mi(sual).com

Picture: wallpaperbase.com

Rimawi khawvelah chuan Elivs Presley i hria ang a, The Beatles te hlawhtlin zia chu hai rual a ni lo. Khawvel hi rimawi a lo awi tute zinga hlawhtling ber pawla an lo sawite an ni a, mahse khawvel huapa hlawhtling ber zingah chuan ABBA hi hmaih chi an ni lo. Thangkhat lian zet an rimawite hmanga khawvel lo awitlei tu ABBA te chanchin ah hian Hmangaihna, Tumruhna, leh Dawhtheihna te a in phumru a, chung thilte chu pumpelh mai lova paltlang an tumna kawngah chuan Hlawhtlinna ropui tak an chang ta zawk a ni.

Kum 1966 khan Mizoram chu buaina chhum thim takin a tuam tan a, mizo mipa te chu rammu in an chhuak a, nunaute thlabar em em in inlamah an lo awm thung a nih kha. Buaina alo sosang zel a, Khawkhawm te thlengin Mizote chuan tuarin, khawvel dang reng reng hrechang lova mahni sahimna zawng chung renga kan awm lai khan. Europe a Sweden ramah chuan VAI SIPAI hlauva tlanchhiat a ngai ve lova, Hootenanny Band leh Hep Stars Band te chuan a ram mipuite chu an khawm zawk a ni. Hootenanny a an zaitupa ber Bjorn Ulvaeus leh Hep Stars ami Benny Andersson chu an band chhuahsanin an pahnih chuan Khawvelin a theihnghilh tawh ngailo tur Pop Band Ropui ABBA chu an din ta a, chu ABBA chu tun thlenga i ABBA hriat kha ala ni reng asin.

ABBA tih han lamrik ringawt pawh hian Mizofate zingah pawh mitthla an Sam dum-i leh sam buang-i alo lang nghal a, bekhmula leh zawng-rengtea chu theihnghilh theih an ni lo. Kum 1970 khan Pop music chuan khawvel a tuam a, chu rimawi chu ti hlu lehzual tur chuan Sweden ram atangin mipali Bjorn Ulvaeus, Benny Andersson, Agnetha Faltskog leh Anni Frid Lyngstad te inkawp chuan ABBA tih rawn indinin khawvel hi an rimawiin thangkhat lian zet chu an lo awi tawh a ni.

Kum 1966 nipui lai khan Sweden rama an pop group larte pahnih The Hootenanny leh Hep Stars te chuan an ramchhung chu zaia fangkualin hun an hmang a, hemi tum hi Hootenanny-a an zaitupa ber Bjorn Ulvaeus leh Hep Stars ami Benny Andersson te tan chuan an intawn vawikhatna a ni. Hetia zaia hun an hman lai hian zankhat chu Hotenanny ho chuan hmun pakhatah intihhlimna siamin Hep Stars amite pawh chu an sawm ve a, hemi tum hian Bjorn leh Benny chu inkawmin an duh zawngte leh an ngainat zawngte chu an sawi dun a, chu an duhzawng te leh an ngaihnat zawng te chu alo inang em em mai a, mize inmil tak niin an inkawmngei ta hle a ni. Hetia an inkawm ngeih tak em em hnu a kumleh nipui alo inherchhuah meuh chuan Bjorn leh Benny te chuan Hla phuahdun tumin hma an la a, chumi atan chuan an bungrua te chu Bjorn a pa office ah chuan zanlai pawh sawi lovin an in chhekkhawm a, chu an room chhunga an inkhung atang chuan ‘Isn’t it Easy to Say’ tih hla chu lo pianin chu hla chu Hep Stars ho in an rawn sa a, ABBA kalkawng atana thilpawimawh tak chu tuh-in alo awm ta a ni.

