Ka thianpa-in “Ka Phone hi a bo hlen thei thlawt lo. Tum 7 zet ka tibo tawh a, a chhartute hi naupang atanga thalai leh tar te an ni nawk. Min pe let leh zel…” a ti. Hman zan chu TV (local channel)-ah Pawisa tamtham tak chhar a nih thu leh, a neitu dik takin lam theih reng a nih thu an rawn chhuah a. A hma zanah pawh Taxi chhunga Thil hlu tak theihnghilh, Driver-in a neitu zawng chhuaka a pek leh avanga lawmthu sawina thu ka ngaithla tawh bawk a. Bazar-ah ka kal a, Pawisa Ip (purse) a chhunga Pawisa engemawzat awm chhar a nih thu leh, a neitu chuan Market 0ffice-a lam theih reng a nih thu an lo au lauh lauh bawk a.
Tunlai Zoram khawvel- Pawngsual, tualthahna rapthlak pui pui, eiruk chingte leh mi suaksual tak takte avanga lungngai manganga kan rum mek lai hian MI RINAWM, MI DIK leh MI FEL tak tak hi an lo va la tam em! A suala te chu awm bawk mah se, a hnam nawlpui anga thlirin Mizote hi kan lo va la THA em! tih ngaihtuahna chuan min tilawmin min tiphur a, min tiharh sawng sawng bawk a, ngawi thei ka ni ta lo!
He ram hi : Leilung hausakna reng nei lo, Zawng leh Hahuk rualte tualchaina niawm tlang sang pui pui, kham hlauhawm leh ruam thuk tak takte rorelna, Ram leilung nghet lo avanga nun raltitna, buhbál leh tui namen loa harsatna tiin, ram a zawnga ram chhe ber tluk thawthangin kan selin kan sit thin a.
Tlangram mawi leh thlir nuam, Ngaw dur pik khup mai te leh Par tin vulna, boruak thianghlim leh sik leh sa nuam danglam tak te’n a hual vel, Hel leh mi sual rual intelkhawm te’n an tihbuai ve loh RAM RALMUANG,Thlipui, Ruahpui, Tuilian leh Lirnghing te’n khawvel hriat khawpa a nghaisak ve loh RAM NUAM tiin, kan thlirna tarmit hi thlak ta ila, thil chhia aia thil tha duat taka enkawl thin kan nih ngai chuan he ram hi kan va hmangaih lehzual dawn em!
He Hnam hi : Hnam thatchhia, a engamah intodelh reng reng nei lo, rinawmna/ taimakna leh tlawmngaihna te’n a hnuchhawn san tak hnam a ni, kan ti maw!
Sawhthing chin a hlawk… tih thu hria a, Kumdam leh Kawng sira dah tawih hnur tham thar chhuak thei hnam hi — Hnam thatchia a ni thei dawn em ni? Grape leh Serthlum ching rawh u… tih âu thawm avanga manganpui tham thar chhuak thei hnam hi — engvanga intodelh lo nge kan nih? ‘Khua’ chu a awm ngei a, a kawng kan pawh loh vang lek a ni lo maw? Kangmei leh lei min avanga chenna In chan tate vengchhung leh vengthenawma mi tlawmngai te’n Ni 2/1 lek chhunga chenna thar an din sak tak zozai te, Lusunte hnem tura tha leh hun kan sen zozai te, YMA member nih vang pawh ni lo- MIZO kan nih avang zawka tanpui ngaite tanpui duhna thinlung, kan thisen-in a thanhnan tak tlat te hi “Tlawmngaihna a fâm” tiin kan haider dawn em ni le?!
Ringtu der : Sakhuana pawh sual thup nan leh kâwra hmang hreh lo- a der maia ringtute kan ti maw?
Thlasik khawvawt leh Fur khawchhia pawhin a thulh tir zawh loh, taksa chau leh hrisel lohna pawh chhuanlama siam ve mai mai lo, tuktin Zoram tana Biak In chhung ngeia thingthi hi vengtinah an la kuhtul a sin. He ramah hian hlemhletna, mipat hmeichhiatna leh khawvel nawmsipbawlna te’n a tihbuai ve mai mai loh, kahpathir ang tluta rinawm ringtu nghet cherchawrh chhiarsen loh an inphum teuh a sin.
