mi(sual).com

Mizo pa, sumdawnna kawnga hlawhtling tak mai Pu F.Hrangvela chanchin hi mi tamtak chuan ka hre hauh lo anga. Mahse retheihna atanga tumruhna nen, taimakna nen a kan Mizopa sumdawnna kawng a kal hlawhtling ber pawl a lo nih dan hi thup bo chi a ni hauh lo ang le.

Pu F. Hrangvela hi May ni 8, 1928 khan Luangpawn khua Phullen khaw bulah lo piangin a pa hi F.Hrangzika ni in a nu hi C. Sekungi a ni a. An unau hi an tam lo hle mai a, pathum chauh ni in amah Pu F.Hrangvela hi a upa ber a ni a. Chhang pahnih F.Hrangkhuma leh F.Laltawnga te neiin an mi lai F.Hrangkhuma hian kum 1947 khan Thingsul-a an awm laiin Aizawl Civil Hospital-ah a boral san a, tichuan a nau F.Laltawnga nen chauh hian an dam ta a. A nau Pu F.Laltawnga hi tunah Thakthing vengah a khawsa mek a ni. Luangpawn khua atang hian Aizawlah a Pu Kima hnenah an khawsa ve a, mahse khawsak te a lo hrasat ve deuh avangin Thingsul lamah an pem chho leh a. A pa hi a boral hma tak avangin Thingsul-ah hian a nu ho hian an khawsa ve ta a ni.

Khatih hun lai khan Thingsul-ah hian Middle School te a awm loh avangin Pu F.Hrangvela hian Aizawl lamah Boys ME School ah pawl ruk a zir zawm ve leh a. A nau F.Hrangkhuma boral lai hian Boys ME School ah a luh lai a ni a, Boys School-a a luh hnu hian Mizo High School an tih mai thin Govt High School-ah khan pawl sarih thleng chu a kal ve nghe nghe a mahse chhungkaw harsatna avangin pawl sarih chu a zir tluantling ta lo a ni. Lehkha a zir ve lai hian an khawsak a harsa ve thei hle mai a, school fee tur pawh a nei ngai lova. A school fee tur tuak nan hian lung phurh te, hockey ball tur tuk te leh mi ekin khur tur lai te in a in hlawhfa chawp thin a ni.

Hetia pawl sarih thleng a zir ve hnu hian Misson Sap ho hnenah khan zirtirtu hna a dil ve ta a. Zirtirtu hna a thawh hmasakna ber chu Thingsul Tlangnuamah a ni a. LP School-ah thawkin hetah hian cheng 12 leh buh phur 12 ( Buh phur khat hi tin 3 a ni) thlakahtah a hlawh ve thin a. Heta a thawh lai hian Selchhingpuii, Hmawngkawn khaw nula nen Pastor Chhawna kutah kum 1948 khan an innei ve ta a. Ani nen hian fa paruk:
1. F. Lalmalsawma 1950-1967
2.F.Lalzarliana 1952-2002
3. F.Lalthakimi 1954
4.F.Lalthazuali 1957
5.F.Laldika 1959-1993
6.F.Lalthazovi 1962 te an nei a.

A nupui Pi Selchhingpuii hi nu taima leh zaidam zet mai a ni a, lehkha zirin ni khat chiah sikul a kal ve a, mahse mahni inzir chawp in ziak leh chhiar a inzir thiam ve a, mi rilru chak leh hriatrengna tha tak mai a ni in thil chhinchhiah thei tak mai leh hmangchang hre tak mai a nih bakah pasalte zah thiam tak, chhungkaw huikhawmtu thatak a ni bawk.

