Archive for the ‘Lifestyle’ Category

Police hotu zurui man!

Tuesday, March 19th, 2013

Khawvel a Irish awmna tawh phawtah chuan March ni 17, 2013 kha an hawksak ni a tih theih ang! Hemi ni hi mithianghlim (Saint) Patricka’n Ireland chu ringlomi (paganism) aṭang a a chhanchhuahna ni a puan a ni a, an patron saint a nih ber chu. Mizoram a kan gospel centinary ang deuh te pawh ani mahna! Tichuan, Irish ho hi hawksak/hlimhlawp (party) nuam timi an nih takah chuan hemi ni (St. Patricks Day) ah hian ruih chiam an ching ta mai a, a ni chhawm nen erawh a inmil lo viau awm e.

Engpawh nise, kumdang ang bawkin USA lamah pawh Irish thisen kai ho chuan St.Patricks Day chu an lawm leh ta a. Zurui an tam dawn tih an hriat lawk vangin sawrkar lam pawhin zu rimnam hnu a motor khalh an tlem theih na’n tiin, a thlawnin taxi a hman theih thu radio leh TV lam thlengin khawpui hrang hrang ie., Washington D.C. ah te chuan an puang leh a ni.

St.Patricks Day chu alo thleng leh ta a, dan bawhchhia a zu rui pawh an awm leh ta nawk mai. Chutih karah chuan langsar tak mai pakhat a awm a, chanchinbu lamah an ṭial nasa teh e.

Baltimore county a an police Captain, Captain Matthew McElwee chu a thisenah phal chinbak alcohol a awm vangin an man der mai. Motor khalh chungin thisenah alcohol hi .08 chin chunglam chu khap tlat a ni. Chutiang, .08 tling tur chuan zu shot 3 lek a ngai reng bawk a! Captain an man tak hi kum 16 lai Baltimore county a police hna lo chelh tawh niin, chumi county a Franklin Precinct-ah kum engemaw zat commander nihna chelh tawh a ni bawk. A hna chelh mek chu chawlh lailawk tirin, chhui mek a ni a, chutih chhung chuan police hovin an nin em em mai ‘administrative duty’ thawh tir mek a ni. (more…)

Posted in Information, Lifestyle, News, Opinion | 13 Comments »

Mi danglam Lutz Long.

Sunday, March 17th, 2013

Sports lam tui leh ngaihven te chuan, US mihang Jesse Owens a chanchin hi kan hre hle awm e. Hitler-an Nazi a kal vung pui vanglaiin, an khawpui Berlin-ah ngei mai, 1936 Nipui Olympics ah khan, Hitlera ideology kalh tlatin, Aryans ho khumin Gold medal 4 ngawt mai ala anih kha. Lar namen lovin a lar ta a, a elpui ber khatih laia Germany leh Europe Champion nilai leh Hitlera’n a chhuan em em, German tlangval sam buang thar mai Lutz Long erawhchu hria kan tam vak lo mai thei e.

Lutz Long tia hriatlar tak, he German tlangval hi a hmingpum chu Carl Ludwig Long ani a, Kum 1913 April ni 27 khan Leipzig-ah alo piang a ni. 1936 Summer Olympic Germany in an khawpui Berlin-a an thlen tum khan, kum 21 mi niin, a vanglai a hmang mek a. Long Jump-ah phei chuan European Champion nilai niin, European Record siamtu ani mek a. Hitlera, khawvelah hian Aryan ho an chungnung bik ani tih ring tlat tu leh thehdarh mektu pawhin, an ram leh a ideology tidiktu tura a hual leh a chhuan em em a ni.
(more…)

Posted in Event, Lifestyle, Religion | 12 Comments »

A Changtupa chet a hun

Monday, March 11th, 2013

Vau thla alo ni leh ta reng mai. Zirlaiten exam pawimawh tak takte kan beiin kan hmachhawn mek hlawma. Mi tam takin zirna tha zawk beiseiin phairam hmun changtlung zawkte kan pan leh sup supin a rinawm. Mize hrang hrang nei kan ni a, mahni in thunun kawngah pawh kan inchen lo tlang hle. Hnamdang, culture dang zinga han tal chiah hian kan nungchang tha tam tak kan hloh thina. Inthlahdah vang anih rualin mi chitin chitang inchiahpiah nuaih nuaihin a hrinchhuah pakhat pawh kan ti thei ang chu.

