mi(sual).com

C. Lalnunchanga

Mihring hi a dam lai ngei hian a thih theih a, chung mite chuan anmahni thlan ni tinin an lai thin a. Tun lai kan ramah pawh hian dam lai ngeia mitthi mi tam tak kan hmu thei âwm e. Engvangin nge chung mite chu an dam lai ngeia an thih? Chu an dam lai thlan thim kawng zawh chu eng kawng nge ni ang? Heng zawhnate hi chhâng tûrin ziaktu pakhat a lo pen chhuak a. Lalrammawia Ngente chuan a chhiar tawhte’na an ngaihtuah nawn fo turin ‘Damlai Thlan Thim’ tih bu chu min thehsak ta a ni.

A thawnthu tlangpui: A changtupa Lalchhuanawma chu fapa mal a ni a. A pa chu sawrkar hnathawk a ni a, thingtlangah an chhungkuain an awm a. Mahse, a pa chuan zu a in nasat avângin a hna atangin an ban a. Kum 10 a upa a nihin a nu a uirê a. A pain a nu a hnawtchhuak a, an pafa chauhvin an awm ta a. Chhuana chu a lo thang lian a, rawlthar a rawn hriat chuan an In chhung khawhar leh rethei tak chu tlanchhuahsanin Aizawl a pan a. Aizawlah chuan chhung leh khat hmelhriat tumah a nei lo va. Mahse, Aizawlah chuan chhungkaw tha tak, Pu Thandanga te chhung a bel fuh hlauh mai a. Pu Thandanga chuan fa, hmeichhia pahnih a nei a. A upa zâwk chu vai ramah pasal neiin a awm a. A naupang zâwk Mawitei chu college lecturer a ni a. Tin, thingtlang lama mi an chhungte, tlangval Hminga an awmpui bawk a; a nupui nên, chuti chu an chhungkua chu an ni.
Pu Thandanga te nupa hian Chhuana chu an fa tak tak ang chiahin an en a. Tin, Mawitei leh Hminga te nên pawh hian unau piang hmun ang maiin an inen tlang a. Chhuana hi a naupang ber a ni a.

Pu Thandanga te Ina a awm hnu hian Chhuana chuan Open school-ah lûtin lehkha a zir tha leh a. Pawl sâwm a pass hnuin, “Ka û,” tia a koh Mawitei thawhna college-ah a lût a. Chutah chuan a dam chhûng nuna mi pawimawh ber ber thian pathum a chhar a. Tin, lehkha a zir lai hian a u Mawitei thiannu Dawngi, amah aia upa nên an inngaizawng a. Dawngi hi nula hmêltha tak, mi hausa fanu a ni.
Zan khat chu college-a a thiante an Inah an lo leng a.

Zan reiah a thiante chu a thlah a. Veng dang J.A.C duty-in Chhuana chu an lo hnek a, an man a, pawisa an chawitir a. Chhuana hi ruih thei thil ti ngai lo, tlangvâl tlâwmngai leh luhlul tak a ni a. J.A.C duty-in an hnek ringawt chu a la na hle a, phuba lak a duh a; a pi leh pute hnênah pawh engmah a sawi duh lo va. Mahse, J.A.C hruaitute chuan an naute thiltih dik loh chu a pu hnênah ngaihdam an rawn dil a. An ngaihdam indilna pawisa erawh an la duh lo va.

Chumi hnu deuhvah a pute chuan Silcharah motor part la turin an tir a. A lo haw lam chu vai motor-ah a lo chho va. Vaiho chuan an suam a, Kawnpui daiah thi paihin an paih a. Chhuana chu a thinrim hle a, phuba lak a duh a, a tawhsual tawh dân chu police hnênah pawh engmah a sawi duh lo va. A thiante pathum hnênah chuan phuba lak a duh thu a sawi a, a thiante chuan a tâwp thlenga tanpui an tum thu an lo hrilh a. Tuirial kama amah sawisatu vai driver leh handyman chu an chang chhuak ta a. Chhuana chuan fair takin a sawisa lêt a. A thiante’n an tanpui miah lo va. Tual thah chu a tum lo, mahse vai pakhat zâwk chu a sawisa hlum a. A thiante lung Inah kum 5 an tang a, amah Chhuana chu kum 10 a tang a. A jail tang chu a bialnu Dawngi chuan rinawm takin a lo nghâk a, mahse Chhuana tang chhuah dawn thla khat emaw lekah a lo thi hman a. Damlai thlan thim kawng chhuk chho zawha Chhuana nun tlan reng mai chanchin chu he thawnthu hi a ni a.

