mi(sual).com

Kei hi tawnhriat mak tak tak ka nei thei hrep a. Hei pawh hi–

Kumin kum tir khan- DU (Delhi University)-a kan thiannu pakhatin, hun remchang a neih ve leh Mizoram hmu tura rawn zin a tum thu min rawn hrilh a. Hun a kal zel a, 28 July khan Lengpui Airport-ah ka zu hmuak a.

Ti chuan, hmun fahrah tè tè fanpuiin, ni 3 zet chu kan inzui hnak hnak a. Tlai khat chu- hmun pakhatah (a bak sawi lo mai ang) zanriah fàk turin, Wine thami ûm 2 paipawn chungin kan inkhalh chhuak a. A hmun a thengthaw nuamin, boruak a thiang bawka ka thiannu pawh chuan nuam a ti hle. Kan piah lawk dawhkanah chuan tlangval 4, smart tak tak hi an thu bial ve laih a.

K1 (Kerh)
Bula mite tana bengchheng nih hlau takin, thawm an dim thiam em em a. An hmel a hlimin an fresh bawk a, hmuh an nuam hle. An titi atang chuan, Company Pakhat hnuaia thawk ho anni tih ka hre mai a. An thawhna nawm zia te, an thawhpui nula nalh zia te, an pute that zia te, pakhat sual bik zia te an sawi a, an tui tlang hle.

K2 (Kerh Kerh)
An hawi pir tan a, an nui ring tan a, an phur tan a, an bial a zau tan. An zinga pakhat chu rawn pheiin, polite takin lighter hawh min rawn dil a. A zial chu a tan a, kal ta mai lo chuan a tawi a tawi a. Pakhat rawn phei ve lehin, ka thiannu chu a rawn be luam a. Khawi atanga lo kal nge? Mizote a hmuhdan? Mizoram nuam a ti em? tih te zawtin, a cham chhunga hlim leh nuam taka hun hmang turin duhsaknate a hlan a. An dawhkan lam panin an phei ve leh mai a.

K3 (Kerh Kerh Kerh)
An insawithei tan a, an pàwr tan a, an luruh a ring tan a, insumna an tlachham tan. Vai nula an ngaihzawn tawh thu te, tlaivar thaka an lampui tawh thu te, an ‘tih’ hrep tawh thu te, ‘tih’ an nawm zia thu te chu insumkarna nei map loin an aupui ta vak vak a. Pakhat chu kan lam pana rawn kal leh tumin a tho hluai a. Pakhatin a lo pawt thu hnawk a. ‘Ka be ve reng reng duh alawm le’ tiin a tho leh a. Pakhatin ‘I mawl eee mai. I rui anih kha’ tih phahin a nam-kàt dawr a, a pai chawn chawn a. ‘Ka mawl aaaa..?’ tih phahin a no ken lai chu chhuatah a vawm keh chuai a, an buai ta luai luai mai le. Ràng takin security te’n rawn thelhin, an nawr chhuak ta hlawm a.

Keini pawh…
Ni e, kan báng bik lo. Ka thiani nen chuan ‘K2’ Category vel kan ni ve a, kan ri ve ta bab bab a.

“ZU khap in la mamawh hle mai”

‘Khap kan nih vang alawm kan he tih…’

“Khap lo lek phei ula chu, innasa lo ngawt ang le”

‘Hman hman atang khan lo khap ta lo ila, kan thiam ve tawh ngawt tur a…’

“ZU in thiam thei hlawl lo khawpa hnam mawl hi an awm ve rèng a nia. Chu chu nangmahni insawidan pawh niin ka hria. In Kohhran hruaitute, Sorkar hruaitute leh in mifel ber ber te pawhin- Mizote zu in thiam theih loh zia hlir ani lo’m ni an sawi…”
(ka thin a khai ta zak mai. Ka sa phat a, kut khur hlawk hlawkin amah chu ka kawk a)

‘He hnam, Mizo hnam hi ZU in thiam thei lo chatuan khawpa hnam mawl kan ni lo tih hre rawh. Chu tia’ng chuan mi hmu hlek suh. Kan chhak leh thlanga hnam mawl leh berhchep ve tak tak te mahin, an in thiam chuan kan thiam ve thei. An khap loh ngam angin kan ngam ve lo mai a ni. Kan hotute’n kum tam tak min khap hnan tawh a. Chu mi avang chuan zu awmna hmun, zu zalenna khua leh khap lohna ram kan thlenin– Ar khuh hawn ang maiin kan thawveng a. Bawngsual thlun phelh ang maiin, awm ngaihna leh chintawk hre lêk loin kan sapatal mai thin zawk a ni. Nakinah khua a la var ang a, harh hun kan la nei khawp ang. Lo ngai reng rawh, khap anih loh hunah chuan e– Kum 5-10 chhungin nangni te, kan vela mite leh khawvel ram tina mite ang hian kan la in thiam ve em em ang. ZU anih avanga kan buai luai luai reng bikna tur leh, kan in thiam loh kumkhua bikna tur awm lo”

Ka ti ta hrep a. Ka insawi thinrim deuh nge ni, ka sawi zawh rual chuan a chhipsam-ah ka tham a, ka kuai vanvadak a. Chu ve leh, uluk takin ka ‘PE DÀK’ ta ngawng ngawng a. A lo arpui mitchhin diar diar a. Ka thlah chiah chu a thaw hawlh hawlh a, a meng kun ngài a, ‘Dik’ tiin a lu a bu ta nghat nghat a.

Aw le! He thawnthu atang hian zir tur kan nei. ZU hi in tura siam ani a, a duh chuan in mai tur a ni. Mahse, in thiam i zir ang u. I tum ang u. A tawk i hria ang u. In control thei ang u. Tum chuan a theih a ni. ‘K1’ kan duh tawk ngang lo anih pawhin, ‘K2’ bak chu pelh tum lo hram ila. ‘K3’ chinah tawh chuan– Thin a lo ràm tawh a, ngaihtuah a tawi a, kan meng thip rûm a, kan buluk a, thil ho tè-ah kan sâ phat tawh mai thin. Chù mi dawt chu– MUALPHONA!!!

(K1 K2 K3 hi, Zu no– no1 no2 no3 tihna ni kher loin, mahni dose atanga kan thliar thiam mai ka ring)

Similar Posts:

• Kerh Kerh…
• Ka Hlau!!
• Hnam mawl zia!
• …ve mai la…
• Zu hi

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, October 2nd, 2010 at 9:33 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.