizoram-a tournament tawp lova kal zinga upa ber) neihah te Top Scorer a ni ve ve a. Tin, kum 2006-a Sazep khua-a neihah Final-ah Zawlsei  1-0 a hnehin Khuangleng GSA chu a champion-pui a, hemi tum hian Goal 8 thunin Top Scorer a ni leh bawk a ni.

Tin, Khuangleng Zone Football Championship-ah Kum 2003, 2004 leh 2005 khan Khuangleng GSA chu a zawna vawithum champion hmasa ber ni turin a champion pui leh a, kum 2003 leh 2005 te hian Top Scorer a ni leh bawk. Kum 2003-a Bungzung Pavilion hawn, Tuichangral Invitation Football-ah khan Final a thlenpui a, vanduaithlak takin Champhai  an hneh lo hlauh a, mahse hemi tum pawh hian top scorer a ni leh tho bawk .

Mizoram State aiawhin :
Zico-a’ n hi kum 2006 February khan Mizoram Junior Team a khel turin an thlang ve nawlh mai a. Hemi tum hian Silachar ah MM Gupta Memorial  khelin Final-a Oil India  2-1 hnehin Mizoram tana a vawikhat khelhnaah a Champion-pui nghal a. Heta tang hian Mizoram Football Assiciation (MFA) chuan hmel hriatin Mizoram aiawha khel turin Level hrang hrang Under – 19, Under – 21 leh Mizoram XI ah te vawi engemawzat a ko ve a ni.

Kum 2011 National Games Jharkhan-a khelhah te khan Mizoram aiawhin a lo khel tawh bawk. Tin, India rama State leh State inelna  Santosh Trophy-ah pawh Mizoram aiawhin tum 3 (kum 2014 nen) a lo khel ve tawh bawk. Chumai bakah Shillong-a a awm laiin Meghalaya State aiawhin Under 21-ah leh Santosh Trophy-ah te a lo khel tawh bawk a ni.

Zico hian Invitation Tournament pawh a lo khel ve nual tawh a, Silchar Stadium thar hawnna-a Mizoram XI leh India rama Club tha Mohun Bagan(Kolkata) an inkhelh tum khan a khel a, Ramhlun Sport Complex hawnnaa East Bengal (Kolkata) leh Mizoram inkhelh tum khan a khel bawk.

India rama Tournament sang ber Foreign Team te pawh an chah thinna IFA Shield-ah pawh Brazil  club tha Botafogo FC te pawh a lo hmachhawn ve tawh bawk a. India ram mai bakah Foreign ram Nepal, Bhutan leh Bangladesh-ah te inkhelin a lo chhuak tawh bawk a ni.

Zico hian Tournament hrang hrangah Mizoram aiawhin vawi 12 vel a khel tawh a, Meghalaya State aiawhin vawi 2, Assam State aiawhin vawi 1, North East India(India hmar chhak state pasarih) aiawhin vawi 2 a lo khel tawh bawk.

Professional Football-ah:
Zico hi Tuipuiral atanga Mizoram pawna Football eizawnna atana hmang hmasa ber a ni a. Kum 2007-a Guwahati-a Mizoram aiawha a khelh tumin Assam Electricity Board (ASEB) FC Coach ten a khel an hmuh atangin Mizoram Football Association (MFA) hruaitute kal tlangin ASEB-a khel turin an rawn sawm a, hemi rual vek hian Chhatisgarh Club Shanti Bengal pawhin an rawn sawm bawk. MFA hruaitute thurawn angin ASEB hi a zawm ta zawk a, he a Club-ah hian amah chauh mizo a awm nghe nghe a ni. Session  khat a khel a, Trophy engemawzat a lakpui bakah Top Scorer leh Best Player chawimawina te a dawng nual bawk. Kum 2008-ah chuan Meghalaya khawpui Shillong Club hlun tak Arhima FC-ah a insawn a, Arhima FC-ah hian Session thum (2008- 2010)chhung a khel a. Arhima FC-a a khelh chhung hian  Shillong Super League-ah vawi hnih an champion a, I- League 2nd Division-ah Seasson hnih a kaipui bawk. Shillong-a Football ngainatu leh Mizo awm zingah Zico hi hre lo an awm lo ang tih tur khawpin a lar a. Top Scorer, Best player leh man of the match nihna engemawzat a dawng bawk.

