mi(sual).com

Ka dah tawh emaw ka tia, kalo la dah lova. Nikuma ka chhuah tawh The Last letter chhunzawmna na thawnthu tawi ani e. The last letter en duh tan
https://misual.life/2011/10/07/the-last-letter/

Favang boruak a nuamin thla lah chu a eng uarin lung a leng a, rilru in kan tlangval lai min hriatchhuah tirin mami nu nena kan in ngaihzawn laia Pu Phunga serthlum huana thla eng hnuaia hlim taka kan awm dun lai leh vaihmite thlawk mai mai pawh kan nuih pui laite rilru ah a rawn lang a. Hlimte a tudang ngai lova kan lendun laite rilru ah a rawn tharin tunah zawng engkim mai hi a dang tasi. Ka tih hreh ka tih a ngai a, tlang rel hlauh vanga keimah hlimna tur nia ka ngaih tihreh tur khawp chuan dawizepin ka in hre silo. Zinglam dar 4 a ri tawh a, ka thiannu (Bialnu) chuan bus station ah kan in tiam ang ngeiin minlo nghak tawh ngei dawnsi. Hmmm.. kan chokapui dawhkanah hian ka thil ziah chu dahin ka kal mai ta nge.
(more…)

LPS leh ZONET chanchinthar ah chuan Mizo tlangval Indian Army a tang lai, Indonaa a Ram leh hnam tana a nun hlan ta Tv.Lalruatfela chungchang leh vawiin chhun a vui liam anih thu te an puang in, he tlangval huaisen zia te leh a nunna a a chan chhan pawh an captain a chhan na lamah anih thu te an puang bawk a. Zoram titi a tling in, Bazar ah te, School ah te, Office ah te he tlangval huaisen chanchin hian sawi a hlawh in mitin titi leh ngaihsan a ni. Ram pumin a chanchin an sawi luai luai a, Chief Minister pawhin a chhungte zangnadawmna an pek tur thu te puangin Mizoram ti hmingthatu he tlangval huaisen chhungte pawh an thlahthlam loh tur thu leh an chhung zinga mi sawrkar hna an pek tur thu te TV ah a sawi awl lova. Opposition lam lahin remchangah hmangin Ruatfela ruang lak chungchangah leh Aizawl lama phurh chhoh chungchangah Sawrkarin hma a la tawklo tiin thuchhuah an siam bawk a. Ngaihven lo tan pawh he rawngrut tlangval chanchin hi a hriatloh theih lohin a chanchinin Zoram khawvel pawh a chiah hneh hle a ni.

Kum tam alo vei ve ta, Krismas dawn a mipui an zik mur mur lai leh hlimlai, mitin mai ten Lalpian hun nghaka an nun an hman a hmalam hun atana an in buatsaih lai a ni in khualzin tamlai ani a. Mapuii pawh chuan pawl 12 exam an zo tawh bawk nen an chhungkaw eizawnna ber anih angin, an hotel lamah a hun tam zawk a hmang thinin khualzin an tam thei bawk nen a hah hle thin. December 21 tlai lam a ni in he ni hi zawng Mapuii tan chuan a hlu in a theihnghilh tawh ngai lo ang.
(more…)

Ka fa duhtak,

A hmasa berin ka biak Pathian hmingin i ngaihdamna sang ber ka dil a i lenna van hmun nuam leh mawi atang khan i Nu leh Pa tlaktlailo tak hi ngaihdam minlo dilsak thin dawn nia.

Thiante leh U leh nau ten an hraileng chawia hlimten laichhuat an chhir a, chhungkua a hlim taka an awm ka hmuh hian ka rual awh a zualin i pa sangtean a fapa nausen duat taka a pua a, a awi dur dur thin hmel ka hmuh te hian ka thinlai ati nain ka hnuk ati ulha, nang ngaih ati zual thin a. I Pu Mama fanu Remi pawh khan school a kal thei tawhin A,B,C a thiam tawh a, Ba Ba black sheep te a sa thiam tawh asin. He khawvelah hian cheng ve nila kum lamah in inrual tlang dawn nen nang pawhin i thiam ve tawh awm si a tiin i Nu nen khumlaizawlah vawi tam kan tap a, hunkal tawh a siamthat theih tawh siloh. Mate, he ni alo thlen hian kan rilruah i cham reng tih minlo hriatsak leh la, i lenna hmun mawi leh nuam atang chuan min rawn thlir reng thin dawn nia. Keini i Nu leh Pa zawngin i hmel hmu leh mah ila, kan hre tawh kher awm silo chein eng ang hmel leh pianzia nge i put ang tih pawh kan mitthla thiam dawn silo.
(more…)

(A sei ngawt ang, a part a dah leh a buaithlak in tia, part 2 dah a part 1 link dah leh net a muangg en let a peihawmloh in tia. Part 1,2,3 ka combine a, ka thliar hrang a, a duhin a part bil en ula, a duh tan a vaia chhiar nghal a remchang bawk. Mahse inla phun dawn chiang sa, in phunchiar hlawm si,.. hehehe.. )

