mi(sual).com

SYSTEMATICAL STUDY

(Zirlaite tan)

Lehkha kan zir hian engtin nge hlawk zawka kan zir theih ang? Tih dan bik riau a awm em…?

I zir tur (course) hrechiang rawh:

Eng subject pawh zir la, i zir tur chin i hriat chianna khan nasa takin a pui ang che. Mahni course pawh hre chiang lo i nih chuan i thiam chin leh chin lo pawh i chiang lovang a, a khawi chin nge in zir tawh a, eng chin nge zir tur la awm tih pawh i chiang lovang. Mahni zir tur chin ber i chian loh chuan i thil zir ber kha i chiang tak tak ngai lovang. Entir nan, CL-XII (Sc.) zirlai i ni a, Chemistry i lo zir ta a, heti hian ti ang che :

a.  A pumpuiah chapter eng zat nge awm hria la

b.  Chapter zawng zawng chu a indawt danin a hming hre vek la

c.  Chapter lian deuh leh te deuh, zir ngun ngai deuh bikte pawh hre chiang la

d.  Chapter tina a then tenau – sub topic te pawh hre bawk ang che. Hetianga i tih ngat chuan i course chu i hre chiang ta hle tihna a ni a, chu chuan i rin phak baka nasain a pui ang che.

I lehkhabu hman lai hrechiang rawh :

Eng subject pawh zir la, kha subject tan bika i lehkhabu hman lai kha, a lehkhabu hrim hrim kha hre chiang rawh. Heti hian Tu nge a ziaktu? i.e a ziaktu hming (ii) Eng hna thawk nge? Khawi hmunah nge a thawh? (iii) Eng degree nge a neih a, khawi hmun atanga inzirchhuak nge a nih? (iv) Khawi hmunah te nge a lo thawh tawh thin (v) A thuhmahruai (foreword) chhiar ngei ngei rawh. A thuhmahruaiah hian kha lehkhabu kha eng lam hawia ziah nge a nih a, eng lam nge uar an tum, entrance lam nge board exam lam…etc a inziah ziah thin avangin a tangkai theihna tur chin leh a tangkai lohna tur chin i hrechiang thei ang.

Hunbi neiin zir rawh :

Mahni peih hun apianga zir mai thin, zir hunbi pawh nei lem lote hi zirna kawnga mi hlawhtling sawi tur an vang khawp mai. Ram changkang zawkah te pawh experiment an lo bei tawh thin a, chung atanga an hmuh chhuah chu hunbi pawh nei lem lova rei tak tak zir thinte ai chuan hunbi nei rana rei lote zir thinte an thiam thei zawk tih hi a ni. Mi thiamte chuan kan thluak hian a remchan hun apianga thu lo lut lo dah that ai chuan hunbi neia  lo lut thinte hi a hre rei zawkin hna pawh a thawh chakpui zawk an ti a ni.

I ni tin hun hman dan tur duang lawk thlapin i lehkha zir hun tur bik te, infiam hun te, thian pawl hun te,…etc, darkar fel takin bituk la, chu i time table chu zawm thlap tum ang che. Hetia hunbi neia i zir chuan i tan thil dang tihna hun a awm ang a, hunbi nei lem lova zir thin, zir chhuna tivak mai thinte ai chuan i hlawhtling zawk ngei ang. Hun bik neia thil i tih thlap thlap chuan eng thil mahin i hlawhtlinna a dal lovang che.

Subject zir thlak thin rawh :

Zan khat lehkha zirah subject inang lo zir thlak a tha. Entir nan dar 7:00 – 8:30 Mathematics i zir a, chumi hnuah dar 8:30 – 10:00 chu Physics ai chuan Chemistry zir la a fuh zawk mai thei; a chhan chu Physics leh Mathematics te hi an inlaichin hnai riauva, formula eng eng emaw a lo awm bawk nen, ngaihfin a awl duh (hei hi chu a zirtua thuin a danglam thei ang, mahse mi tam berte lo tawn tawh dan a ni). Tin, subject zir thlak dawn hian minute 5-10 vel chu chawl zawk la, hemi chhung hian i zir tawhte kha a tlangpui tal ngaihtuah let leh thin ang che. Hei hian thiam a tichiang duh.

