Mizo Aw News :: Sept 15

September 15th, 2006 11:41 am by narzhoc

Lalduhoma’n Zin Loh Bill Lak Pekir : Sawrkar Sumah
Dahluh Dan Tur Bangbo
Aizawl, Sept. 15 : ZNP President Pu Lalduhoma chuan Ratu bial MLA a nih anga MLA-ten an lak theih Free Travel Facility zin si lova kum thum chhung atana a pawisa lo lak tawh Rs. 3,90,947.000 chu nimin khan Mizoram Legislative Assembly-ah a pekir. He pawisa a pek kir hma hian Aizawl Press Club-ah rei lo te chanchinmite kawmin hetianga pekkir thutlukna hi mi dang tumah kaihhnawih loha ama pual liau liaua a siam a ni tih a sawi a, hetianga zin lohna pawisa lak hi corruption pangngai nen danglamna awm lova ngaia mipuiin hriatthiam harsa an tih avangin mipui beidawng tak MLA-ten mipui an siam pawi a tih thu a sawi a, an rawng an bawl mipuite berin dik lo an tih avangin chu ngaihdan chu tawma heng pawisa a lo lak tawhte chu pekir a ni tih a sawi.
Hetia sum Pu Lalduhoma pek kir hi Assembly Secretary Pu Ngurthanzuala chuan kum kal tawh ami, account pum lo chinfel tawhte a nih avangin sawrkar suma thunluh lehna tur head of account pawh buaithlak tawh a ni ang tiin a kuta dah lo turin a ngen a. Mahse, Pu Lalduhoma chuan a pe let ta tho a, Assembly Secretary chuan Speaker zin hawn huna ngaihtuah tur a nih thu a hrilh.
ZNP President hi Vice President Pu C.Vulluaia, Gen.Secretary Pu K.Liantlianga, Ru Rualkhuma Hmar leh hruaitu dangten press conference leh Assembly Secretary hnena pawisa pek kirnaah hian an tawiawm a. Pu Lalduhoma chuan Mizoram MLA ten LTC leh TA an lo lak theih thin chu titawpa, April 1991 atanga Free Travel Facility siamna danah hian MLA-ten an zin ngei a tih finfiahna atan ticket,etc. an thehluh phut a ni lova, tun thlengin rules pawh siam a la ni lo a ti a. Chuti chung chuan harsatna emaw sawiselna emaw pawh awm lovin kum 16 lai hetiang hian hman a lo niin tih danphung pangngaiah neih a lo ni a ti.
Hetiang kalphungah hian Pu Lalduhoma chuan inthiam lohna chang pawh hre lo leh pawi khawih nia inngaihna rilru pawh pu lovin a lo la ve mai tih a sawi a, he facility la vetu a MLA puite pawh rilru bawlhhlawh pu chunga la tumah an awm a rin loh thu a sawi bawk.
Pu Lalduhoma chuan tunah erawh chuan he dan hrim hrim leh a hman dan hi sawisel theih tak a lo ni reng mai tih an lo hre ta a ni tiin he dan siam that a nih loh chuan ZNP MLA-te chuan he facility hi an la tawh lovang tih a party chuan a lo puang tawh a ni a ti. Mipuitenhruaitute chunga duhtuina an nei lawmawm a ti a, rah tha tak a chhuah zui zel a duh leh beisei thu a sawi.
Pu Duhoma chuan he thil hi ram tan Pathianin malsawmna inthup leh hmanraw tangkaiah a chan tir theih tih hriaa beidawnna leh thil dik lo ngaia neih phah nana hmang lova beiseina thar nen hma lam thlirtirtua hman tum turin mipui a ngen.