He thawnthuah hian character leh plot dangdai tak kan hmu a. A tir atanga a tâwp thlengin a thawnthu hian kan chan loh khânah min chhuahpui zar zar a. Tin, a changtupa hian damlai thlan thim zawha, a nun hi engvânga tlanpui ta vak mai nge a nih tih hi hriat thiam a har hle a. A nun chettirtu hi a rilru thatna nge? A thinlung huaisenna? Mahse, hemi piah lamah hian a rilru chapona hi a nun tlântirtu ber niin a ngaih theih âwm e.
Nun tlâwm tak phênah pawh hian tlâng ang maia nghetin chapona hi a inchherchhuan thei tho va. Chhuana pa Muana mizia hi han thlir ila. A nupui a uirê a, amah lah zu ngawl vei, mi hnuihnung, zu zuar leh an khuate pawhin an hmuhsit mai a ni a. Heti chung hian a nupui chuan haw (inneih) leh a duh em em a. Mahse, a tâwp thlengin Chhuna pa hian a nupui hi a ngaidam thei lo va. Hetah hian a luhlul leh chapona a lang a. Hei hi mipa tam takin mipa a nihna tilang tûra a thil duh, a thinlung nghehna leh mipa a nihna tehkhawng a ni ve thei tho bawk. Chapona han tih hian a chhe zawnga inteh ngawt theih a ni lo va. Mi zawng zawng, mi chhe ber thleng hian kan chapo vek a. Chhuana leh a pa chapona erawh hi chu anmahni zahawmna hum duh vanga chaponaah pawh a puh theih âwm e. Chhuana chapona hi J.A.C duty-in an ben tum leh, Vaihovin Kawnpui daia thi paiha an paih avâng hian a lo irhchhuak a. A bialnu Dawngi pawhin a chelh zawh rual lohvin a thinlungah tlâng kâng chirh inup ang maiin a inbeng muk a. A khawthlirna atang chuan a thawi damna kawng pakhat chauh a awm, phuba lak a ni. Engin nge maw mawlh a, a pi leh pu leh police pawh hrilh duh lo va, a thinlung hruaina a zui mai le? Hei vâng hian atân dam lai thlan thim kawngkâ chu kik hawnin a awm phah ta a ni. A thinlung mawlhtu hi a rumra hle a. A thiltihin a nghawng thui dân tur a ngaihtuah chian hmasak tâwk loh avâng hian Chhuana hi a mâwl deuh pawh a ni mai thei, mahse he a rilru hi chu a mipa thinlung chapona vânga lo chhuak liau liau niin kei chuan ka hmu daih mai.

Nula lakah pawh a changtupa hi a luck hle a. Hmeichhiate’n an duhna chhan hi pa hrêk hrâwk, nula care thiam, mi nun tlâwm leh zawldawh tak a nih vâng a ni a. Atân hmeichhe pawimawh tak pali an awm a. Dawngi, a u Mawitei, a thianpa Ruata farnu Muanpuii leh zu zuar, a nupui ni bawk Thangkimi te hi. Tin, hmeichhe vanduai tak Pari a lo lang bawk. He lehkhabu puma a ziaktu Lalrammawia Ngente hmangaihna khawthlir hi mi pângngaite hmangaihna thlir dân piah lam hret, mi pângngai dai phak loh (supernature) deuh hlek a ni a. Emily Bronte novel Wuthering Height-a Heatcliff-a thinlung buruh zet ang kha chu ni ve kher lo mah se, a hmangaihna khawthlir hrim hrim hi a danglam a. Hei hian a ti ngaihawm a, chhiar zawh thuai thuai mi a tinghakhlel a ni.
Dawngin’n Chhuana a hmangaihna aia thlakhlelhawm hi tlangvâl tân a awm kher lo vang. Chhuana jail tan chhûng zawng dawhthei takin a lo nghâk a. A nghâk chhuak tep tawh a, thla khat chauh a la awm tihin a thi a. A u Mawitei’n Chhuana a en dân hi hriatthiam a har hle a. Chhuana hi a nau a nihna angin a hmangaih a, a thiannu Dawngi lakah pawh a duhsak a. Amaherawhchu, thisena inzawmna tak tak engmah nei ta lo chu tlangvâl hmangaihna ang pawhin a en tho va, a tâwp thlengin a insum tluan a, pasal pawh a neih loh phah ta hial a. A thianpa Ruata nau Muanpuii (Mami)-in Chhuana, jail tang chhuak, vantlangin mi sual leh hlauhawma an ngaih chu a thinlung zawng zawngin a hmangaih a. Chhuana lahin Mami chu nau angin a en a. Heng hmeichhe pathumte hmangaihna hi a thianghlim a, sum leh pai leh nihna leh zahawmna engmah a phut lo. Nula leh tlangvâl zawng zawngin an duhthusâm hmangaihna a ni. Amaherawhchu, Chhuana hian heng hmangaihna zawng zawng hi tlansanin nuthlawi zu zuar Kimi a luhkhung a. Hmeichhe pathumte tân hian Chhuana chu vanduaina lian pui a ni ringawt a. Chhuana’n ama nun a tihchhiat a, a damlai thlan thim kawng zawhah hian heng hmeichhe pathumte hian an zui ve zêl a. Hei hian a chhiartute ngaihtuahna a hnûk hnawk zo vek bawk a ni.