Ka sawi duh tak chu phaia kan awm hian zirna bakah thil pahnih ngaihpawimawh a tul ka tia-  mahni invawn thianghlim leh chetdan mawi neih. A bikin mipate mawhphurhna a sang hlein ka hria. Zan men rei vak vakte, chawei khawm leh thianho inkawmte a tihloh vek theih bik lova. Vairam anih tak avanga mahni inluaha zu thing rim nen, thlan rim nen, kuhva leh hmuam chi eng engemaw rim nen inchawhpawlh nam huama khawsak bual bual mai hi a changkanglo takzeta. Hnamdang mipa, a bikin hmarchhak lam mi Kristiante phei hi chu an invawng felfai hlawm viau mai ka hriat ve chhunah chuan.

Mizo mipa zuk leh hmuam ti ngai miahlo hi an vang hlea (ka hriatchinah chuan).  Zuk leh hmuam (leh zu te pawh aniang chu) hi kan rual pawlna hmanrua pakhat an ni ve a. Hetah tak hian hnamdang nen kan inbiakpawh  leh thil tih ho (interact) hunah te a che tawp pawl leh felfailo pawl nilo tura insum theih a tha khawp mai. Chuan Mizo mipate hian hmeichhiate hi tawng thiam kawngah an tluklo deuh thinin ka lo hre ve mai maia. Thiltihna hrang hrangah leh khawi ilo kalnaah hmeichhia zawkin hma kan hruai fo mai. Saptawng leh vaitawng a tul huna nal taka tawng thei ngei turin tan han la sauh sauh teh u.

Mizo hmeichhiate tan chuan mizo mipate hi a changtupa berte in ni maia, in hnung kan zui theih nan chuan hma in hruai hmasak a ngai. :)

 

Posted in Advice, Lifestyle | 29 Comments »

Thingtlang nun.

Thursday, February 28th, 2013

Thingtlang nun hian hahdamna deuh a nei a. Tualchhung ami te hi an in hre pawh vek zel mai a, an bai chhuan liam thleng pawh hian; chawhmeh insuah sak te pawh hi nunphungin a ken tel a ni. He thlalak hi kum 3 vel lek kal ta a lak a ni a. Khaw pakhat a tlai, zanriah kil hma a naupang ho hun hman thin dan a ni e.

a

Titi thiam deuh chu ni ila, ka han sawi zui teuh tur hi a ni a. Titi thiam loh luatah a picture chinah hian kei chuan kan duhtawk phawt mai ang e.

Bonus pic: (Nizan, 2013 february, thlabial zan zet kha chu aw…)

b

Posted in Lifestyle, Mizo Society & Culture, Mizoram, Pictures | 22 Comments »

Vanram I han thleng ve hlauh te anih ngai chuan:- (Sunday Pual)

Sunday, February 24th, 2013

Leilung dana I hringnun a lo tawp hunah, Vanram te I han thleng ve hlauh anih chuan:-