A nupui nena an inneih hnu deuh hian Baktawng lamah Salvation Army ho Middle School hawn tharah thawk tura sawm a ni in a phei leh ta a. Hetah hian hun engemawti chhung Middle School-ah hian a thawk chho ve a mahse amah hian matric te a lo pass lem si loh avangin Primary School lamah a chhukthla leh ta a. Hetia Primary School-a a thawh lai hian amah hian tan a la nasa bawk a, an sikul hian Mizoram pumah pakhatna atanga pasarihna an hauh fai vek a. Khatih hun lai a sikul lam thuneitute phei chuan an ringhlel hial nghe nghe a. Amah hian tan a la nasa a, a zirlai te zawng zawng kha sikul lam a an zir bakah in lamah a zirtir a, an zirlai bu chhung ami kha a by-heart tir vek tawp mai thin a, amahah pawh in an zirlai zawng zawng kha a hre bel in a hrechhuak vek mai thin. Kum 1957-58 khan Basic Education Training te pawh Chaltlangah hian a zo ve nghe nghe a ni.

Hetia sikula a thawh lai hian khaw hrang hrangah an sawn kual ve thin a. Baktawng atang chuan Sateek ah te Phulmawi-ah te, Phulpui lamah te leh khaw dang dangah an sawn kual a. Pu F.Hrangvela makna deuh mai chu hetia an sawn kual ve thin lai pawh hian sumdawng rilru a lo pu tawh teh chek a ni ang chu naupang zirlaibu leh lehkhabu vel te hi sumdawn nan a ak pah zel a, duli lek lek hlep khan a hralh a, henga a pawisa hmuhte hi a khawl zel thin tlat mai a ni.

Taimakna leh tumruhna hi mihringte min ti hlawhtlingtu an ni ve hrim hrim mai a, ani pawh hian he thil pahnih hi a thlachham lo tlat mai. An chhungkua hrim hrim hi mi taima leh tumruh chhung tak mai an ni tih a lanna chu an chhungkua hi chuktuah huan siam nachang hre hmasa kha an ni ve tlat mai a. Baktawnga zirtirtu hna thawka an awm lai hian an in bulah hian chuktuah huan siamin Aizawl lam atangin thlaichi te an la chhuak a. Khatih hunlai kha chuan bawng te kha khawlai velah te an tlat tir mai mai thin a. Khatianga bawng khawlai a tla te ek kha zing karah lakhawmin an in bul huanah chuan terrace te siamin an dahkhawm a, a lo ro dawnah an chek sawm leh vek a, chung chu leitha atan hmangin thlai tha tak tak kha an thar chhuak reng thei a. Zikhlum te parbawr te, knolkhol te leh bawrhsaiabe te tha tak tak mai an thar chhuak a, mullah kan tih ang te phei hi tang phel dawn dawn a sei tha hi an lo thar chhuak thei tlat tawh a ni. Heng an thlai thar te hi Aizawl lamah te phur thlain a hralh a, heng a hralhna man te pawh hi a khawl tha zel thin.

An unau hian hna pawh an thawk rim hle mai a. Kum 1948 khan an unau hian a nu hi lo zau tha deuh mai an vah sak a, chutah chuan buh phur za chuang lai mai chu an thar ta a. Heta an buh tharte hi tin khat cheng hnih zel a hralh in cheng 600 lai mai an lei chhuak ve thei ta a. Hetih hunlai hi chuan cheng 600 chu hlu tak mai hi a ni a. Tichuan bawng te lei in buhfai te an lei khawm a, chung chu an bawng te chu phurh tir in an hralh chhawng leh a, hetianga an pawisa hlep tlemte te lo tling khawm hi an khawl khawm zel a, chutatang chuan zawi zawi in sumdawnna an lo tan chho ta a.

Amah Pu F.Hrangvela hi sumdawng mi tak a nih bakah a nupui hian a puibawm tha em em bawk a. Baktawng vel a zirtirtua a han awm lai te hian dawr te an kai ve thin a. Amah hian chhun lamah a hnaa akal hlanin a nupui hian an dawr te chu a lo enkawl ve a. Nawalh te leh thil dang dang nitin mamawh an zawrh ang chi te chu a lo hralh ve thin a. Lehkha thiam ni lemlo mahse dawr ba te leh an thil hralh ang zat hi chu chipchiar takin a nupui hian a lo chhinchhiah tlap thlap ve thei tlat mai thin a ni.