Kum 1969 alo ni a, Hootananny leh Hep Stars te pawh chuan chuailam an lo pan tan ve ta a, mahse Bjorn leh Benny te thianduh erawh chuan hla phuah belh zelin, an zai dun tan ta a Hetih laia record company neitu leh publisher ni bawk Stig Anderson chuan hemite thiandun chu fuih in hma alak pui a, Bjorn leh Benny te hla phauh chu a duhin hmalam hun engtak an neih tih hriain an pahnih enkawltupa ber atan Stig hi a tang ta nghe nghe a ni. Hla an siam zel a, an zai zel bawka tichuan ‘Hej gamle man!’ (Hey Old Man!) tih chu an siam leh a, he hla satur hian Bjorn leh Benny te chuan phungbawm sawmin Agnetha Faltskog leh Anni Frid Lyngstad te chuan an aw mawitak chu ‘Hej gamle man’ tih hla ah chuan an telh ve a, hemite pahnih hi mizotena sam-dumi leh sam-buangi kan tih ngeimai te kha an ni.

Anni Frid Lyngstad (Frida) tia an koh mizoten sam-dumi kan tih chu Benny nen Malmo Sweden hmar ram atanga hotela intihhlimna hmun atangin 1969 khan an inhre tan a, hetih lai hian Hep Star ami Benny hian hmun dang dangah zaina hmun a nei nual a. Agnetha Sam-buangi chu Bjorn nen chuan May 1969 khan TV show pakhata an telho na ah an lo inhmutai tawh bawk a ni.

Tichuan le! 1970 November thla chuan heng mipali te chu a vawikhatna atan mipui hmaah an rawn inlan ta a. Mahse an zaithiam zia hi an miten theihnghilh nge an lahrelo zawk, mipui lamah chuan an tlana lo hrih hle a ni. Zaithiam hlawm viau mahse mipuite chuan group hrang hrang ami inrawtphur chawpa zai ho mai mai angah la ngaiin thutak khukin an khuk pui teh chiam lova, mahse mipuite selna lam chu sirah hnawlin heng mipali te hian zai chu an la chhunzawm ho zel a ni.

Mite hriat la hlawh em em lo mahse heng mi pali te hi an zai naah an in pui ho zel a, kawng hrang hrang ah an intanpui tlang nasain an inpawh tan em em tawh a ni. 1971 July thla alo hrechhuah meuh chuan Bjorn leh Agnetha te chu an innei ta a. Hemi kum vek hian Bjorn leh Benny te chuan an an manager Stig Anderson a record company ‘Polar’ tih ah chuan an inhnimphum nasa tawh hle a ni. 1972 kum laihawl atang khan heng mipali te hi rawn in larthar lehin Nakin lawka ABBA lo ni tur intham lawknan an hla ruahthamloh “People need love’ tih chu pawlhming mumal tak pawh an neih hmain an rawn tlangzarh ta hlawl mai a, Sweden rama Top 20 kaipha hial khawpin an hla chuan mite duh a rawn hlawh tan ta. chutia an hlate miin an lo hriat ve tan takah chuan anni pawh an phur tlang hle a, an hmalam hun kalzel dan turte pawh chu an ngaihtuah tan ve ta a ni.

1973 Febuary thla chuan Sweden rama Eurovision Song Contest neih naah chuan an thian za ho chuan an tel ve a, hemi tum hian ‘Ring Ring’ tih hla Bjorn, Benny leh Stig te phuah chu an sa a, Agnetha, sam-buangi chuan Bjorn a fai Linda a pai mek lai ani bawka, raipuar lung chungin an zai nghe nghe ani, tichuan intihsiakna a zawh meuh chuan hemite pali chu a pumpuia pathumna an ni a, mahse swedish leh english hla an siam leh te chuan Sweden ramah chuan thawm a nei hle nghal bawk a, tichuan Sweden ram pumpuiah an hla leh an album te chu Top 3 ah a awm nghal der tawh a ni.

Mite hriat an hlawh tan ta a, mahse Bjorg, Benny, Agnetha leh Frida te pali te chuan group hming mumal an la neilo a, chuchuan mite ngaimawh a hlawh hle, chutia group hming mumal neilo an awm reng hnuin an Pu Stig Anderson chuan an group hming atan chuan anmahni hming bul theuh Agnetha, Bjorn, Benny, Anni te lakhawmin ABBA tih chu an rawn phuahchhuak ta a, chutih lai pawh chuan chanchinbu thenkhat chuan hemite pali group hming tur inphuah siakna hialte an lo nei bawk a, mahse chung zawng zawng khaikhawmna chu ABBA tih bak thildang engmah a awm lo.

