Archive for the ‘Luangliam’ Category

Oh, Mizoram, where art thou lovers?

Wednesday, June 19th, 2013

Mizoram hi a khawngaihthlak asin aw! A chhan maw?

1. A duh apiangin a pawngsual a. A chhan chu phalna emaw royalty pe miah lovin kum tin ton sing tel state chhunga mau lui luang hmangin an tawlh thla hem hem a. Kan forest officer leh ranger chi hrang hrang sum neih en hian ram ngaw hum that rin chi a ni lovang. Ruah sur tam vangin kan ram a chereu lo hi kan vanneihna ani.

2. Mizo hmel ang pu an nih phawt chuan a duh duh ram hrehawm zawk atangin an rawn pen lut hum hum a. An ram, Manipur state, Assam, leh Myanmar ram tlem tal rawn sawk tel tal sela chuan a pawilo tur. Kan ram khawizu rawn zuk tura lo kal hian Mizote minority ah an la siam dawn.

3. Mizo zinga lehkhathiam tam tawk lahin Mizorama phalna neia awm (legal resident) an Mizo pui, Lai, Bru, Gurkha leh midang aiin state dang chu sawi loh, ram dang mi (foreigner) ngei pawh an en laichin tlat mai a. Heng ho hian Aizawl bazarpui hmun pawh an luah nghet hle tawh niin an sawi ka hre tlat. Heng lehkhathiam thenkhat phei chuan Mizo hnam a awm lo, Mizo hi hnam hming a ni lo, ti tawk lah bo lo. Mizoram pumpui hmangaihtu hi an awm pawn a lang lo. Mizo (Lusei) tawng hmang chin chu kan in hrethiam fu, mahse midang kan state a awm aiin state dang leh ram danga awm duhsak tawk an bo lo.

4. Ram hruaitu tha lah thlang thiam hek suh. Infrastructure (hmunhmarel), school leh damdawiin tha neih aiin biakin ropui kan ngah. Kawng bumboh taka motor tha tak neih, service provider tha hawt si lovin mobile phone, iPad leh gadget man to hralh zar zar theihna a ni lawi si. Utilities (electric supply, tui leh gas) lah khawvel ram hnufual bera awm ang maiin a harsa si.

Mizoram hi mihring angin en chhin teh u, mi khawngaihthlak tak ani. Duhsaktu leh duattu a nei tlem asin.

Posted in Luangliam, Mizoram, Opinion | 24 Comments »

Krista avanga mi â

Sunday, June 16th, 2013

- Rev. Vanlalzuata

Chang thlan : 1 Kor. 4:10

Keini zawng Krista avangin mi â kan ni (I Kor. 4:10).

Vawi khat chu London khawpuiah khuan mi danglam tak mai pakhat a awm a. Ni khat chu “Krista tana mi â ka ni e,” tih hi a kawr hmaah a tar kulh mai a, chuti chung chuan bazaar lun laiah a tei a tei kual a. Mite chuan hmusit takin an nuih ru tet tet hlawm a. A tuk lehah phei chuan a kawr hnung lamah chuan thuziak dang a rawn tar belh chhah leh a. Mite chuan nimin lam aia â zual sauhva ngaiin an nuih a za lehzual a. Amaherawhchu a hnung lama thuziak chuan mi thenkhatte thinlung a khawih ta riau mai a, chuta thuziak chu, “Nang tu tana â nge i nih ve?” tih hi a ni. Mite chuan Krista tana â kan nih loh vek vek chuan Setana tan kan â lo thei lo a ni tih an ngaihtuah zui ta a.Chu pa chu nuihzat ngawt tur a nih lohzia an man ta a. Tirhkoh Paula ngei pawh kha thiamna lamah chuan Gamaliela ke bula sei lian ngat a ni a, tunlaia Phd. kan tih ang hi chu a ni ngei ang. Nimahsela, “Keini zawng Krsta avanga mi â kan ni e,” a ti tlat mai.

