mi(sual).com

1st, Friday: Vawiin khan Independence day Celebration Football Tournament chu Lammualah khelh tan a ni a; hetah hian Mizorama a vawikhatna atan African Liberian player pahnihin Luangmual FC tan an khel ve nghe nghe.

2nd, Saturday: Thalai Kristian Pawl (TKP) Zemabawk leh Ramhlun North Pastor bial te chuan vawiin khan an dincham pha pual in Civil hospital-a damlote tan thisen an pe.

3rd, Sunday: Mizo United Methodist Kohhran Myanmar-te chuan vawiin Chawhni inkhawmah Malaysia atanga lo kal Tv. Hmingthanfala leh Nl. Lalengpuii te chu Mizo United Methodist kohhanah rinawm taka awm leh rawngbawl an tum thu intiamna te an neih theih avangin full memberah an la lut.

4th, Monday: Zanin dar 11 vel khan Hunthar Venga Pu F. Zokima In bul kawng thlangah Taxi MZ01-C/1103 a tlan liam a, a chhunga chuang mi pali zinga Lalmuanpuii @ Am-i (30) d/o K. Zosangliana leh Lalparliani @ Papari (27) d/o F. Lalbiaktluanga, Mission Veng ve vete an thia, driver leh midang pakhatin hliam na vak lo an tuar.

5th, Tuesday: 21 st July a boral ta zaithiam R. Lalhmangaiha pualin Vanapa Hall-ah Leikapui zan buatsaih a ni a, zaithiam hrang hrang zaite leh a chanchin an sawite chuan kalkhawmte mittui a titla nasa hle.

6th, Wednesday: Kum 10 kal ta chhunga Mizoram sorkar-in hmasawnna hrang hrang a kalpuina lehkhabu ‘Mizoram Hmel Danglamna’ tih chu vawiin khan IPR Auditorium-ah Home Minister, Chief Minister charge la mektu, Pu Tawnluia’n a tlangzarh a; Journalist thite zangnadawmna a hlan nghal bawk.

7th, Thursday: Vawiin khan Pi Zaii Hall, Synod Conference Centre-ah Central Kohhan Hmeichhia Committee buatsaih, Kohhran ten Mipat hmeichhiatna hman khawlohna an hmachhawn dan tur (Seminar on Churches’ Responses to Sexual Abuse) zirhona hun an hmang.

8th, Friday: Mizoram-a CBI ko luhna tura tan latu, People’s Right to Information and Development Implementing Society of Mizoram (PRISM) chuan Rev Chanchinmawia thih dan, CBI-in rang taka a chhui theih nana file kal lai tichak turin Home Minister, Pu Tawnluia a ngen.

9th, Saturday: Sihphira Central YMA Boot Camp-a lutte chuan vawiin khan hlawhtling takin an camp an chhuahsan. YMA kum puan, ruihhlo do bawhzuina kal zelah thla hlui ni 22 atang khan Central YMA buatsaihin Sihphir-a Sinners’ Friend Camping Centre-ah ruihhlo ngaite pualin Boot Camp hlawhtling tak hi buatsaih a ni a, he camp-ah hian mi 50 an lut a ni

10th, Sunday: Presbyterian Kohhran hnuaia Dept. hran hrangte chu an 14 th September-a an inkhawmpui tawh dawn avangin an zirlai an beingawrh hle.

11th, Monday: Excise Deptt Lunglei te chuan zanin khan tualchhung Zu Rs 54,000/- man hu leh a neitute an man.

12th, Tuesday: Lunglei Dist Football Association (LDFA) te chuan vawiin khan Lunglei Circuit House Conference Hall ah Sport Minister Pu Z.H Ropuia chawimawina hun hmangin Chawimawina thu ziak an hlan

13th, Wednesday: Hriphaw rama rul lian an hmuh chu man tumin vawiin khan a awmna ram, Tuivamit ruam-ah pa pali an thawk chhuak.

14 th, Thursday: Vawiin khan Central YMA hruaitute chuan MPC Office tlawhin inthlanna thianghlim leh fel fai neih theih dan tur an sawipui.

15 th, Friday: India Independence day vawi 61-na a nia he hun hmang tur hian Mizoram Minister leh MLA-te Zoram hmun hrang hrangah an fehchhuak hlawm.