O.P.Singh Chhuitu Commission Report : “Sawrkarin Thudik A Hupbo” – Congress
Aizawl, Sept. 15 : Mizoram Congress (MPCC) chuan Agriculture Director (hlui) Dr.O.P.Singh cheng nuai 70 chuang eirua puh chhui danah MNF sawrkar chu a thil tih theihna hmangin thu dik a hupbo a ni tiin hei hi mipuite zahlohna a ni an ti. MPCC huan MNF sawrkar hnuaiah mipui sum tihchingpena a awm fo tawh ti sawiin chhui chhuah theih aram a awm lo na an ti a. Zoram mipui thlavang hauh nan a tawp thlengin MPCC chu a kal zel dawn tih sawiin an eiruk thup nan MNF sawrkar chuan a Officerte hun khirh tak a hmachhawntir fo a ni an ti a, an dem thu an sawi. Nimin khan ADCC President Pu Lalrinliana, MLA leh MPCC Legal Cell Chairman Pu R.Lalrinawma leh hruaitu dangten Aizawl Press Club-a chanchinmite an kawmnaah kum 2004 November thlaa, chutih laia Congress MLA, tuna MCP MLA nia sawrkar thlawptu Pu Liansuama’n Mizoram Assembly inkhawma chutih laia Agriculture Director Dr.O.P. Singh cheng nuai 78 lai tichingpena a puhna Mizoram sawrkarin a chhuitir Pu Remmawia Vanchhawng Inquiry Commission Report sawrkar atanga RTI Act hmanga an dil chhuah atangin an party ngaihdan leh hmuh dante an sawi a, “Corruption kan do tlan laia a sawi kha a ni a, tunah hian Pu Liansuama chuan engnge a sawi dawn “ tiin an zawt a. Dr.O.P.Singh chu amah mai ni lo, a chung lama mite thu anga hetiang pawisa tam tham tichingpen ni ngeia an rin thu an sawi. Zawhna chhangin Congress hruaitute chuan Remmawia Inquiry hian Dr.O.P.Singh hi Anti Corruption Department chhui turin a recommend a ni an ti a. Mahse, Mizoram sawrkar chuan Pu L.R.Laskar, IAS (retd) chhui thattirin L.R.Laskar Inquiry chuan Dr.O.P.Singh puhna chu finfiahna awm lo tiin a report a, Mizoram sawrkar chuan Dr.O.P.Singh chu a thubuaiah thiam a chantir a, suspend chhunga a hlawh a pe kim a, suspend chhung chu hnathawk (duty) angin a chhiarsak bawk a, a thubuai tihfel hmain a hna a lo zawmtir tawh a ni.
Congress hruaitute chuan Pu Piangthanga, SDEA, Saiha-in Rs.3,10,000 a chenna ina ni 10.4.2004-a a pek ni leh Pu Lalfelkima, Cashier, DAE Office ami leh Pu V.O.Oppaya, Head Assistant, DAE Office-a miten ni 10.4.2004 (inrini)-a ama chenna ina Rs.11,00,000 an hlan nia an sawi nia Dr.O.P.Singh-an Rengdilah awm nia a insawi hi inrinni a ni a, mahse, Commissioner of Agriculture chuan 9.4.2004 – 11.4.2004 thleng station leave chawlh a pe a ni tih tarlan a ni a, ni 11.4.2004 chu Easter Sunday a ni a, public holiday vek a ni an ti. Heti chunga hmun hla lutuka kal bo vang vang tur ni si lo sawrkarin station leave chawlh a pe tlat mai hi thil mak a ni an ti.
A dawtlehah chuan Aizawl, Kolasib, Lunglei leh Champhai DAE te leh an kaihhruaite chu Inquiry Commission hmaah ni 16.3.2005 hmain an thu leh hla ngaihthlakna hmahruai (preliminary hearing) neih vek a ni a, Dr.O.P.Singh hnenah Accelerated Irrigation Benefit Programme (AIBP) sum an hlan ngei thu an sawi vek a. Mahse, Dr.O.P.Singh chu inbuatsaihna hun tha tawk pek nia nia langin ni 14.11.2005 khan Commission hmaah koh a ni a, preliminary hearing n eih chauh nia tarlan ni siin DAE ten sum an pek ni leh thla nia sawiahte chuan Dr.O.P.Singh chu Aizawla a awm lo thu finfiahnate siam a ni.
Pathumnaah chuan DAE hotuten pawisa tam tham tak Dr.O.P.Singh an pe ngei tih Inquiry Commission hma an sawi mek laiin Directrorate of Agriculture chuan DAE-ten AIBP sum an dawn zawng zawng bo thlau awm miah lova a nihna tur atana hman tangkaina (Untilization Certificate) siam fel a, Finance department-in an certified hnuah central sawrkarah thawh thlak a ni hi thil mak tak a ni.
Congress hruaitute chuan DAE Aizawl, Lunglei, Kolasib leh Champhai hian an sum chin vel danah CCS Conduct Rules Section 3, Sub section (2) (iv) an bawhchhia a, mipui sum Rs.73,66,000 lai tihchingpennaa inkhinnaah hian thiam loh an chang ta nia tarlan ni siin anmahni an huat vang ni lovin, an chungah sawrkarin action a la dawn em tiin an zawt a, a thiam lo zawk hrem hi sawrkar tih ngei tur niin a lang a, tun thleng chuan thawm engmah a awm lo hi thil mak a tling a ni an ti.
Ni 3.4.2004-ah Dr.O.P.Sing hnenah Pu P.A.Thomas, DAE, Kolasib chuan Rs.10,00,000, ni 5.4.2004-ah Pu Lalfelkima, Cashier DAE Office, Aizawl chuan Rs.24,00,000 a pe tih a ni a, Dr.O.P.Singh chuan heng niah hian New Delhi-ah a awm tiin Govt.of India Meeting buatsaihah a tel tih a sawi a. Mr.Ziley Singh,Planning Adviser, Govt.of Mizoram leh Pu Rema, Assistant Manager, MAMCO te pawh Meetingah chuan an tel ve niin Inquiry Commission hmaah a insawi a. Mahse, Meeting Attendance sheet-ah chuan tel ve nia sawi Officer pahnihte hming a lang ve hauh si lo a, thil mak a ni. (He Meeting Attendance Sheet hi Congress hruaitute chuan chanchinmite an hmuhtir a).
Pu Lalrinliana Sailo chuan MNF sawrkar chu tantu an tlem tawh hle nia sawiin a tantute chu sawrkar hnathawk zingah chuan Corrupt Officer tlem te chauh an ni tiin Dr.O.P.Singh chhuinaah Mizo pa Kristian tha tak ring lo zawka Pu L.R.Laskar report a ring mak a tih thu a sawi bawk.
Wng.Cmdr. Lalzawmliana (retd) leh Congress hruaitute chuan thu sawiin MNF sawrkar hnuaiah hian thil dik lo a tam em ema, eirukna lian tham Police modfernisation, toilet van, Aiipuk, CM nupui car man to, Tuirial Hydel Project, Referral Hospital, Greater Aizawl Water Supply Scheme Phase II, Tui Meter, Baffacos sum, PMGSY kawng lai leh a dang tamtakah MNF sawrkar hi an fihlim a nih chuan an control loh CBI chhui an ngam tur a ni a, CBI chhuitir ngam lo an nih chuan Pu Hawla case hi sawi sawi ngam tur an ni lo an ti.