Tirhkoh Paula’n, “Krista avanga mi â kan ni,” a tih hi eng nge a awmzia? Krista avanga tuar ngam a nihna te, chân ngam a nihna te, thi ngam a nihna te a sawina a ni. Amah ngeiin, “Kan Lalpa Isua Krista hriatna ropui bikzia avang khan thil engkim hi chânnaah ka ruat a… hnawmhneah ka ngai a ni,” a ti a (Phil.3:7,8). Thu maiin Isua chu a hre mai lo va, amah avangin nun danglam a nei zui a, a tawngkamin Isua thu a sawi mai lo va, a nunpui a. Mite tih dan zui lovin Isua tih dan a zui a, “Amah avang leh amah atang leh amaha tan thil zawng zawng hi a lo awm a ni,” a ti tawp mai a (Rom 11:36).Khatiang khawpa mi thiam kha, Isua avangin hmuhsit leh endawng a tuar nasa hle a, lung inah vawi eng emaw zat a tâng a, khawvel mite ngaih chuan a va han â tak em!!

Krista avanga Petera-te âtziate kha khawvel mite chuan an nuih zat hle ang. Galili dilah khan lawng pahnih pil lek lek khawpa sangha tam lutuk an man khan, Lal Isuan amah zui turin a sawm a. An sangha man zo zaite leh an len te kalsanin Lal Isua an zui ta daih mai a. An sangha mante kha han zuar sela, a man chu an nupui fanaute pe te te sela chuan a dik deuh tur. Nimahsela an kalsan daih mai si a, an va â tak em !! â tak an ni e. A hmusit duhtute tan phei chuan mi â let tawp an ni a, mi â ward-a dah mai chi an ni e.
(more…)

Posted in Luangliam, More than words, Religion | 6 Comments »

NANG NGEI HI I LO NI

Saturday, June 15th, 2013

Bawih, kan inkar thu hi a duh duh chhiar atan ka chhawpchhuak ve tawp asin. Thuziak thiam ni lo a, ka rilrua awm ang ang ka ziak thla tawp tawp a nih hi. Lo thinrim suh aw.

Ka thiante nen phone lei turin dawrah kan kal a, phone dawra kan inhmuh kha kan inhmuh hmasak ber a nih kha. Zep lovin ka sawi pawp pawp dawn. Mite chuan an vawikhat hmuhna-a an bialnute an atchilh nghal thu an sawi thin a, kei chuan kan inhmuh hmasak ber kha’n i bul ami kha tha ka ti zawk!!! Thil kal tawh chu inthenna’n hmang lo ang kan tih kha tiraw? A ho em mai, nang ka lo thlang zawk che kha ka la inchhir eih lo.

Khatia phone dawr atanga kan chhuahdun khan kei chuan heti tak hian ka duh ang che tih ka ring pha miah lo. Mahse hun rei lote chhungin min lo hneh reng si. Ka thiante nen kan inhmuh a, kan titi lai vel khan i pian a nalh hle tih ringawt ka lo ngaihtuah a. Mall atanga kan haw kawngah khan i ril zia leh belhchian i dawl reuh zia bak sawi tur ka hre tawh lo asin.

A tawizawngin sawi tawp mai ila, kan inhrechiang tawlh tawlh a, i bula ka awm a ka hlim theihzia leh, rei lote kan inhmuh loh pawha kan inngaih thinzia te chu i hriat ve vek kha. Keimah chauhin in ka luah a, ka thiante pawh hrilh chuang lovin ka inluahah kan chengdun ta mai kha ania. Bawih, chhiar hrehawm i ti em? Min ngaidam rawh aw, mahse ka puangchhuak lo thei si lo. (more…)

Posted in Luangliam | 13 Comments »

I him em?

Friday, June 14th, 2013

Hman deuh khan Aizawl veng pakhat a nula tleirawl fel tak pakhat chu a in awkhlum a. Ruihtheih thil a ti ngai lova, nula fel tak a ni si a. A zirlai ah pakhatna a ni zat zat thin a, Class IX a zir kumin 2-na a ni hlauh mai a, result a hria chu a shock lutuk a, a khawng tawp tih thu an sawi a. Amah a fel a, a nu leh pa hmangaihna a dawng a, sum leh paiah harsatna an nei lova, a zirlaiah nise top ani a, khatia 2-na an ni kha a la na lutuk a, a inawhhlum phah a lo ni a.

