mi(sual).com

Misual.com hi mizo website zingah chuan tlawhtu nei tam ber a ni tawh mai lawng maw te ka ti thin a. He website tlawha lut a, chhiar ve thin ho hi chu sawi tel lo ta mai ila, thuziak post tu pawh kan tam, comment tu pawh kan tam ve ta. Kan phuisui sawt khawp mai.

Thuziak mi an awm a, chung te chuan thu tha tak tak an post thin. Chutih rualin mahni thuziak post duh avang chauh a in register a, post a chhuah hnua puallenga thlang tla ang maia bopil hlen ta vang vang an awm ve chawk bawk Thuziak thiam ve vak lo kei ang te hi chuan mi thu ziak sa lo comment mai hi ka tih theih tawk a nih miau avangin comment lamah ka lang ve thin. Comment huanga inkawm khawm hi nuam ve deuh a nia. Tuk-zana ka comment pui thin ngat chu a takah hmu ta ila ka nel nghal viau ka ring asin, kei thluak thawl pa hian.

Member in register thlap kan nih chuan pakhat tal chu comment ve thin turin ka han ngen rawih teh ang che u. Comment hi a hlu em em a, ngaihdan tha tak tak kan thawh khawmna anih rualin kan inkawmna hmun a ni nghal bawk; chuvangin a nazawngah chuan comment closed loh hram ni ta se, a duhawm hle ang. Comment huanga thuziak sensitive zual deuh chu admin te’n tha an tih angin edit emaw ta mai se tiin duhthusam awmze neilo ka han sam ve mai mai ang e.

Facebook kan uar tlang ta bawk a, i han sawi law law teh ang. Facebook ah hian heti lama in nick te kha hmang tawh lovin mahni hming tak tak in lo hmang tawh hlawm si a, misual lama ka comment pui thin fel tak tak te kha, tute nge in nih ka hre thei tawh lo. Pu Mzvision te, Vaiva te, Kawlhawk te, H. Vangchhia te, Chawnghilh te ho hi chuan an nick an hman chhunzawm a, ka hre thei nghal mai. Friend request kan thawn chhuah chang hian ‘misual.com ami chumi khami chu ka ni e’ tiin inhrilh hre ta thin ila chuan, rang takin kan inhre nghal mai ang a, a nel pawh kan innel sawt ngei ang.

Entirna pakhat lo sawi ta i la, Sangtea Ralte hian friend request lo siam ta se, tunge anih ka hre hauh lovang; amaherawhchu “Saitawka ka nia” rawn ti thlap na se chuan e, a rang a rangin ka confirm nghal ang a, ka titi pui nghal mawlh mawlh ang.

Hriat theuh angin post tur leh comment tur chuan in register a ngai a. In register lem lova chhiar ve thin te an tam em em tih chu ka hre tho na a, in register thlapa tlangnel taka titi khawm thin te ngat hi chu chhiat-that ah pawh kan inpawh viau ka ring. Kan lo tam tham ta deuh a, mize hrang hrang awmkhawm tih takah thu pawh a saisa nuaih chang a tam a, ngaihdan pawh a inpersan thei khawp mai. Ngaihdan inan loh vanga thui tak thlenga inhnial a, na tak taka in kah fuk fuk chang pawh a awm fo mai.

Mahse misual.com member theuh kan ni tih hi i hre nawn fo teh ang u. Fing bik kan awm lova, fel bik lah kan awm hek lo, misual.com huang chhunga leng theuh ka ni. Misual.com member pakhat a lo che mawilo palh emaw, a tawngkam kan helh riau tum pawh a awm thei. Hetiang hun ah pawh hian inelsen a, inhmuhsit zui a, na tak taka inti let hrep lovin, “A ni hi chu ka member pui a ni a, a tawng sual palh ve a ni ang e, i hrethiam ang u,” intih ngam a tha.

Mihring mizia a inang lova, thenkhat te’n tawngkam mawihnai taka in comment thluaithlum thiam laiin keini ang dangawk leh tawngkam thiam lo, ak zathnih hnuai lamah pawh rawng lo lehnghal tan chuan tawngkam bung tak tak, kan hmang fo ngei ang a, amaherawhchu kan hram tlakhawlh em em vang a ni lo tih hi kan inhriat tawn sak fo a tul ang. Kan ngaihdan loh ang deuh taka miin thu an lo vawrh chhuah pawhin a tul anih chuan ngawih chuh hun hriat pawh a tul ta khawpin ka hria.

Inti fing taka mahni ngaihdan sahuai thing vawn tlata, khawpui a rik phawt loh chuan ka thlah lovang ti niawm taka mahni tanhmun sawh nghet lui tlat a, midang rilru tina thei khawpa comment thinkhei tak tak ziak loh hram zir ang u. Tangrual tham kan awm a, intibuai tham kan awm bawk. Misual.com huang chhunga leng kan nih vangin “inchhan hun leh tanrual hun” pawh i hre thar leh teh ang u.

Misual.com avangin hmelhriat loh te thianah kan insiam zel hi a lawmawm ka ti thin. Misual.com huang pawn lam thlengin kan inthian zui zel ka beisei. Mihring theuh kan ni a, harsatna tawh hun te, thu lawmawm neih hun te kan tawng theuh ngei ang. Hetiang hunah hian kan beng kan tih var ve deuh a tul ka ring.

Hlawhtlinna inlawmpui liam liam te hi nuam ve deuh a nia. Post thenkhata comment karah member zinga chanchin lawmawm lam nei an rawn zeh tel changin kan comment kal tluang lai chawlhsan lawk a inlawmpui liam liam te hi a hlu in a va mawi tak em. Heti lam hi i uar deuh deuh teh ang u. Kan memberpui te’n damdawiin hial an lut anih phei chuan i kan ngam ang u. Lungngaite lungngaihpuia lawmte lawmpui hi kan tihtur, kan duty pakhat a ni e.

Similar Posts:

• Happy Birthday mi(sual).com!
• Rawtna hote
• Misual.com kaihhnawih ka vei leh rawtna
• Misual.com sawi belh lehna
• mi(sual).com Thawnthu Tawi Inziahsiak

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, September 25th, 2010 at 10:00 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.