mi(sual).com

Bus, a khalhtu awm lo chu a tlan kawi fua fua a, a chungah thil pahnih a awm. Thil pakhat chu – Buara Ip ùk, a chhunga eng eng emaw inhnawhkhah tlat a ni a; thil pakhat leh chu – ‘Amah’ a ni (amah hi hriat theih a ni lo). Amah chu ri-fiak takin a faifuk a, Bus chu vawilehkhatah a ding bulâwp a! Buara ip chu a la lawk a, khawngaihna leh lainatna tel miah loin a vawm thla thuai a. A khu luih a, buara tlang a peh nghal thawt a. Chuta tang chuan luruh pathum a rawn lum chhuak nghal a…!!

Chù buara ip uk tlakna atanga hlam sawm bial vela thil rèng rèng chu an tuiral nghal zawih zawih a; Amah chuan H0 a ti hle. A thensuk a, a zimar a, bus chung atang chuan ‘Rulpuiludin’ an tih ang hian a rawn chhuk a. Lei a rap chiah chu, khawvel hi a nghing lawih a! Van lam hawiin a ràk chiam a, a mit atangin mei leh kât a luang chhuak zawih zawih a! Khawvel hi a ta a ni tih entir nan, a hnapkhir (hrual mum sa) chu a pumin a hmawm hmak a!

Tih tur leh hmachhawp a ngah em avangin, chùmi hmunah chuan a ropuina leh thiltihtheihnate nen intirapthlak chiam hman a ni lo, a kal chhuah vat a ngai. A ke a pen ta! A rah chin apiang a ram a ni! A rah tawh lei chu a khi nghal thawt thawt a, a khì atang chuan rannung mak tak tak an rawn chhuak nuah nuah a; Amah chu an zui nghal zel a.

Thui pawh a kal hmain, Tlangval pakhat, a bialnu-in lengdang a chhai san avanga lo thu kun ngiai chu a hmu a; Amah chuan H0 a ti hle a. Tlangval chu a âwm-ah a tham a–

“Lenglerhi ngaiin val i kùn a maw? Tho la, ‘D’ thar zawngin i mit lèn rawh”

a ti hrep a. Khàk a chhak a, a rap pherh a, a kal leh ta a. A kal zel a, hlawhchhamna avanga nun beidawng, kawngsira lo let reng a hmu a; Amah chuan H0 a ti hle a. A phih tho a–

“Tum 5 i hlawhchham anih chuan hlawhtlinna rahbi tum 5 i rap tawh tih inhria la, hnual suh. Hlawhchhamna hi hlawhtlinna kailawn a ni tih hre rawh”

a ti a. A vawih khum a, a kal leh ta a. A piah maia nutling tap thawm avang chuan- Amah chu a vir vut a, a va pan a. A mittui hruk sak a’n tum zet a; a liah fai ta zawk a–

“Vawiinah, i chungah vanduaina rapthlak a thleng tih ka hria. Chùmi avang chuan lungngaiin tap suh la, vanneihna i lo chan tawh zozaite avang khan lawmthu sawi zawk rawh”

a ti a. A chuk a, a kal san leh ta mai a. Pen ngâ a pen a, vei lamah a kawi thut a. Pa pakhat, thingbul lo tauh chawrh chawrh hi a hmu a. Amah chuan thilawmzia a hre leh nghal vek a; H0 a ti hle a. Chúmi chu, a chhip samah thamin a kuai vanvadàk a–

“Thil tha lo i lo tih thinte avangin intihreawm mah ta che, mawla! Thil tha ti turin hun i la ngah tawk a, tunah hian i nun buatsaih nghal rawh”

a ti a. A kal san dawn zet a, thingbul chu vawi khat a tauh tir chawrh a, a kal san leh ta a. A thil tawnte avang chuan ‘Amah’ chu a hùk vak vak a! A changin bé èl êl a, a changin a bù ùl ûl a, a changin a bauh a, a changin a nui chiam a. Amah zuitu – thilnung zawng zawngte chu kokhawmin–

“Hun liam hnu ngaiin kûr suh ula, hun lo la awm tur thlirin intiharh rawh u. Thil tha lo in lo tih thinte avangin intilungngai suh ula, thil tha ti turin tho rawh u”
tiin a zilh hrep a.

Ama rah khik ngei, lei khiah chuan a lut daih a. A rawn dak leh zuau a, a irh uk a– “Post a luh tlem viau chuan kan rawn inlan leh thuai ang” a ti a. A mawng a kawm a, a hnim a, “a tha thawkhat e…” tiin mawng lang kungin a biru a.

Similar Posts:

• Socrates-a leh finna zawng tlangval
• Mingoho min puh chhiatna mai mai a ni
• Fiamthu Panga
• 2012 September Fiamthu
• Ex-Iron Maiden Man Too Iron-Mouthed for North Easterners

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Tuesday, January 11th, 2011 at 9:45 am and is filed under HAHAHA, More than words. You can follow any responses to this entry through the RSS 2.0 feed. You can leave a response, or trackback from your own site.