mi(sual).com

By Denis Lalfela, Rome

Ahmasain chibai ka buk a che u. Krismas atan a in inbuatsaihna hian rah tha chhuah se, in chhungkuaah thlarau malsawmna tam tak lo thlen rawh se. Kum tina khawngaihna hun kan neih hi, ngai a neih mai a awl hle a, dan ang mai a hman liam atan erawh a uihawm hle mai.Krismas awmze nei taka hmang turin kawng hrang hrangin ruahmanna kan siam ngeiin a rinawm a.

Thlarau lama min puitu atan tlem a zawng ka rawn thai ve leh e. Tun tumah chuan Khaw chhak mifing ten nausen Isua chibai an bùk thu (Mathaia 2: 1-12) ngaihtuahin, point nga ah ka then hrang a. Chungte chu

1. Arsi an hmu
2. An zin chhuak ta
3. Harsatna an tawk
4. Chhandamtu chibai an bùk
5. Hlim takin an haw leh ta! Khawchhak mifingte thil tawn hi keini ringtu te pawhin nitin kan tawng thin. Chuti anih si chuan ngun zawkin i thlir ho teh ang.

1. Arsi an hmu: Chhandamtu a lo pian meuh chuan kawng hrang hrangin a in puang chhuak ta. Khaw chhak mifing ten arsi an hmu a, Judate lal lo piang chu zawngin arsi an zui ta a. Arsi hmuh hi a pawimawh reng a ni. Keini pawh van lam thil thlir leh Pathian au thei tura kan thinlung kan tihruah a ngai a ni. Chu hmun ruakah chuan Lal Isua a lo piang thung dawn a ni. “Ka thinlung ram Kaisar lalna ah hian, Bethlehem tlangpui rawn din la” ti a lunglen taka kan zai laiin, he Krismas ah hian Lal Isua mitin thinlungah lal ber rawh se. Tin, chu Arsi eng thlir nachang la hre ve lo te leh Arsi eng awmlo ang hrim a la nung te tan abik takin dilsak ila. Mitin Vàn lam hawi a, Pathian atang chakna thar thàl nachang kan hriat reng theih nan Thlarau Thianghlim chhunenna I dil bawk ang u.

2. An zin chhuak ta: Arsi hmuh ringawt chu a tawk hauh lo. Khaw chhak mifingte khan arsi kha zui ta lo se, Chhandamtu an hmu lèk lovang. Keini pawh Pathian aw hriat mai a tawk lova. A hmel hmuh leh van lam hawi ringawt a tawk hek lo. Arsi an hmuh veleh a an kal chhuak ang khan, keini pawh nitin nunah Pathian hruainain hma kan sawn tur a ni. Krista khawngaihna èng, van malsawmna zarah huaisen takin hmalam kan pan tur a ni. Kan hmaah enge lo thleng dawn kan hre lo, mahse ENG kan hmuh a chuan min hruai zel ang. “Min hruai zel thin, min hruai zel thin, Ama kutin min hruai zel thin” tiin zam lovin ke i pen ang. Amah rinchhan a pen chhuak te hi kan Pathian hian a ensan ngai lo. Mi tling lo ber pawh ko duhin mi thaah a siam zawk thin. Mahni khawvel theuh kalsan a, a hnung zui tura rahbi hmasa ber rap a, ke pen chiah hi a har lai ber a ni awm e. Krista zawng leh zuitute tan tih màkmawh a ni thung si.

3. Harsatna an tawk: Khaw chhak mifing ten Arsi èng zui a Jerusalem an thlen meuh chuan lal Heroda chu sawi loh, Jerusalem mipui zawng zawng an mangang ta. Mifingte chuan Chhandamtu piang ta awmna chu an zawt vel a. An duh ang chhanna mumal erawh an hmuh hauh lo. Chuvangin an bangbo ru hle tih a hriat theih. Mifingte ang hian èng chu hmuin zui mah ila, harsatna kan hmaah a awm theuh. Ringtu tam tak chu Pathian kan zawnna kawngah kan hmanhmawh lutuk a. Mitdawivaih thiam rawih ang leka duh hun tè chauh a Pathian auh nachang hria lah kan tam! Lalpa, chumi khami ka duh tiin list thui deuh kan siam a. Chhanna hmu mai lova kan inhriat leh vui leh tihtauh kan ching a. Ama kut ropui a inhlan thlap hi tawngtaina thuk tak a ni tih kan hre ngam lo fo bawk. Chutih rualin Krista èng hmutu chu a zàm ngai lo; harsatna pawh a paltlang ngam thin. Chu harsatnaah Pathian thiltihtheihna a hmuh tlat avangin a hmachhawn ngam thin.

