mi(sual).com

Tunlai hian mi thenkhat beiseina chuai lam nen auchhuak in thalai zawk ten ram an siam danglam theih beiseina a ri nasa hle a. Tuna khawtlang sukthlek leh “thalai dinhmun” atanga ka rin ve tehchiam loh thu ka han sawi teh ang.Tunah hian Mizoram thalai dinhmun hi enge ni chiah? Ram kalsiam tur chuan kan inpeih tawh em? Thalaite chu ram kalsiam tlak khawpa vengva an ni chiah em? Lehkhathiam tih hrim hrim hi a tangkai ber em? Thalai ten rualu thenkhatte tawngtawngpaw thlak ringawt hi kan that pui ber ang em?

Competition Level a hniam lutuk: Mizorama thil pawi em em chu thalai zinga competition level hniam lutuk hi a ni. Hei hi ram leh khawtlang kalphung sukthlek dik loh vang a ni. Mahni chhia leh tha hriatna hmanga kal inzirtir lovin khawtlang pawl leh Kohhran ten min bawih tlat avangin Professional zawngin rilru kan pu thei lo. Tlangval fel leh nula fel hlimthla hi Kohhran leh khawtlang pawl hmangin kan siam chawp a. Khawtlanga inhmang mi tak chu mifel kan ti a, inhmang lem lo chu fel tih an hlawh ngai lovang. Tunlai khawvel erawh mahni tana chakai khawrhna khawvel a ni si. TKP, KTP, YMA programme a tam a, hla zir, lu men, thlan laih nan hun kan hmang zo va. Khawtlang pawl hnatlangah taima ber awm fahranin kan thawkchhuak a.

Tichuan, khawtlang ten pawl mi fel ni a kan ngaihte thenkhat chu inchhungkhura chhungte pawn an biak ngam loh khawp a, tum kawh luau reng hi an tam viau si a ni. Pa pian tha pui pui, hnathawh tur nei lo, kuva dawra thu nileng mai mai, enge maw chang a BUSH a policy pawh sawi ve thei viau si hi te kan kat nuk a ni. Tichuan, khawtlanga kalphung hrim hrim hian mimal tan tangkaina a pe nep a. Kan chheh vel hnam thalai ten min tlan san mek a ni. A tawpkhawkah chuan thangkim lo thalai rualte chuan competition dik lo bawkin inbenbel dan kawng kan zawng leh ruai thin si a ni.

Chawmhlawm state: Kum 2007-2008 hian Mizoram chuan cheng vaibelchhe1936.36 hmuh a beisei a. Mizoramin a thawhchhuah ve tura ruahman chu cheng vaibelchhe 161.10 a ni a, kan sum hmuh tur zawng zawng atanga chhut a za zela cheng 8.58 vel chauh a ni. Central atang hian kan hmuh hi za zela Rs.91.42 vel a ni. Thil lang chiang tak chu, Chawmhlawm state dik tak kan ni tih hi sawi nawn leh pawh ngai tawh chuang lovin thu dik a ni. Fing thiam tak leh inremchen a tul teh lul nen thenkhat ten an lo eiru tan tan thin hi chu a pawi a ni.

Kan thawhchhuah hmanga inchawm tur chu ni ila, rangva in nei phak hi kan tlem pharh ang, di in leh chhawl bukah kan cheng fur zawk ngei ang. Thlam ropui tak tak te, Routmawii-te, Super Model-te, youth idol leh youth icon buaipuina tur te, Music video pakhat siam avanga Bus chuan zak nghal ringawt tur pawh kan awm kher lovang. Eng chen nge central zem hi kan zen reng theih ang le? Kan theih loh hunah enge kan dinhmun ni ang tih hi ngaihtuah tham a ni.

Consumer Culture leh Mizo Thalaite: Mass Media khawvelah kan cheng a, khawvel changkanna hrang hrang kan hmelhriat ve tan a. Mahni inchhungah, TV atangin khawvel ram hrang hrang nunzia i lo hmu ve a. Ramdang hausa zawkte nun zia hian i chil a ti put a. Heng ram dangte hian an thawhhahna lai erawh kan thluk lo. Mi hausa tawntaw, (Million Air) Jordana pheikhawk ang lo bun ve maite, Britney Spear-i kekawr hak ang lo neih ve ngei tum tlat te hi kan kat nawk tawh a. London leh New Jersey kawtthler ami te thawmhnaw inbel ang chiah lo inbel thei hi Aizawl-ah an leng suau suau a, London leh New jersey kawtthler thleng pha erawh an tlem pharh si a ni. Awle, nalh tak tak a inchei hi a tha e, mahse kan ram hian thawhchhuah reng a nei lova, eitladuaktu (consumer) mai kan ni tih erawh theihnghilh loh a tha hle. Thawhchhuah nei tum zawnga kan in san mar chhoh pawh a hun hle bawk a ni.