PART 1

College chawlhlai ani bawk nen tihtur em em ka neihloh avang chuan kan kawmthlanga dawrah chuan ka thu mai mai a, ka kuhva leina dawra meizial zuk paha ka thut lai chuan ka thutna dawr kawta awm Zira carpentry tih chu ka enin, a kawta a dawr neitupa Pa.Zira kan tih mai ina a thuthleng siam uluk taka a hru chu ka en in amah Pu.Zira chanchin a hma a min hrilh te ka ngaihtuah chho a. Pa.Zira kan ti ngawt a, kum lamah chuan ka Pa aia upa, Putar tia chhiar theih tawh, nupui pawh neilo, a Nau fate 2 awmpui leh eizawn nana Carpentry dawr siam a ni a. Amah lah chu a bula awm a nuam in, tawng duah chi nilo mahse rualkawm a thiam bakah a thil siam a uluk nen kan veng leh a chhehvel ah chuan a thilsiam te chuan ngaihhlut an hlawhin mi 3 a chhawr chung chuan an buai theiin, a hlawk bawk aniang a nau fate 2 a chawm bakah In tha tak a sa in, 207 motor pakhat nei bawk a, Kohhran leh vengchhung thawhlawm ah pawh a thawhhlawk thei hle thin.

(more…)

Fur lai aniin boruak a hnim ruai a, chhum lah chu a zíng phui mup mai bawk nen boruak pawh a uap hle a. Chu furpui boruak uap chhurh mai chuan Pu Lalnuntluanga te in chhung pik tak chu a belhchhah in chu in ah chuan hlimna in thla a zar lova, an chhungkaw nun a hlim lo ani tih a hriat theih bawk si. An In lian tak ah chuan cheng an tam lova, a ruak huai a, an sofa set mawi tak te, an LCD TV liantak te chuan chu in chu cheimawi mahse chu in ah chuan hlimna a thlen hauh silo. Van lama chhawm theihloh khawvel thil mawi tak tak chu Inah chuan a tam a, mahse chung chuan hlimna a pe silo. Engkim mai, an In atanga a chhunga awmte chu Pu Tluanga leh Pi Remi te thawh hah liau liau rah aniin eirukna leh hlemhletna cheng khat pawh a tel silo. Mahse, hah taka an thawh hram hram rah mah nise, Pu Tluanga te nupa, kum upa lam tawh tan chuan engmahlo mai a ni si.

Pi Remi chu an sitting room thutthleng nuam takah thuin an chhungkaw thlalak a en a, a keu let a let in, a bianga mittui rawn luang chuan a album ken chu a far karh karh a, an nunhlui leh an chhungkaw nun thin te thlir letin an fapa Sangtea naupan lai thlalak, a Pa ina a kokichhuan lai chuan a lung ati chhia a, a vel ani. An Inchhung an thlir vel a, Fanu 2 leh fapa 1 an neih avangin an fapa neihchhun an duat em em tan veka an tih an in leh rosum zawng zawng te, hah taka anlo thawhchhuah sa engmahlo maiah a chang ta si. Nu ber rilru atang chuan a fapa a hmangaih leh a duat em em, naupang fel tak, kehthei ena a en hetianga a awmta mai hi a na a, tawrh thiam a har ani e.Pu Tluanga erawh a tawng lemlo, mahse a hmel ah chuan lungawi lohna, hlim lohna a langin a rilru a hah tih reng a hai theih siloh, sitting room lama an chhungkaw thlalak chu a en a, muang ban charhin
“Mama Nu, keini pawh kan thiamlo ania nge” tiin an Nu lamah chuan a phei ta a.
(more…)

Vengthlang kawn atanga chak deuha a rawn chho chu Pi.Rinhui dawr kawtah a han ding a, a koki dinglamah gas bur a puin a kut veilamah chow pack sa Rambo polythene khat tlat a khai bawk a, a hawi vual vual a, a bawr lutuk chu a hmute chuan anlo fiam sap sap reng a.. A dress ngai te te, a t-shirt dum a hma a iron maiden tih inziak, a hlui tawh em avanga I RO MAI tih chiah lang tawh leh a kekawr hman thiam, jeans azawnga jeans eng ngei mai chu hain Pi.Hlu-i dawrah lutin a thil put leh khai dah chuang lova dingin a hawi vual vual a, a bawr em avanga nuih tute erawhin a hmel an en chian cuan an nuih reng a zalo , a hmel hmu tan chuan nuih ngam chi ni heklo.. Lungngaih zana Isua hmel kha chu tluklo mahse a hmelah zawng lungngaihna a langin, a mitmeng te lah phungzawl mitmeng iaingin a pual titih a, a hmai mam lemlo takah chuan thlantui rawn luangin a din dan lah a mak.

A gas bur leh thil khai nghhat chuang silo in a ke ding lam chu ngil at a dahin a ke veilam erawh dah awn deuhin a ding kawi ang ngel a, a mawng fual tak erawh a dah poh ang hàrh a, mi hnungchhawn zawnga reilo te a awm chhung erawh kha chuan a jeans eng, a lu lian tak kheng rang nuai , a tshirt dum dal tawh tak leh a koki a gas bur leh a kut veilam hmawra a chow khai tenen chuan hmuhnawm a tlingin Pi.Rinhlui pawh a insum hleitheilo. Mahse chutia patling, a hmel leh a thlantui nen meuha thil a pangngailo ani tih lantir lo nuih khum chu thil awm ani loin, an biak lahin a chhang si heklo, chutah insum tak chunga “U.Chawi enge nita, buaina I nei ami” an han tih chuan,

“Nu.Hlu In inthiarna a ruak em”
“Aw ruak e”

(more…)