Archive for the ‘Advice’ Category

Vanram I han thleng ve hlauh te anih ngai chuan:- (Sunday Pual)

Sunday, February 24th, 2013

Leilung dana I hringnun a lo tawp hunah, Vanram te I han thleng ve hlauh anih chuan:-

1. Pathian chuan, eng Car nge I khalh thin a lo ngaihven viau ring duh suh; motor chuanna tur neilo leh an chhungte damlo damdawiina hmanhmawh taka phurh ngai phurhna pawh nei lote, mi engzat nge I lo tanpui a, I lo phurh tawh lam a ngaihven zawk ang.
2. Pathian chuan, I in mawi leh ropui leh ropui loh lam ai chuan, I inah chuan eitur neilo mi engzatnge I neih eia lo chuangkai a, mikhual thlenna tur hrelo mi engzatnge lawm taka ilo mikhual tawh tih lam a ngaihven zawk ang.
3. Pathian chuan I Wardrobe-ah thawmhnaw engzatnge I neih tih lam ai chuan, silh leh fen tur neilo mi engzat meuh nge I lo thuam ve tawh tih lam a ngaihven zawk ang.
4. Pathian chuan I hnathawh san leh san loh lam ai chuan, I hna chu I theih tawk takmeuh leh rinawm takin I thawk em? Tih lam a lo ngaihven zawk ngei ang.
5. Pathian chuan, thian engzat nge I neih tih lam ai chuan, mi engzat tan nge thian tha leh rinawm I nih tih lam a lo ngaihven zawk ang.
6. Pathian chuan I thenawm khawvengte nihna leh ropuina lam ai chuan, I thenawm khawvengte tana malsawmna I nih leh nih loh lam a lo ngaihven zawk ang.
7. Pathian chuan, I vun rawng lam ai chuan, I nungchang rawng mawi leh mawi loh lam a ngaihven zawk ang.
8. Pathian chuan I hausak leh hausak loh lam ai chuan, Damlo natna khirh tak vei, damdawi leina tur leh Damdawiin panna tur neilote tana, I robawm hawnga ilo pekchhuah ve tawh zat lam a ngaihven zawk ang.
9. Pathian chuan I thu thiam leh thiam loh lam ai chuan, kawngbo leh kal ngaihna hrelo te, I thu leh hla hmangin kawng dik kawhhmuh a, hruai chhuah ilo tum tawh thin em? Tih lam a ngaihven zawk ang.
10. Pathian chuan, chhandamna a thawh zawh tawh sa diam I ngaihven leh I pawm har lutuk avangin, a lo hrawkin alo vin khur khur hauh lovang che; I tana chenna hmun tur alo buatsaih peih diam tawh chu hlim tak leh lawm takin a lo kawhhmuh zawk ang che.

Midangte nuihtir theih ringawt hi a tawk lo; an lungngaihna mittui chu hruk hul sak a, chu dinhmun atanga nuih leh tir theih hi Malsawmna ani ngai e.

Posted in Advice, Lifestyle, Religion | 16 Comments »

Ka irawm chhuak thu nawite

Tuesday, February 19th, 2013

#Hringnunah hian i lo hlawhtling a nih chuan, nangmah anga hlawhtling ve turin i fate zirtir ang che. I hmu lai ngeiin i hlawhtlinna par tlanin an tlu che dah ang nge.

#I fate an lo hlawhtling a nih chuan lawm la, chapo erawh chapo suh; a hlawhtlina a vangin i rila rah ngei khan a hmusit thei che a nia.

#Neih tam tum la, i fate erawh tam tak pe suh, neih chuangliam hian kawng dik lo min zawh tir thin si a…!

#Khawvel siamtha tur chuan ram siamthat hmasak a ngai, ram siamtha tur chuan khawtlang siamthat hmasak a ngai, khawtlang siamtha tur chuan chhungkhua siamthat hmasak a ngai, chhungkaw siamtha tur chuan MAHNI insiamthat hmasak a ngai tih hi thudik awm reng zawm har tak chu a ni.

#Ring tak leh thiam taka i tawngtaina chu theinghilh a ni ang a; i nundan erawh chu an hre reng thung ang.

