mi(sual).com

Chhawl ang thliah hnu I vul lai nite,
Chunnu kan ngai bang nem le.
Chhingmittui nen kan chhui I sulhnu,
Puan ang chulzai rello nang ngaih hi.

Thunawn:
Nghilhni I awm dawnlo chun nunnem!
Thinlai tui ang dam diai Lunghnemi.
Kan chhuang em che aw min hmangaihtu,
Muangte’n chawl nang che I Lal hnenah.

I par min dawn a I hrai lengte,
Muangte’n kan leng I zar luai an.
Awi maw! Hnuh uai a chang zo ta si,
Kan dawn lai Zarluai I fam ta maw!

Piallei dai an I zal ta si maw,
Kan lawina run riang zo ta.
I hrai lengte kan hrilh a hai lua,
Chunnem, kan la tiam lul lo asin.

• PS: An Nu, khupbiha dam in mual a liamsan hnu-a amah hriatreng nana min phuah tir ve ani e.(anmahni chu sawilo mai ila).

Khawvêlah innghahna tùr ka nei lo hi ka lâwmna a ni,
Pathiana innghah nachâng ka hriat phah a.
Sum leh pai ka ngah lo hi ka lâwmna a ni,
Vâna ka ro min hmuh fiahtîr a.
Ka hrisêl lo hi ka lâwmna a ni,
Vân nawm tùrzia min hriattîr a.

Ka hrehawm avangin ka lâwm ang,
Ka nawmna tùr min zirtîr avangin.
Ka lungngaih avangin ka lâwm ang,
Hlimna thurûk min hmuh chhuahtîr avangin.
Beidawnnain min hliamin ka lâwm ang,
Beiseina nung ropuizia min hriattîr avangin.

Ka paws 130-na a rawn chhuah khân ka rilruin “A bâk chu insûm ve deuh tawh ila a ṭha ang. Midangte ken nachâng hriat hi mi hawihhâwm hna a ni ngai e” tiin ka ngaihtuah neuh neuh a. Mahse, nizân chu he thu hian rûlhlût ang maiin min ei ngut ngut a, min ei chhiat hma ngeiin ka rawn phawrh leh ta nge nge a ni e. Kei, Eden bawhchhiatna hrik pai, ka nu chhûl aṭang rênga sual saa hrin, pian tirh aṭanga mi lawilo leh hnaisailo, lu chhîp aṭanga ke lêr thlenga pân chhia-ina a bawm khah; finna tlânsan, thiamna hawisan leh hriatna bihrûksan hian in mi hriatthiamna ka rawn ngên nawn leh a ni e. Paws za leh sawmthum leh pakhatna!

Hmangaihna hi hriatthiam phâk rual a ni lo,
‘Hmangaihna’ erawh chuan min hrethiam ṭhin.
Midangte hmangaih dân ka thiam ne-maw,
Min hmangaihtu hmangaihna erawh ka hai si lo.

Hmangaihna hi mit delin hre ṭhin mah ila,
Min hmuh hmaih ngai si lo.
Mihring chuan mitin kan hmu a,
‘Hmangaihna’ erawh chuan thinlungin.

Mihringte chuan hmangaihna hi mak kan ti a,
‘Hmangaihna’ erawh chuan min zirtîr ṭhin.
Hmangaihna avangin mittui a luang a,
‘Hmangaina’ erawhin a hru hul ṭhin.

Hmangaihna avangin miin a nunna a chhat a,
‘Hmangaihna’ erawh chuan nunna a ngaihlu ṭhin.
Hmangaihna avangin kan tuar a,
‘Hmangaihna’ erawh chuan kan hrehawm a phal si lo.

Hmangaihna avangin kan ṭap a,
Hmangaihna erawh chuan hlimna thlen a tum ṭhin.
Hmangaihna avangin kan nui a,
‘Hmangaihna’ chu a lâm ṭhin.

Hmangaihna hi kan zawng a,
‘Hmangaihna’ erawh chuan min kalsan ngai si lo.