1. Pathian chuan, eng Car nge I khalh thin a lo ngaihven viau ring duh suh; motor chuanna tur neilo leh an chhungte damlo damdawiina hmanhmawh taka phurh ngai phurhna pawh nei lote, mi engzat nge I lo tanpui a, I lo phurh tawh lam a ngaihven zawk ang.
2. Pathian chuan, I in mawi leh ropui leh ropui loh lam ai chuan, I inah chuan eitur neilo mi engzatnge I neih eia lo chuangkai a, mikhual thlenna tur hrelo mi engzatnge lawm taka ilo mikhual tawh tih lam a ngaihven zawk ang.
3. Pathian chuan I Wardrobe-ah thawmhnaw engzatnge I neih tih lam ai chuan, silh leh fen tur neilo mi engzat meuh nge I lo thuam ve tawh tih lam a ngaihven zawk ang.
4. Pathian chuan I hnathawh san leh san loh lam ai chuan, I hna chu I theih tawk takmeuh leh rinawm takin I thawk em? Tih lam a lo ngaihven zawk ngei ang.
5. Pathian chuan, thian engzat nge I neih tih lam ai chuan, mi engzat tan nge thian tha leh rinawm I nih tih lam a lo ngaihven zawk ang.
6. Pathian chuan I thenawm khawvengte nihna leh ropuina lam ai chuan, I thenawm khawvengte tana malsawmna I nih leh nih loh lam a lo ngaihven zawk ang.
7. Pathian chuan, I vun rawng lam ai chuan, I nungchang rawng mawi leh mawi loh lam a ngaihven zawk ang.
8. Pathian chuan I hausak leh hausak loh lam ai chuan, Damlo natna khirh tak vei, damdawi leina tur leh Damdawiin panna tur neilote tana, I robawm hawnga ilo pekchhuah ve tawh zat lam a ngaihven zawk ang.
9. Pathian chuan I thu thiam leh thiam loh lam ai chuan, kawngbo leh kal ngaihna hrelo te, I thu leh hla hmangin kawng dik kawhhmuh a, hruai chhuah ilo tum tawh thin em? Tih lam a ngaihven zawk ang.
10. Pathian chuan, chhandamna a thawh zawh tawh sa diam I ngaihven leh I pawm har lutuk avangin, a lo hrawkin alo vin khur khur hauh lovang che; I tana chenna hmun tur alo buatsaih peih diam tawh chu hlim tak leh lawm takin a lo kawhhmuh zawk ang che.

Midangte nuihtir theih ringawt hi a tawk lo; an lungngaihna mittui chu hruk hul sak a, chu dinhmun atanga nuih leh tir theih hi Malsawmna ani ngai e.

Posted in Advice, Lifestyle, Religion | 16 Comments »

Zet-u-zu (Hetiang zawng hian)

Friday, February 22nd, 2013

Wriiten by-L Vanchiau

Buhfai umtawih, vai dawidim phut a chiah zawp tawh hnu, umtawih firiau leh kawi nuai mai; Sazu nghal fal deuh liluh chhuak zo lo in a tawihhnan buhril var paw phut mai chu mei thil-tih-theihna hmanga chhuan so a awmin, ngaiteh bel a so liam ni hauh lo a, dawnthleng a rawn far ngei tuifim tak rawn far chhuak a thiltihtheihna ropui tak a ni.

Zu kan tih tak hi lo ni chuan. Thiltihtheihna (power) ropui tak nei a, mi tam tak nghawng a hrui vet a damlai nunkawng ngil lam a kaih kal lo zawng a hruaitu chu zu hi a lo ni reng chuan. Chu tuifim rawn dir chhuak tar tar chu maw sual hlawm leh tenawm tak zawng a lo ni.

Zu hi a lawnga a awm hi chuan sual anih hi ka hmuthiam ve hauh lo mai pek chuan. A tawnah erawh pumpui a luan thlen a, thluak a fan raih tawh hnu ah erawh lu a kai chiai chiai in a hai chhalh a, chu hunah meuh zawngin thlarau rawn thawk chuan ropui bera te, thiltithei bera te, chak leh huaisen ber ni thei tur in huaisenna a pe ta thin a. Tha leh thisen a thunun hnuaiah chuan a ni thlarau chuan a awmpui thin ni.