(more…)

Posted in Advice | 23 Comments »

Rilru Beidawnna

Monday, February 18th, 2013

Trans. by Joel Lairemsanga
Source: JourneyAnswers.com
Dt.8.2.12; 4:15 pm

He lei hringnunah hian ngui em em châng leh hlim taka awm châng i neih tawh thin ka ring.

Elija chu Pathian zawlnei ropui tak, tisa leh thlarau pawha beidawnna leh nguaina ( depression) lo tâwk ve tawh hi a ni a. Beidawnna satliah mai pawh ni lo, sawifiah hleih theih loh khawpa nasa lo tuar tawhtu zawk a ni. Elija chanchin hi ka hrilh hnuah che i beidawnna lak atanga nun thara i nun chhuah ngei ka beisei tlat a ni.

Zawlnei Elija hian a hunlai zawlnei der zawng zawng te chu chovin, tu pathian nge dik zawk tih hre tura intihsiakna ropui a buatsaih a. Israel-ho zawng zawng leh Baala zawlnei mi 450 leh, Aseri zawlnei, Jezebeli dawhkana chawhlui kil ve thin mi 400 te chu an lo kal khawm ta mup mup mai a. Engti’ang pawha nasa leh ringin, zing atanga chhûn thlengin an pathian koh eih tumin mahni taksa hial zai mahsela Baala zawlnei te chuan an ko eih zo chuang lo. Zawlnei Elija erawh chuan minung Pathian a’n koh ve meuh chuan LALPA mei chu a lo tla a, halral thilhlan te, thing te, lung te, vaivut te chu a kângral ta vek mai a ni! Tunah zet chuan mipuite chuan Elija biak Pathian ropuizia chu mit ngeiin an lo hmu ta. Israel lal Ahaba erawh a lungawi lo tak zet a, Elija chu that ngei turin chhia a chham hnan ta.

Khati khawpa huaisen leh rorum si kha thah hlauvin Elija chu a tlanchhe ta duai duai mai le! Baala zawlnei te nena an inelna avangin rilru lamah a lo châu ta a; a tlanchhiatna lamah a taksa pawh a silin a chau ve ta bawk. Chaw leh tui ei leh in tur a neih loh avangin tunah chuan a lo chauvin a ngaihtuahna pawh a buai ve ta tak zet zet a. Hetihlai tak hian thih hlauhna leh Israel mipuiten Pathian an zui duh loh avanga beidawnna chuan thangâwk angin a rawn bâwm buai nghal zat mai. Mahni mission-a fail, mi tangkai lo, nun ruak leh khawhar, mal ngawih ngawih leh damchhan pawh nei tawh lova hriatna chuan a rilruah hmun a chang zo ta. Beidawnna leh nguaina-in a rilru zawng zawng a hneh zawh tâk avangin hei bâka lungngaihna hi awm theiin a ring tawh lova, thihna hmachhawn tawp mai chu a inhnemna awmchhun a lo ni ta. A va beidawng tehlul em!
(more…)

Posted in Advice, Luangliam, More than words, Religion | 10 Comments »

Valentine’s Day Vangin i buai a mi?

Thursday, February 14th, 2013

Vawiin Valentine’s Day a lo nileh ta reng mai, hemi alo thlen hian thalai tamtak chu ka za huai huai thin tih pawh kan hai awm lo e. Mahse ngun takin I han ngaihtuah chiang the ang u hmiang. Tun tumah hian Valentine’s Day ropui na lam pang ka rawn sawi dawn hauh lo a, ka ngaihnep vang pawh a ni chuang lo. Mahse ka rilru a a rawn lan ve dan ka rawn sawi ve mai dawn zawk a ni.

!4th February vang a thil thleng zawng zawng hi ava tam em…mi tamtak chuan an nunna hial an chan phah a, hmangaihna lem leh in bumna vangin. Mi tamtak chuan tullo ah sum harsa taka an thawhchhuah kha an khawh ral mai mai bawk a. Mipa ten an bialnu te tan inhualna hmangaihna tak tak ni silo neih tumin an hman hlel a, hmeichhia te pawh bang chuanglo. Chuan hmeichhia ten hun rei tak an thianghlimna an lo vawn tawh chu hmangaihna lem leh he Ni nidang nena danglamna awmlo vang hian an lo hloh nual bawk a. Mi tamtak te chu an thinlung kehchhia vangin an mahni nunna hial an la a. Buaina tamtak an in siam belh a ni. Heng zawng zawng hi he Ni nidang nen a in ang reng vang mai hian a ni. Ngaihtuahna han hmang zau deuh ila chuan harsatna kan tawh tamtak hi kan pumpelh ngei ang.

