mi(sual).com

Tukin (01.23.07) zing zet chu ka tho fuh nge fuh lo pawh ka hre lo, Misual.com ka rawn lut a, CM pawisa an chhutna ka chhiar a. Vanglaini.org-ah ka lut leh a, MPC- in Larsap hnenah Mizoram President’s rule a dah turin an ngenna ka hmu leh a, a chhan berah chuan pawisa sum hman dik loh vang a ni berin a chhan an rawn sawi ah khan chuan a lang a. Mizoram hi vei ve hle mah ila, ziak meuh a vei thu han au chhuahpui hi chu, Zoram pawna awm tan chuan a in thlahrunawm thin. Thian zaho titi na leh engemaw han sawi khawm nikhuaa ka sawi bak hi chu inthlahrun a na a, chu a chhapah kan Mizoram lama thiante lah hian, Mizoram I vei anih chuan lo haw la, hetah rawn vei rawh min tih fiam chang a lo awm bawk vei nen. Mahse ka ngaihtuah chiang a, Mizoram chhunga awm chuan, mahni leh mahni in vei a har ang bawkin, Mizoram hi vei a lo har niang. Ka rawn haw nikhua chang pawn, hmundanga ka vei em em thinte kha ka ngaihtuah pha lo a, chhungkhat leh thenrual tha te nen hlim takin hun kan hmanga, kan khawtlang nuna dik lo nia ka hriat thin te ka theihngilh duak a, vei neilo len in ka leng leh mai thin. Chuvangin ziak talin ka vei lai hian dahchhuak ila, awmzia midang tan nei lem lo mahse keimah tal ka in sawi thawl alawm maw le tih chungin, ka vei zualpui te han tar lang dawn ta ila.

“Sum ngainatna hi sual tin reng bul a ni” kan Bible-in a lo tih angin, Sum hian mizo fate hi min ti buai hle reng anih hi, sumah hian hlimna a awm lo, mihausa tan vanram luh a har tih sermon dup dup reng mah ila, hei hian kan nunah engmah a tawk danglam lo emaw tih mai tur anih hi. Hausakna kan lawm a, mi hausa te kan ngaisanga, hausak loh hlauin kan phibuai a. Sum in hlimna min pek theih hi kan zawnga, kan kristianna chu sum avangin kan dah hnuaihung ta zawk a. A hahthlak khawp mai!

Minister-te sum hmanruk kan sawi kan sawi a, kan er a, eirute kan sawi a, Pathian rorel turah dah ngam lo in, a chang chuan keimahni ten rorel sak te kan tum a. Sum hian min tih buai nasat zia hre reng chung si hian kan kuta sum thianghlim lo ban chu kan sim duh chuang si lo. Han ngaihtuah ve chhin mahteh : Sum hi a lo hlu em alawm, minister-te sumlak luh tam chu sawi ta lo ila, chanchinbu ah kan hmu tam tawh bawk a. Minister emaw MLA an nih chhung rei lo teah in chhek khawl an tum a ni mai a, a awm tho e, sum ngaina khawtlang kan ni miau a! Chiang faka sawi hlawh si lo, Officer-te ho nundan hi I chhut pui ve ngai em? Aizawl khawpui chhunga kan officer-te hi an hlawh a tam asin, Foreign-ah sikul leh collage emaw zirna eng emaw-ah an fate an rawn dah thei tlat. Delhi tlanga fate hruaina man ngawt ai chuan an kal man pawh hi a to asin. Chu chang a ni lo, an nupui te thleng hian foreign-ah an rawn bazaar a, an bazaar hman loh pawn branded hlir a sin an rawn chah a, an hak ni. Heng hi khawia sum nge niang! Lalpan an chungthu ngaihtuah rawh se! I ti tawp mai teh ang, ka chhut pui thiamna hian a tlin lo a ni e.

