mi(sual).com

Brig. Sailo-an Gas Pipe Line Atangin Power Tam Thei Ang Ber Leh Mizote Tan Thawh Theih tur Tam Ber A Phut
Aizawl. August 22 : MPC President Brig.T.Sailo chuan Mizoram tana rotling tur khawpa Mizoram lui liante khuap turin Mizoram sawrkarah beiseina a nei tawh lo tih a sawi a, sawrkar laipui hma lakna avanga Myanmar atanga Gas lak luh tur kawngah Mizoram kilometre 300 chuang Gas Pipe Line-in a paltlang turah chuan kawlphetha tam thei ang ber leh Mizote thawh theih tur hna, a tam thei ang tichhuak zawnga theih tawp chhuah turin Mizoram sawrkar a beiseiin a ngen. Brig.T.Sailo hian nimin khan ama hming ziakna ngei press statement tichhuakin kawlphetha tam tichhuak thei tura Mizoram luite khuap tur chuan dan anga dik taka roreltuten ro an rel ngam a ngai a ni a ti a, dan anga ro rel a nih phawt chuan compensation tam lutuk avanga Mizoram lui liante khuah theih lohna chhan tur a awm lo a ni a ti. Rorelna dik hnuaiah Mizo tumahin an hamthatna tur avangin ram pum huap thatna tur an dodal duh a rin loh thu a sawi.
Brig. Sailo chuan Mizoramin harsatna kawng hrang hranga a tawh meknaah mimal tinte chu mawhphurhna nei theuhah inngai thei se a duh thu a sawi a. “Engtinnge kan ram hi kan siam that ang?” tih ah party tin hruaitute inelna neih hun a tih thu a sawi. Buh (chaw)-a intodelhna chungchang sawiin Brig. Sailo chuan hemi atan hian kawlphetha leh kalkawng a pawimawh a ni a ti a. Kum 1981-82 khan ruahmanna mumal tak an lo siam tawhin bul an lo tan tawh niin a sawi.
Kawlphetha hmang chuan Mizorama lui lian kam zawl leh awi tlante leiletah a siam theihin kum khatah buh vawi hnih a thar theih a, tlangramte pawh leilet (dry terrace) kum khata buh vawikhat tharnaah siam theih a ni bawk a ni a ti. Hetianga tih theih a nih chuan kham khawp Mizoram atanga thar a ni ang a, kum tina lo hal a, lo neih thin a bo ang a, Mizoram tan politics tak a khelh theih tawh dawn a ni a ti. Hetiang atan hian hun chu a duh rei lo thei lova, sawrkar leh kut hnathawktute an tanrual chuan kum 10 chhung leka puitling tur a ni a ti.

World Bank Kawng Siamtute Harsatna Donation Khawn Vang A Lo Ni – CMZP
Chhimphei Joint MZP chuan Aizawl-Buangpui kawngpui siam mek chhe lutuk siam that a nih theih nan he kawng siamtu contractor engineer-te nen kawng siamthat ngai laite August ni 15 khan an enfiah a, hetah hian political party thenkhat leh NGO thenkhatten donation tam tham tak vauna nen an lo dil thin avanga kawng siamtute hian harsatna an tawh thu an lo hrilh a, hma lak pui turin an ngen tih an sawi. Donation khawnna lehkha zawng zawngte an kutah an lo hlan a, chuvangin he kawng siam hna tluang taka a kal a, a hlawhtlin thuai theih nan donation khawn a, an harsatna lo thlen thinte chuan khawn zui tawh lo se an duh thu CMZP chuan an sawi. Donation khawnlui a, kawng sial hnaa harsatna siamtu chu a tul angin an do dawn tih CMZP chuan an puang a, a tul angin heng donation khawntute pawh hi an tlangzarh emaw, Police hnenah FIR thehlut emaw an tum tih an sawi.
CMZP chuan tuna Aibawka KV 33 Sub Station thar dah turah sawrkar chuan ban (tower) tha ngei phun thei se, thil chhe leh mai thei, nakin lawka thuanawp leh tur ni lo, a tha ngei pe se an duh thu an sawi bawk.

Theological Education Sunday hlawhtling taka hman a ni
BCM chuan nimin piah khan Theological Education Sunday pualin kohhran hrang ah hun a hmang a. AICS a zirtirtute leh zirlaite chu hmun hrang hrangah in sem darhin he hun hi an hmang a. Aizawl-ah Rev Dr LH Lalpekhlua hovin, Chaltlang kohhran an tlawh a, Mrs Amongla Jamir hovin Shalom Kohhran leh Town church te an tlawh a, zirlai ten Gilead kohhran an tlawh thung. Rev HC Vankairinga – Serchhip & New Serchhip. Lunglei:- Rev Dr K.Thanzauva – Zotlang, Serkawn, Ramzotlang. Dr RL Hnuni – Salem, Chanmari. Rev Rodinmawia Ralte – Rahsiveng, Moria, Venglai. Rev VL Hruaia Khiangte – Electric, Chanmari Vengthlang, Edenthar. Mr Keci Siang – Sethlun, Gilgal, Lunglawn. Andrew Lalhmangaiha – Zobawk. Rev R.Lalthanmawia – Zohnuai, Venghlun, Bazarveng ah te he hun hi an hmang.
AICS hi kum 2000-ah din tan a ni a, tunah hian Lecturer 12 an awm a, Zirlai 65 an awm mek a, Batch thar hawn a ni dawn a, tun thla tawp hian written test leh interview an nei dawn a ni, diltu mi 50 vel an awm. AICS atang hian BD zirchhuak 42 MA (Missiology) 4, Missionary Orientation 10 in an zo tawh a, Pastoral hna-ah te Missionary te leh Mission field-ah te puiin heng zirchhuak te hian Pathian rawngbawl hna an thawk mek a ni. Nimindar 11:00 khan BCM hruaitute chuan Lunglei ah chanchinbumite an kawm bawk.