An unau hian mi buh thar te lei khawl in Aizawl lamahte bawng phurh tirin an rawn zuar thin a. Bawng engemawzat buhfai an rawn phurh tir a, chungchu Aizawlah rawn hralh in heng Hlimen tlangdung khua leh Meltum Saikhamkawn tih vel leh Kulikawn leh Thakthing velah te hian an rawn hralh a. Tichuan thingtlang lam a thil awm lo nawalh leh thildang inchhungkhur mamawh ang chi kha an phur let chho a, chungchu hlep nei in an zuar veleh chhawng thin a. Chutiang ang chuan karkhat chhung hian vawi hnih te Aizawl an rawn kal hman thin a ni. Khaw kar kawng te ala thatloh avang leh bawng phei chu an lo kal chak theih vak loh avangin kawnglakah hian zankhat te an riah a ngai thin a. Zan an riahnaah a tuk a an chawfun tur rawng an bawl lawk vek a, tichuan zingah hma takah chhuak in an an thleng hman hram thin a. An khua an thlen velah an bawng kaih te hi an lo chauh ve tawh thin avangin duat takin chi tui al an duh tawka an dawt tur in lama lo awm te’n an siamsak ve thung a. Chutiang chi tui al duh tawka an dawt hnu chuan ram lamah chaw zawnga tla puar tur in an thlah leh thin a ni.

Hetianga hun engemawchen an unaua an han sumdawn dun lauh lauh hnu hian chhungkaw thil eng engemaw avangin an awmna pawh an han sawn kual ve dawrh dawrh a. A nu Pi Sekungi hian thingtlang lam a awm chu chiseh mamawh Aizawl lam atanga lak reng a ngai a, tin, thingtlangah chuan pawisa a vang a, Aizawl lamah pawisa a tam zawk a, eizawnna tur pawh remchang a tam zawk e ti in Aizawl lamah kum 1964 khan a pem thlak pui ta a. Thakthing venga Mizoram driver hmasa ber Pu Rochhinga in an luah a, tichuan a hmalama a pawisa lo khawl ve atang chuan Dawrpui pheia tuna Mosolman biak in chhakah sawn Pu Lalbela dawr chu Rs 12,850 in a lei ve ta a. Silchar lamah te kal in puanthan leh pheikhawk te lachhuakin puanthan leh pheikhawk dawr chu a siam ve ta a. Amah hi sawi tawh ang khan sumdawng mi tak mai a ni a, a dawr a thil hralh chhuah leh bungraw awm te hi a chhinchhiah kim thlap thin a. Tin, khatih hun lai khan tun angin TV tih vel ala awm lova mahse advertisement lamah pawh khan a lo sang fu a ni tih a hriatna chu a puanthan hralh theih loh deuh te kha kawrah thui tirin khatih hun lai a nula hmeltha deuh te kha an hak tir a, khang hun lai kha chuan Aizawl velah pawh tun ang hian mihring an la tam tehchiam lo bawk a, khatianga nula hmeltha deuh in inchei nana an rawn hak chhuah kha chu an intihhmuh nghal sup sup zel mai kha a ni a, a tunlai tawng takin a ‘hit’ hle nghal zel a. Chutianga a tih chuan a hralh zo ve leh thuai thin a ni.

Hetiang hian sumdawnna chu a bei chho ta zel a, hetih hun lai hian contract hna te a thawk chho pah bawka, amah pawh hi Class-1 contractor thleng ni chho in Class-1 contractor hmasa berte zing ami a ni ve phak hial a ni. Amah hi mi biangbiak thiam chi tak mai a lo ni bawk nen a hlawhtling chho ta viau mai a. Chutah tunhma a Bedford truck an tih ang chi a body tawi kha a lei ve a, mautam tam lai te a ni a, Lunglei lamah te buhfai a phurh tir ve thin a. Heihi a insiam len tak tak tanna bul tak pawh a lo ni chho ta ni in an sawi. Tam kha a tla nasa a buhfai phurh a lo ngai nasa a, motor hmang a hna thawh tur kha a lo tam chho ta em em mai a. Khatih hunlai a Aizawl leh Lunglei inkar kawng te chu zim tak mai, metal loh, motor leng chiah chiah kha a ni a, mahse hetia buhfai an thiar chhung hian a tluang bawk a vawikhatmah an chesual hauh lo bawk. Heng a sumdawnna atanga a pawisa hmuh te hi uluk takin a khawl zel a tichuan a sumdawnna pawh a ti lian chho zel a Hardware dawr changtlung tak mai Khatla-ah hian a din ta a. Chumi hnuah F.Hrangvela Industry hi a rawn din chho leh ta a ni.