(more…)

Posted in Lifestyle, Zu | 14 Comments »

Dawr nghaktu

Sunday, February 17th, 2013

Engemaw mai mai thai kawi leh teh ang. Hmanni chu Dar 10.00AM velah thil leitur ka neih avangin dawr pakhat ah ka kal a, dawr lian ve tak ania, thawktu pawh kha 7/8 vel chu an awm ang. Ka lut kha bengvar takin ‘Enge I duh?’ min lo ti vat a, dawr an nuam vat vat hle mai a. An thil zawrh ka en a, ka duh zat leh a rate te kan inbe fel a, an tehfel lai chuan thutna awlah ka thu a, coffee te min pe a, an hawihhawm khawp mai a.

Coffee in a ka thut pah chuan dawr chhung chu ka thlir kual a, a neitunu kum 60 bawr vel tur hian a Tiffin chaw a lo ei mek a, dawrtu an tam bawk si, chaw a ei laklawh si, rem leh remlo in, tawng pah bawk, chaw ei pah bawk, pawisa dawn a lo ngai bawk. An indaih lo em em khawp a. Ka thil leitur ka la fel a, pawisa ka pe a ka chhuahsan ta a.

Office ka thlenin ka thil leite thiante’n min enpui a, a neitunu buaizia, chaw ei paha customer te a biak dan leh pawisa dawn ngai bawk, a indaih loh zia ka sawi a, kan thawhpui pakhat chuan ‘A ni reng ang chu, a duham em alawm. Tikhawp khuan an hausa a, a pasal ni se Pu……Sorkar Department pakhata Gazetted Officer pension tawh ani a, in leh lo ropui tak, motor nise a chhuak thar apiang an nei thei a, nikhat pawh a dawr khu zuk chawlhsan phal lova’ a lo ti a.

Ka ngaihtuah zui rilru ta reng a. Mihring te hi kan va duham tak em! Neih tam lua pawh a awm theilo ani maw? A ngah apiangin a ai a tam an duh a, dawr neitunu pawh kha han inthlahdul ve se, tar a lam a phar buai phar buai lo khan a tu leh fa te kutah dah ngam se, sum nise an ngah a, a duh leh a pasal nen engthawl tak te’n han zin dun vel se la nun hi a hadam ang mawle ka tih rilruk sak a. Kei chu ni I la Pu Hva te vengah te ka zinsan daih ang mawle :-D

Posted in Lifestyle, Opinion | 36 Comments »

EIZAWNNA

Friday, February 15th, 2013

Kan ramah hian ‘hna a vang, eizawnna avang’ hi kan tih teh fo mai a hei hi enge a chhan, a lo vang reng em ni i lo bihchiang dawn chhin teh  ang…

Mizo te hi lehkha zir uar tak mai kan ni a, a nei pawn nei lo pawh zirna in tha leh phai lamah kan fa te zirna leh thiamna sang zawk an rawn puak chhuah beiseiin kan in dah a, tichuan kan han zir chhuak ta cheng a, sawrkar ah hna kan beisei ngei a, mahse sawrkar hna hian mi zawng zawng a lo daih vek seng si lova , tichuan hna avang, eizawnna a vang tiin kan lo phun kan lo phun ta thin a lo ni a. Lehkhathiam hna hmulo pawl te hial kan lo din phah a, a zialo khawp mai a. Lehkha thiam nih chuan kan lehkha thiamna kha sawrkar hna chauh nilo a mahni a eizawnna kawng a in hai kuak nan te hman mai awm hi a ni hian ka hre ve thin a, nge ni kan lehkha thiam dan hi a lo la ziktluak chiah lo zawk.