I note bu vawng fai rawh :

Fai taka i note bu i enkawl chuan i tan en leh a nuamin lehkha zir a tichakawm zual sawt ang. Thiam loh sa nak alaia note bu tawp tak mai i keu fo chuan har miah lo pawh i hmu har chawp anga, i thiam lo tual tual thei hial ang. Chuvangin i hawrawp a tha emaw tha lo emaw i note ziak ulukin vawng fai ang che.

A ziahin ziak thin rawh:

Chutia i thiam tawh sate chu chhiara by heart mai kha duh tawk lo la, i hrethiam a nih pawhin la duh tawk mai lo la, a ziahin ziak thin ang che. A bikin Science subject late tan a tul lehzual. Formula in zirte kha a ziaha ziah chhuah loh chuan hriat reng theih an ni mang lova, chuvangin vawi tam tak ziak nawn fo thin ang che. A lem pawimawh te, a chawh chite phei chu chhiara by hearth satliah mai kha chu a tawk lo a nia.

I note / Text bu thai rang rawh :

Pawimawh i tih lai kha engtin emaw i duh dan danin chhinchhiahna siam thin la, i duh leh milem emaw, pangpar lem emaw ziak thin rawh. Hei hian tanngkaina tak a nei ve a ni. Exam hall luh hnuah i thiam i ziah chhuahin i theihnghilh palh thei a, chutih laiin i chhinchhiahna siam kha i note bua a thu inziak te ai khan i tan mitthla a awl zawk a, chu chuan i hriat chhuah lehna kawngah a pui ang che. Hemi atan kher lo pawh a pawimawh lai i chhinchhiah tawhna symbol kha i mitthlaa i hmuh rualin a thu kha hriatchhuah leh a awlsam phah a ni.

A History hre tel rawh :

A bik takin Science zirlai tan hei hi a tul lehzual. Heta history kan tih hian chipchiara Historian-te anga zuk hriat ve kher kan sawina a ni lo, i thil zir lai lo chhuah chhoh dan bik kan sawina mai a ni. Entir nan – Pawl 12 (Sc.) Physics-ah khan Davisson and Germer experiment kha lo hmang ta ila. Heti hian ngaihtuah thin ang che : He experiment hi eng lam hawi nge? (ii) He experiment hi eng vanga tih nge? (iii) A hmalamah khan engtin nge ngaihdan an lo neih thin? (iv) Tichuan he experiment hian chu ngaihdan hlui an lo neih thin chu a nemnghet ta nge a paih thla zawk? Hetiang thilah hian a pawimawh lai ber tih theih hial tur, sikul lama kan inzirtir ngai mang si loh a awm.

Chu chu tunhma lama ngaihdan hlui lo awm tawh thin chungchang (a history) inhrilhhriatna khi a ni. A tunhma lam chanchin i hriat miau loh chuan he experiment hi a tulna leh a pawimawhna i hre tak tak lovanga, nuam ti takin i zir ngai lovang. Chuvangin zirlai kan zir hian zir mawl tawp lovin Text bu pawn tlem azawng a behbawm tur lakkhawm tel hian mi a pui nasa thei hle. Zirtirnaa luh tum i nih phei chuan hetiang hian ti ngei ngei ang che, a nih loh chuan tha takin i zirtir emaw i tih chhungin naupangten i class an lo ning hle mai ang.

I zirna hmun thlak zeuh zeuh rawh :

Mi tam berte chuan kan zir zawha hmun danga kan insawn hian kan thiam tawh sa kha kan theihnghilh leh mai thin. I thil zir lai chu i thiam tawh hnu khan hmun dang khawi laiah emaw insawn la, chutah pawh chuan i la thiam reng em inchhin rawh. I theihnghilh leh tan mai thei a, inzir leh a la ngai tihna a ni. Hetiang te chuan exam hall-ah ziah tur a vang lutuk ang asin! Chuvangin i pindana i thiam chian em em kha in choka/sitting room-ah i la thiam reng em? Mahni inchhin thin ang che.