Chhungkua leh Laihna hnai duhsakna: Hei hi corruption ziarang dik tak, kan pawm zam em em si leh kan kalphung pangai tak a ni. Mi tam tak chu loh theih lohna avangin he huangah hian kan intat lut mek zel bawk a ni. Chhungkhat laina hnai an nih vang rinawtin qualification-ah pawh tling hauh lo ten sorkar hna an hmu nawlh nawlh a. Political party ten quata list an siam a, vote zawn nan hna pek an intiam a.

Hei hi a pawi zia mai chu, thangthar tam tak theihtawpa lehkha zir thinte beidawngin kan siam mai ni lovin, mi hmakhua/future kan khawih chhiat sak vek a ni. A Kristian mawlh lova, thalaite than a ti thuanawp em em mek a ni. Competition dik tak nei thei ila, kan thangtharte hian hma an sawn chak anga, tun ai hian an taima zawk ngei ngei ang. Competition dik tak kan neih hi a hun a ni.

Aw thalai, in ngaihtuah chiang mawlh teh..! Politician fa emaw Kohhran hruaitu fa emaw a ti theitu fa i ni thei e. Chhungkhat laina hnai duhsakna hian ram a tihchhiat zia leh mi chanhai zawkte tawrhna a thlen nasa zia hi ngaihtuah mawlh tawh teh. ‘Kristian thalai ka ni’ i ti a ni lawm ni? Tun atang hian ‘competition dik tak chauhin hna kan zawng dawn i ti ngam em le? I chhung ten dik lo taka hna an pe ngawt che a nih pawhin i hnawl ngam dawn em? Competition dik lo hi thalaite nun kawng hruaisualtu a ni tih leh ram ti awprawngna bul a ni ti hi pawm ngam ang u. Nang leh kei lek paw’n bul kan tan ngam a nih chuan kan ram hi chhan tlak ala awm a ni.

Ram hruaitute hlawhchhamna siam tha turin: Buh leh bara intodelh, thlaithar hralh, Hydel Project etc…planing ropui tak tak hi kan ram hruaitu ten an siam a. Thalai hawiher zau I nihna angin hlawhtling tawk lo i ti thin a ni. Ram kalsiam enkawl tura roreltu apiang te hi an inchhuih palh zing lutuk tawhin, a tam zawk hi chhungril nuna corrupt tawh Chief Election Commisioner hlui J.M Lyngdoh’an Ulcer hri vei a tih ang hial niin i hmu thin a nih kha! An kum upatin a bawhzui a, an insiamtha mai mai dawn tawh lo ti hial in ngaihdan i nei tawh a. A siamtha tur hian nangma huang atanga tan lovin, ram hruaitute huang chinah intahluh tan I duh mek a. I huang chin atang hian siamthat tuma thawh i nei tawh em? Vawikhat tal pawh ram hruaitute thurawn i pe tawh em?

Zirlai pawlte dinhmun ‘thenkhat’: Kan rualu te kalphung fuh loh zia kan sawi fo lai hian nang thalai enge i dinhmun chiah le? Mizorama kan pawl (NGO/civil society) neih zinga lar ber pakhat Mizo Zirlai Pawl a inhmang mi i ni a. Tun tum chu i hnathawh ropui tak tak lam ai chuan, i tih fuh loh hi ka han sawi sak thung teh ang che.

Education hi ram siamthatna bulpui a ni tih chu i hre bel hlei hlui tawh a. Mahse, Mizo zirlai ten zirna hmanga khawvel intlansiakna an cho ngamna tur lam ai chuan politics thil ngialngan hi i tui ber a ni lawm ni? Zirlai pawl a i inhman duh ve si avangin a hminga lekin Law College i inziak lut a, class erawh I kal hman reng reng lo a ni lawm ni? Zirna lam ai chuan, Vai hnena tihluihna hmanga ‘donation’khawn hi i hna ber a ni mai lawm ni? Run dalah zirlai ti tha lawmman han siam sak zauh leh press realease siam zeuh hi i thawh ber a ni mai em? Mizo identity i vei a, identity awmzia hi eng chen nge i hriat tawh? Identity lehkhabu pakhat pawh i chhiar chhuak tawh em ni? Hnam dang i pawng huat a, mahse pawisa hmuhna tur atan erawh i haw lem lo a ni lawm ni? Hindu lalram zauh tuma fing verther taka thawk mek ABVP ten in programme siamte pawh an rawn sponsored sak hial che em ni kha?