Thawhtanni Atangin Aizawlah Taxi An Intlanchhawk Dawn
Aizawl khawpui chhungah thawhtanni Sept. ni 18, 2006 atang hian thu leh awm hma chuan taxi-te ni inchhawka tlantir a ni dawn a, taxi number tawp kawpkim leh kawpkim lo an intlan chhawk dawn a ni. He thu hi chanchinmite hnenah Aizawl District Superintendent of Police (SPU) Pu L.T.Hrangchal chuan he hma lakna hi mipui himna leh remchan zawk nan leh Aizawl khawpui chhunga lirthei tawt lutuk tih ziaawmna a nih theih nana pawl hrang hrang hruaitute leh mipui tam zawkte rawn chung leh duh dan anga enchhinna (experiment) atan a ni a, hman reng tur leh hman reng loh tur tih a sawi theih loh a ni a ti.
Aizawl District SP chuan heti taka Aizawl khawpuia lirthei tawt hi a chhan lianber chu Taxi-te an ni a ti a, chu chu tun hnaia nikhat taxi an tlan loh khan a lang chiang a, tin, sawrkar motor-te hi chhan te zawk an ni a, chumi a lanna chu pisa kal leh haw nana motor hmang thei Group “A” Officer-te nawrh lai khan a lang a ni a ti bawk.
Taxi khalh leh neitute chu mi harsa zawk, loan laa eichawp zawng an nih tih pawh hriat a ni a, mahse, hetianga intlanchhawktir hian an hlawk zawk mial emaw, an ngai an awh emaw pawh a ni thei a ti a, chutiang a nih phei chuan taxi-ten chawlh an nei tur chu an tan pawh a tha zawk hle dawn a ni a ti.
Taxi-te hi zing dar 8 atanga tlai dar 6 thlengin an tlan loh tur ni-ah chuan an tlan khap a ni ang a, hemi darkar huam bak leh chawlh (holiday)-ah chuan taxi zawng zawng tan tlan theih a ni ang. Tin, mamawh bikten taxi an tlan ni ni lote an hmang duh a nih chuan Traffic Police Office atangin phalna lak theih a ni dawn a ni. Taxi-te hi an tlan loh ni-ah chuan garrage-ah dah vek tur a ni ang a, kawngpui generalparkingah an dah thiang lo a, an service ni-ah pawh general parkingah chuan an dah a thiang chuang lo bawk. Dan awm sa angin taxi-te chu an tlan ni-ah chuan khawi stand-ah pawh dingin an tlan thei ang a, stand chungchanga harsatna siam an awm chuan traffic police hnenah complaint thehluh tur a ni.

