Thawnthu

March 23rd, 2015 1:34 am by Chhuaklinga

Tum khat chu California State-a khaw pakhatah hian Kumthar lawmna danglam leh ropui tak mai hi an buatsaih a. Zai thiam, lam thiam, lemchan thiam leh talent ropui tak tak nei tam tak mai hun hmang tura ruahman a ni a. An show neih tur te zinga mipui hip tu ber erawh chu zanlai dar 12:00 chiah a Ni (sun) an ti chhuak tur chu a ni. He hun an hmanna khua atang hian Ni tak tak lo chhuak ang chiahin a lang dawn a, a en dan leh a engin thil a chhun te pawh a rawng put dan chu a tak ang thei ber tura ruahman a ni.

He tiang taka ruahman a nih avang hian California State pawn atang pawhin he hun chhim tur hian mipui an lo pung khawm nasa hle mai a. Chung zingah chuan Arizona State a Rider turu tak mai Steve Jeffrey-a ho “Rangers” ti a an hriat lar em em ho pawh an lo lang ve hlawl mai. An ni ho hi an hun hman tum dan pawh a danglam hle reng a, hotel leh riahbuk ilo vel pawh an book hran lem lova, chu zan chu an thawmhnaw inbel lai lum lem lo tak te nena hman tlingtlak chu an tum dan a ni.

Zan dar 9:30 vel a nih chuan chu kumhlui thlahna leh kumthar hmuahna programme chu tan a ni ta a. A thlengtute an inbuatsaih tha bawk a, a ropui miah miah kher mai. A hun a vanglai a ni chho tih chuan beisei lawk hauh lovin vur a sur ta tlat mai le! Programme chu khawlai, awze tawngin open air a hman a nih avangin mipui boruak chu a ti dai deuh hlek na a, chuti teh chiam chuan a khaihlak phah lo. Amaherawhchu, Steve-a leh a pawlte, thawmhnaw tlabal tak taka inbel te tan chuan chu sik leh sa lo danglam ta lutuk chu tawrhhlelhawm tak a ni. An zu chak tha chi deuh te nena an han tan ngial pawhin an in inlum zo mang tlat lo a ni.

An programme chua kal ngaiin a kal mup mup zel tho va. Zanlai dar 12:00 a lo ri ta an nghahhleh ber leh mi tam zawk te lo kal chhan Ni chu kawlkil atang chuan a rawn chhuak ta a. A ropui danglam hle mai, chutia vur sur te pawh chuan a timawi ta zawk mah a, mipui te chu an hlimin an lawm hle mai a. Chutiang thil chu khawvela kumthar lawmna’n a an tih vawikhatna a ni tlat a, a ropui bawk a mipui sahawk leh hlim au thawm chuan chu khawpui chu a khat a ni ber mai. Zanlaia khawvel thiamna hmanga Ni han chhuah tir ut mai chuh, a hmu ve theia awm nih chu a hlu hle reng a ni.

Chu tiang a hun an hman mup mup lai chuan khawvar pawh a lo hnai ta a. Steve-a leh a hote tan erawh khaw vawt vin tuk mai avang chuan chu Ni lem chhuak chu a ropui tur angin a ropui lova, an tan a hlut tur angin a hlu ve lo a ni. Khua a lo vara Ni a lo chhuak ta, ni a lo tlang sang zel a khawvawt lutuk pawh a ziaawm ta hle mai, Ni lem lawmtuten lawm nachang reng an hre lo va. Amaherawhchu, Steve-a leh a naute tan chuan a hma zana Ni lem chhuak mipui tam takin an hlut em em, lumna reng nei lo ai kha chuan chu Ni tak tak, lumna leh enna ropui tak nei lo chhuak chu a va hlu dawn teh reng em!!

“Thil lem mai mai hi mipui tam zawk hian an buaipui a, an lawm a, an bawr luih luih thin. Thil tak tak erawh chu a mamawhtu dik tak ten an hria a, an tan a hlu a ni.”

Ka lawm e.

tren tren