BA, MA ilo kan han pass chho a, sawrkar hna in a lo daih vek si lo a, kut hnathawh kan lo hreh tumhrang tawh si a, hetiang tan chuan hna chu avang duh khawp ang le. Kan ramah hian hnamdang kan tih, Vai leh Burma mi kan tih te kan state chhehvel ami hnam dang an mahni chhungte kalsana ei rawn zawng an tam em em a, kan rama hnamdang tam lutuk hi a sawrkar leh khawtlang ang zawng te pawhin kan buaipui nasa tawh ani a. Heng ho hian eng dang an ti a ni lo a, kan ramah ngei hian ei an rawn zawng ani a. Hnamdang heti zat in kan ramah  ei an rawn zawn a , an khuaah an chhung te an chawm theih laia keini a hmuna awm ten ‘Hna a vang, eizawnna avang,’ kan ti kan ti ta mai hi enge a chhan ni ta ang le???

A chhan bulpui ber ni a lang chu keini a ram leilung fa te hian heng hnamdang kan tih ho thawh ang hi kan thawk peih lova, kan thawk duh lo a, keimahni thawh ve turah kan ruat  tlat loh vang hi niin a lang. Heng hnamdang kan tih ho in an thawh ang hi thawk duh in thawk peih ta ila kan ramah hian hna/eizawnna avang kan ti fo lo anga, tin kan ramah hnamdang an tam kan ti kan ti lo bawk ang. Cement mistiri leh helper te hi heti zat Vai ho an awm a, Mizovin kan thawk ve duh tlat lo mai te hi a mak ka lo ti ve mai mai thin. Tin sumdanna kawngah pawh dawrkai a, dawr chhete chhungah dawhkan a calculator nena inchhawp deuh rap a bawp khawkherh a chair vir thei a thut loh  hi chu sumdawngah kan ngai lo emawni tehreng ni, hnamdang heti zat hian dawr luah lovin a kala kal kualin kan ramah ei an zawng a ni a, hetiang te hi lehkha thiam pawh thiam lo pawhin a kan tih ve theih vek ani a, dawr luah man chawi a ngaihloh mai bakah customer ten min rawn pan hun nghah kher ngai lovin mahniin kan pan mai dawn tihna a  ni a.
(more…)

Posted in Lifestyle, Luangliam, Mizo Society & Culture | 22 Comments »

Pherh Fesawn

Friday, February 15th, 2013

Tûn hma chuan Lusei mipain ‘Hnawkhal’ (Vaiza pil aṭanga siam) an inbel a, hmeichhia-in ‘Siapsuap’ (Vaiza pil aṭanga siam bawk) an inbel ṭhin. A hnu deuhah hmeichhia leh mipa-in ‘Puanmâwl’ thuam an inbel a; hun a lo kal zêl a, kan thawmhnaw inbel pawh a changkang zêl a, tûn hi kan lo thleng ta a ni.

Changkânna khawvêlah hmasâwnna pawh a thlawhin a thlâwk fua fua tawh a. Thil ‘dangdai’ kan ngaisangin, mite tih loh ang deuha ‘danglam’ kan châk ṭhin. Fesawn chungchâng thu-ah chuan mipa aiin hmeichhia hi an sângin fesawn stail hrang hrang pawh an ngah hle. Lu chhîp aṭanga ke lêr thlengin fesawn stail thar hi ni tin a chhuak ti ila ka duhâm lutuk lo vang chu maw. Mipate erawh a chângin kekawr bawp a arh a, a chang leh a zuih a; danglam nasa lutuk a awm ngai mang lo. Kamis thâwl hek hawk, a bân thleh; jacket kâwnga hrên tih vêl kha tûnhma fesawn a ni mai a. Tûnah chuan heti hi kan ni leh a.

Fesawn hian hma a sâwn zêl a, dangdai leh maksak pawh tam tak hmuh tûr a awm ta. Tûnah chuan uchuak lutuk a nih ngawt loh chuan ‘mak’ pawh kan ti tawh lêm lo. Hmeichhia-in mipa thuam inbel an duh a, mipa-in hmeichhe thuam inbel an duh bawk si; fesawn lam tuimi leh siamtuten ‘uni sex style’ te an siam chhuah phah a. Mipa leh hmeichhia hian danglamna kan nei tlêm ta hle. Tûnlai mipa fesawn chhuak thar pakhat chu ‘Pherh Fesawn’ tia a hming ka phuah ve hi a ni. TV sirial kan en aṭangin a ni emaw, mipate hmeichhe bula an tâl tam avang emawa lo awm pawh a ni thei a, chu lo pawh chu tam tak a awm thei ang. Tûnlai fesawn chhuak thar pakhat chu a ni ve hrim hrim. Mahse, he pherh fesawn hi chuan tûnhma fesawn inthlâk ang mai ni lovin nunphung a khawih buai pha tlat.