A nupui ber Kimi laka hmangaihna tluantling kan hmu lo hi he lehkhabu danglamna a ni leh zel a. Chhuana hian engvânga zu zuar Kimi hi nei mai nge a nih tih a ziaktu hian a chhan a ziak chiang tâwk lo hle a. Hmanrua leh a thiante nên a rûka inhmuh khâwm nâna a In hman an duh vânga nei ni berin a ngaih theih.

He thawnthua kan hmuh hmasak ber chu Chhuana nu uirê thu leh chhungkaw keh chhe chanchin a ni a. Hei hi a thawnthu ruangam tûr a ni ang tih chhiartute rilruah a lo lang hman a. Mahse, a thawnthu laimuah a tira chhungkaw keh chhia hian hnuhma a nei zui lem lo. Mihring nuna intuh nghet tlat pakhat chu chhuanlam hi a ni a. Mi sual tam ber hian an sualna chhanah mi dang puh tur tu emaw an nei fo va. Amaherawhchu, Pari vanduai dân kan en erawh chuan mi dangte um luh pawhin damlai thlan thim hi a dai theih tho tih a lang a. He ka thawnthu thlir laia thil lang chiang tak erawh chu ‘Mihring hmelma chu mihring’ tih hi a ni a.

Chhuana chu jail a tan laiin a piangthar a, mahse a nunah nghawng thui tak erawh chu a nei zui vak lo. Jail atanga a chhuah hnua hna hrang hrang a han thawh kualnaah pawh hian a piantharnain a nun a sâwi danglamna aiin, jail-a a luh hmaa a mihring nihna ze ngai tho kha a nun hruaitu niin a lang. Hna thawkah an chhawr duh lo va, a In luahnate’n an hnawtchhuak bawk a. Heta tang hian a nun hi a hel ta tlat a. Rukru leh suamhmangah a inlet ta a. Amaherawhchu, K.T.P Treasurer te Ina K.T.P pawisa leh thawhlawm ipa pawisa a rûk tum erawh chuan a thinlung chhungril taka Pathian a tihzia a lang chiang hle a ni. Mi sual tak emaw kan tihte nun chhungril tak takah pawh hian Pathian zahna chu a lo awm ve meuh mai.

Damlai thlan thim a zawhna kawngah hian chhuanlam engmah neiin a hriat loh va. He a nun kawngkâ hi tumahin Chhuana hi an hawnsak lo va, ama duhthu ngeia lût a ni. He kawngkâa lût lo tûr hian kawngka dang zau zâwk atân hawnin a awm a ni. Hei hian mihring hlimthla a tarlang chiang hlein ka hria. Chhuana, tlangval chhuanawm tak, mi insum thei, zuk leh hmuama fihlim, mi rilru ngil, zaidam, nulate tana ngaihzawnawm taka pa, chhungkaw fel tak kâra hma lam hun êng tak mai, a hnua bawraw taka a dam lai ni a han chhiar ta mai hi zir tûr zawnga lehkha chhiar thin mite tân pawh zir tûr a tam hle. Kan zir chhuah chu a in ang vek lo vang, mahse thawnthu ngaihnawm tak, vawi hnih chhiara ngaihnawm a ni.

He thawnthuah hian khawtlang nun siam that duhna te, mi rethei leh hausa inkâr zau lutuk a ziaktuin a veizia te, thian rinawm hlutzia te, Mizorama dân (law) mumal lo lutukin nghawng a neih dân tha lo (custom) te kan hmu a. Chutih laiin tlâwmngaihna ropuizia pawh a lo lang a. A ziaktu hi revolutionist emaw tih mai tur a nihna laite pawh a awm a. Amaherawhchu, a lehkhau chhungril tak tak han luhchilh erawh chuan moralist a nihna hi a lian hle.
He lehkhabu hi Family novel an tih ang hi a ni a. A ziaktuin a luhchilh ber chu chhungkua leh a behbâwm a ni.

Similar Posts:

• Hmangaihna II*
• Lucifer’s manifestation (Pathian ang)
• Hmangaihna!
• Ve thuai mai a!
• Hmangaihna 131

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Tuesday, July 31st, 2007 at 2:31 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.