ABBA tih hminga an invuah hnu hian an group chuan harsatna liandeuh mai tawh an nei a, chu an harsatna chu khatih hun lai khan Sweden ramah sangha tin siamtu lar ber company hming chu ABBA tih anlo ni reng a, chuvang chuan an Pu Stig’an he company neitute chu biain an hming ang chu hman ve a dil a anni pawh chuan lo phal sak ve a tichuan ABBA tih hming chu khatih hun lai khan chihhnih awmin sangha tin siamtu company hming leh zaithiam tun thlenga khawvelin an hlate kan la tuipui em em mai ABBA te an ni.

1974 April thla chuan kum tina an neih thin Eurovision Song Contest chu Brighton hmunah an neih a, hetah hian ABBA te pawh hi an tel ve a, an hla ‘Waterloo’ hmang chuan a ber nihna an hauh nghe nghe a ni. Waterloo hla hi ABBA lo lar chhuahna hla ti ila a sualtam awm lo e, he an hla Waterloo hi UK an hla ber kaite pakua te zinga a hmasaber a ni nghe nghe a chubaka an hnam tawng nilo ramdang tawnga an hla lar hmasa ber a ni bawk. Waterloo hla chu hun reilote chhung chuan khawvelpum a dengchhuak der mai a, US lamah pawh top 10 ah a in vawrh thleng nghal a ni. Hla dangte pawh nei ve tawh mahse kum khat chuang zet chhung mai chu an hla thar te pawh chuan Waterloo tih hla hi chu a khum thei meuh lo ani.

1975 thallai alo thlen a, SOS tih hla chuan UK leh US ah te chuan Top 10 leh Top 20 chart ah an rawn lang leh a, heta trang hian ABBA chu hnam dang sap hla sa ah an rawn in vawrh chho nasa tan hle a ni. 1976 kum tir teah ‘Mamma Mia’ tih hla chu UK leh Germany ah a ber a rawn ni chho leh a, chutiang zel an hla tharte chuan khawvel ram hrang hrangah a ber nihna rawn hauh chho zelin 1979 kum tawp lam thleng mai kha chuan an hla ‘Fernando’, ‘Dancing Queen’ ‘Knowing Me, Knowing You’ ‘The Name of the Game’ leh ‘Take a Chance on Me’ tihte chuan khawvel hmun hrang hrang a dengchhuak a ni.

Kum 1976 atanga 1979 inkar khan ABBA hian Album 5 ngawt mai chu UK ah ber nihna hauhpha an nei a, hemi hunlai hian UK ah chuan khumtu awm lovin kar 36 chhung ngawt mai chu pakhatna haupha pawh an nei bawk a, Kum 1991 kum tawp thlenga UK chart ah azawn a ber nihna ABBA in an lo neih chumi khumtu awmchhun chu The Beatles te chiah kha an ni.

1977 khan ‘Knowing Me, Knowing You’ tih chu a rawn hlawhtling leh em em a, hemi kum hian ABBA chuan an vawikhatna atan British ramah zaiin an fehchhuak a, hetah pawh hian an hlawhtlingin mite lawm an hlawh em em a ni. Hemi kum vek hian Australia lamah pawh an lar em avangin Australia mi Reg Grundy leh an pu Stig chuan Australia ah ABBA ho film hlawhtling leh lar em em mai, Mizote pawhin a hunlaia Zodin Cenima hall khat veka an en thin, Ticket nei tur pawha tharum nena sualchhuah ngai hial khawpa Mizo pawh ina kan hlut ABBA – The Movie tih chu siam a ni bawk. Khawvelin ABBA a hre tawh a, chumi ti belhchhah lehzual turin Kum 1978 vek hian hun rei tak lo awm dun tawh Benny leh Frida te chu an han in nei a, tichuan ABBA chu nupa tuakhnih awmkhawm an ni ta a, mahse thlathum chauh nupa tuakhnih group an ni hman tih ah Bjorn leh Agnetha te chu an inthen ta a ni.

