mi(sual).com

via Vanglaini.org

Aw Kashmir
Saturday, 25 September 2010 07:09 Vanglaini

Kashmir tia kan hriat lar, Jammu and Kashmir khu, ram mak leh dangdai tak a ni a. Muslim tamna ram, Hindu lalin a awp thin, ram pakhat ram hrang hrang pathumin an awp ram a ni. Lal awpna hnuaia kum tam fe an awm hnu-in zalenna tharin a hmuak dawn emaw tih nak alaiin buaina, chhiatna leh innghirnghona-in a lo hmuak zawk a. Lei eden tih thin kha lei anchhedawngah a chang zo ta a. Indona hmun, rawlral chetna bul pui leh sumthuninu-ah a lo chang zo ta a ni.

Khawvelin Kashmir a hriat dan tur hi ram buai satliah ve mai, India leh Pakistan innghirnghona bul ber tiin khawvel mipui tam zawk chuan a hre mai awm e. Tlema bengvar leh lehkha thiam sang deuh chuan China pawh a inrawlh a, a hmarchhak lam ram tam tak hi a awp tel tiin a hre ve mai thei. Khawvel mipui chuan ram dangah buaina tam tak a awm ve avang hian thil mak, ropui leh dangdai tak ni pawhin an hre kher lo mai thei. Amaherawhchu, Kashmir buaina hi ngun taka kan chhut chuan ram buai sathliah a nih lohzia kan hre thei awm e.

Hnuchhawn ram a ni

Kashmir hi ram nuam leh mawia sawi a ni a. A ram leilung hi thlai-in a ngeih hle ni tur a ni, an apple te pawh an hmingthan pui hle thin. A ram mawi leh a boruak a nuam em avang hian khualzin tam takin an tlawh a, a hming lemah pawh “Lei van ram (Paradise an Earth)” tiin an phuah a. Mahse, thil a letling zova, buaina, helna leh inghirnghona avangin lei eden hi lei anchhedawng a ni ta zawk a ni. Kashmira buaina thleng hi kum tin chawh rualin vawi 2500 vel thleng ang a ni ta mai a, a nawmna ai mahin a tihbaiawmna hi mi rilruah a intuh zawk mah a nih chu.

Lu zuar tan lo chuan han zin ngam na rual a ni ta lo a. An apple chu sumdawnna atan pawh a hman hleih theih ta lova, hmun thenkhatah phei chuan sipaiten ui vawm nan te an hmang hial a. Helna avangin harsatna chi hrang hrang leh retheih mangangna in thla a zar a, a zar mek zel dawn a nih hi… A ram mi leh sa ngei, Hindu hnam tha, Kashmir Pandit te chu, a ram ralmuan loh em avangin India ram hmun thenkhatah raltlanin an pem darh a, tunah phei chuan hnam riangvaia ngaih niin thil thenkhatah phei chuan reservation te pawh an pe ta hial a ni.

Indona hmun a ni

Ngaihdan indona (ideological battlefield)

Kashmir hi a tak mai ni lovin, thu-a indonna hmun pawimawh tak a ni. Mi thiam leh zir miten a ram buai dan leh a buaina chin fel dan turah hian rawtna leh ngaihdan pawh tam tak an sawi chhuak tawh a. An hmuh dan pawh a inang vek thei lova, an rawt pawh a inang vek hek lo. Engnge tha a, engnge tha lo tih pawh a hriat hleih theih tawh loh chu a nih ber hi maw!

Tin, a mi chengte duhdan leh ngaihdan pawh inang hek suh – a thenin India a awm an duh, a then mahni-a ro in rel (Independent) nih duh, a then lah Pakistan lama beh duh an ni. India lam awn te pawh hian thuneihna danglam bik (greater autonomy) an phut a, ngaihdan a sai sa ta nuai reng a nih hi. Chutih rual chuan hel pawlte hian Pakistan lam an awn thung. Heng an inpawhna karah hian thu maiin a daih loh chang a tam a, tharum hmanga innawr leh silai hial hmeh puah te a ngai fo reng a ni.