Zirlai pawlah i in hmang rei tial tial a. Hlawh nei lova, nitin zirlai office a kal reng theih a ni bik si lova. Zirlai pawisa khawnkhawmsa ringawt ringa nun kumkhua theih a ni dawn bawk si lo. Eizawnna emaw pawisa hmuh dan tur pawh i melh tan a. Hmelhriat i ngah tawh bawk nen, contract han hmuh dan kalphung te pawh i hre thawi tan a. Khasi students’ Union hruaitute ang maiin Politics lama zuan luhna chance pawh i melh tan ruai tawh a nih kha…. !! Hetiang hian Mizo thalaite hi ram ropuiah hruai thlen i in ring a maw?

College zirlai i nih lai pawh khan College Students Union hruaitu atan i in candidate ve tum pawh khan, i sawisel hrat ber politician-te culture zulzui chiahin i campaign a, an han thlang tling che a. Students Union-te chuan function ilo in huaihawt a, sum enge maw therhlo in beisei thin a ni lawm ni? Zirlai i nih lai atang khan eiruk tur chu i melh hle tawh a ni lawm ni kha? College College student hruaitu i nih lai atanga Rs sing hnih/khat lek pawh i lo puanhnuai duh a nih chuan zirlaite hmakhua hi ava eng lo em! Hetiang chung hian ram la enkawl i tum fo si a maw?

Tuna kan ram hruaitu tam takte pawh hi an hun lai chuan MZP/Students’Union vela lo inhmang thin an ni lawm ni kha? Nangmah ang mai hian student an nih lai atang hian thil dik lo hi an lo zir tan a ni mai lo maw?

Khawte thawmhnaw leh khawtlang pawlte: Sap chu vakvai chenin i ngaisang a, an mahni an i chak thin a. Chawmhlawm statea awm i nih i ngaituah duh lova, in chhungkaw neih phu lovin, celebrity ho thawmhnaw inbel ang apiang pawh inbel i tum ve a. Hetih lai hian Chakma leh Burma mi erawh i haw em em thin a. Sunday a an khawlai leng chhuak ve te pawh hnawksak i ti thin a nih kha. An thawh peih ang te, an tih peih ang te erawh i ti peih ve der si lo.

Tin, i huat em em Chakma te hian “DELHI TLANGAH” politics an khelh san mek che a sin. Chawmhlawm state hian engkim hi kan state atanga reform theih a ni lo tih i hrethiam har ngawt mai. India ram laipui zawka awka neih ngam ai chuan mahni kawtkaia artui zuar velh hi i tihtheih tawk ala ni mai em ni le? Khawvel pum huapa hming lang thei turin khawtlang pawlte hian thalaite chherna chang an hre lo. Heti reng reng chuan kan in up hlum zo dawn a lawm.

YMA thuvawn pakhat “hun awl hmanthat” tihte hi tunlai khawvel atan chuan a nuihzatthlak zia hi i hrethiam har ngawt mai. Hun awl kan ngah lutuk hian kan ram leh hnam changkang loh zia a ti lang tih phei chu i ngaihtuah ngai hauh lo. Mi ramah chuan miin hna an thawh nasat lutuk avangin, rilru hah hri an vei a, hetiang tanpuina tur clinic leh inkaihruaina hial an siam tawh tih pawh i hre hek lo. Hna thawh nasat lutuk avanga i taksa chhiat phah sawi tur i la nei lova, i zan len rei lutuk avanga i mit sen rum thin tih mai loh chu!