1979 a an album hmasaber tur ‘Voulez-Vous’ chu a rawn chhuak leh a, hemi chhunga hlate chu an mimal lam hringnun zawhmek te chhanchin phochhuhna lam hla a tam hle a, ‘I Have A Dream’ tih chuan UK ram chu a chiah hneh hle a ni. He hla hi Wimbley Arena naupang ho nena concert na a an sak ho zawh hnu chuan ABBA chuan chu an concert chu ABBA tih awmchhung atana zaia khawvel an fan hnuhnungber chu alo ni ta a. Mahse chu chuan ABBA khawvel chu a titawp chuang lo va, 1980 khan Bjorn leh Benny te chuan hla thar ‘Super Trooper’ tih chu rawn siam lehin hemi kum vek hian an rawn tlangzarh a, heta hla ‘The Winner Takes All’ tih chu an kawppui te ve ve nena an inkar hmangaihna lo awm hrilhfiah nana an siam chuan Pakhatna a hauh chiang leh hle. 1981 khan Benny leh Frida te pawh an inthen ve leh ta a, hetia an inthen hnu pawh hian an group ABBA hi chuan a tawrh phah chuang lova, hun rei pawh a liam hmain recording chu an tan leh ta a ni.

Nuthlawi leh pathlawi an nih takah chuan an inkarah harsatna a awm hman lek lek tawh tih ah Bjorn leh Benny te chuan kawppui an neih leh a, tichuan an pali chuan a hnuhnungber tur atan album ‘The Visitors’ tih chu an siam ta a, ‘One Of Us’ tih hla chu a hlawhtling filawr zingah a awm leh a, la zai ho zel mahse tun hma ang kha an ni tawh lo, an rilru chuan ABBA piah lama an hmalam hun tur ngaihtuah ranin an awm hlawm tawh a ni.

Frida leh Agnetha te chuan mahni in zailam an tan a, hlawhtling ve viau mahse 1974 atanga 1982 inkar chhunga ABBA anga an hlawhtlinna ang kha chu an phalo tak zet a ni. Bjorn leh Benny te pawhin hla phuah chu an la bansan mai chuang lova, hla ropui leh tha tak tak chu an la siambelh zel tho a ni. Hun alo inher zel a, pop music lamah pawh tuaithar dangte an lo chhuak ve zel a ABBA te pawh chuan chuailam an pan tan ve ta bawk a. ABBA khualzin kawnga an hlawhtlinna hnuhnungber tur atan kum 1992 khan ABBA Gold chu tlangzarh a ni. He ABBA GOLD ah hian tun hma atanga an hla tha ho dahkhawm niin he album hi khawvel pumpuiah top chart a ni a, ABBA zinkawnga an sum lakluh hnember na pawh a ni nghe nghe bawk.

Febuary ni 2, 2000 kum khan kum 17 zet a liam hnuin ABBA te chuan dollar Billion khat lai hlawh a inzawmkhawm leh tura sawmna an hmu a, he sawmna hi American British sumdawng pawl thenkhat te hnen atanga an hmuh niin concert pawh vawi 100 chuang nei tura sawm a ni a, mahse chu sawmna chu ‘zahawmin an sum hmuh tur pawh hnawl harsa hle mahse chung sum tam tak te chu ABBA te chuan ngaihtuahin an tana ruat nilo a hriain chu sawmna pawh chu an hnawl ta a, tichuan he khawvelin ABBA chu an hlimthla te thlir chauh chu a tihtheih awm chhun a ni ta a ni. Sweden ram pawhin an ramin ahrin chhuah khawvel danga an chapo pui em em mai chu an car Volvo leh ABBA te chauh chu an ni ta a ni.

Similar Posts:

• Euro Group Stage Khelh Hnuhnung ber
• Euro 2012 Group Draw
• Euro 2008 Time table
• Benny Hinn Cures People With Jacket!
• Euro 2008 June 10 Fixtures | Spain v Russia | Greece v Sweden

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Tuesday, May 15th, 2007 at 2:11 am and is filed under More than words, Music and lyrics. You can follow any responses to this entry through the RSS 2.0 feed. You can leave a response, or trackback from your own site.