Rawlrala chetna bulpui a ni

Kashmir hi Pakistan-in rawlrala chetna hmun bulpui ber a ni ti ila kan sawi sual tam pui awm love. Kum 1989 atang khan rawlrala chetna hi tan a ni a, chhum lo chat lovin a kal zel a ni. Kashmir hel tam zawk hi Pakistan puih leh tirh an ni deuh ber. Pakistan hian a ram chhungah hian India rama hel thawn luh turte training a pe tluk tluk thin a ni. Helte kut hi venhimna hnathawktute mai bakah, mipui pawhin kawng tin rengin an tuar nasa a ni.

Kashmir hi rawlrala chetna a hluar em avang hian thlanmual rathlak tak a ni. He indona hmunah hian venhimna hna thawk mi 7000 vel, hel pawl mi 20000 bakah pawi sawi lo mipui nuai khat dawn laiin an nunna an chan tawhin chhut a ni. Vawiin ni thlengin an la thi malh malh reng a, chin hriat loha bo tam tak an awm bawk. Chutih lai karah mihring zahawmna bawhchhiat thu (human right violation) a lo ri ve sek bawk a, khua a var thlawt lo.

Tunah phei chuan Kashmir mai duh tawk lovin Pakistan hi India ram hmun hrang hrangah a in zar pharh zel a, North East thlengin min kang kai chho nia sawi thawm te pawh a awm ta reng mai.

Sumthuni nu a ni

Kashmir neih hi thil hautak zet mai a ni a, sum leh mihring a heh hle. India tan chuan Kashmir enkawl hi ipte mawng pawpa pawisa thun ang maia hautak leh awmze nei lo a nihna chen pawh a awm a ni. Kashmir hi a raltit avang hian venhimna hnathawktu dah hnem a ngai a, he rama venhimna leh sorkar hnathawk turte tan lawmman leh hamthatna danglam bik siam a ni bawk thin.

Tin, tun thleng hian a rama remna en thlithlai tur hian UN Military Observer-te an awm reng a, he mi atan hian ram hrang hrang atangin sipaite chah khawm niin UN lam pawh hian sum tam tak a seng a, a la seng zel dawn pawh niin a lang.

Ram mawi leh hmun nuam tak tak a awm lai hian tlang chhengchhe fe fe, a then te phei chu kum khuaa vurin a bawh khah lek luk mai te thleng khuan an humhalh vek a ngai a. Heng vur rama khawsak hi a hautak a, ei leh in tur, thuamhnaw leh hmanrua pawh a tha bik a ngai a ni. An hmanraw thenkhat phei chu ram dang siam chawk luh ngai te a ni hlawm avangin a hautak dawbawl (double) lo thei lo a ni. Heti khawpa a hautak avang hian Kashmir hi chu sumthuni nu a ni ringawt mai a ni.

Khawvel buaipui Kashmir

Kashmir hi khawvel hriata India leh Pakistan pholangtu pawimawh tak a ni. Kum 1947 ram pahnih te an indan atang khan an han buai phat a, UN-ah phei chuan Kashmir hian Pakistan leh India hi a hruai lut hma hle. UN Security Council resolution hmasa lam no 39 leh 47 hi Kashmir vanga siam a ni ngat nia! Ram tam tak hriat tur hian Kashmir hmang hian India leh Pakistan hian introduction an pe deuh reng a, an introduction pek dan erawh a duhawm lem lo thin khawp mai.

Tun hma hun hmasa lam khan Gen. Mc Naughton (Canada) hovin rawtna te an siam a, Mc Naughton Plan an ti. A hnuah Autralian mi Sir Owen Dixon hovin an bei leh a, ‘Dixon proposal’ an ti a, a hlawhtling tak tak thei lo. Commonwealth Conference-in a chai leh laih laih hnu-in Frank P Graham hovin ‘Graham Mission’ an ti leh a, chu pawh eng a ang tak tak thei lova, awlsam takin a chin fel mai theih bik loh. Kum 1949 atang khan tun thleng hian UN Military Observer Group dah an ni a, ram hrang hrang sipaiten helai ram hi ngun takin an la thutchilh ve reng a. Ram tam takin chin fel tumin tanpuina kut pawh an phar a, tun thleng hian thil ropui tak chu a lo thleng thei lo chu a nih hi maw?