Kum 2011 khan Arhima FC atangin Kolkota Club hlun  I League 2nd Division Club Southern Samity FC-ah a insawn leh a. Kolkota-a a khelh chhung hian India rama  League hmuhnawm  ber  leh boruak sangtak Kolkota League an khel a. Kumin 2012 Season-ah khan India ram hmun hrang hrang atangin sawmtu a nei nual a, chung zingah chuan I-League Club Mumbai FC leh Sikkim United (Baichunga Club) te pawh an tel a, mahse engemaw remchan lohna avangin a zawm ta lo va, Mizorama a Club hlui, Ist Division Club Dinthar FC-ah a lut ta zawk a ni. Dinthar FC hi MPL-ah a champion-pui leh ta nghe nghe a ni.

Hmanni mai khan Dr. TAO Memorial Football Tournament Mizoramin kan thlenah khan Champion Team Captain a ni tih pawh Mizo mipui zingah hrilh nawn ngai kan awm âwm lo e.

Sawi tur tam hle mah se kan sawi vek seng dawn si lo a, Tournamnent/League-ah vawi 20 chuang fe champion team-ah a tel tawh a, Best palayer, man of the match  leh top scorer pawh a lo ni nual tawh bawk. Kan sawi tawh te bakah tlem tarlang ila, a vai chuan kan dah seng lo ang kan tih kha.

A Champion-na thenkhat leh kum te:

-Chudai Gold Cup, Dibrugarh (ASEB) (June)/2007
-Assam League (ASEB)/( July) – Aug )/2007
-All Assam Inter District Championship (Gawahati Dist. XI )-Nov-.Dec 2007
-MFA Cup, Ist Div Club (Dinthar FC) January) Jan 2008
-Central YMA  (Ramhlun South YMA)/May 2008
-Shilong League (Arhima FC)/2008
-Meghalaya State Championship (Arhima FC)/2009
-Shillong League/2009
-Meghalaya Championship (Arhima FC)/2011
-Boidopati Tournament (Southern Samity FC)/2012
-Red Ribbon Football Tournament (Chanamari YMA)/2012

Top Scorer a nihna te

-Chudai Gold Cup, Dibrugarh-2007   ASEB (Assam State  Electricity Board) – goal 4
-Central YMA Tournament,  2008 (Ramhlun S YMA)/goal 5

Best player & man of the match anihna te:

-JN Buyan Tournament (Tinsukia)-a  ni 4.8.2007 – 7.8.2007 a khelhah ASEB tan a khel a, goal thum (3) thunin Best Player a ni.
-October 2007-a Local Tournament, Assam a khelhah Bhogaigoan Team(Assam) tana kheliin Best Player a ni.
-Nepal (Kathmandu) Gold Cup, November ni 11-15, 2011-a khelhah Southern Samity FC (Kolkata) tana khelin Quarter Final-ah man of the match-ah thlan a ni a, mobile phone a dawng nghe nghe.
-Ek Nayanar Memorial (Kozhikode) a  march 12-19, 2012-a khelhah Southern Samity FC (Kolkata) tana khelin Semifinal-ah man of the match-ah thlan a ni a, Rs 5000/- a dawng a ni.
-August 15, 2008 a Meghalaya State Independence Day lawmna Meghalaya XI Vs North East  an khelh \umin NE Team Captain a ni.
-May 2012-a Santosh Trophy Orissa a an khelh tuma Mizoramin Rajasthan  9-0 an hneh tum khan Hattrict siamin Captain a ni bawk

Mizoram Football Team/Club hrang hrang Champhai Football Club (CFC), PHE Dept. FC, Champhai, Chhinga Veng GSA, Luangmual FC, Aizawl, Dinthar FC, Aizawl, Ramhlun South YMA, Kulikawn FC, Aizawl, Chanmari YMA, Dinthar FC Aizawl-ah te a khel tawh bawk.

Similar Posts:

• Indian Football-ah Thil Thar? (Santosh Trophy-ah senior team-a mi tel phal lo)
• Independence Day Celebration Football Tournament
• Manchester Premier Cup 2008 ah Mizoram che tha zel
• Sheffield FC – Kolkata , Shillong & Guwahati ah
• Aizawl F. C in Website an nei ta

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, March 14th, 2014 at 11:23 pm and is filed under Sports & Games. You can follow any responses to this entry through the RSS 2.0 feed. You can leave a response, or trackback from your own site.