Thalai demna : Hnathawh tum lo, Nu&Pate thawhchhuah ringa inla changkang, tawngpawr hawipir satliah, mahni nihna leh dinhmun aia lan san tum, ruihhlo leh hurnain a tihbuai Mizo thalai kan ti thin a.
Thlir la, hawi vel teh. Hetia’ng mi hi kan thalaite zingah chhiar tham lek an ni tawh. Mahni kuta din tum, mahni thawhchhuah ngata chhungkaw din tum, mahni hlawh ngeia nupui fanau chawm tum, thalai intodelh an pung tual tual e. Rualelna chang hria, thalai harhfim/thluakfim te’n hna leh sum zawngin kan khawlai an suar ta! Drugs addict hun a liam a, thiamna leh finna zawnga an intlansiak tak suau suau hi haiderin kan hmu nikhualo kumkhua dawn em ni le?!
Ni e, thahnemngaih luatah kan khawlohna laite thurchhuakin kan han insel chiam thin tak na-a, tunlai khawvel sualna sang chho zel thlirin kan chhe lo e. Tin, he ram hi zahpui suh ang u; Mizo hnam hi ngainèp suh ang u. Miin a ram a zahpui chuan a Inchhung a zahpui a ni. A hnam a hmuh nèp chuan amah a inhmu nép a ni. Chu mi/ chu thinlung atang chuan thil tha leh thil ropui reng a lo chhuak dawn si lo a. Kan khawtlang leh kan nunphung réng hi– Kan chhe lo e!
Similar Posts:
- Ti hian ka ngaihtuah thin
- Chhanna Mak!
- Kan theihna mual mualah…
- Mizoramah Zu a vang em?
- Thalaite khawvel vs ram siamthatna lam
December 11th, 2010 at 6:04 pm
thatna lai leh thatlohna lai kan nei vek a..tin mi hring hi kan in ang lo vek bawk…khawkhata tha deuh poh khaw lehlam ah chuan a sual viau thei..mi te ngaih ah buai lo in mahni lam in en ang u….para 1 chhiara ka rilru a awm lo thai tawp..chiar chunzawm leh teh ang
Report this comment
December 11th, 2010 at 6:05 pm
Kawlhawk a thlirna hi ka tawmpui thlaps.. Ka’n chhiar chiang lehzual nghe2..
k first hman ta lo sa2.. :rolleyes:
Report this comment
December 11th, 2010 at 6:05 pm
Chhiar phawt teh ang…. :kiss:
Report this comment
December 11th, 2010 at 6:07 pm
Hmel nenlam ka chhelo :lol: :lol: Nakinah ka chhiar ang, Bazar phawt ang, naktuk ‘Give em chain’ nei dawn tlat
Report this comment
December 11th, 2010 at 6:10 pm
Ziak tha khawp mai…kan la chhe lo reng ani…
Thil hi a chhe lam hi a lansarh chak vang leh kan sawizui peih zawk vang te pawh hi nifahmiang..chhe ta viau a kan inngaih thin..
Hetiang optimist writing hi chhiar anuam,,,min ti harh sawng2 thin….
I ti tha e…
Report this comment
December 11th, 2010 at 6:20 pm
Baal hmaa la thingthi ngai lo mi an la awm teuh turah beisei teh ang.
Report this comment
December 11th, 2010 at 6:21 pm
Va bei tha ve…..duh thawh lutuk na avangte hian mi thenkhat in an ti vak thin tak nanga keipoh KAN LA CHHE LO KA TI……….
.
Report this comment
December 11th, 2010 at 6:25 pm
Krismas alo hnaih nikhua pawh a, riangvai chan hai zawkten Krismas anlo hman nawm ve theihnan a thawhlawm thawh hreh miahlo ‘misual’ kan la kuhtul a sin….chhelo tak kan ni…
I hit tha e
Report this comment
December 11th, 2010 at 6:27 pm
post tha tak ani..ka pawmpui che.
Report this comment
December 11th, 2010 at 6:30 pm
ziak tha thin dep2 hle mai Sir chu. Hawh u, i dinthar leh ang u..
Ka dulkiar pawh hi ka lo la chhe em em lo alo ni reng mai!