Kan pawm emaw pawm lo emaw pherh fesawn hian Mizoram a rûn mêk a. Mipa, a bîkin râwltharte hian he fesawn hi nalh an ti a, an awt a; heti anga inchei hi nuam an ti a, nunpui hi an châk tlat a ni. Chu chuan mahni inhriatna dik lo a hring a, midang an hmuh dân a dang a, mawi lo takin an kawnfi êm êm tawh mai a ni.

(more…)

Posted in Lifestyle, Mizo Society & Culture, Mizoram, Opinion | 25 Comments »

Nupui neih nawmna

Thursday, February 14th, 2013

Parawl ho leh tlangvalte ka awhthikna ni chhuang lovin, nupui nei tura Pathianin mipate hi min lo duan avang leh Pathian Pathian zia; mihringte min duhsak zia lantirna anih avang zawkin nupui neih nawm zia leh nawmna hi han sawi ve ka duh tlat a ni.

Mihring hi kan in ang vek lova, nupui pasal in nei fuh lo ve tak tak te pawh hi awm a ni a. nupui neih inchhir tak tak leh pasal neih inchhir tak takte pawh an awm ngei ang; amaherawh chu chung; nupui nei fu lo inti te leh pasal nei fu lo inti te pawh chuan, han sawi chhuak duh ngat sela chuan nupui an neih hun engemaw lai tak kha chuan nupui neih nawmna hi chu an tawng ngei ngei ringawt. A nawmna chu rei leh rei lo a awm a ni mai zawk. Nupui neih hi engtik lai mahin nuam tihna ka nei reng reng lo ti hi chu an awm ka ring lo.

Aw le, kan thupui lamah ve thung aw! Mihring pian phung leh Pathian min duan dan atang rengin kawppui nei tura siam kan ni a; chumi avang chuan kan taksain puitlin lam a rawn pan atangin hmeichhe zah atanga intanin, hmeichhe bula awm nuam tihnaah a rawn chhova, an tel lova awm thei lo khawpin hmeichhe ngaiin mipate hi kan kur ta, chumi thinlung nawrna avang chuan awm dun theih dan ngaihtuahin mipaten theihtawp kan han chhuah a, tichuan, a vawrtawpah nupaah kan lo insiam ta thin. Hemi tel lo hi chuan mipa hi a mal ngawih ngawih a,khawharnain a khat thin. Mipui zingahte, huau huauahte pawh tel ve mahsela, hmeichhe tel lo chuan a mal ngawih ngawih a, a khua a har veng veng thin. Mipa thinlung ruak, khawhar, lungleng chu hmeichhia hian an lo hnemin an lo luah khat ta thin a ni. Tichuan thinlung mai ni lovin tisa nen pum khat, damchhunga awm dun reng tura in ngai leh induh leh in beiseiin nupaah an lo insiam ta thin. Nupui chuan mipate khawharna leh mal em ema an inhriatna te kha an lo la kiang ta thin a.Mipate hi dam chhan neiah min lo siam ta a ni.Nupui han neih hi chuan dam chhan hi nei ta veng veng hian kan in hria a, thihte hi kan hlau ta em em mai thin. Damchhan nei reng reng lova inhriate hi a ni khawvel a mi khawngaihthlak berte chu!
(more…)

Posted in Adventure, Lifestyle, Luangliam | 22 Comments »

« Older Entries
Newer Entries »