mi(sual).com

(Sap nu pakhat, Christian tha tak, Chin refugee te lo buaipui thin tu in a kum 70-na birthday lawmnaah Chin nu pakhat speech nei tur in a sawm a, An ram an rawn thlen tirh a an experience leh an thil hmuh dan vel sawi tur in. He nu hian tawng a thiam em em loh avangin ka tanpuina a rawn dil a, a speech tur hi ka ziah sak ta a. Birthday party-ah chuan a han chhiar chhuak ta a, an lawm kher mai an ti. Vawiin khan misual a post phalna ka va dil a.. Hei hi Mizo tawnga ka hnena a sawi dan tlangpui a ni a, a vaiin ka ziak seng lova, Tin, mi thenkhat thil hriat loh vang a an thil tih, nuihzatthlak tawpkhawk a tam mai. Sawi lan ziah erawh chu nuam an ti chiah lo vin an zak deuh va, chuvangin he speech-ah pawh hian a nuihzatthlak zual sawi lan loh a tam mai – elcee)

“KJ airport kan rawn thleng chiah chu vawt kan ti hle mai (December a ni a). Airport chu kan beisei aiin a lo te in mi pawh an lo tam lo va. Tin, Airport atanga kan awmna hmun tur min khalhna kawngah pawh chuan In tlemte chauh kan hmuh avangin ‘Hmun fianrial deuhvah min dah khawm dawn a nih hi’ ti in kan in hrilhru a. Chin ramah chuan kan Inte a inhnaih hlawm em em a, Tin, Kuala Lumpur, Malaysia khawpuiah kan awm chhung khan Building sang pui pui kan hmuh te kha ropui kan ti em em a, in ram hi Malaysia lakah chuan ram hausa tak a ni tih an sawi avangin thil reng reng Malaysia aia lian leh ropui vek turah kan ngai bawk . Asia-ah chuan mihausa ten Cement In an nei a, mi rethei ten thing In an nei a, chuvangin thing In hlir kan han tlan pel kha kan rin ang he hu a lo nih hmel loh hle in kan hria.

Chuan kan In luah tur theuh chu pakhat te te in kan en tan a, a hmasaberah A&B-a te in L street a mi chu kan han lut hmasa ber a, In chhung chu pawn a tang a kan en a, kan rin ai in a lo tha daih zawk a, In tin a kan luh apianga kan thil hmuh hmasak ber chu dawhkana thleng a mawi tak a THEI an lo dah theuh chu a ni a, a bikin Apple kan hmu kha kan lawm leh zual. a chhan chu Chin ramah chuan Apple kan ching ve lo va, a hrim2 in Burma-ah chuan Apple a to em avang in leina kan nei zo lo. Kan vai chuan phur em em in kan In tur theuh chu kan in en sak vek a, Tutenge Sofa, Dawhkan, Khum nei tha ber, tih vel te kan khaikhin sap sap a.

Kan pa C-a leh kei pawh kan apartment min pek L street a mi chu kan lungawi pui hle. Khum mawi tak a khuh a nih bakah kan mamawh tur zawng zawng a lo awm sa thlap a (kan mamawh tih pawh kan hriat loh thleng in) a bik in choka a Cupboard tam tak lo awm ber mai kha tha hi kan han ti khawp a, a chhan chu Chinram-ah Cupboard kan neih ngai loh avang in. Fridge-ah chuan thei, Arsa, thlai etc. a lo awm a, Paprika kan hmu a kan lawm zia kha, Hmarcha lianpui thak deuh emaw kan ti a, kan han ei a, a lo hang dup si a, paih kan rilruk lai in kan thianpa D-a a lo kal a, a ni hi Malaysia a restaurant a thawk tawh a nih avang in a lo hria a, a hawn ta a.

Ropui kan tih ber mai chu KHÂWL (machine) zawng zawng kha a ni. Coffee-machine, Vacuum cleaner, Dishwasher, Washing machine, tumble dryer etc. Kan zavai in a hman dan tur hrilh vek kan ni na chungin han start tawp mai kha kan hlau deuh hlawm a. Tui lum leh vawt duh duh a herh chhuah theih kha ropui kan ti khawp mai bawk. Kan thianpa pakhat E-a erawh chuan a Inah tui lum a herh chhuah theih tih a lo hre fuh lo va, A hriat chhuah meuh chuan tui vawt in thla engemawzat (thlasik chhung in) a lo in bual hman.

Ka la hriat reng chu engtinnge Dishwasher thawh dan hmuh chhuah kan tum tum kha a ni. C-an button chi hrang hrang kha fimkhur tak in a hmet kual vel a, vawilehkhatah a fan a vir ta thut mai, kan hlau lutuk varanda-ah kan tlan chhuak, In chungah kan In luah neitupa len lai a lo ni hlauh va, kan tlan chho va, kan theih ang tawk tawk in kut zaizirin thil hlauhawm tak kan In chhungah a thleng tih kan sawi, chutah nui deuh chung in min zui thla a,a rawn off ta a.. …A&B te phei chuan Washing machine hi thla tam tak an hmang ngam lo va, a hria ten an tih luih tir a, mahse an thawmhnaw suk lai vir kual vel kha a tet ta vek emaw an ti a, an thinrim hman thelh..