Report this comment
December 11th, 2010 at 6:33 pm
Ka pawm zawng a va nilo e..kan chhe ve pangngai hle ah ka ngai a sin le..
Report this comment
December 11th, 2010 at 6:36 pm
Kei chu ka pawm zawng a ni e. Kan tha vek lo tih chu kan hre vek. Chhe ber anga inchhuah reng mai hi a dik lo reng a ni.
Report this comment
December 11th, 2010 at 7:18 pm
NOI: Mi khawsa thei pangngai tak, rualawt lem lo, mite zah kai, mi neih ang nei ve zel thei tan chuan optimist a awl khawp ang, a thatlohna ai chuan a thatna i hmu lui nasa zawk ang.. Change tur hmuh thiam a har ve ngawt ang, a chhan chu i dinhmunah i hlim tawk a, leh chuang tur i hmu lo a, Rethei zawkte dinhmun hre tur khawpin i tlachham ngai si lo. Hnam dang dinhmun awt tur in i hawizau leh lawi si lo. Ram siamthat tum a theihtawk a bei te i hmusit ve khanglang si ang.
Kei chuan kan Zoram hi khamko sang tak a ding, thli na lemlo tak pawn a len liam mai theih hmuh in ka hmu a. Kan morale a dik lo a, kan ngaihsan zawng a fuh lo a. Kan politician te an taima tawk lo. Kan bureacrats te pawn sawrkar khalh ding aiin mahni hlawkna bak an em lo e..State lungmuang nihte hi chapo pui chi a ni em? lungmuang tak a hnathawhnan a hun tha a kan hman loh chuan enge hlutna a neih!
Kan chhe ve pangngai ka ti e..
Report this comment
December 11th, 2010 at 7:19 pm
A tha khawp mai thu ziak chhiar hahdamthlak tak a ni e. Hmasawn zel tur hian thahrui kan nei em, sualna leh khawlohnain min hneh dawn nge hma kan sawn zel anga ropui takin kan la ding chhuak ang tih chu hunin a la hril ang chu.
Report this comment
December 11th, 2010 at 7:29 pm
KKK chu i rawn ziak tha dap dap hle mai, ka ngaihdan leh hmuhdan ka sawichhuah ve thiam si loh a ni e.
Nia, a nawlpuia thlir chuan kan CHHE lo a lawm. A tha lo hi an LANGSAR leh hluai mai thin a.
HAUHUK i tihna a nih ka ring, hehe.
…khrum
Report this comment
December 11th, 2010 at 7:30 pm
mahse Zawlaidi pawh kan Synod berin ZU ah a pawm tak kha…
Report this comment
December 11th, 2010 at 7:37 pm
A chhia tlem te hi a langsar thin a,hetiang mi tha te chanchin han hriat tur awm hian thinlung a ti lawm thin e.
Hmanlai aiin sualna a nasa tih erawh a dik tho…mi reng kanin tam hleih tawh mai
Report this comment
December 11th, 2010 at 7:40 pm
Tha dap dap hle mai.
‘You are what you think’ hi dik duh fu a nia. Chuvangin positive attitude/mindset siam thei chanchin/thu inhriattir fo a pawimawh a ni.
Report this comment
December 11th, 2010 at 7:47 pm
A thatna lai i hmuh theih avang in mi vannei tak i ni mahse a chhiatna lai kan ngaihthah a kan thut mai chuan kan kawng nuam tak piah hi a chhe duh viau mai an tih ka hlau ani..Kei zawng mizote hi mize nghet neilo ka in ti thrin chhan chu kan chhungril hian tak tak na a pai tlem tlat ani..Hmanni Gwahati atanga kan haw lam a Mizoram aiawh a chhuak naupang tete leh an hotute abo a bang awm lova zu dawr a an dak fur mai han hmuh te,kan chhuk lam a kan chuanna motor a tawngtai a hnu lawk a zu a lem kan hmuh zui leh mai te kha ngaihtuahna ava ti thui em..tin, hmanni sunday time chanchinbu hma lam khat deuh thaw a Mizo chanchin chhia hlir mai inziak te kha keimahni tho ziah lantirtu kan ni si..hui ha..
Report this comment
December 11th, 2010 at 7:52 pm
A tha lam i sawi mi tlemte zingah khian tel ve phak a va chakawm ve le!