Mairang ah harhna thleng
Meghalaya State chhung, Shillong atanga Km 45 vela hla Mairang khuaah August 15 atang khan harhna a thleng a, tun thlengin harhna hi a la kal zel.
He harhna ang hi kum 1906 khan a thleng tawh a, Mizoram atang pawhin chu harhna pawchhuak ve tur chuan an kal a, hemi hnu hian Aizawlah harhna chu a thleng chho ve ta a ni. Shillong Mizo bialtu Pastor Rev. VL Nunmawia chuan, ‘Thawhlehni chhun khan naupang school kalte chuan harhna an chang phut mai a; Biak In lam an pan zel a, Upa leh Pastor ten an buaipui nghal a ni,’ a ti.
Harhna chang naupangte chu a then an tap a, a then an khur a, a then chu tawngtaiin an zai bawk a. Rev. VL Nunmawia chuan thuchah pawh sawi hleih theih loh khawpin he harhna hian a nuai a; zai leh khurhna a nasa hle tih a sawi bawk.

TKP Meet hman zawh a ni
Aizawl City TKP Coordination buatsaihin Pathianni khan BCM Town Church-ah TKP meet cum Bible Quiz neih a ni a. Bible Quiz hi Thufingte leh Thuhriltu atanga neih a ni. He quiz-ah hian bialtin aiawh mi 6 ten inelna an nei a, hetiang hi a result chu a ni. Point hmuhsan dan indawta dah a ni e.
1. Aizawl ‘w’ Bial– point 147.5 lawmman Rs 1500 an dawng.
2. Aizawl ‘E’ Bial– Point 147 lawmman Rs 1000 an dawng.
3. Aizawl ‘S’ Bial– point 140 lawmman Rs 700 an dawng.
4. Aizawl ‘N’ Bial– point 118 lawmman Rs 500 an dawng.
He Quiz hi MTKP Vice President hmasa ber leh MTKP dintu Pu Vanlalkunga’n a hmanpui a, quiz lawmman tur Rs 2000.00 a tum nghe nghe bawk.

Mizoram ah Bank thar hawn a ni
United Bank of India, Aizawl Branch chu nimin chawhma khan Mizoram Chief Minister Zoramthanga chuan I&PR Auditorium ah a hawng.
CM chuan Mizoram chu state ralmuang, ziak leh chhiar thiam tamna ram leh ram awl zau tham awmna anih avangin sum leh pai a dinchhuahna tur kawng zau tak a in hawng a ni tiin hemi atan remchanna siam thei tur Bank ten hma an rawn la thin chu lawmawm a tih thu a sawi. Mizoram ah bank dang pawhin hma rawn la zel se, chu chuan inelna thianghlim hring chhuakin Bank chhawr tangkai duhte tan hmasawnna a in hawn belh zel a beisei thu a sawi.
India rama UBI Bank Director pahnih zinga pakhat PC Zoramsangliana pawhin director dinhmun a luah atanga thla riat chhung emaw lek a UBI Branch thar Mizorama hmasa ber tur leh India ram pum a 1319 na hawn theih a ni chu lawmawm a tih thu a sawi bawk.

Manipur-ah Sipai An Hrang : Inkhawm An Pawngkahah – NESO
Tun Pathianni zan khan Churachandpur (Manipur), New Lamka-a Evangelical Baptist Church (EBC) inkhawnm sakrament sem lai chu sipaiin luhchilhin nunau an pawngkah chiam mai tih North Eastern Students Organisation (NESO) chuan an sawi a, hetah hian Evangelical Youth Fellowship Chairman Thawng Khaw Lian s/o Rev.Ginzam chu a thi a, mi dang 5 damdawi ina dah an ni tiin pawi an tih leh dem leh hriatthiam har an tih thu an sawi. Nimin khan press release chhuahin biak ina Pathian be lai inkahhlum leh hliam hi Armed Forces Special Powers Act hnawksakzia leh runthlakzia tilang chiangtu a ni an ti a. Sakhaw hmun pawimawh tihbawrhbannaa mawhphurtu a na thei ang bera hrem turin NESO chuan an phut a, tihzuzi a nih chuan hmar chhak mipuite sipaiten rikrapna tinrenga an nghaihsakna hi engmah loah sawrkarina ngai tihnaah NESO chuan a ngai dawn a ni an ti.