He thu atang hian zirtur kan neiin ka hria. Kan nun hi a tluan lutuk chuan kan tan a lo thalo thei dawn ani tih hi ka ngaihtuah a. Motor pawh a break rah fo a tul ang hian kan nitin nunah hian min break tu obstacle te hi awm ve zauh zauh se a lo tha dawn mang e tih ka ngaihtuah phah ta a. Kan thluak nilo, kan thinlungin kan nun a ro a rel hian buaithlak a awm fo. Mental health hi Physical health tlukin a pawimawh si a.

Nangmah han inen teh. I hrisel in sum leh paiah harsatna te tawk miahlo in I nun I hmang em? Hmangaihna kawngah te I tluang purh em? Tin, I zirlai leh I thil tihna ah a sang ber I ni vek em? Mithiamte sawidan chuan mihring nun ah hian ‘average’ nih hi kan mental health atan chuan a him ber an tih teh tlat chu. Enge I ngaih ve dan le?

Posted in Lifestyle, Luangliam, Opinion | 26 Comments »

SHE HAS TO GO

Thursday, June 13th, 2013

Tears are hard to stop; even more difficult to watch them stream down her cherry red cheeks. Love is a funny thing; you don’t choose it – rather, it imposes itself upon you. The human heart is designed to circulate life-giving blood throughout our fragile bodies; it cannot cushion so many emotions. Tears are hard to stop, as I helplessly watch them pour down her cheeks again…

God does not make mistakes. It only takes time for His creations to accept His blueprint for our lives. I believe God was perfectly satisfied when He decided that I should be a Mizo. I was born into a middle-class Mizo family in Aizawl, and was brought up with typical Mizo values and mindset. I love my people and my land, and I have no qualms in proclaiming that we are His chosen people.

Her hands are still warm, but I’m not sure if her heart still is. The last teardrop is slowly running down those soft cheeks, as I watch with mixed emotions. I never intended to fall in love, but apparently Cupid thought otherwise. I’ve seen a woman’s tears before, and am fully aware how false and poisonous it can be. But it’s different this time, and a silent war rages on inside.

(more…)

Posted in Luangliam, Mizo Society & Culture, More than words | 17 Comments »

Dear Brown.

Tuesday, June 11th, 2013

Dear Brown,

I tet lai a i hmel awm dan leh nungchang te kha i unaute aiin a danglamna em em a awm lova. Mahse nangmahah hian engemaw tak zawng a awm a ni, i chhungte hian kan ngaina em mai che. I hmel han en mai hian i zaidam hmelin i rilru a that hmel ngawih ngawih a. Mi i lawm thiam dan leh mi i tih hlim dan zozai hi chu aw.
(more…)

Posted in Luangliam | 9 Comments »

Mihring!!

Friday, May 31st, 2013

Ti hian, misual-ah post 239 ka submit ta! Min lo hrethiam ula, inlan ve deuh zeuh zeuh ka duh si a, ka tel tin aphai ta a niang e, tunhma ang khan ( ti ve khanglang ila) ka hnùm hleithei ta lo. Hei, tunah pawh ka fb wall-a mi ka rawn thlawh phei leh tawp! Thenkhat chuan in lo chhiar tawh ang a, ho pawh in ti viau maithei — misual-a pâwt châk tawh si, pâwt tur dang hre si lo post a nih mai mai hi… post tha tak tak karah lo awm ve luklak teh se. (H)

Tul lova computer, cell phone kan bih peih luatah kan mit a fiah lo zo a.

Ring uchûak tak taka bengah earphone kan hnawh-tawt thin avangin kan ri hriatna a tha lo zo a.

Sahdah, khaini vangin kan hmui hnuai zawk a piangsual a, mi zinga nui tha ngam lo khawpin kan ha a trit-êk a.

Zial vangin kan chuap a ro a.

Zu vangin kan thin a lian a.

Kuhva vangin kan pum a lawng a.

(more…)

Posted in Lifestyle, Luangliam | 18 Comments »

Hmangaihna hi enge a awmzia dik tak?