Kan hmangaih tak tak te chungah kan hmangaihna kan lantir tur a ni lawmni iti a ni mai thei, aw ni e, matheilovin kan lantir tur ani alawm, mahse nikhat atan chuah nilo, kumkhua atan a ni zawk dawn lo em ni? Hemi Ni chuah hian kan lantir a nih chuan hmangaihna tak tak nilo, hmangaihna suak a ni zawk tihna a ni. Hmangaih tak tak te chungah chuan nitin hi Vanlentine’s Day a ni vek dawn lawm ni? He Ni nidang nen a danglamna awm chuanglo vang a ilo buai ve vak a, tulloah I in tih buai vak kha awmzia ava awmlo tak em. I hmangaih nen a in in hmangaihna lantir nan khan ni special bik enge a ngaih chuan na?

(more…)

Posted in Advice, Opinion | 10 Comments »

Na chi hrang hrang te

Wednesday, February 6th, 2013

1. Na tur ut ut hi Lu naah te leh kut hmawr septic-ah te a awm duh a, hei hi thisen dawt lo vung avang a ni duh hle.

2. Na vung vung emaw Na ngut ngut hi Sciatica te leh kawng Na-ah a awm duh a, hengte hi hriatna thazam neka a awm vang a ni thin.

3. Pum Na herh tawng tawng hi ril inherh vang a ni a, tha inpawtah pawh a awm bawk.

4. Kal na leh mit na hi an awmna zawnah na vung vung angin a lang thei a, tin, na zawk zawk angin a lang thei bawk.

5. Lung thalo chu awm veilam a na zawk zawk emaw, nghawngah leh ban leh lam leh lam na angin a lang thei bawk.

6. Pumpui ulcer Na chu thin zawnah na vung vung angin a lang chhuak thin a, tin, hnungzang dar inkara Na angin a lang thei bawk.

Miin Na rei tak a neih chuan a rilru leh a nun a khawih thei a, hlim lohna leh thinchhiatna a thlen thei a ni. Tin, mut that theih lohna leh taksa rihna a hloh thei bawk.

Thu lakna : Natna Lar Zual Enkawl Dan Leh Inven Dante By R. Zasiama

Posted in Advice, Copy Paste, Health, Information | 19 Comments »

Puitling Nun.

Monday, February 4th, 2013

Mi puitling thlerh thlawrh tak maite hi chu kan ngaisangin kan zah nghal mai thin a. Kum upa tawh tak tak, nawi ang reng viau si a awm theih laiin, la naupang te si, puitling thlarh mai a awm theih bawk a. An kum phu lova, an nun dan, an tawngkam leh hawiher leh an thu vuak thlak puitling tak leh fing takte chu, mitin hian kan ngaisang thin anih hi. Puitling nun chu engtin nge kan sawifiah tak ang le? Heng a hnuaia ka han sawi ho te atang hian mahni theuh I han in enfiah dawn teh ang:-

1. Mipuitling dik tak chu a thinur viau chang pawhin, tilang nghal buan buan lovin a inthunun thei thin a, Cool raihin ala tawng hram hram thei thin a, inhriatthiam lohna alo awm chang pawhin tharum leh thil tichhe rum rum zawnga che lovin, sawifel theih a tum hram hram thin.

2. Mipuitling chuan, a hmalam thui tak a thlir thiam thin a, a hlawhtlinna tur chu reilote nawmna hlimpui avanga chan aiin, a hmalam hun thui taka tan a that zawk leh a hlawhtlin phah na tur anih chuan, a pumpelh/chan phal rih thin.

3. Mipuitling chuan a hna thawh laklawh lai chu, a puitlin tak tak hmain miin sawisel sak fo thin mahse, a tihhlawhtlin hunah a tha dawn tih a hriat tlat chuan, a tilui hram hram thin.

(more…)

Posted in Advice, Lifestyle, Mizo Society & Culture, Religion | 19 Comments »

Nupa nun hlimna tur atana zawm ngai thenkhat te.