Vur a lo tla chiah kha kan tan thil thar a nih avangin kan lawm in pawn kan thlir reng mai, Vur lo tla, Thing a in khai vel te kha nalh kan ti em em, zanah erawh chuan vawt kan ti thei khawp thung, kan guide in duh duh a In a tih lum theih thu min hrilh in a tih lumna mi on sak, zanlaiah a lum lutuk kan thlan, tih ngaihna kan hre lo va, tukverh kan hawng thul; a tukah a herh hniam theih tih kan hre chhuak chu kan thaw huai mai.

Chuan thla nga vel kan awm tih chuan tleirawl ho chuan kekawr sen or pawl an rawn ha chhuak ta sup sup a ( hei hi RUSS an ti a, Cl-10 zir lai hian an zawh dawn thlakhat chhung hi chutiang chu an ha thin, an subject a zir in a rawng a dang) kan thianpa F-a chuan tleirawl tamtak in an hak a nih avang in kawr tunlai tak a nih dawn hi ti in a nupui duhtak tan leisak ve a lo tum ( vanneihthlak tak in dawrah lei tur a awm lo)

Nipui a lo in tan a, pangpar mawi tak tak hmun tin mai a tang a a rawn par chhuak kha hmuhnawm kan ti thin em em a. Lung khawkrawk karah pawh pangpar nalh tak tak a rawn chhuak te kha mak kan ti a, thlasik a vawh leh thim ngaihtuah in nipuiah a lum hle tih kan han hria kha kan thla a muang sawt mai. Khua a en rei em avangin mut nachang hriat a har fo bawk. Tihtur vak awm hek lo, kan in len pawh reng a, zan dar 12 velah te kan la bengchhen avangin vawikhat chu K-a te In a kan awm lai in an thenawmpa in min rawn khak.

TAWNG hi kan buaina ber a ni reng mai. A bik in culture in kawngro a sutna,(awmzia a neihna) bikah hian. Thil kan hre fuh lovin nangni ho pawhin min hre fuh lo thei khawp mai. Abikin AW leh AIH kan tih hian in hre thiam lo fo. AIH tih hi kan culture-ah chuan polite lohna tak a ni, kan hriat thiam loh thilah pawh AW kan ti fo thin, kan duh loh thilah pawh AW tih chang kan ngah mai.

Tin, AW tih pawh hi a mawi loh chang a tam mai. Mi thenkhat in chaw ei a min sawm te hian kan riltam leh tam loh min zawh in ‘Riltam lo’ ti in kan chhang ngei ngei thin. Chaw erawh kan ei tam thei fu si, mak min lo ti thin ngawt ang.

Tin, Telephone hmang a thil hralh ho hian min phone ve fo thin, G-a chuan hrethiam miah lo vin ’AW, AW’ a lo ti hmiah hmiah mai a, a hnu chuan bill tamtak pek tur a lo thleng ta a, buaipui a ngaih phah ta zêk bawk.

Kan Culture-ah hian mi In a kan len emaw, mi nen kan in hmuh in ‘Chaw in ei tawh em?’ tih hi ti ti tan nan kan hmang thin, nangni hovin ti ti bul tan nan weather chungchang in sawi thin ang deuh hi a ni thei ang. Pu H-a hian vawikhat chu min zawt a, ‘Chin ho hi kan In a an lo kal apiang hian chaw kan ei tawh leh tawh loh min zawt ziah a, an ril a tam thin nge chaw kan pek an beisei?’ ti in.

Kan zavaia kan zir hleih theih loh ber chu appointment kan neih hian hun kan vawng dik in kan kal ngei thin tur a ni tih hi (note-hetah hian sawi tur a tam lutuk a, mahse a sei dawn lutuk avangin sawi tel lo mai ang)

A tawp ber atan kan Ram ka ngaihna ber chu Thlaihring (eg. Antam). Tin, kan culture, kan zavai a kan in hriat chian em emna hmun te, khawtlang thiltih tamtak kan tih ho thin te,Biakin a kan inkhawm ho thin leh, mithi an awm a khawhar kan lenpui thin te hi a ni. Tin, Christmas kan hmun khat a kan zavai a kan hmang thin ka ka ngai thin em em bawk”.

Kan belh leh lawks khaw pakhat a awm Chin nu pakhat pawh an inah an awm luaih luaih laiin sap ho an rawn kal, kawngka bula a inlengte pheikhawk kha kawk in “Pheikhawk a va tam ve” an ti a ni awm e, Chin nu chuan “Ka lawm e” ti in a chhang a, tun thleng hian a thian ten fiam nan an la hmang an ti.

Similar Posts:

• Fiamthu
• Enge in Ngaih ve dan ?
• MIHRING A
• ‘Lung-khaw-sa’ hi i hre tawh thin em?
• Mizoram pawna kan incheidan hi

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, February 23rd, 2009 at 10:34 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.