Kei zawng, fel leh that ka tlin lo thin a..!
Report this comment
December 11th, 2010 at 8:19 pm
kawlhawk leh i thuziak chu lem a va nuam khalh khalh ve le. Tute pawh keini mi(sual) zz pawh hian a positive lam thu hi chuan min ti phura, kan khi seng mai chu anih hi.
Nia ken tello hian thiltha tamtak hi kan u leh nau then leh rual te kan hriat leh hriat loh te hian an va ti nasa em. Ruahpuivanawn sur chang pawh hian nilai zan inkhawm hi thalai an la awm nual thin reng asin.
He thuziak zet hi chu chanchinbu lam hian an chhuah chhawng keuh se ka ti hle mai a
Report this comment
December 11th, 2010 at 8:20 pm
Sualna,hlemhletna leh rinawm lohna ten tuallai inthlahrung lo taka an len suau suau tawhna Zoramah hian mi rinawm inthup, mi fel biru, mi tha langsar lo tam tak an la awm tih a taka hriattir kan ni leh thin te hian thinlung ipik a ti thawveng leh thin.
Report this comment
December 11th, 2010 at 8:30 pm
Sodom leh Gomorrah ah mitha tlemte zawn ang vel kha ani maw :lol:
Report this comment
December 11th, 2010 at 8:56 pm
Tha khawp mai. Chanchin duhawmlo tam tak kara hetiang chhiar tur lo awm hi a lawmawm. A chhe lai hi a langsar hma em a, kan chhe ta vek emaw tih mai a awl. Mi tha, dik leh rinawm hi an la tam ang tih i ringhlel lovang u.
Hman kum deuh tawha Zion Street-a ka bazar laia ka thil hmuh ka’n share ve teh ang. Nu pakhat hi bag zawrhna dawrah a lo kal a, ‘Nimina bag ka lei khan min kir sual a, hei Rs 30’ tiin an kir diklohna ang chiah kha a rawn pekir leh a, ka rilru a khawih ngang mai. Tam tak chu ni ila ”Ka luck kher mai, pawisa min kir sual a” tiin kan ngawi bo duh mai awm mange…
Report this comment
December 11th, 2010 at 9:14 pm
Kawlhawk i post chuan minva ti hlim ve. :lol:
‘zamngailo vala tang ta che’
Report this comment
December 11th, 2010 at 9:34 pm
chhiar a nuam viau mai
Report this comment
December 11th, 2010 at 9:50 pm
Kawlhawk nge nge chhiar a nuam thin mange..
Hmanah pawh taxi-ah ka account book ka theihnghilh palh a, Aizawl taxi stand zawng zawng deuhthawh kan zawn hnu leh beidawng tak a kan haw kha chu taxi driver chuan min rawn phone a, an address min han hrilh mai chu ka lawm teh a sin..
“Aw Zoram ka ngaihlu che..”
Chutihrual chuan kan ram a sualna a punlun zia hi chu kan hria e..Hun a la tlai lo I tang zel ang u..
Report this comment
December 11th, 2010 at 9:51 pm
Dik viau, kan han ri deuh hluai thin tak naa zoram ngaih a la nat em hi maw. Thil thalo chanchin hriata kan han pawr deuh hat te pawh hi hmangaihna vang a lo ni e, mi thalo tlemte avang erawh chuan kan lungngai fo thin.
A tha lam leh entawn tlak lam hi news tam ber leh hriat tam zawk nise chuan tun aia chhelo tur zawk kan nih ka ring khawp.
“Aw zoram, miten sel thin mahse, Ram dang zawng zawng aiin kei zawng, ka ngaina che…”
Report this comment
December 11th, 2010 at 10:05 pm
Pu Kawlhawk-a post nge nge a tha leh khawp mai. Naupan tet atanga Pathian thu nung hmanga chawm len te chenna ram a ni a. A tu pawh mai hian sual ve chang nei mahse, inchhirin an in lamlet thuai thin. Thenawm khaw veng te nena chen ho thiam, titi ho thei, inkawm dial dial thei hnam nunzia hi a mawi asin. Hetiang ram ralmuang leh nuamah chuan chanchin duhawm lo te hi a langsar hma bik a nia. Misual tlemte awm ve thin te hian kan hmai an tibal thin mai mai alawm.