Aizawl Khawpui Lirthei Sing 3 Chuang : Enkawltu Traffic Police 128 Chauh An Awm
Aizawl khawpuiah hian lirthei a tam ta hle a, Traffic Police lam chhut dan chuan Aizawl khawpuiah hian lirthei 35,000 vel a awm. Aizawl District chhungah lirthei 40,000 chuang an awm a. Hengte che vel viltu tur Tranffice Police 128 an awm a, kawtthler hrang hranga nikhata darkar 7 chuang duty thinte chu mi 90 chuang hret an ni. Aizawl SP chuan Aizawl khawpui kawng zim leh lirthei tawt avang hiankhawlai/kawtthler-a duty pangngai bakah mipui punkhawmna tawh phawtah chuan Traffice Police-te an tel ve zel a ngai tawh a, chutiangah chuan kumin chhung hian inneihna 26, thihna 29, mimal leh pawl thiltih 89-ah traffice police-te an duty loh theih lohna a awm tawh a, sawrkar thiltih (function) 24 a awm tawh bawk a ni a ti.

MNF Sawrkarin Khawl Hlui Lei : Congress Thalaiten Dahbo Turin An Vau
Mizoram Congress Thalaite chuan PHE Department-in lei hnuai atanga tui siak chhuahna motor (drilling machine truck) a lei tur (lei tawh) chu a hlui, hman theih loh a ni tiin Mizoram sawrkar chu heng khawl hi a rang thei ang bera thawnkir turin an phut a, heng khawlte supply-tu KLR Industries Ltd.Hyderabad hnenah heng khawlte hi nimin atanga Sept.ni 18, 2006 dar 10:00 a.m. hma ngeia la chhuak turin an hriattir. MPYCC chuan Chief Minister hnenah lehkha thehlutin, a copy KLR Industries hnenah pein he ni tiam chhunga heng bungruate tuna Zuangtui PHE Store Division-a awmte leh a supplier chu inla chhuak turin an hriattir a, hun tiam hnuah bungrua leh a supplier an la awm a nih chuan eng pawh an chungah thleng se, PHE Minister leh Supplier Representative (Bakula) mawh a ni ang an ti.
MPYCC chuan CM hnena an lehkhaah chuan heng tui siak chhuahna khawlte hi a hlui, a thar anga inleitir tumna awm ngeia an hriat thu sawiin he company aiawh leh PHE Minister chu sumdawng dun nia an hriat thute an sawi a, heng khawlte hi indawntir turin hma lak mek a ni an ti. MPYCC chuan sawrkar sum leh pai harsatna leh mipuiin tui an harsatzia an thlirin heng bungruate hi hman theih loh tur khawpa chhia a ni si a, a man atan hian cheng vaibelchhe hnih chuang sen a ngai dawn a ni an ti.
He thu hi nimina Aizawl Press Club-a Pu Lalrinliana, MLA, President, ADCC hova Congress hruaitu thenkhatten chanchinmite an kawmnaah pawh an sawi chhuak a, heng khawl supply tur hian hian KLR Industries company hnenah khan kumin April thla khan supply order pek tawh a niin tunah hian a lo thleng tawh a ni an tia. Khawl lian 2 man Rs.555 lakhs vel, khawl te pahnih man Rs.54 lakhs vel a ni an ti a.