Monday, February 4th, 2013

1. A rualin thinrim chin loh tur. Pakhat a thinrim hle tawh chuan, pakhat zawk chu inbengdaih vat thin tur.
2. In in a kang hluah te anih ngawt loh chuan, aw tawp tawpa in vin(au khum) loh tur.
3. I nupui/pasal rawtna chu tha tawk lovin hre mah la, a aia rawtna tha I hriat si loh chuan, zawm ve mai thin rawh.
4. Mahni incheina ringawt buaipui lovin, I nupui/pasal inchei vena tur lam ngaihtuah tam zawk thin ang che.
5. Sawisel I duh tlat hunah pawh, tawngkam ngaihnobei tak leh Hmangaihna nen sawisel thin ang che.
6. In hun liam tawha a thil tih sual/dik loh sawi chhuah ching reng reng suh.
7. Pathian tih chauh lo chu, I nupui/pasal aia ngaihpawimawh zawk thil dang (Fb pawh telin) nei reng reng suh.
8. I nupui/pasal chu vawikhat tal I hmangaih thu emaw, fakna thu tawngkam khat tal sawi lovin ni liamtir ngai suh ang che.
9. Thinur tun chungin khumah mu thin suh ang che u.
10. Thil I tih dikloh palh changin, ngaihdam dil hreh ngai suh.
11. I nupui/pasal chu midang nen tehkhinin a tlinlohna sawi lang fo suh ang che.
12. I nupui/pasal mahni insitna a neih theihna tur ang chi reng reng sawichhuah ching hauh suh ang che.
13. Mihring 2 inmil nghal thlap hi thil awm theilo tluk ani a, zawi zawia inmil lohna lai kha in adjust tawn tum thin tur a ni.
14. Nupui/Pasal te duh loh zawng riau chin than kan neiha, an sawi chhuah thin chuan, insiam that tum ve hram hram thin tur ani a, amaherawhchu, pianpui leh thisena inthlah chhawn mizia angte hi sim ahar em em thin tih erawhchu, inhriat tawn sak thin tur a ni.
Sawi belh theih…

Posted in Advice, Lifestyle, Mizo Society & Culture | 27 Comments »

Hringnun Tlangchhipa Lawn Tumin

Thursday, January 31st, 2013

(Tunlai chu, mi(sual) in nghaktua ka ngaih thin: KawlHawk, Chemtatrawta, Awmtea Leo Khiangte, Saint Samoo, aduhi, sheldon, H. Vangchhia leh mi(sual) milar leh thahnemngai tak takte an reh, a khawharthlak riau. Tu emaw istail-in, tun bak hi ka post tawh lo mai thei a ni .. :-) )

Chin lem nei lo hringmi
Thingtlang khaw mawngpinga nitin hun hmang thin khan office hnathawka khawpuia awm kan chak em em thin a. Peih lo chung chung leh sum inpukchawp hialin lehkha kan zir chho ve tawk tawk a. Kan zir sang tial tial a, rualawh erawh a na tual tual.

Kan duhthusam leh kan mumang pawha kan man ngai loh hmunah mahni ei tawk thawk chhuakin ka awm ve a talangin rilru erawh a nghet miah si lo. Hna tha zawk thawh tur ka hria a, chu hna thawk thei turin ka inpuahchahna erawh a bei tham hle si. Ka hna duh tak pawh chu thawk ta teh reng pawh ni ila, duh tawk lem nei lovin hlawh tha zawk leh nun nuam zawka ka hriat te nun awt reng rengin hun ka hman tho ka ring.

Ka thesis ziah lai
Vanneihthlak tak ti ngawt ila, vanduaithlak ka tihna lai pawh a awm awm e. Research min kaihruaitu kha kan college Dean a ni hlauh mai a. Research ka beih laiin harsatna lian tham ka tawk lem lo va. Department danga hna ka neih paw’n ka guide hming ka sawi chuan, phur takin min tanpui a, awlsam tein ka hna ka zo mai thin.