Hnehna entirna hmun ni

Kashmir hi India leh Pakistan tan chuan chak leh chak loh enfiahna hmun pawimawh tawp khawk a ni. Kashmir hmunah hian India leh Pakistan hi vawi thum lai an inbuan tawh a, tunah pawh hian Pakistan lam hian a tihdan thlakin, helho hmangin India mit ti mim turin Kashmir-ah hian a nunchang sual a chhuah ngat ngat reng a ni.

India-in Kashmir indo-a hnehna a chan kha Pakistan laka a intihtheihna lian ber a la ni fan a. Pakistan pawhin Kashmir-a hnehna chan tak loh hi India a erna chhan pakhat a tling ve a ni. Pakistan tan pawh Kashmir tluka India a chaibuai theihna hi a awm loh avang hian Pakistan pawhin Kashmir hi a thlah mai duh lo a ni. Tin, China tan pawh, Aksai Chin ram awp hi India a tham lohzia leh a hnehna lantirna atana chhinchiahna pawimawh tak a ni thei a ni.

India leh Pakistan inkar tehna pawimawh ber a ni

India leh Pakistan hian Kashmir hi an inkara inthian that leh that loh tehna atan an hmang nasa hle a. Pakistan phei chuan Kashmir hi chinfel a nih loh chuan India leh Pakistan hi an ingeih tak tak theih an ring lova. Inremna leh inthianthatna tura an inbiaknaah pawh hian an rel tur pawimawh zingah Kashmir hi ‘a serh zinga a mei ang’ a ni tlat a. Kashmir avang hian inbiakna pawh a hlawhchham fo a ni. Inthianthatna kawng sialna atan pawh Kashmir bawk hi hman a ni.

India ram Kashmir leh Pakistan Kashmir a bus tlan tir te chu ram pahnih inkar inthianthatna pawimawh tak a ni ta reng mai a. Chuvangin, kawng tam tak chuan dik vek lo mahse, tun dinhmunah hi chuan India leh Pakistan inkar hi Kashmir hmang hian nasa takin an teh thin.

Kashmir hi rei ngial Lal-in a awp hnu in kum 1947 khan Lalin a awpna a tawp a, mahse zalenna aiin harsatna hlirin a lo hmuak a. Kum 1989 a rawlrala chetna a rawn hluar hnu phei chuan Lal awp lai ngai vawng vawng tur khawpin kum 20 chuang chu buaina, harsatna leh hlauhna-in thla a zar a. Tun dinhmun atanga thlir hian harsatna leh buaina hian kian lam a pan mai hmel loh leh nghal a. Tin, he ram insemtute lah hian an vawn hi thlah an tum mai loh hmel bawk si a, an tan hian eng tikah tak khua var ve leh ang maw?

– C.Lalengkima
Jawaharlal Nehru University.
New Delhi-57
#(he artikul hi chhurpi tlawn hnih in ka lei, a ziaktupa hian a phal chhiah lo mahse ka lei thei hram chuan kashmir hi nuam ka ti leh ziak tha ka tih em vang in ka rawn la chhawng ani.)

Similar Posts:

• Pakistan Supreme Court-in Pakistan Prime Minister manna thupek an tichhuak.
• Mangan pui awm Pakistan
• India Vs Pakistan
• Cricket WC Semi Final : India vs Pakistan
• Pak was preparing to use nuclear missiles

Recent Posts:

• June 2016, Mizo(ram) Diary
• The reason we have bad roads in the North East
• INNGHAHNA TLING THURIL CHU
• Essay on Amen
• A MAKIN AVA ROPUI EM…!!

This entry was posted on Monday, September 27th, 2010 at 12:57 am and is filed under More than words, Whatever. You can follow any responses to this entry through the RSS 2.0 feed. You can leave a response, or trackback from your own site.