Khawtlang pawlah i in hmang a, thuneihna ropui tak nei emaw i in ti a. Mahni nun trawp ru zet si hian misual zawngin i vak vel thin a maw? Zu in duh reng siin, zu zuar ho I vau vel thin a ni lawm ni? Timna nei hlek lovin, misual i tih zingah pawh mirethei chhungkua zing a mi chu ramsa kawlh ber ang maiin thisen i chhuah thin a ni lawm ni? Mi hausa fate awm tha duh lote chu i vau ngam ngai em ni? In nghaisakna rapthlak ber hmangin khawtlanga hnawksak i tih zawngte chu i nghaisa thin a maw? Nang hi enge i nih bik le? I chhungkaw chungah heng thilte hi thleng turin i duh bik em le? I nghaisak thinte ang chiah hian I farnu chungah thleng se, eng nge i ngaihdan ni ve ang le? Mi thlarau mawh hi i phur ngam em ni le? I tih tur hi hre ve lul tawh teh!

Sorkar hnathawkte culture: Chhungte i neih that em avangin, i phu loh hna i hmu ve ta mial a, nitin office i kal ve ta ziah a. Office-a lo thawk sa tawh te zingah zawmthaw tak tak an tam a, thenkhat phei chuan thawk lovin, office chhungah Pathian thu an sawi tlawrh dup dup a, an tawngtai vel thul a. Upa deuh/senior lam phei chu – Lungphunna leh inneihna apiangah kal an tum avangin nang pawh rei loteah i zuzi ta mai a ni lawm ni kha!

Mizorama sorkar hnathawk dan kalphung hi reform tul zia hi i ngaihtuah ngai em? Sorkar hnathawk 30% pawh khi ban ila, a bak zawng 70 % khian an la thawk zo hle ang tih te hi i hre lo em ni? Lai leh Mara Autonomous District council-ah phei chuan politician ten vote zawn nan hna engzat nge an siam chawp tawh tih pawh ila hre kher lovang. Kan Governor hlui meuh pawh a lu a hai thin zia te, a hminga sorkar hna thawk, thawh tur nei chuang si lo zingah i tel ve em? Mizoram ei chhe mek tu i ni tih i in hre tawh mai em, mahse awlsam taka an hrawk chawm i duh miau si a lawm le!

Intodelh lohna hri: Thahnemngai deuh ten Intodelh chungchang an sawite phei chu i hne tawh lutuk. Hna hniam i sit em emah hian Mizoram pawisa hi hnam dang kutah a luang ral mek a sin. Fiamthu thawh nan taka i hman thin te, Vai mistiri, Burma lei laia inhlawh thin, mi awmpui, Vai artui zuar leh Vai chawhmeh zuar etc ten kumkhata an sum hmuhchhuah hi i chhut chhin tawh em? kum 2006 chhung khan Hyderabad khawpui a sum lalut hnem ber an chhutnaah chuan Hazam/ sam/lu mettu te zuk ni tlat pek a. Hna hniam, thawh tlak loh ni a i ngaih hmang hian hnam dang ten min exploit mek a ni. Heng hmang hian hnam inchimralna tih hi a thleng mek a ni mai lo maw?

B.A/M.A val i ni a, sorkar hnaah vek inhnawh luh theih a ni si lo. Sorkar hna melh pahin Private School-ah Rs 4000-6000 hlawh turin hna i hmu ve ta mial a. Show room thawmhnaw leh Cell Phone Man to tak tak nen office i kai nitin ve a. I duh duh a, i tirhkah i thingpui dawr chawlhna thin khan nang aiin income a ngah hial zawk tih pawh i hre chuang lo. he thingpui dawr nghak hian thingpui dawr bakah theihtawpin thil a zuar kual a. A thawhhah man tling khawm chu i thlakhat hlawh ai khan a lo tam ta daih mai nia. Nalh zuar, sum lakluh tlem si i ni a, i rilru a la hah chuang miah lo erawh….i khawngaihthlak a ni! Hna hniam tak taka i dah tlat hmang khan mi ten sum an ruh khalh hnawk hnawk mek che a ni.

Kuthnathawh phei chu i zak thin a nih kha! Mahse, hei hi chu ka dem reng reng lo che. Rualute kalphung fuh loh vang a ni. Hemi siamthat hi a hautak zet mai a ni. A hminga degree certificate vanga M.A val i nih ve miau avangin security tha ber sorkar hna melhna chang hre tawkin i fing var ve miau a lawm. Thahnemngai deuh ten kuthnathawk turin an han fuih thar leh vel che a, i beng rawngah a lut mawlh tawh lo. I dem awm love, kuthnathawk turin lehkha I zir hlei nem le. Kuthnthawk tur chu ni la, M.A hi zir kher a ngai lovang. Skill labour tak tak nih ngai khawp a, kuthnathawhna tur hna kan la nei lem lo bawk nen. I dinhmun ang bawka awm mek, kei lu mum, atzat hnih hnuai lam hi ka bangbo tak meuh a ni. Engtin nge kan insiam that ang tih erawh beng sikin lo ngaihtuah ve mai mai teh!