Tunlai thangtharte sualna kan sawi fo a, an thatchhia, damdawi an ti, mipa phei chu lak tlak kan awm lo kan tia, tute nge mawhphur, mahni fate ngaihsak lek lo a sum a buaihote hi an ni dawn lawm ni? Naupang chu a tet laiin a kalna tur awm kawngah chuan kal tir la tih kan chhiar fo a. Baptistma emaw nau kan hlan laiin a puitling hma loh zawng kan mawhphurhnaa awm turin Pathian leh Kohhran hriatpuina in thu kan thlung a, kan thuthlunah kan rinawm loh vang a ni thei ang ngem, tunlai kan thalaite nun a thlak chhiat em em na chhan hi. Heng zawng zawng avang hian kan Zoram hi a tlu chhe mek a, foreigner-hote leh Vaihote vai vai thin mah ila kan thalaite nun a fuh tawh loh avangin, chhunglamah kan nget a, vawilehkhatah kan tlusawp rup ang tih pawh a hlauawm ta. Zoram hi mizo fate ta a ni a, kan ram hi din chhuah pui leh tur chuan, tharum leh hnamdang hnawh chhuah lam ni pawhin alang lo. “He ramah hian awm la, rinawmna vawng zel rawh” ti a SAM bu in asawi hi kan zawm chuan si loh chuan kan ding chhuak thei ngai lo ang tih a hlauhawm khawp mai. Tuna thalaite hian kan nu leh pa ten an hmangaih sum hi um lovin, dikna leh rinawmna nen nung ngam ila, kan tu leh fate pawh chu chu zirtir zawk ta ila, hei hi kan dinchhuah leh theihna bulpui ber tur a ni thei mai lo maw? Rinawmna pawh hi a fan thui thei asin, Pathian laka rinawmna te, kan mihring pui laka rinawmna te bakah thilsiam chunga rinawmna te pawh a kawk vek thei ang.

Minister-te leh officer liante ho kan sawilai hian keini thiamna leh thluakin heng nihna a min chelhtir theih loh hote nundan hi han en ve leh thung ta ila. Kan zirna leh kan finna in hengho dinhmun hi min thlen phalo mahse kan awh ve na chu a bang chuang lo. Sum duh khawtlangah kan seilian miau a. Chuvangin neih ve theih dan kan ngaihtuah a, hengho thil tih dik loh hi hrereng mah ila kan be chhe phal lo a, kan duhsakna lem in tih lawm a, an zar zo ve kan beisei a, hnunglamah kan rel phar leh si a ang khawp mai. Chumai a ni lo, hengho hnuaiah hian an thlauh palh chhar tumin kan phili a. Officer lianhote hnuai a mi in an pu te sum lak luh tamzia hriatpuiin an theihna lai lai ah lo hai luh ve an tum a, midangte chanai hial an kheuh khem sak duh a. Heng la ni pha lo pawh hian, Political party eng eng emaw belin, mahni eizawnna lama thahnem ngai taka thawh aiin kan LAL ve hunah tih hmachhuanin nileng lengin Political party sumhmumah-an titi a. Keimahni dinhmun te te ah kan theih zawng zawng ni a kan hriatin sum awlsam hi hailuh chu kan tum ruh tlang hle ti ila a sual tam pui lo awm e.

Heng sum awlsam ngaihtuah ta reng reng chuan kan fate kan zirtir dan pawh a lo danglam zo ta. “Mama, Mami, lehkha zir tha rawh, I zirthat loh chuan HLO I thlo ang tih” in an sawithaih a. Mi tu pawhin hlo thlawh/kut hnathawh chu hna hnuaihnungah ngaiin kan thawk hreh a, lehkha zir hram hram a, hna lian tak thawh ve a, sum tla hlang partlan kan tum ve a. Mahse hmunin min daih ta si lo. Association leh eng pawl pawl emaw dinin, khalam atanga pawisa la hailuh hram kan tum ni ta in alang. Fate kut hnathawh sawi mawi pui ta si lo chu, lehkhazir an peih vak loh phei chuan eng emaw mai mai tih an lo hreh a. Abikin thalai mipa phei chuan inchhung chet leh sekrek khawih thlengin a tih loh tur emaw a ti hial tak avangin, tih tur dang an zawnga, a ni lo lamah a taimakna a ti lang a ni mai lo maw? Kan inhleina leh tihtur dang kan zawnna hi a tha lam zawngin kal tir tum ta ila. Fuh phian mai thei asin!!!

Similar Posts:

• Duhtak
• Ka hmangaih em em che asin
• Intodelh Nan – Rinawmna Leh Dikna
• Nangmah in hmangaih rawh!
• Rinawmna

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Thursday, January 25th, 2007 at 9:03 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.