4. Chhandamtu chibai an bùk: Lal Herodan a tihkhawtlai hnuah, Bethlehem lam panin an kal leh ta. Heroda chuan Mifingte ahnen a an kir leh hun tur nghakhlel takin a thlir a. Lal thar lo pianga chu chibai buk ve ngei duhin a insawi a, a tak ramah chuan thah a duh zawk si. Heroda ang hian a langah chauh tawngkam tha, felna thinlung kan pu fo lo maw? Kohhranah Pathian hre chang si lo, mite hmai zah leh ropui duh vangin thahnem kan ngai fo lo maw? Chutiang khermeina chu a tlo lo, Heroda nunah pawh kan hmu. Ngaiteh, nausen Isua pianna zawnah Arsi a ding ta, a hma atanga hruaitu Arsi khan a kalsan lo. Nang leh kei pawh thlarau kawnga min hruaitu Lal Isuan min kalsan lo. Ka zingah awmin min tithar reng a ni, a aw hre tura kan thinlung kan buatsaih erawh a phut mai a ni. Nu Mari hnena naute chu an hmu a, zahna chibai an buk a. An neih ang ang phal takin an hlan a. Krista zawngtu ten Amah an hmuhin an hlim hle thin. Kum sanghnih kal ta a thil thleng kha kum tin titharin nausen Isua chibai kan buk leh dawn a ni a. Eng ro hlu nge Isua kan hlan ve dawn le? “Vànah in ro khawlkhawm rawh u. I ro awmna apiangah i rilru a awm ang” (Mt 6:19-21) tiin Isuan min sawm kha! Enge kan ro hlu ber chu? Kan fate, pawisa, motor, eizawnna, mobile, sex, drugs, zu, etc te em ni? Chung lei mawina ai chuan kan thinlung, kan nun pum ahnen a kan hlan thar leh hi kan tan a Lal lo piang Isua duhdan a ni. Chu thilpek hlantute chu a malsawmna chhiar sen lohvin a vur dawn a ni.

5. Hlim takin an haw leh ta: Chhandamtu chibai an buk zawh chuan an khaw lama an haw leh a ngai ta! Heroda fin vervekna pumpelh turin kawng dang a haw tura an manga hriattir an ni. Isua kan zawnnaah Amah hmuin hlim em em mah ila, chu hlimna a tawp mai lovin Lalpan thawk tura min tirhna/ dahna hmun theuhah kan kir leh a ngai thin. Hmel danglamna tlangah khan thlarauva an hlim em avangin Petera chuan bàwktè pathum khawh a duh ta hial a. Mahse chu tlang ata chu chhuk a, an nitin nun huaisen taka hmachhawn a ngai ta zawk a nih kha! Kristaah hlimna changin thlarauah piangthar mah ila, Setanan min awm hle hle tir dawn lo. Kawng hrang hrangin thlemna a lo kal a nga, achang chuan thlemna ni thei lova kan ngaih hmangte pawhin Setana a che thei. Mahse Krista èng hmu leh neitu chu a tlanchhe ngai lova, hnehna nun nei turin a bei hram hram thin. Kristaa hlimna kan tem te chu a mamawh apiang te hnenah phal takin kan sem anga, chu hmangaihna kan dawn chu kan tipung zel dawn a lo ni. Chu tak chu kan nuna Krista hmuh a tùlna leh ringtu nih a hlutna chu a ni. Krismas vuakvet a thilpek kan sem te, damdawiin leh chhawmdawlna hmun kan tlawh te, chanhai zawk te tanpui kan duhna pawh chu Krista hmangaihna semzai leh tihpun kan duhna lantirna mai a ni. Pathian hmangaihna leh mihring inkara hmangaihna tangrual chuan rah tha, chhenfakawm, mitin tinung leh tithar thei a hring a. Chu rah seng tuma feh chhuak zawng zawngte nausen Isuan malsawmin thlarauah hlimna han pe theuh rawh se. Amen!

Similar Posts:

• Bethlehem Arsi leh Khawchhak Mifingte.
• Wise Men from the East to Jerusalem
• Tihtakzeta Lal Isua Chibai Bûktu – Mifingte {Sunday Pual}
• Nausen chibai buk
• Krismas Thuchah

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Monday, December 17th, 2007 at 2:25 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.