mi(sual).com

Krismas chu ni hnih chiahin a dang tawha, mitin mai chu he ni ropui tak mai hmuak hian an in buatsaih sung sung hlawma. Dawr eng pawh mai chu a lun vek maia. Chawhmeh dawr atanga thawmhnaw man to zawrhna thleng chuan lun lo pakhat mah a awm lo. Ka hmazawna dawr pakhatah chuan nupa tuak khat hian an fanu kum 7 mi vel hi kaiin an lo bazaar puia, hlim takin an chhungkua chuan an duhzawngte chu an en kual hlawm a. Ngaihtuahna a ti thui ngei mai. Ka chhungkua ka mitthlah an lo langa, chung mi tam tak karah chuan keimah chiah chu lungngai a kun awm chhun niin ka inhria.

Kum khat lai a liam ta, kan nu hi inchhunga a chet velnaah a che suala, ho te anga lang kha a lo ho huah lo maia, rin ai takin a lo na a, a tluk sualna avang chuan khum betin a awm phah ta a. Kei kut hnathawk ka ni a, ka hlawh chhauh tlemte chu kan nu damdawiah leh kan ei leh in atan a ral nghal vek zel a. Kan nu a dam that lai chuan kan nupain kan la inpeizawna, khawsak harsa lutuk loin kan awm thei thin, mahse a chetsual tak atang hi chuan kan khawsak chu a rawp tial tiala, kan ei tur che che kan nei ta chauh maia. Hnathawh tur a awm remchan loh phei chuan kan nghei lo chauh ta maia.

(more…)

Krismas urlawk ni a ni a, ni dang ang bawkin vur a tla seng seng a, a vawt kher mai. Mipa naupang pakhat, Bobby-a chu an huanah ngawi rengin a thu a, pheikhawk bun tur a nei lova, kawrlum lah a ha hek lo.

A vawi ti chu a khabe a inkhawng hlak hlak reng a. Chutiang chuan darkar khat lai a thu tawh nain, Krismas thilpek atan eng nge a nu a pek ang tih a la hre mai thei chuang lo. A nu pek tura a ngaihtuah apiang chu a leina tur pawisa a neih lohna chuan a chhilh nghal zel a.

Bobby-a pa chu kum 3 kal ta khan a thi tawh a. A nu hovin an khawsa nawk nawk a; an chhungkua an harsa ngang mai. An chhungkaw chawm nan a nu chu a thawk rim lo a ni lo va, hna a thawk lo lah a ni hek lo; nuamsa takin an chhungkua chu a chawi chhuak zo ngang rih lo a ni.

(more…)

Ka Nu, ka ngai bang thei lo che…

Sahmulphah thla tir a ni a. Ka in luah chung zawlah khawhar taka thuin ka hawikual vel a. Van thiang ruih mai, khawimaw lai a thlasik kawng in a bawh pet chuai te chuan nunhlui bawk min ngaih tir leh ta. Ngai teh, Chhohreivung paw’n an zinkawng ngai zawhin vanlaizawl min lo kai san leh der tawh in, Siruk-i te unau paw’n Chhohreivung um phak nih hlau ni awm fahranin hmatiang sawn relin an de sep sep bawk. Aw.., heng siar te hi keiin ka hriat ve hnu ah danglam lo leh, in peih loh san awm miah loin, lungrual takin an awmna hmun theuh ah an eng zan tin a. Kei erawh chu thian leh rual tam takin min awm loh san a, tin ka Nu ngei paw’n he lei anchhedawnga min cham pui peih lo in pialral min kaisan tawh bawk.