(more…)

Posted in Advice, Lifestyle, More than words | 15 Comments »

Hmelthatna Thuruk

Thursday, January 31st, 2013

By JV Chhakchhuak

I mawia i mawi chuang e Enchim loh mi thianghlim Van Angel leh Seraf te tluk hial leh Rose par leh Lily, Hawilopar nen, nula hmeltha Chernghaleng leh an sawi hmeltha ram khat lanu hnehin; mahse siamchawp mawina rochan tling lo ral leh mai thin mawina chhuanga inhnangfak ve mai thin, nulate zingah i lo telve mai dah ang tih ka hlau a ni.

Lo hnai la, ka thu ngai teh. Kum sang rorel lo thleng tur tluk hiala dik “HMELTHATNA THURUK” dik tak chu ka han rawlruk teh ang che. Chhaktiang turni chhuakin thlangkawl zamual a liam leh na ngai e tih leh nausen pianghlim chuan hnuntui a mamawh tih pawh lo ringhlel ta mah la ka ngaithiamin awm pawh ka la ti e. Mahse he hmangaihna thuruk zet hi zawng lo ringhlel hlek suh ang che. I mawi a i mawi hluan e. Zoram mawitu Derhken par leh Thangrei, Chawnpui par paw’n an iang zo lo i hmel mawina; mahse lungchim tak a dawn chungin ka han thlir thin che a, lungtiawi lo mit tikhamtu chu mawi lehzual nan ti-a phuahchawp mawi tlereuh incheina, hmelhmai rawng danglamna chi hrang hrang leh sakruang mawina lan loh hlauh vanga khuhtu mumal pawh nei lova i inpenparh velna te khan hmangaihtu che thinlung hi a tihnur thin a ni tih hi theihnghilh hauh suh ang che.

Thinlung thianghlim si lo puan chang tivar i la nih chhung zawngin hmel zawng a tha “mahse” tih thawm hian i hnung lamah um chein hriat pawh i hre thawi thin reng dawn asin. Thawhchhuah ni si lo, thawhin a phu bak el-euha inchei a, in pen-parh leh ngawt thin nula te hian ngaihsan an hlawh ngai mawlh lo tih hi hria ang che. Puitling i ni ve tawh a, ngaihtuahna fim hmangin tunge i nih i inhriatchian theih vena turin i thinlung darthlalangah Inbih nawn fo ang che. Kangvar lenghawr ang lek-a thli bengna lam lama lengkawi mai mai tur i ni hleinem! Mawi nan tia lunghlu behin i ban tluanin darluan-ngun kual bun khat vek mahla, milem bia te pathian cheimawi ang lek bak englua a anpui chuang law’ng che.
(more…)

Posted in Advice, Fashion, Lifestyle, Luangliam | 14 Comments »

Bus chuan ka uak!

Saturday, January 26th, 2013

Hmanni chu bus-ah ka chuang a, ka bulah hian vaipa pa lian pui hi a thu a, a hnapkhir a kheuh mual mual a; ka uak ru tuarh tuarh a! A hnapkhir kheuh chu a hrual mum a, a pen per a, bus thutna ban a’n vuan nghal chat a! Duhtawk ta mai lo chuan a kheuh leh a, chutiang chuan a ti a ti ta mai a. Ka va han ten tak em aw…!

Chuta tang chuan bus-a chuan hi nuam ka ti ta lo riau mai a; a vawn ban te ka vawn dawn apiangin ka hre chhuak ta ziah mai leh nghal a. Ka vawn hmain kut tenawm tak tak engzatin nge lo vuan ang tih te ka ngaihtuah ta thin a. City bus ngat phei chu mi chitin chitang chuanna a ni si a, mi invawngfel leh thianghlim tak takte chu awm ve bawk thin mah se tawp tak tak an awm reng a. Nitin bus an sil si lo, an sil chang lahin a chhung lam an tifai ngai em em thin bawk si lo va, ka tenchhiat a zual ta em em mai a ni.

Fainaah tan i la thar ang u. Mi zinga hnapkhir kheuh mual mual te hi i ching tawh lo hram ang u. Hetiang hi Mizo zingah pawh kan la tam tlat. A tenawm a, pumpui tha vak lo phei chu luak a pawt a, uak tuar tuar palh a hlauhawm thin.

Hawh u, i fai ang u.

Posted in Advice, Lifestyle, Mizoram | 17 Comments »

« Older Entries
Newer Entries »