Kohhran Thalai: Kohhran thalai a inhmang thin i nih avang hian fel ber emaw i inti fo thin a nih kha! Drugs addict leh zu in ho phei chu i hmusit ru hle thin a. Mahse, heng ho te hian i nunah hian hmuh tur an hmu bik si lo a ni. Thalai pawl atangin khawmpui nikhuah i phusa hle thin a. I tel mekna thalai pawl hian khawmpui an buatsaih dawn pawhin, sorkar hnenah vehbur an khawn duk duk thin a ni lawm ni. I hmusit em em thin ruihlo bawiha kun mekte nen hian chawmhlawm state-ah in awm dun mek tih hi ka han hrilh ve reng reng ang che. I tel mekte thalai pawlah hian lemchang thiam zingah i tel mek a ni tih hre mawlh teh.

Lehkhathiam mi hlauhawm te: Tunlai hian mi thenkhat ten thalai lehkhathiam te an chona awm fo a, a hming leka degree sang nei ve i nih avangin mahni awmhmunah i lo bu ve nghauh nghauh a. Lehkhathiam hrim hrim hi Mizoram chhanna hmanrua a ni ber em tih erawh i ngaihtuah thleng kher lo thei e. Ziak leh chhiar thiam tamna state-ah hian lehkha thiamte hian mipui mimir tan malsawmna a thlen tak tak chuang lo tih pawh i hre lo. Tlema vantlang chunglam a, hriatna (knowledge) i neih te chu remchangah hmangin mipui i bum a, dik lo chung pawhin sum huih luh dan i melh ruai thin a ni lawm ni?

heti chung hian lehkhathiam i la inti ngam cheu em? Corruption hre tawk leka inzir fing, politics thil nena hna hmu thei tawk vel leh officer dinhmuna kai thei tawk i nihna hi lehkhathiam nihna tur ber em ni? Hna I hmuh hrilh loh avangin i chalchang au lek a ni mai lo maw? Ram vei em emin, chanchinbuah i au tial vel a, hna i hmuh ve leh i tham ral leh daih si mai lovang maw? Mipui ten kan hnemhnan pui chuang em ni? Khawtlang ram leh kalphung tha zawk i auchhuah pui tawh reng reng em ni? Ram tana tangkai enge i sihchhuah ve tawh? Chona i chhang ngam tak zet nge, tuna kan kal dan hi lungawi pui lo zetin i thlir liam ve leh mai dawn? Lehkhathiamte development duan hian kan ram policy hi a nghawng em?

Khawtlang kalphung dik lo leh tha lo auchhuah pui ngam lo, siam tha tura chetchhuah tum lo mithiam zingah I tel ve mai lo maw? I nun atang hian Degree vang ringawt a lehkhathiam nih ringawt hi a pawimawh ber lo tih chu a lang chiang teh a sin, chona chhang ngam nihna hi a pawimawh zawk chu a ni tih hi hre ve mawlh tawh teh.

Rualu VRS Thangthar: Kan ram kalfuh lohna hi Rualute vang niin i hria a. A dik a ni, mahse a dik famkim lo. Mahse, hemi siamtha tur hian rualute hi thangthar ten thlak ringawt hi tha ber turin i ngai a maw? A teuh lo mai. Kan ram kalphung hi mihring (player) ringawt ni lovin, a kalphung (system) hi a corrupt tel tawh a ni. A player hi thlak ringawt ila, a system hi a kal dik i ring a maw? I ngaih ang ngawt hi a ni hauh lovang.

Party tello Sorkar: Kan ram political party te kalphungah hian beiseina i nei tawh lova. Thenkhat ten party tello sorkar an sawiri tan a. Democracy ramah hian political party tello sorkar a awm ngai em ni? Democracy chhunga awmin, a kalphung ber chu i nuaibo thei chiah ang maw? Mizote hi hetiang tur khawp hian politics leh sorkar kalphung hriatna lamah kan fing var lem lo a ni.

