mi(sual).com

Khatia kan pahnih chauha kan awm tak kha chuan kei tawngkam lo thiam bawk si lo, tawngtur a vang hle a. Ka han thut hnaiha, ka lasi note-i chu a hawi chhuak lo. Mipa a la hmachhawn ngailoh vang nge? Min duh ve vangin kan awmdun khan a lai tlat zawk niang le.

Chutia ngawi renga rei fe kan awm hnu chuan ka thiamdan ang angin biak tawng kan tum ve a. A rul tawk lekin min chhanga. Ka huaisenna zawng zawng nen amah ka ngaih theihzia leh amah avanga buaina ka neihte ka han hrilha, a ngawi renga. Chutah, ka duh a, ka rilru a luah hnehzia ka han sawi chuan a nui suk a. A biangsum a lang leh ta! Chutah ka han kuai hera, min rawn en a. Ka duhna leh a rilrua awm ka chakzia ka han hrilh a.

Aw ngaihnobei zetin,”hmun hranah kan awma, lo duh ta chein, i tan lo rinawm ila ka tan i rinawm ve reng thei angem” tiin zawhna min rawn zawt a. “thei e” tiin ka chhanga. Ani chuan,” keipawn ka duh che a, ka rilru i luah thin a sin. Kan inkawm zawk atang khan hmuhleh che ka chak thin. Tuna kan awmna inhnaih ta em em pawh hi ka dilna Pathianin min chhan vang aniang” a han ti a. Ngaihthlak a va nuam em! Chutah min rawn en a, min nuih var var a.

Ka han kuaidaka, a hmui chûl zozam par ang mai mawi leh pianpui tih hriatrengah chu ka han fawp a. Kan innuih suk a. Kan infawp leh a.. a thiannu chuan thawm a rawn neia, kan haw phei ta a. Kha ni, ka ngaih em em, ka lo ngaihzawn ruk em em nen inkungkaihna kan neih tan ni kha, ka rilru hian a la hre reng thin.

Tlaiah chaw ka han ei a, enge ka hmeh pawh ka hre mang lo. Ka lasi note-i ka ngaihtuahnaah a rawn langa, duhthawh taka kan infawh laite kha.. ka kham thuai a. Ka lasi note-i te awmna lam ka en a. A lo awmreng tawh a. Min rawn nuih var var a, min rawn bye bye bawk a. Min ngai ve hle a ni tih chu a tilang chiang hle a ni.

Kan inngaihzawn atanga ni hnih vel lekah ka awmpuite chuan an hre nghal vek a. Pawi tih a hnekin ka intithei zawk hiala, a chhan chu kha ka lasi note-i kha chu hmeichhe tam tak tan pawha thik awm khawpa hmeltha a ni tlat si a.

Kan inngaia kan inthlahlel hle a. Inhmuh ringawt pawh kha nuam kan ti thin. Ka thiante pawn ‘D riallova’ min ti hiala, mahse ka lasi note-i ka ngaihzawng a nih avangin ka zak lo. Ngaizawng ve se kei aiin an thlir nasa daih ang.

Chawlhni a nia, ni dul ruih a. Ka lasi note-i pawh a rawn dak rih lo. Dar 9 vel a ni tawh ang tihah Ambulance chu ka lasi note-i te hostel thlangah a ding a. Hmanhmawh takin a tlan lehnghal a. Ka ngaituah vak loh avangin engmah pawh ka hre zui lem lo. Ka lasi note-i ka mitthlaah a cham reng mai a ni.

Ka lasi note-i te awmna lam ka han en leh a, a reh vawng vawnga. Ka ngaih a tha lo tan a, ka thauah min man tlat mai a. Dar 12 velah chuan patling pakhat a lo kal a, kan warden a biaa, min rawn au a. Insiam rawh tih ringawt min hrilh a. Engmah sawizui lovin ka insiama, chupa nen chuan motorah kan lut dun ta a. Pa hmel zahawm tak a nih avangin kan inbe tam lo hle mai
“khawnge kan kal dawn?”

“damdawiinah”

ngaih a tha ta lo em em a. Damdawiin kan thlen chuan ka lasi note-i thiannu chuan min lo pawh thuaia, a pa a lo ni a. Ka lasi note-i chuan min lo lam reng avangin a thiannu pa chuan min lo hruai hi a lo ni a. Ka tan an va han inpe zo hlawm tak em. Engmah min hrilh zui lo.

Ka lasi note-i bulah chuan ka thu a. A kut ka vuana, min rawn nuih pei hram a. Min be zui lovin min en ringawt mai a, a chau tih a hriat hle mai. A bulah chuan ka awm reng a. A khat tawkin doctorin a rawn en reng bawk a. Nakinah chuan doctor chu a roomah ka zui phei a. A natna ka zawt ta tawp mai a. Ka rei, min damrei pui tawh lo ang maw…?

Awm ngaihna a vang duh khawp mai. Ka insum hram hrama, ka lasi note-i bulah chuan ka han awm leh a. Ka en thin, ka rilruah chuan naktuk lawkah min kalsan dawn tih ka hre si. Hlim hmel put ka tum hram hram a. Hlim erawh a har. A chhungte pawh an lo thlenga, thutna ka han ken dawn pawn a phal tlat lo. Min ngai ve em em a. A chhungte pawh chuan min hrethiam hle a, amah a fel ang bawkin a chhungte pawh an fel hle mai.

A darkar tinin a zual zel a. Zing lam dar 4 velah chuan ka lasi note-i chuan nakina hlim taka kan awmna tur, then tawhlohna ramah chuan min kalsan ta. Tap thawmin a zuia, keichu engtin nge ka awm pawh ka hre rih mai lo. Ka mitsulh a ni ber mai. Ka han harh chuan a kut ka lo vuan a ka lo fawp vawng vawng mai hi a lo ni a. Rilru a baihvai duh ngei mai.

Kum tam pawh liam tawhin nupui fanau pawh nei duah tawh mah ila ka lasi note-i kha ka rilruah a la awm reng thin- ka ngai che lasi note.

Similar Posts:

• Ka ngai che- Lasi note III
• Ka ngai che- Lasi note IV
• Ka ngai che- Lasi note II
• Ka ngai che – Lasi note!
• Tleitiri zunzam..

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Thursday, September 9th, 2010 at 12:30 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.