mi(sual).com

Saddam Hussein-a te, Benazir Bhutto-i te thlen ve phak loh kum 2008 kan han chuangkai ringawt pawh hi malsawmna chikhat chu a ni phawt mai. Malsawmna pawh hi a dawng hnem deuh hi chu an awm te hian ka hre thin.

A mak ngawt mai, Pathian biak inang rau rau pawh hi kan malsawmna dawn hi a in chhah hleih deuh em ni chu aw? A chang hi chuan kei aia Pathian thu awih lo leh tawngtai tlem zawk ngei tura ka rin, sualna lama ka u ngawih ngawih tur a ka ngaihte hian ka malsawmna dawn tur hi min dawn khalh tlat a hriat changte hi ka nei deuh roh thin nia mawle!

Hetianga ka ngaihtuahna a kal sual deuh chang hian alawm mumang ka neih ziah thin. Nizan pawh mumang ka nei leh pek a, ka mumangah chuan malsawmna petu hi ka lo hmu a. Mahse, hei engtizia nge ni pahnih an ni tlat mai! Pakhat zawk hmelah chuan zaidamna leh ngilneihna a lang a, mite thatna tur a duhsak zia hi a mit mengah chuan chiang takin a hmuh theih.

A hnena malsawmna dil chu an lo in sul pel zut zut a, ka chhiar seng lo tawp mai. A ni chuan mite chu an tana tha tur ang zel in an dilnate chu a lo chhan sak a; thenkhat hlim takin an rawn chhuak a, thenkhat erawh duh loh rai ang maiin an rawn tum chhuak bur bur a. Malsawmtu dang chu ka han en leh a, a hmel atang chuan bum hmang a ni tih hi chiang takin a lang a, to ruah haw tur a thuam famkim nena rawn thawkchhuak hi a ang berin ka hria. A hnena malsawmna dil a kal chu mi tlemte an ni.

Mahse a ni chuan a malsawmna chu mitin tan a phalrai a, an dil loh pawh a pe pawp pawp mai. Chutia ka thlir reng lai chuan malsawmtu ka hmuh hmasak zawk kha ka bulah chuan a lo ding reng chu niin! A nui suk a, i hrethiam tawh em? a ti a. Engnge a awmzia? ti a zawh ka tum lai tak chuan ka harh ta hlawl a. Ka zun a lo chhuak hle mai a.

Khua a la thim avangin ka mu leh a, rizai hnuaiah a te thei ang berin ka han tawm kual, muthilh leh tumin beram te ka han chhiar vei ngial thin chung pawhin nghate rep fep tawh lam ang maiin ka meng ta kar mai. Ka mumang ringawt chuan ka ngaihtuahna a luah a, ka mitthlaah malsawmtu mi chi hnih ka hmuhte kha an cham reng mai si a. Tichuan malsawmna hungchang hi ka ngaihtuahna fing lo tak hian ka phak ang tawkin ka ngaihtuah ta nauh nauh a.

Malsawmna tih tawngkam hian min ti buai ta hle mai. Malsawmna ka dawn ni a ka hriatte hi tu hnen a mi nge? Malsawmna a ni chiah em? He ngaihtuahna hian min ti tim uaih uaih mai. Malsawmna ni a ka hriat ka dawn thenkhat hi min petu ni thei tur awm ang ka ngaihtuah hian ka duh ta hauh lo. Pathian malsawmna emaw ka dawn tih lai hian setana malsawmna hi kan lo chapo pui thei hle dawn a lo ni.

Kan sum leh pai lakluhna phu lova sum kan lo ngahte hian tu malsawmna nge maw ni dawn le? Kan hlawh phu lova in ropui kan sakte hi tu malsawmna nge maw ni dawn le? Kan fate phai lam a sum tam tak senga kan dah chung pawha motor chhuak thar kan lei leh mai thei thinte hi tu malsawmna nge maw ni dawn le? I nghawnga rangkachak thi zozaite leh i incheina manto tak takte kha tu malsawmna nge maw ni dawn le? I inchhung bungrua manto leh changkang tak takte kha tu malsawmna nge maw ni dawn le? LSC i ngah dan em em te hi tu malsawmna nge maw i dawn bik le?

Hausakna zawng zawng hian setana malsawmna chu a ni bik lo tawp. Dikna leh rinawmna nun kaihruaitu a hmang chunga taimakna leh thawhrimna avanga Pathian malsawmna atanga ding chhuak sawi tur an awm teuh. Pathian malsawmna hi chu a tluantling a, chhiaa ral leh mai mai chi a ni lo.

Chutih rualin kan Pathian malsawmna hi sum leh pai a teh chi a ni lo, A ni chuan i tana tha turin ro a rel a, i dil loh zawk malsawmna a pek che hian chu malsawmna chu a chhiar thiam leh hmu thiam apiang an nihlawh a ni mai. Malsawmna emaw i tih hi i chhiatna tur bul a lo ni reng thei si a tiin, Kum 2008 chu bul i han tan ang u aw…

Similar Posts:

• Setana hi a biak tlak tak tak em?
• Bawm Pahnih
• Mumang
• Mumang mai mai…
• Lunglei mi(sual)dotcommers Free Medical Clinic

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Friday, January 4th, 2008 at 9:24 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.