Monday, May 27th, 2013

Hmangaihna hi a saptawng takin ‘verb’ a ni emaw ‘abstract noun’ emaw pawh lo ni ta se, a Mizo tawng zawngin i han hrilhfiah dawn teh ang… phur fe fe in lo awm em? :P

Pu Lalhmingliana Saiawi chuan hmangaihna chu… ‘.. a chhan leh vang chu engpawh lo ni ta se la, kumtluang a daih chuan hmangaihna a ni mai’ a lo ti a. Mahse, hmangaihna a hrilhfiah a ni lo, hmangaih chhan leh a outcome/ results chungchang a ni a sawi ni!

I hmangaih em em a, a tan chuan i neih ang chhun chhun papawr kan pawh i ui lo a ni thei, si ar lak i huam lo a nih pawhin fur ruah tal do chu i inhuam ve ngei turah ngai ta i la…. ‘Ka hmangaih che a sin’ i han tih zawh chiah hian enge chhanna i beisei ve le! “Kei pawh in ka hmangaih che a sin” a lo ti bawih hnap emaw “Ka lawm hle mai a” a lo ti a nih pawhin a ri i ngaithla tawh lo ang, a hmui phun atangin i focus ang a, a mitmeng i mit sir pah ang.

Chutah chiah chuan suangtuahna ramah i lut kual ang a, zan thla eng hnuaiah tu dang ngai lo ten lungrual a leng dunin, zan dang a awm leh dawn tih hre lo in lungchim takin i kuah zui vawng vawng mai lo maw? I han thang harh a, a chhanna thluk chu eng key nge tih i han van ruai a, Minor nge Major key tih chu i thinlung guiter chuan i han perh chhin ve la. A tapah chuan eng key pawh lo ni ta se, a famkim lohna ni a i hriat ve ang chhun chhun pawh kha, a ti famkimtu ah an lo chang hman tawh si! “Naktuk hi ni lo mai se” i ti rilru em?

Mak tak maiin a tuk khua a lo var a, a ngaite bawkin hmangaihna hi enge ni ta? tiin tapchhak tlawh tur i neih loh pawhin thenawm hnai kuhva dawr bang tlawh chhanin i khup i sai hlarh hlarh tawh mai lo maw? Zan lam a chiang viau si kha a tuk a lo thlen chuan zanin ah min la hmangaih tho ang em? tih i dawn zui vawng vawng a, zing chaw hmeh anthur tlak hang chauh a lo ni nen, vai buhfai urh rim nen harsa ti takin chaw tlang i lem tawk tawk in ka ring! (more…)

Posted in Luangliam, Mizo Society & Culture, More than words, Opinion | 8 Comments »

RAMÂR HMANGAIHNA

Friday, May 24th, 2013
Tho hreh takin khumah ka let ka let a, âr a rawn khuang chiah a, barakhaih ang mai in khumah ka ding ta hluai a. Ârpa ka ngah tehreng nen, chu Ar khuang danglam bik na chu enge?

CHU ÂR CHU: Zing tina khuang thin, tuktina chaw ka pek, ka duat em em, ka ar zinga ka ngainat ber a ni, fa chuam anga ka enkawl, fa tlumber anga ka duat a ni. Tukkhat chu kawhmawhbawlin âr dang a chuk chiam mai a. Chaklo leh naupang zawkte bula awmdanmawi zirtir ka duh avangin ka arpa huaiber bulah chuan ka khung lui ta a. A hlau ngang mai!! A lu thukru in bih ruk a tum a, pakhat zawk lahin dimdawihna tel map lovin a mawng ah tak mai chuan a pet ta lauh lauh mai a. A sualhuai zawk ta na na na chuan a nawp ta nek a, a hnehsawh ngei mai. A râk teng tunga, ar dang hriat ah tlawmzawk nih thu puangzar in a iak ve ta vak vak mai a. Ar dang ho paw’n an lawm vang nihmiang an lo kawkawdak ve noh noh mai bawk a. Khami tuk kha chu kan chhung kan bengchheng ngei mai!! Chuan eng tin zel?

