mi(sual).com

Lal Isua chu mihring te tlan nan Van ropui kalsanin he khawvelah a rawn kal a, hrehawm tinreng tuarin Kraws lerah kan tan a tuar a, phum a a awm hnuin keimahni chhandam turin vawiin ni angah hian thihna hneh in a tho leh ta! Vawiin hian a Kohhran ho ten he a thawhlehna ni champha hi kan lawm mek a ni. Min chhandamna tura thlan thim pawh hneh zova min tlantu Lalpa fakin hlim takin zai ila a kohhran ho te hian kan aw leh hun neih zawng zawng te hi Lal Isua chawimawi a amah fak nan leh a thu zawm nan i hmang thar leh ang u.

Lal Isua a tho leh!

Lal Isua chu Kraws lera khenbehin a awm a a thih hnuah thlan ah phum a ni a a nithum niah thihna hnehin a tho leh ta. Hei hian khawvel zawng zawnga thuneitu leh lei leh van lal ber anih zia a entir chiang hle. Lal Isua meuh pawh thi a thlan a phuma a awm khan mihring a nih zia a lantir a, thlan atanga a thawhleh khan mihring te hmelma hlun ber thihna ngamtu a nih zia leh a ropui zia a tarlang bawk. Lal Isua kha thi lo sela chu bawhchhiatna ina a hrin mihring te tan chhandamna kawng a awm lo. He khawvel ah min chhandam thei an awm lova, khawvel sum leh pai leh hausakna engmahin min chhandam zo lo. Lal Isua thisen chauh lo chuan. Chu thisen avang chuan Chhandam kan ni ta ngei a, mahse he chhandamna hi a thlawn hauh lo. Mi tam tak chuan Chhandamna te hi a thlawn a kan dawn leh a thlawn veka kan chan ringawt tur emaw an ti thin a, mahse Chhandamna hian phut let a nei a, ringtu chhandama awma te hian tih tur/ thawh tur kan nei.

Lal Isua rualin i tho ve ang

Lal Isua kha khawvel a reilo te rawng a bawl lai khan harsatna hrang hrang a tawk a, sawichhiatna te, dawta hekna te, ensan te, tihhlum hial tumna te vawi tam tak a tawk a, a tawpah chuan hrehawm takin misual ber te angin Kraws an an khengbet a a thi ta hial a. Mahse Lal Isua chuan thihna a hneha a thawhsan. Ringtu te zingah hian chhandam nih inhre si, chhandamtu pawh hria a ring, mahse thihna thawhsan ngam lo, harsatna leh hrehawmna te tlansan lova tlukpui mai thin kan tam mai. Kohhran a mi nghet tak tak te pawh hian chhandam te tih tur leh awmdan tur hi kan hmu thiam lova, ringtu beidawng/ thlarau vakvai ah kan inchhuah fo thin.

Bethesda dila damlo kum 38 ngawt zeng hnenah khan Lal Isua khan engtinnge a tih kha? “Tihdam i ni ta, tho la Pathian fakin zai la awm mai mai rawh” a ti hauh lo mai, “Tho la i awngphah kha la la kein kal tawh rawh” a ti anih kha! Chuvang chuan chhandam a awm tawh te chuan mahni awngphah lak a ke a kal a ngai, midang ring lovin. Kristian tha tak ni si zawmthaw lutuk leh hna thawk peih lo leh chawmhlawm nih rikngawt hi a zahthlak, Bible chuan, “Hlau leh khur chungin nangmahni chhandamna thawk chhuak rawh u” a tih kha (Philippi 2:12).

Chuvang chaun vawiin ah hian Lal Isua thawhleh rual hian ringtute hi i tho ve ang u. Kan thatchhiatna te, Pathian rawng kan bawl that peihlohna te pawh hi i thawhsan hlawm teh ang u. Kan rilru buaina te, harsatna te, ringtu ni chung si a thlamuanna nei lo leh sual ti ru renga kan awmna te, Kohhran hnathawh tih puitlin aia Kohhrana sawiselna leh phunchiarna tidarhtu kan nih thinna zawng zawng te hi Lal Isuan thihna a hneh rual hian heng kan thlarau nun ti thi thintu, keimahni a sual bet tlat hi paih i la, i thawhsan daih ang u.

serchhip.wordpress.com

Similar Posts:

• “Mahse nunhlui dawn changin thinlai ruk a na ngei” tih thluk khan han sa chhin teh…
• Security of Salvation
• NAZARETH ISUA KRAWS-A AN KHENBEH KHA A THO LEH TA (Easter Sunday Sermon)
• Chhandamna (Sunday Pual)
• Ruatlawk Theology (Chhandam tawh nge Anchhedawng sa a piang?)

Recent Posts:

• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?

This entry was posted on Sunday, April 12th, 2009 at 11:09 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.