Hrangbana College-in Champion Lawm Dawn
Vawiin hian Govt. Hrangbana College chuan Mizoram University Inter College Sports 2006-a a pumpuia champion an nih an lawm dawn a, khual lian atan Pu K.Sangthuama, Minister leh khual zahawm atan Pu Z.H.Ropuia, Minister leh Pu Vanlalzawma, MP beisei an ni. Zirlai 1,500 vel awmna, India rama College thatna tehna leh Mizoram College tha tehnaa B++ Hrangbana College hian Inter College Sports-ah gold medal 22, silver 14 leh bronze 8, a vaiin medal 44 an hmu a, champion an ni a, a dawttu Govt.Aizawl College chuan medal zawng zawng 32, gold 11, silver 11 leh bronze 10 an la. Pathumna Pachhunga University chuan medal 20, gold medal 8, silver 7 leh bronze 5 an la.
Best athlete 3 zinga Elizabeth Lalnunmawii leh Tlaisun Lalnunsiama chu Hrangbana College atangin an ni a, pakhat chu Lalngaihawma, Pachhunga University College a ni. Tlaisun Lalnunsiama hian mimalah titha berin judo, baxing, discus throw leh javelin throw-ah gold a la.

Kawng Sir Bazar Khap
Zanin atang hian khawpui kawngpui sira chawhmeh leh thil dang (hawkers) zawrh khap a ni dawn a, a bikin Dawrpui pheia zan lam atanga thlai thar zuarte inpho chhuah leh a dawrtute bazar chu khap leh zual a ni. Chhun lamah pawh kawngpui dungahte chawhmeh leh hawkars inpho chhuah, second hand thuamhnaw zuar thlengin khap a ni dawn.

NSS Volunteer Thisen Pe
Nimin khan Govt. Zirtiri Residential Science College NSS Volunteers leh Red Ribbon Club memberte chuan Aizawl Civil Hospital Blood Bank tan thisen an pe a, thisen petu mipa 39 leh hmeichhia 24 niin unit 63 an pe. He Blood Donation huna awm ve turin Ministry of Youth Affairs & Sports, NSS Regional Centre Guwahati atangin Pu Deepak Kumar, Youth Officer leh Pu R.Sangma, Asstt.Youth Officer an lo kal a, Mizoram NSS Unit Liaison Officer Pu Darchuailova pawh a awm.

CM Relief Fund Pe
Bungkawn MNF Unit chuan Chief Minister Relief Fund-ah Rs.2,000 Chief Minister Office-ah an hlan.CMO chuan CM Relief Fund petute chungah lawmthu sawiin a theiten pe zel turin an sawm.

MUP Member Lengpuiah
Director, Information & Public Relations buatsaihin nimin khan MUP Ramthar Unit, Durtlang memberte chuan Lengpui Airport leh hmun hrang hrang an tlawh.

Lung Nate Tan Remchang
Lung (heart) natna avanga B.M.Birla Heart Research Centre, Kolkata pan tur thil hriatchian duh neite chuan V.L.Neihthangi (nunu-i), Executive Business Development, B.M.Birla Hospital, Camp : Aizawl Venghlui biak rawn teih a ni a, Phone 2327616/9436196101-ahte biak theih.

