mi(sual).com

KS a nih vang maia ui tak chunga ka thlah liam tak avangin engtik niah nge ka lungna a dam tak ang le?

Zopa kum chhiar chuan kan intawn leh thenni kar khan kum 11 hmel lai a hmu der mai. Sap kum chhiar chuan a tling lo deuh ang. A duhawm em vang pawh nifahmiang, nikhatah pawh vawi duailo ka chulin ka thlir a, Ka lung dumtu a nih avangin kan inthen leh ang tih lam ka suangtuah phal ngai miahlo mai hi a lo ni…. Tunah chuan ‘thu a tawp e lumam’….A ngawih reng avanga “Dam takin le” ti ngam bik chiah silo in, ka thinlung chuan ui takin a thlah liam ta…..

Ka class bang chu in thlen vat vat hmanhmawhna chhan tur ka nei chuang lem lo bawka tiin bus-ah pawh chuang duh lovin kan in lam pan chuan ka lehkhabu zakzeh tat hian kein  hmanhmawh duhlo lui takin ka kal hnak hnak a. Tlangval ve ta nafam chuan hmeltha tih zawng leh en nuam tih bik deuh chu ka tawng nual mai.

Chutia, “saw chu a va chhe lo reuh, saw chu a pian a nalh, saw phei saw chuan a nalh zia a hria angem aw?” tih ngaituah vel chunga kawng kal te ka sulpelh zut zut lai chuan, ka hun hman dan thleng pawha min vawng thei tur khawpa hmel hmuhnuam ka tawng nawn ang tih ka hre der si lo. Ka vawi hnih hmuhna atan kar lohah ka hmuhna dawr ka lo thleng leh ta chu niin!

Hmuh nawn in beisei deuh, a awm ring tawh chuanglo chunga kan thlek deuh zauh chuan “Eheu! saw saw alawm, hmanni a ka hmuhna ngai bawkah khan a lo awm leh nia. A ni lehlo zawk em aw? A hawiher leh hmaitlang atang sawn ka la chhinchiah. Mahse, tinge, Hmanni a ka hmuh dan ang chiah khan  a awmna ngaiah a la awm chu le? Mite hip tur hrim hrimin an dah em niang? min hmu ve angem? a lam ka hawi lai tak hian remchang takin a mit leh ka mit han intawng hlauh se aw…mahse min hawi ve der silo” tia rilrua keimah ka inbiak mawlh mawlh lai chuan, mit pali nei ang maiin chiang tak maiin amah chu ka lo thlur bing ran tawh mai chu niin. Mit pahnih choh ka nei tih ka hriat chhuah meuh chuan a mawina famkim hmuh nan chuan mit paruk neih mai a chakawm hman rum rum mai.

Va bel chiang ngawt turin huaisenna ka nei bau lo. Han bel chiangin vehthlem dan ngaihtuah ve ngawt dawn ila a lan dan mai atang chuan milian fa tan lo chuan han chulnel inthlahrunawm tak hmel puin a fai vanga. A hmai chu a pian nalhna chawih mawi tawk chiahin a hlai lo a, a hmelmawina ti zahawm tur tawk chiahin a hmaitlang hriam dan chu a bil taih mai bawk si.

Chutia mipui insulpel nuk nuk pawh hre chang lek lo a kham lo taka ka la thlek vawng vawng lai mek chuan dawr neitupa (emawni) niawm tak pa san tha leh invawn hmel tak mai chuan a kut khinghnih meuhin a hmaitlang tawn tawnah chuan “Ka ta i ni” ti niawm tak mai hian dim tak si leh nghet chalh mai si hian a rawn vuan ta mai. A bianga vawn ringawt chu a duhtawk mai dawn emaw ka tih laiin chheirawle…saw le!! A fawp dawn em ni a bih hnai tial tial mai. chekah chekah…dawr chhungah chuan ka va zuang lut nghal ruak teuh teh reng em. Mahse ka inveng hman hram e.

Nupa atan chuan an in awmlo deuha ka hriat avangin a nupui a nih phei chu ka ring chiah lo. Anni, dawr chhunga awm khan pawn lama mipui haw lam leh kal lam in sul nuk nuk karah uluk taka thlirtu an nei tih an hre dun der mai silo tak a. Ka tum phak loh leh beisei rual lohah duhthu samin ka lo in zeldin thui lutuk deuh poh ni se, khatih lai kher kha chuan ka indem phal bik lo a lawm. Tihngaihna hre der silo, beidawn dawna beisei ngaihna pawh hre silo chuan ka kalsan leh ta phawt a.

Zan ka han mut dawn chuan ka hmu nawn leh lo ang tih ka hlauhna aimah chuan ka chanpualah a ni kha han tla thei hlauh mai se ti a ka suangtuah zui tak zel avang chuan a thla talin min tlawh ringin thinthi pawhin ka mu meuhlo tih kha chu ka la hre chiang viau. Chu achhapah a tuk nilengin hna ka thawh a ngaih dawn avangin hemi ni a ka hmu lo tur chuan engemawti riau hian mi mawlh thei tur khawpin a duhawmna khan keimahah zung a lo kai fel der a lo ni. Taka, inrinni ah choh nilenga hna ka thawh thin avangin kha mi ni kha zirtawpni a lo ni dawn tak maw! Khuangchawi thla, leh ta nghal nghal a!!

‘Pathianni inkhawmnaah leh zel chuan a zun khan min phuar zui lo hram ang chu’ tihlam ka ngaihtuah phal lo. Biakbuk chhungah pawh min zem zui zel se pawi ka ti ta map lo mai. A zunin min phuar zui tlata ka rin avangin thalai tlar hnung lam chu ka han chuh nghal chawt a. Inkhawm chhung na na na chu a thla pawhin Biakbuk a zah ve a nih dawn hi ka tih mek lai chuan beisei bak a thleng leh ta, Thuhriltu in a sawi mek lai chuan Pulpit hnung bang sang lamah chuan a hmel hmuh nuam tak mai chu nui si lo, tum silo hian dik tak leh rinawm tak hmel puin a rawn inlan ta heu mai le.