Politics lamah hian Mizo Union hunlai khan kan ram hruaitu hmasa pu Lalbuaia Ex.MP te, Pu Vanlalhruaia Ex MLA te kaihruaina hnuaiah politics lamah te zuanglut in kum 1969 khan Aizawl Town pumpui a Block President atan thlan a ni a, tin, Mizo Union-ah khan High Committee Councellor te pawh a ni ve thin a ni. Kum 1970 khan Khatla-ah hian a pem a, tunna khatla kawng chunga an awmnaah hian an khawsa ta a ‘Upper Khatla’ tih pawh hi ama phuah a ni nghe nghe a ni. Amah hi ram leh hnam hmasawnna lam ngaihtuah chi tak mai anih avangin kum 1972 a kan ram UT a lo nih a MLA thlan kan neih hmasa ber tum khan Khawbung bialah a han ding ve a. Hemi tum hian MLA atan hneh taka thlan tlin a ni nghe nghe a. MLA a nih chhung hian Khatla, Bungkawn leh Maubawk in Village Council hrang neih an dil chutih hlawhtlin a ni a, amah hi Khatla VCP hmasa ber a ni ta nghe nghe a, term thum zet President hna hi a chelh chho ta nghe nghe a, a hun chhung hian Khatla veng chhunga JL High School leh TBL Middle School te hi tih puitlin an ni bawk.

MLA a nih tawh loh hnu pawh hian ram hmasawnna lam hi a vei hle thin a, ram tana tha tur ni a a hriat chu chanchinbu lamahte a ziak ve thin a, lehkhabu te pawh siamin corruption do nan leh mipui inzirtirna lam atan ‘Mizoram Natna Hi Tihdam A Ni Dawn Em?’ tih leh ‘Zoram Chu Hmangaihtu Ta A Ni,’ tih bu pahnih te hi a lo ziak ve tawh nghe nghe bawk. Hmalakna hrang hrang a neihte zingah kum 1995 August ni 24 khan Mizoram tan a industries lama sul sutu pawimawh tak mai, Central Sawrkar leh Mizoram Industries Department ten a an pawl hmelhriat ber pakhat leh an rawn ber Mizoram Chamber of Industries chu Pu K.Lalauva (Maranatha) nen hian an lo din chho a. He pawlah hian Vice-President leh Treasurer hnate chelh chhovin a thih ni thlengin Adviser a ni nghe nghe bawk.

Khatla kohhranah hian a theih ang tawkin a inhmang ve thin a. Puitling Sunday School zirtirtu te ni in Nilai-Zan thupui sawitu te a ni bawk a. sum leh pai a a malsawmna dawn te hi a theih ang tawkin mite tanpuinan te a pe ve thin a. Missionary chawm te, Biak In chung tur rangva leh tile te kohhran hrang hrangah te a pe thin in Missionary te tan Ramthar Chanchinbu te a laksak thin a thilpek a rawngbawl hi a ngai pawimah hle thin a. Mak deuh mai chu a fa te Rs100 pek ai chuan khawi Biak In emaw sak nan a Rs 10,000 han pek chhuah mai te hi a awlsam daih zawk a ni.

A fapa upa ber F.Lalmalsawma hi St.Paul’s High School a Class X a zir laiin kum 1967 khan a boral a. Amah hriatreng nan hian Aizawl Theological College-ah Lalmalsawma Memorial Award a siam a. He award hi a tirah chuan B.Th hnena hlan thin a ni a, tunah hi chuan B.D. zirlai titha ber hnenah hlan thin a ni tawh thung. A fapa pathumna F.Laldika hi kum 1993 khan a lo boral ve tawh bawk a, tin, a fapa F.Lalzarlian hi kum 2002 khan a lo boral tawh bawk. A fanute hian pasal an nei vek tawh a amah hian a boral ni thleng khan tu 18 nei in khup hnih a hmu hman a, tunah hian a tuchuan te hi 14 zet an awm mek bawk.