Japan Siam Thilte Entirna
Vawiin leh naktuk-ah YMA Hall Chanmari, Aizawlah Sharp Business Systems (India) chuan Japan siam office hnathawhna autamatic hmanrua chi hrang hrang (Japanese Technology in Office Automation Equipments) an entir dawn a, 10:00 a.m. atang dar 6:00 p.m. thleng a ni a, a duh apiangin en theih a ni. Exhibition chhung hian computer,etc.etc. a man a tlawm ang.

PAMRA Vaubeh Ring Lo
MNF Thalai (MNYF) ten Congress Thalaite chu PAMRA Office-ah luhkhung a, vaubet a, thupha chawina siam luihtir anga an puhna chu ADCC Gen.Secretary Pu K.Lalchhuanawma chuan PAMRA hote chu an diknaah chuan vaubeh mai mai theih an nih a rin loh thu, an thil tihah dik loh an intih chuan thupha chawi ngam, mi huaisen an ni a ti a. An puten bum kawi mai mai mah se an diknaah chuan mi huaisen thih thlenga tang ngam tura PAMRA a hmuh thu a sawi.

YMA Branch Chess
Mizoram pum huap 3rd.Lalrodinga Inter Branch YMA Chess Tournament 2006 Electric YMA Hall-a khelh mekah chuan nimin thleng khan point 12 hmu tawh Serchhip Kawnpui YMA leh Mission Vengthlang North YMA an la sang ber a, point 11.5 hmutu Vaivakawn YMA-in an dawta, Dawrpui Vengthar, Chawnpui leh Bethlehem Branch ten point 11 theuh an hmu. He tournament lawmman hi 1st.prize Rs.7,000, 2nd. prize Rs.5,000 leh trophy bakah lawmman dangte a awm.

Mautam Zirhona
Vawiin dar 10:30 a.m.-ah Vana Pa Hall-ah Directorate of Agriculture buatsaihin Mautam chungchanga hriat tur pawimawhte zirna leh mipui tih bengvarna beihpui hawnna inkhawm neih a ni dawn a, Agriculture Minister Pu H.Rammawi khual lian a ni ang. YMA Libray tha tlan chhuahte hnena lawmman sem a ni ang.

Presby. Hospital Website thar
Presbyterian Hospital, Durtlang chuan website an nei thar a, Rev. Dr. R. Lalbiakmawia, Executive Secretary i/c Hospital- a hawng. Tlawh duh tan website hi www.derhkentlang.org. ah luh theih a ni.

MZU Hnuaiah NSS Cell
Nimin piaha NSS Advisory Committee of Mizoram Pu Z.H.Ropuia, Sports & Youth Services Minister hova inkhawm chuan Mizoram University-ah NSS Cell din ni se, kum 2007-08 atangin University hian Coordinator puitling neiin NSS Cell enkawl se tih a thupungin an rel a, a hun tur chu la ngaihtuah leh ni se an ti. He inkhawm hian Mizorama NSS hma lakna hrang hrang lungawi thlak an ti a, hmasawn zel tura hma lakna tur te sawihovin, Mizoram NSS Unit hrang hranga pawisa sem chhuah dan tur te an rel fel a. Kum 2006-07 chhunga NSS Action Plan thlirhoin siam rem ngaite an sawihoin an siam rem a, an pawm nghal a ni.

Basketball champion lawm
33rd Sub- Junior National Basketball championship khelh zawh taka champion team, Mizoram Basketball Team te chak lawmna chu vawiin khan Synod Conference Centre-ah neih a ni a. Sports Minister Pu Z.H. Ropuia chu khuallian a ni a, fuihna thu sawiin.Basketball Champion Team te hi Pu Chalrosanga (Mavala) RTP chuan a lawmpui nan Airtel Pre-paid Simcard a pe theuh bawk.

Painting Competition Lunglei-ah
Art & Culture Department buatsaihin September 29 khian A&C Auditorium Lunglei-ah Middle School leh High School zirlai naupang te tan ‘On the Spot Painting Competition’ neih a ni dawn a. Sept. 22, ‘06 thleng in report theih a ni.