Ka mitvai akara a hlimthla mai maiin ka Pathian biak min tibuai tur a ni lo tiin ka luhlul te kan chhuah ve sateh a. Mite’n thusawi an ngaihthlak thuap lai leh Upa te’n, ‘thuhriltu thusawi chuan kan thurin a kalh palh thei angem’ ti a ngunthluk taka an ngaihthlak thuap lai chuan keia buaina tlang zawng a dang deih si.

Ka haw hnu chuan a thatna leh thatlohna te khin dik thei ang ber ni a ka hriata ka han buk chhin vel pawhin ka hmuh leh huna ka awm dan tur ka la inrel fel thei lo. Ka tana khuanu ruat ni thei ta mial se a mawi leh duhawmna te kha ka chhuang lutuk palh angem? Dik leh rinawm tak hmel pu mahse a lairil a lo ngetru ve thei reng tho mai.

Thutlukna ka siam ta. Ka duhzawng a ni a, a fuke invuah dan leh a pianken kha ka it zawng tak a ni. Bawkkhupin han thluang mar zan mai phei selang chuan…(awh khaiah!! ka kuang lo ka nawr palh tep mai) A pian mawina khan nge ti nalh ang a, a nalhna khan a pian a ti mawi zawk ni ang? A hmaitlang khan nge a hmel ti duhawm a, a duhawmna khan a hmaitlang a ti tha zawk. A mawi mai niloin a bul vel a mi te tan pawh mawina a tling hial zawk lawng maw?. Khua lo var se naktukah chuan ral en mai ni loin a biang tawnah ngei khan chelhin (Ka ngaihtuah ringawt pawn ka zam tan der mai) mi min en loh lai anih phei chuan ka chuks ngei tur a ni.

Zing hma takah thawhphan nei leklo khawpa harh vangin a zunin min kaitho a. Ka kal lamah tlawh phei hmasak a, han thawt lawk deuh phawt a, haw lamah engkim tih chian theih ni mai sela ka va duh em. Amah kha tunlai sanah a class hmel reuh em avang khan, KS a nih ring lo mah ila sum tam deuh zawk te pawh inrinlawk a sual lo ange tih thilah, ka khawl bawm te pawh chu ka sawh keh ta hial a. Mahse ka ngaih ang ngawta sihhnip a ni dawn em ni? Ka duhthusam innghahna chu tiauvut nge lungpui tih pawh hre hrang thei lovin a ni chuan hrui lovin mi phuar ta. Ka lam hawi tura amah leh a thinlung kuai her tur khawpa belhchian dawl ka nih loh teh lul nen, belhchian hmasak loh phei chuan belhchian tlak hmel pu pawh ka ni lo leh ta nghal a.

A lo awm ngeina tura ka rin dawr zawn ka thlen dawn tep, amah pawh ka hmu deuh ri riai tawh tih atang chuan inringtawk tak hmel put luih tum in ka kut vei lamin ka kekawr ipte ka zen a, ding lamin ka darbah ah lai hrui chu kan hrawm nghet sauh a. Ka tum hmun ka thleng tep e tia insehruh ru deuh leh a lam hawi ran a ka kal lai chuan ka thianpa hian mi rawn kuai her sawk mai a. “Koh i va hre thei lo ve” ti bai bai chung hian mi rawn fiam bawrh bawrh a, nuih a za tawi duh tak tak hle mai. Sakeibaknei pawhin a sa seh a ei dawn chuan mahni choha kil a duh thin asin maw le.

Ka hmabaka tihtur ko tak maia ka ngaih chuan ka nunphung a va ti khaihlak nileng teuh tehreng em. Khatih lai na na na kha chuan ani tih loh, ka chhehvela thil nung leh nunglo awm zawng zawng mai kha chu enghelh tham khawpa engtithawllo hlir mai an niin ka hre ta.

Ka haw lamah chuan remchang a awm ta ngei mai le. Dawr kawngkaah chuan ka han pen lut thawr mai a, Ka pan nghal ruak a. Amah kawk chung chuan “hei hi”….. ka han ti chhumbung lai deuh chut pek a. Ka inthlahrun rukna thup tum chuan lehlam ka han hawi deuh zet a, ka han hawi let leh nak chuan a biang tawna ka chelh phak ngei tur hian a rawn inhung hnai ta. Khaile, tlangval chet a hun e. Tunah zet chuan ka thil lei hual chu KS (Ka Sana) a ni dawn ta.

Engte nge a tih theih ang tih ka’n zawt a, Digital Sana, Alarm chi nga leh darkar tin signal awm, Time recorder leh stop watch, day light saving time nen, Calendar ni nghal, phone number sawm ruk (60) a dah theih (Mizorama Cell phone a rawn chhuah hma khan kum fe chu data bank hi ka tangkai pui) A man ka pek zawh chuan ka sana (KS) thar, Japan Ori. Casio nen chuan Pu C Thangkima dawr chu ka chhuah san a… Kum 11 dawn chhung chu ka tan rinawm takin a nung a, water proof a nih avangin ka inbual pui zing, tui ka chen pui fo, mahse vawite khat mah far khat pawh a lem lo.

Similar Posts:

• Masi Hmang turin min rawn dawr r’u
• Dawr luah man
• Misual ho ngaihdan hriat a van chakawm em
• Nulate tana chhiar tur
• Thamral lo

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, December 13th, 2010 at 1:00 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.