16 th, Saturday: Vawiin chawhnu dar 1:25 khan Zuangtui PHE Store kawngpui ah Taxi MZO1 D 2575 in naupang kum 4 m Lalrintluangi D/o Lalnuntluanga chu a su hlum.

17 th, Sunday: Zaithiam Zion-i renthlei leh Minister ZH Ropuia te ruaka thlalak niawm taka sawi darh mek chungchangah Zion-i chhungte chuan Zion-i ngei a nih thu an sawi a, chutih laiin mipa chu Minister ZH Ropuia a nih loh thu an finfiah tawh tih police te chuan an sawi.

18 th, Monday: Vawiin khan Chief Minister, Pu Zoramthanga hovin Cabinet Meeting neih a ni.

19 th, Tuesday: Tun hnai-a pawl ding thar, United Democratic Alliance buatsaih-in vawiin khan Venghlui-a Central Hall-ah Aizawl khawpui chhunga ZKP, MPC leh ZNP Extended Executive Meeting neih a ni.

20th, Wednesday: Lunglei lam zaithiam, Pensy B. Lalthangliani chuan thiam zirna rún sang bèl turin vawiin khan Mizoram a chhuahsan ta

21st, Thursday: Vawiin khan Mizoram Governor Lt Gen (Rtd) M.M.Lakhera, PVSM, AVSM, VSM leh Mizoram People Forum hruaitute’n inkawmna hun tha tak Raj Bhavan ah an hmang a, kumin kum tawp lama inthlanna lo awm tur chungchang an sawiho.

22nd, Friday: MFA Leaegue vawiina S/F 1 st league-ah 1st Bn. MAP leh Dinthar FC 2-2-in an inhnehtawka, S/F pakhat zawkah FC Kulikawn leh SSA FC 1-1 in an inhnehtawk bawk.

23rd, Saturday: Central YMA-in ruihhlo ngaite tana tun thla ni 12 atanga Sihphir-a Sinners Friend Camping Centre-a Boot Camp a siam chu vawiin khan zawh a ni ta

24th, Sunday: Lawngtlai kawng, Hrangchalkawn piah deuh a Khamhar quarry a chim avanga Zirtawp zan atanga lirthei a kaltlang thei lo chu vawiin tlai dar 7:00 vel khan sial tlang leh a ni ta.

25th, Monday: Vawiin chawhma dar 10.00 atang khan ni hnih awh tur Public Relations chungchanga thiam zirna (workshop) chu I&PR Conference Hall-ah tan a ni.

26th, Tuesday: ZKP, MPC leh ZNP-te’n an din United Democratic Alliance (UDA) chuan vawiin khan ‘Thawhhona thuthlung’ an siam.

27th, Wednesday: Vawiin khan Presbyterian Bible School chuan Synod Conference Centre (Pi Zaii Hall) ah Graduation Service vawi 13-na an hmang.

28th, Thursday: Tukin zing dar 2 vel khan Bairabi-a Pi Chhingpuii In a kangral vek a, bungrua engmah an chuh hman lo.

29th, Firday: Vawiin tlai dar 2 khan Pu Haukhum Hauzel, Chief Secretary chuan I & PR Conference Hall ah Press Conference a nei.

30th, Saturday: Vawiin khan MPF Awareness Campaign, Sihphir Presbyterian Kohhran Hall-ah neih a ni a, MPF hruaitute atangin Upa Lalramthanga, MPF General Secretary; Dr. Lalbiakmawia Ngente, MPF Secretary leh Pu Lalsanglura Ralte, MPF Campaigner te’n hun an neihpui

31st, Sunday: Ramthar Ni a ni a, Mizoram Presbyterian Kohhran chuan chawhnu inkhawm thupui atan ‘Rawngbawl tura kohna’ tih leh zan inkhawm thupuiah ‘Chanchin Tha hril rawh u’ tih hman a ni bawk.

Similar Posts:

• October 2008 Mizoram Diary
• English Premier League and Man City
• November 2008, Mizoram Diary
• July 2008 Mizoram Diary
• June 2008 Mizoram Diary

Recent Posts:

• NUN THÂMRAL
• President Trump ka hmuhdan (amah thlawptu lam atangin)
• YMA LIBRARY ENKAWLTU TEN SEMINAR & TRANING KAN NEI
• February 2017, Mizo(ram) Diary
• misual.com tih tawp a ni dawn?

This entry was posted on Tuesday, September 2nd, 2008 at 9:10 am and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.