Lunglei MZP-in Chawngte Principal duh lo
MZP Southern Headquarters Lunglei chuan Chawngte College Principal AB Nath-a’n an College Magazine-a Kristian-te leh Muslim sakhaw sawi chhe zawng leh, chi leh chi inkara buaina chhuak thei zawnga Article a ziak chu thalo an tiin an duh loh tak zet thu thuchhuah siamin an tarlang a.
Mizo Kristian leh sakhaw dang hmusittu a ni an ti a. Mizo Kristian ten uchuak taka Chakma te tiduhdah anga min puh leh, kan thurin Bible chhungthu mawi lo taka a kaihlek pawi kan tiin lungawi har kan ti takzet a. Hetianga Sakhaw hmusittu hi Mizorama awm reng tlakah kan ngai lova, chuvangin thil duhawm lo zawk a thlen loh nan tun thla chhung ngeia Mizoram chhuahsan turin MZP chuan a duh a. Mizoram a chhuahsan lo a nih chuan a tul anga hmalak zel kan tum bawk a ni, tiin an thuchhuah ah chuan an tarlang.Hemi chungchang bawhzui tur hian Lunglei MZP hruaitute chu Zirtawp tlai khan Chawngte-ah an kal nghal a ni.
CM in hlan
Nimin khan CM Zoramthanga chuan kum 2010 a India in Common Wealth Games a thlen tur atana inpuahchahna tur lehkha leh pwimawh dangte Mizoram Olympic Assn. hruaitute hnenah a hlan a.Heng thil pawimawh te hi Zoliana Royte in a dawng a ni.

Kum Tling Lo Pawngsual Bawk
MHIP Gen.Hqrs. chuan Tv.Thanmawia, 38, Muallungthu chuan zirtawpni August ni 11 chhunah hmeichhe naupang kum 5 mi a pawngsual pawi an tih leh dem thu an sawi a, pawngsualtu hi court-in a hrem theih sang bera hrem tura an duh thu sawiin hetiang thil a thlen tawh loh nan Mizo mipa zawng zawng an ngen.

MNF Sub.Hqrs. Camping
Aug 22 – 25, 2006 chhung hian Residential School Pukpui, Lunglei-ah MNF Sub Hqrs. bul tumin Gospel Camping neih a ni dawn a, Speaker atan Major Dr. ST Dula a ni ang. He Camp-ah hian MNF Sub.Hqrs. in lut tura a tih bak a duh apiang tan luh theih anih thu camping secretary chuan a sawi.

Solo Competition Lungsen-ah:
Lungsen Branch MZI chuan Sept. 6,7 leh 9’06 zan khian Lunglei Dist. Open Solo Competition an buatsaih dawn a. Hetah hian Roliana Ralte hla, ‘Zan Lalnu’ tih chu sak tur a ni a, mahni hla duhzawng pakhat sak bawk tur. Lawmman Ist – Rs 2000/-, 2nd – Rs 1500/-, 3rd – Rs 1000/- a awm ang. Hrechiang duh chuan 9436146081 / 9436370587-ah zawhfiah theih a ni.

Lunglei MSU thiah a ni
Mizo Students’ Union (MSU) Gen.Hqrs. chuan MSU Regional Hqrs.Lunglei chu suspend-in Adviser Rule-ah a dah a. Hetiang hian hruaitu lailawk a ruat nghal: Chairman – Thanghmingliana Renthlei, Vice Chairman – Eric R.Zomuanpuia, Secretary- K.Lalrochana, Treasurer- David K. Lalmuanzuala. Hetiang boruak awmna chhan hi MSU Regional Hqrs. President chuan Vice President a suspend a, boruak sang chhovin, MSU Gen.Hqrs. chuan MSU Regional Hqrs President thil tih dan chu pawmpui lovin hetiang hian hma a la ta hmiah mai a ni. Hemi chungchang hi nimin khan MSU Regional Hqrs-a hruaitu nihna hlih sak takte leh hruaitu lailawk tura Gen.Hqrs. rawn ruatte chu an adviser Dr.J.Zorema hovin an Office Venglai-ah an inhmukhawm.

Journalists’ Ethics Sawihona
Nimina MJA buatsaih-a press mi zawng zawng tana Aizawl Press Club-a “Code of Ethics for Journalists” sawihonaah chuan lunch (chawchhun sem) thleng chuan journalist-te awm tha hle a, lunch hnuah chuan an tam lo hle. Chanchinmite zalenna zau tak chuan mawhphurhna a keng tel a ni tih chuan sawi a hlawh hle.

Similar Posts:

• World Bank kawng hawn a ni
• MZP nena an buaina LDYCC-in a sawifiah
• Health Minister-in a mit a donate
• Zo Quiz
• Thil tisualtu zawk chu MZP hi an ni. Thudik hre duh tan SP leh Magistrate a zawh theih reng e – LDYCC

Recent Posts:

• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?

This entry was posted on Tuesday, August 22nd, 2006 at 12:44 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.