TLÂWMAH A LA: Tlawmzawk nih chu a la na ngang mai!!! Ka’n la chhuak chiah chu, a zum zât mai a, Âr dang bulah pawh awm duh miah lovin, âr la dang lah a ngaihsak tawh hek lo, a sim chiang hle ah ka ngai mai a!!! A tuk khua a lo var a, a khuang ka hre ta hauh lo mai, ka zawng chiam a, ka beidawng der a ni!! Khawi lai ah emaw lo thi palh a nih takin ti in chhung chhungin thenawmte ramah kan zawng luih luih a. A ruang rêng hmuh tur a awm lo a, a thawm lah hriat tur a awm tawh hek lo!!! Pûâl lenga thlangtla an sawi ang vang vang in a reh ta vawng vawng mai a ni.

KA LUNG A LENG: Thla hnih a liam. Tuktin ka tukverh bianga thlawk kai a khuâng âl âl-a min kaitho ziah tu, ka hmel a hmuh apianga thian te tlansan a min pan dat dat thin, ka âw a hriat apianga khuan chak ziah mai, ka Pisa ban hun awm vel a rawn haw ve ziah thin a ni. Mahse, Tunah chuan a awm tawh lo, ka khua a har ta takzet mai!! Ka ngaih em avangin zingah te hian a lo chhâwn mial takin ti in veng mawng lamah te ka zuk khuang ru vel thin a, a chang leh arnu kak ang hian ka kak ve chiam chiam mai thin!! Hmelhriat ten “U Zra kan huan ah a rawn khuang thin, U Zra hi tun lai chu a kâk vak vak zel” ti a an sawi hlau chung chungin, KTP leh YMA a ka OB nihna hre ran in a rukin rei fe chu ka khuang ru ta tang tang a. Mahse, Thla khat a liam a, a ngaihna a awm tawh ngang lo, a tawp nan ti in Chhingaveng nena kan in ri na ah ka ngam tawka ringin, ka va khuang leh hrâm a. Ka âr chu ka mangtha zui ve ta nge nge a.

(more…)

Posted in Lifestyle, Luangliam, Mizo Society & Culture, More than words | 8 Comments »

Nu Lehkhathawn. (Mothers’ Day Pual)

Monday, May 13th, 2013

(Admin note: Sorry, nimin current a mumalloh avangin kan rawn online theilova, a tlai tawh deuh na in kan rawn chhuah tho e)

Ka fa duh tak,

Ka kum tea lo tam ve tak avangin, ka tawng te a lo fiah ta lo deuh a, ka sawi ngai I hriat loh ka hlauh avanga ka sawi nawn ka sawi nawn anih pawhin, min hrethiam hram ang che. Tawng I thiam tirh I la tawngfiah theih hma si a, I duh zawng ngen a, I sawi ngai I sawi I sawi thin lain dawhthei takin ka lo ngaihthlak sak thin che kha.

# Ka khup te lo chak lovin, ka lo tlu naih naih palh anih pawhin, I naupan laia I tlu tur venga I kuta ka chelh thin che kha hre chhuak ve thin la, I tlu palh I tah bai bai chang a, hmangaih leh duat taka ka kaihthawh thin che kha.

# I hnaah buaiin, I nupui/pasal fanaute tan I hun awl hman zawh I thlahlel tih pawh ka hria e. Ka thusawi hmanlai leh thing ve tak tak te chu min ngaihthlak sak ve hram thin la. Tawng I thiam hma leh I thiam tirh a I thusawi hriat thiam tuma dawhthei tak a ka beng ka dawh hram hram sak thin che leh, ka hun ka pek thin che kha hre rengin I hun min pe ve hram hram thei ang em?

# Ka lo upat tak avanga mahni taksa pawh thunun tha hlei thei lova, khuma zun ka cheh mai mai anih pawhin, I naupanlaia I zun leh ek hmangaih taka ka thiar sak thin che kha hre rengin, min hau mai lovin, min then/sukfai sak hram hram thei ang em?

(more…)

Posted in Lifestyle, Luangliam, Mizo Society & Culture | 7 Comments »

« Older Entries
Newer Entries »