Tlawmngaihna pawh hi a tlahniam reng reng lo. Hmanlai tlawmngaihna leh tunlai tlawmngaihna a inang thei tawh lo tih mai a ni e. Hmanlai angin sakei hliam um te, ramvah te, mizawn te ang chi kha a awm tawh loh vang maiin kan tlawmngaihna a chuai chuang lo. A hun a zirin a lo lang chhuak mai thin. Khawtlang a ralmuan theih nan tia mahni in lum tlansana khawvawt tak hnuaia zankhaw tairek thlenga duty te pawh hi tlawmngaihna chikhat chu a ni tho mai. Sawi tur a tam. Pu Kawlhawka hian a ziak fun kim khawp mai.
Report this comment
December 11th, 2010 at 10:11 pm
I thil post hi ka van duh e, ka lo thlir ve thin dan ani. Kan society hi Christian Conservative kan nih vang nge kan thil thlir dan tlangpui pawh hi a pessimist mah mah..thil reng2 ah a tha lam hmuh tum lovin a chhiatna lai kan melh emaw tih tur ani ! Kan politics tobul/khelh dan a dik lova, rinthu a mi soichhiat vak2 chingte poh kan om a, a tuartu tan chuan nuam duh lo tak ani. Hmeichhe inzuar/tleirawl KS tam thu an sawi chamchi a, mahse inzuar lo fel tak2 hlir ka hmu bawk si a ! Nula sangkhat awmnaah pakhat alo engemaw zauh chuan a chhe zawngin kan ‘generalize’ vak zel…tunge ‘we genaralized to be called fools’ titu kha ? Chuvang chuan ‘positive’ zawng hian thlir ila, mizoram tluka nuam hi India ramah hian a awm bik miah lo asin….
:lol: 
Report this comment
December 12th, 2010 at 12:27 am
A va han ropui tak em!!
Report this comment
December 12th, 2010 at 1:41 am
Mizo te kan taimak na thin chu, engemaw vawilehkhata hlawk lawih na tham ni tura kan ngaihah kan taima tlangpuiin ka hria. Kum 2 kum 3 emaw, hlawkna lang manglo, zawi2 a hlawk chho telh telh tur chi, kan tu te thleng pawha chenfakawm nithei tur chiah kan taima lemlo niin ka hmu thin.
God’s channel khan an rawn thlithlai ruk vak tum khan 80% vel hi Kristian lem, Kristian nun dan tura nung lo angah min rawn sawi a nih si kha mawle…. source: a hruaikual tu…
Thalaite (a tam zawk ni tura ka ngaih) hian thahnem ngai taka hnathawh na chang, fel fai taka thil tih an chingin an intih hmuh zel niin ka hria. Hei hi Mizoram tan a chance la awm chhan niin ka hria. Eirukna leh hlemhletna chi hrang hrang leh, meizial zuk, kuhva ei nasat thlengin insum an intihhmuh tan ni tein ka hmu, hei hi hmasawnna nasa tak a ni. Mizoram hi fak der emaw ngai thin mahse emaw, sawisel ngaiin awm thin mahse, thangthar te avang hian kei chuan hmalam thlir nuam tihna chen ka nei ve tlat.
Report this comment
December 12th, 2010 at 6:27 am
Mizo chauh lo poh hi an lo rinawm in an lo fel ve khop mai.Ni khat chu ka phone share auto ah ka lo thlauh palh a,a tlan liam hnuah k hre chauh. Mahse a driver kha a fel khop mai ka va phone a alo pick up a chuan min pe let leh tur in a rawn kal leh vang vang nia mawle.
Report this comment
December 12th, 2010 at 6:40 am
A va ṭhain a va dik em!!!! Post of the Week-ah ka thlang e
A chhe lai leh a ṭhalo lai tlemte sawi vawng hluai kan chin hi sim atan a ṭha ngawt mai.
Report this comment
December 12th, 2010 at 8:01 am
Tuna ka handset hi vawi 2 ka thlauh/tibo tawh a, mifelin an lo chhar zel.
Sawhthing chin tehkhinna khi ka thlawp. Tunlai hian ka tuallenna leh a chheh velah vai hovin kg. khatah Rs.17 in an leisak. In-a awm hman reng reng an awm lo. Sawhthing cho/zawngin an buai nileng thin.