Kum 1997 atang khan zunthlum leh thisen sang natna a nei chho tan a, a ke veilama pheikhawngah pan dam theilo a nei bawk a. Kum 1999 khan Greenwood Hospital-a thla khat zet enkawl anih hnuah a that hleihtheiloh avangin Chenai lamah an kalpui leh a. Hetah hian an lo zai na a mahse a dam hleithei chuang lova. In lama an rawn haw pui leh hnu pawh hian pawn chhuak hleithei lovin rei tak a awm leh a. Tichuan kum 2000 July ni 8 khan Aizawl Civil Hospital lamah admit leh in July ni 15 khan doctor ten an lo zai leh a. A chhung leh khat te pawh in thatlohna dang engmah a neilo emaw an tih lai leh amah pawh a hrah that viau laiin a hma lam a lung lam thatlohna a lo neih chu a rawn chhuak leh ta thut mai a. Zuly ni 25 zan dar 7:00 khan nikhaw hrelovin a awm thut a, doctor leh nurse ten theihtawp chhuah in Oxygen te nen an enkawl a mahse awmzia a awm thei ta chuang lova. Tichuan hemi zan dar 8:00 ah hian a hring nun zinkawng chu a lo zawh tawp ve ta a ni. A nupui Pi Selchhingpuii ve thung hi chuan a pasal thih hnu hian kum sawm chuang zet a tu leh fa te a uap hnuah October ni 6, 2012 zing lam dar 4;10 khan chatuan ram a lo pan ve ta a ni.

Amah Pu F.Hrangvela hi kan sawi tak ang khan pa taima tak mai hi a ni a. Hna thawh hreh pawh a nei lo, mahni tihlam tawh chu nasa tak mai a hlawhtlin pui khawp a ti vak mai chi a ni a. Thawh tur awm ang ang hi chu thawk bawrh bawrh mai mi a ni a. Chutiang bawk chuan a fa te pawh hi a enkawl a, mi phei chuan “Hrangvela em em hi chu i fate hi i chhawr nasa lutuk i khawngaih lo em ni?” an ti hial thin a mahse “Ei leh awm awl ringawt tura siam kan ni lova, hna thawk tura siam kan ni a hna chu kan thawk mai tur a ni,” a ti tlat thin a. Hei tak mai hi a hlawhtlinna thuruk pakhat chu a ni ta reng a ni. Mizoram a sumdawng hlawhtling ber te zing ami rawn ni chho in a tu leh fa te pawh in harsa tak leh reithei tak chunga taimakna leh tumruhna hmanga sumdawnna bul a lo tan tawh sa chu tunlai khawvel thang zel mil in an rawn chhunzawm chho ta zel a. Tunah hian a tu leh fa te hian sumdawnna kawng hrang hrang an bei chho ve mek bawk a ni.

*Source: A unaupa Pu F.Laltawnga leh a chhung leh khat te, a chanchin hre tur awm ang ang hnen atanga ka lawr khawm a ni e. Pu F. Hrangvela chanchin hi a chhung leh khat ten ziak tura min ngen avangin ka ziah sak a, Mizopa hlawhtling tak leh entawn tlak tak a nih avangin a chanchin hi post chuah ka dil a, an phalna ngei in ka rawn post chhuak a ni e.

Similar Posts:

• Autobiography chhiar chakawm!
• St. Paul’s School naupangte hi
• MBSE HSLC 2013 Result
• Mastermind 2009-a College Tel Turte
• Zirna nge zai pawimawh zawk?

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, June 11th, 2014 at 11:04 pm and is filed under Lifestyle, Mizoram, More than words. You can follow any responses to this entry through the RSS 2.0 feed. You can leave a response, or trackback from your own site.