mi(sual).com

Mizoram IT director post la chiang lo
Zoram News Service

Aizawl 19/05/08 : Information Technology Department thar piang turah Director a awm tur a la chiang thei lo. Vawiina IT Minister Dr Lalzama’n Press mite a pindana a kawmna ah IT Director Post tur chungchang zawhna chhangin “Information Technology Department thar piang turah hian Director tura awm tur chu sawi loh Recruitment Rules pawh siam a la ni lo”, a ti.

Tunlaia thuthang dik vak lova ngaih theih “Cabinet Meeting thu leh a minute a in mil lo” tih chungchang zawhna chhangin Dr Lalzama chuan “A sawi chu kan sawi ho a, Chief Minister pawhin Technical department a nih angin Technical mi dan pawh a awm a tih thu a sawi a, mahse recruitment rules pawh siam a la ni lova tu nge ni dawn tih chu sawi theih a ni lo” a ti bawk. Press mite hian Dr Lalzama chhan danah hian meeting leh a minute a inmil lo em ni? tih chu a chhanna atangin sawi dawt lo mahse engmah in mil lohna a awm lo niin a ngaih theih an ti tlang hle bawk.

Mizoram State Wide Area Network (MSWAN ) chungchhangah Press mite chuan MSWAN hi lian reng thei si te taka ICT in Project Proposal leh Request for Proposal (RFP) te taka an siam zawhna an zawh chu chhangin ICT hotu pakhat chuan Central chuan he connectivity guideline ah hian sawrkar laipuiin (Horizontal connection) department hrang hrang office thlunzawmna chu state pawisa atanga tih tura a ruahman avangin kan state in pawisa kan nei si lova a lian hlei thei lo a ni a ti bawk. Hetih lai hian kan palai chuan AMTRON (Assam Electronic Development Corporation ) (Assam ho ZENICS ve ti mai ang) hotu lu pakhat a be pawp a, ani chuan “Guideline hi state 1 tan chauh in siam a ni lova keini tan pawh phal a ni lova mahse tunah chuan kan nawr char char avangin center lamin an tum vek ta a ni hemi atan ringawt hian a tlem berah nuai 500 kan mamawh belh a central lam hotute chuan min tiam ta mai nilovin min pe tan tawh a ni” a ti. A sawi zelna ah India ramah hian kumin chhung hian E-Governance ah cheng Vaibelchhia 40,000 dah a ni a a chuh chak chak an vannei a ni mai” a ti zui.

He Press Conference ah hian ICT chuan an hma lak tawhna leh hma lak mekna te chanchinbu mite an hrilhfiah a, a technical hle avangin zawhna leh chhanna pawh a harsa tlang hle a ni.

ICT lam chuan an hmalak tawhna te an sem hnuah zawhna leh chhanna hun hman a ni a, ICT lam pawh hian an chhang buai deuh lek lek a tih theih awm e. A hma lakana thenkhat Comunity Information Centre (CIC) chungah an press mite chuan “CIC hi sawrkar laipuiin nikum hmasa lam tawhah state sawrkar ti tawp a CSC (comunity Service Centre) a leh tur a nih thu len fund a lo kal tawh si lova khawi atangin nge hnathawhtute hlawh an pek zawhna chu chhangin ICT lam chuan sawrkar in kum 2 chhung min la hriatthiam avangin hlawh kan la in pe hram hram a ni a ti. Kan palaiin hemi chungchangah hian Department of Information Technology (DIT) Ministry of Information Technology government of India lam atanga a thu a dawn dan chuan Mizoram ICT hotute te hi CIC hi CSC a let tur a ni tih kan hrilhna a rei tawh a, hma an la la meuh lo nge kan hriatpui lova CIC lam hi chu kan fund rei tawh in a rin awm loh an ti thung.

IT enterprenuer Development programme (ITEDP) atanga thalai te training na tur NEC atang pawisa hmuh zat leh an hman dan zawhna chu chhangin ICT hotute chuan “He project atan hian NEC chuan Nuai 409 an sanction a, tender kan koh hnuah nuai 375 a chhang an awm a anni hi an chhang hniam bera kan pe ta a, tun dinhmunah hian nuai 200 release a ni tawh a, tin a batch hmasaber mi 100 trainning kan pe chhuak tawh bawk a ni” an ti. Hemi chungchangah kan palai chuan he ITEDP a zir chhuak tawh mi engemawzat a kawm chuan an duh thu a sam lo leh an zirna a nep an tih thu in an chhang hlawm a. Kan palaiin engvangin nge an zirlaia an complain mai loh ti a zawhna chu chhangin zirlai thenkhat chuan kan hotuten min vau bet a, a sawisel chu kan hnawtchhuak ang che u an ti a kan sawi ngam lo a ni an ti bawk. He Project hawnnaah hian kan hotupa chuan Vanapa Hall-ah he thil hi kan zirzawh chuan Microsoft neitupa Bill Gates a signature chuang Certificate kan dawng thei tih thu min hrilh bawk an ti.

NASSCOM te nena tang kawpin kumina NAC test an neih chungchhang zawhna chhangin seat 1500 neihah mi 334 chiahin an exam thu an sawi bawk.
He Press conference ah hian IT Minister Dr Lalzama chu ICT Principal Informatic Officer leh a hoten an tawiawm a.

—————-

Central in min suspend tih ka pha lo – Lalthlamuana

Aizawl: Nimin a Press conference IT Minister in kohna ah Press mite zawhna chhangin ICT Principal Informatic officer Lalthlamuana chuan “Central lamin min suspend tawh ngei a ni” a ti a sawi zelna ah Lalthlamuana chuan Discilpinary action ka chunga an lak na chhan ber chu Central lam atangin Deputation in ka lo kal a,Mizoram lamin ka chhuah leh an remti silova, Mizoram sawrkar hnuaiah ka thawk bawk si a, min release loh chuan puanthuah tel a chhuk ngawt thei ka ni lo a ni, tin Mizoram lamin min ui bet tlat bawk si a” a ti bawk. Hemi chungchangah hian Kan palai chuan file a hmuh theih ang ang zawngin Lalthlamuana hi Mizoram sawrkarin an hi beh na a hmu lem lo a ni . IT department thar piang turah Director nih a khel nasa hle naiin a la junior deuh em aw tih chu ram hruaitute ngaihtuahna ah a in mung mek niin a lang

Related: IT department piang tur kha (zawlbuk.net)

Similar Posts:

• Synod-in Press Conference Ko
• PRISM to submit memorandum
• Mizoram IT Department thar – Technical Head awm lo !!
• CM kan interview ta!
• Falkawna Referral Hospital future?

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, May 19th, 2008 at 6:14 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.