NLUP te, NREGS te ai hian sorkarin sawhthing te, grape te, sapthei te, hmarcha etc. te hi an kawtkaiah rate pangngai takin leisak zawk se, kan changkanpui zawk ngei ang. Vai sumdawngte pawn an ti thei alawm le.
ZONET cable distributor-in a sawi alawm. Connection pek tam leh tlem chu Aizawl angin reality show ah a innghat ve lo. Sawhthing rate ah a innghat e a tia lawm. TV nei thar an awm zel a. :rolleyes:
Report this comment
December 12th, 2010 at 12:00 pm
Kawlhawk, i post hi ka duh lutuk! Hetiang anga kan thatna lai inhmuhsak thiam a, infuih thar hi mihring insiamthat nan a effective ber! A chhe lai ringawt sawi hi chuan mihring a siam tha mawh khawp mai! Kan thatna lai in fak a, chumi ruala, tan kan lakna lai inhrilh hian mi a tiphurin, that tumna hi rilru ah a intuh nghet zawkin ka hria! Thu i thiam si, hetiang lam hi rawn ziak fo teh khai! Ka lawm e!
Report this comment
December 12th, 2010 at 6:05 pm
Chhiar a nuamin a tha hle mai. Pawisa bo chu eng local channel ah nge aw an puan le? Hriat ka duh hle mai a
Report this comment
December 12th, 2010 at 6:54 pm
A hahdamthlak thin mang e. Thianpa Kawlhawk nge nge, a tha zawnga thlirna hian hringnun hi a chawmlian a, a tha zawngin a tithang a, midangte nunah thiltha tih ve duhna leh chakna a thlen a, hnam lungrualna leh inpumkhatna a tinghet thin reng a ni.
Report this comment
December 12th, 2010 at 9:09 pm
Kan chhe loe!Tunlai kan post hmuh ah chuan,ala tha ber ani,hetiang zawng tala kan thlir anih loh chuan,sap ho hian emo,vai ho hian emo min rawn thlir pui dawn loa,ala tlai love,chhantlak kan la awm,Pathian zawnchhuah ram kan ni ani lom ni!Baal hmaa thingthi ngai lo kan la tam!ka lawm e!
Report this comment
December 12th, 2010 at 9:30 pm
A thra thawkhat e…mirethei faten ngaihsan hlawh ve duhin tunhma chuan drugs ankhawih a( hausa fate entawnin) mahse ruihhlo khawih hi a nawlpuiin kan hua a kan ngaisanglo, NULA te pawn an ngaisang ta lo, mi hausa fa fa te anthrangharh a lehkha zir an intih hmuh tawh zawk, anneihin a tlin bawksi… chu chu rethei fate pawn an entawn tran mek a ni, tun a ruihhlo bawih a tang laklawh te hi chhan theih anla ni,Supply reduction kha a thra kati khawp,demand awm ngailo kha demand lo theiloin min awk zet a, “demand a awm miau a blah..blah..”anti leh si ND&PS case 90% kha khawilam chhuak nge khah??
Chuan ‘thawhthut hlawkna chauh kan um a, long term kan thlirlo’kan ti maw… kan rethei em a eichawp thawk pah chuan long term plan thawh bawk hi har deuh a nia, thawhthut hausakna a nih dawn chuan tiin bultannan hahthikulin kan thawk mai2 a nih hi .. chu pawh hralh leh theihloh chang a la awmzui a… kan thawkhlum takngial dawn a lawm…A NGAIHNA HRIA ho kha ZORAM chhan tur a penchhuah a hun tawh..
Report this comment
December 12th, 2010 at 11:48 pm
post of the week ah ka lothlang ve top e… Post liam tawh mah nise, ka nau te ka chhiar tir hial teh ang.
Report this comment
December 13th, 2010 at 12:26 am
He post ah chuan tumah kan uang hauh lo mai!
Report this comment
December 15th, 2010 at 4:22 pm
Tunah hian bazar-ah ka awm mek a, pawisa tamthamtak chhar a nih thu leh, pawisa tibo chuan market office-a ngaihven theih a nih a thu an au lauh2 mai. Kan la chhe lo e!
Report this comment
December 15th, 2010 at 4:34 pm
Amen, amen.
…khrum
Report this comment