Durga pooja lawm reh lam a ni bawk a, phur chang a halpuah ralkhat a puak leh zauh zauh tih loh chuan ka khawhar min hriatthiam pui ni awm takin a reh hian an reh tlawk tlawk a. Arsi ka sawi tak te kawk diat diat pah a ka Nu in zan thiang reh hnuai a’n hmangaih takin a kut lum thar thar a min kuah a; an behchhan thawnthu min hrilh lai te ka ngaihtuah let zel a. Chu mai a ni lo; khawchhak mifing te’n arsi mak tak an zui a; a tawp a Isua Krista pianna khua Bethlehem an thlen tak thu min hrilh te; mitin nghahhleh em em thin; zirlai te tan a exam zawh chakawm chhan te, mahni khua a haw nghahhlehawm chhan te, bialnu/bialpa nei te tan a a nawm bik zia te, tin nei lem lo tan pawh a lem bik chuang loh zia thleng a Lal pian hun lawmawm Krismas chanchin min hrilh thin te ka ngaihtuah ta zel a. Duat leh thlahlel tak a ‘Mampui/Mahming’ ti a min ko lai hmel mitthla a’n a lang thar leh a. A ngai te in ka Nu ka ngai vawng vawng.

(more…)

(Nimin, tahrikni 18, December, 2011 kha, Ka Nu duh tak Rochhiari Ralte-in, thawhlehna ni ropui nghak a, lei hrehawm a chhuahsan champhaphak vawi thumna a ni a. He thu ziak hi atan ka hlan e…)

Panlai nun

Kum tawp exam kan zo a. Enghelh tur engdangmah a awm tawh lo. Kan hma lawk a Lal pian hun lawmawm lo thleng tur chu; engemaw tak in min mawlh avangin, nghakhlel in kan phur ve em em thin. Naupangchhia ni mah ila, siamtu duan lawk: tlangsam par te chuan chu hun ropui lo thleng tur chu min hriattir ve bawk a. Thlasik chat paw hreu hro, hmui rep khi char reu ro chung pawn, chu hun hlimawm chuan kan tawn ah a ngaihnobeina a hloh eih chuang lo.

Tlang-buh phurh
Thingtlang ah chuan sawrkar hnathawk awm chhun te kha sikul zirtirtute an ni mai a. Ziritirtu chhungkua, kohhran tan a thahnemngai deuhin, Krismas ruai atan, an vawk vulh lai, rosum a lei aiin an buhphurh hlawh turin kohhran an han sawm ngei a. Pathianni tlai atangin a tuk lawk a buh phurh hnatlang kan neih tur chu kan sawi ho a, nuam thin tak a ni

Tichuan le, tlang buh phur turin kawtchhuah ah innghakkhawm in; a-pui-a-nawiin kan inzui kawi nguah nguah a. Rawlthar phur deuh in dar leh khuang te vua in kan ri bung bung thin. Nidang a buhphurh a hahthlak theih thin nen, tlang buhphurh ni meuh hi chuan hah hi kan hre hman ngailo a ni ber e.

(more…)

Khawnge, a vawikhat ta nafam chu Krismas thuchah i han ziak ve luklak teh ang. Pu vakul, pkfanai te hoin Greek tawng nen, Hebrai tawng nen han bei se zawng, Keyboard phen atang pawh hian kan ding phu suau duh hian ka ring a ni. Mahni insit tak chung si hian, in kel be ve rawng rawng mai teh ang.

Krismas hun lawmawm a rawn thleng leh a. He hun hi i tan nge i hman dawn midangte tan?? Mahni nihna leh zahawmna zawng zawng sawr ral thak khawpa a thilsiama rawn chang kan Pathian tan hian enge thil tha kan tih ve ang? Thilpek hluber min pekna hun champha ah hian nangma tanghma haiin, i hlimna tur ngawtin i hun i hmanhlel mai dawn em ni?

He hun lawmawm lo thleng tur hi i kianga mi rethei leh mi chhumchhia, khawtlang pawhina engahmah an ngaihloh leh tanpui en pawha an en lem lohte leh midang thatna dawng tur khawpa dinhmun sang chang pha ve lo te tan engemaw tal i tihsak ve thei angem?

(more…)

A tel ve hman lote chu len lai chan an ni tih theih khawp hiala ni hlim awm leh kan theihnghilh leh tawh ngai loh tur Winter Meet & Advance Christmas chu December 10, 2011 khan ZSE family ten kan hmang zo leh ta der mai. Zofa Society Of Emirates te chuan Kristmas kan hmang fel pawh a tih theih hial awm e.

Mizo hla ngat mai hlim tlang tak leh phur taka kan han sa dap dap maite khan Kristmas a ti ang leh zual a, Mizo nih a nawm zia min hriat thar tir ni ber mai.

(more…)