Political party reform aia kawngdang (alternative) i zawng nghal rum rum mai hi a fuh ber em? Tuna kan Mizoram party system hi reform chuan hman tlak tur ala ni. Heng political party nuai bo ai chuan, party kalphung reform hi kan vei hmasa ngei tur a ni. Entirnan, code of ethics mumal tak siamte, corruption ti pung tu-block leh Unit system siam danglam te, vengchhung mi ngei (local mi ngei) chauh MLA din tir te, Party candidate siam dan a fimkhur te…etc te hi thalai ten kan vei hmasak tur niin alang. Political party nuaibo nghal rum rum hian kan ram hi a ti danglam nghal rum rum lem lovang. I ngaihdan hi siam hma lutuk teh suh..i ngaihdan a hlawhchham rual chiah hian zoramah mi beidawng an pung belh zel thin a nia aw…!!

Kan ram hlawhchhamna: Ram kalphung chu Birthday cake ang a ni. Bawlhlo (flavour) hrang hrangin inchawhfinin Brithday cake a siam a. Hetiang bawk hian mimal, chhungkua leh khawtlang pawl hrang hrang chungah politics in ram a siam a. Mizo ten Birthday cake siam tur chuan heng a bawlhlo hrang hrang te hi kan chawhfin thiam hlei thei lo a ni. Birtday cake eitlak kan siam chhuak thei lova. Mipui kan phun mur mur tawh mai a ni. Tichuan, kan ram kalsiam hlawhchhamna lian ber chu – mihring (player) leh a kalphung (system) hi a ni.

Tawngkam dangin ka han hrilhfiah ang che aw- kan khawtlang hian hruaitu tha (Leadership) kan hlawhchham a ni. Mipui rorelna kan tih ram reng rengah mipui kaihruai tur hian hruaitu (leader) a pawimawh tak zet a. Mizote pawh pi leh pu atanga Lal lalna hnuaiah “bula tu rawh” tih hmanga in enkawl thin kan ni. Chuvangin, hruaitu tha hmanginZoram thar siamna kawng (chance) ala awm. A bawlhlo hrang hrang infin dik tur hian Birthday cake siam thiam leader kan mamawh a ni. Leadership nei tha haichhuah tum zawnga thalai ten rilru kan sen zawk hi a hun a ni.

Thalai ten chona kan chhang ngam dawn em: Kan ram dinhmun hi harsatna eng pawh lo thleng rawh se, thawh tur hna tha, chona thar kan hmaah chhawpchhuah a ni mai a ni. Chona tel lovin ram a thang thei lo. Kan ram kalphung tlu chhe mek siam tha thei tur chuan thalaite ten chona kan chhan a hun a ni. Tun hunah hian bul i tan ngei ang u.

Ram kalsiam kalphung (governance) chungchang te hi i zir chiang ve ang u. Direct taka Kohhran emaw politics-a han inhman nghal rum rum hi a ni ber lo. Citizen tha tak ni chung hian politician tha tak nihna kawng a awm a ni. Chu chu, sorkar kalphung leh nihna mumal tak lo hriatpui a, kan venpui a tul a ni. Sorkar hi kan vaia ta vek a nih avangin a inchhuih palh turte hi kan lo venpui a ngai a ni. Kalphung dik lo hi kan ngawih bo pui mai tur a ni lo. Thil famkim lo hi siamtha lova, kan ngawihbo pui mai mai leh a nihna tur tak ni si lovah, kan inrel phar mai mai hian awmzia a nei lo.

Thalai ten kan ramah dikna hi tun din leh kan duh takzet a nih chuan thil kalphung fuh lo hi kan auchhuah pui tur a ni. Rinawmna leh dikna in bul kan tan thar a tul ta a ni. Tuna thalai zingah hian mi 1000 lek pawhin rinawmna leh dikna in bul tan ila, kan ram hi a danglam ngei ngei ang. Tunah hian Mizo zingah mi 1000 lek hian ram siamthat duhna tak tak a, mahni nun atanga bul tan duh hi kan awm tak zet em le?

Similar Posts:

• Kalphung thar vrs Sawrkar Thar
• Chalfilh Constituency Joint Students’ Union-in MPF hmalakna do zel dawn
• Mizoram watch
• Kan awm angem?
• NLUP Survey hna YMA ten kan kengkawh ang maw?

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, February 14th, 2010 at 5:00 am and is filed under Mizo Society & Culture, Opinion. You can follow any responses to this entry through the RSS 2.0 feed. You can leave a response, or trackback from your own site.