I taksa awm dan position kha thlak kual zeuh zeuh rawh :

Zirna hmun ngaiah rau rau pawh thu chunga i thiam kha ding chunga thiam tak miah loh tum i neih fo kha. Chuvangin a changin ding la, a tul chuan kal chung pawhin zir mai rawh. Hei hian thiam a tichiang lehzual thin.

Taksa nuamsa lutukin zir suh :

Thutna dup lutuk te, taksa hahdam leh lutuk e.g. mu chnga lehkha zir…etc te ching suh. I taksa a inthlahdah rualin i thluak a inthlahdah ve nghal ang a, i zir nasat ang huin eng ruai i ni chuang lovang.

I zirna hmun – pindan tihnawk lutuk suh :

I zirna pindan a hnawk rup mai a, i hmuh phak leh ban theih maia eng thil thil emaw a tam lutuk chuan i mit a la peng anga, chu chuan i rilru a la peng nghal ang a, i rilruah i zirlaiin hmun a chang lovang.

Thil tum nei la, chu chu a duhin duh tak tak rawh :

Tam tak chuan Engineer, Doctor, IAS, MBA, Designing, Teaching…te chu kan thil tum leh duh ber a ni a. Heti hian mahni inzawt hmasa la : Tuna ka thil tum hi ka duh tak tak em? Ka dam chhung hna atan ka pawm thlap thei ang em? Nge ka duhthusam lek zawk? CL-X-XII vela kan thil tum kan sawi hi mi tam ber chuan kan duhthusam kan sawi mai mai zawk a lo ni fo. Chuvangin i thil tumah khan chiang la, tum satliah lo la, duh satliah lo la, duh tak tak ang che.

A hranpain tumruhna kan tih fo te hi neih theih a ni lo, thil tum i nei a, i duh tak tak a nih phawt chuan chu i duh tak takna chuan tumruhna a neihtir nghal mai ang che. Duh tak taknain bul a intan a, tumruhna a lo piang a, Thawhrimnain engkim a ti thin thung.

Tunah chuan i thil tumah i chiang a, Engineer/Doctor…nih i tum a ni. I tumna hi a tha a, tihlawhtling ngei ang che. Amaherawhchu hei hi hria la : Mizoram quota-a Engg./Medical zir i nih phei chuan i zir zawhah sawrkar hnenah hna pe tur chein kar kar suh. I zirna turin seat man to takin an lo lei tawh a, i zir tawh hnuah pawh cheng tam tak i stipend atan an la hmang leh cheu bawk.

I zirna tur atana tul an tihsak tawh hnu chea i zir chhuah hnua hna pek leh zel che hi sawrkawr mawhphurhna a ni kher lo tih hi. Proffessional graduate ni chunga ei khawp i hmu lo a nih chuan nangma thiam loh liau liau a ni ang, tute emaw puh tumin phe kual phe kual suh ang che.

I carrier thlanah hian i chiang meuh maw?

I thian ten Engg./Med. zir an tum avangin i tumna lo pui leh i tui miah lohna a ni chunga zir ve i tum ringawt a nih chuan i lo zir ve ta ngei a nih pawhin i buai i buai ngei ang. Engineer/Doctor nih i duh chuan Engineer/Doctor ni chunga thawh theih tur chi hna te kha i hna duh zawng a ni em tih chiang hmasa rawh. I zir zawh hnua thil danga pakai leh i tum a nih chuan mihring dam chhung hi tawi i ti lutuk mai thei!

Tunah hian duhthlanna chu i thu hnuaiah a awm mek a, chu i duhthlanna chu i hman a, i kawng tur i tih fel veleh nang chu i duhthlanna sal (slave) mai i ni tawh dawn a ni!

I duhthlanna chuan i tui emaw tui lo emaw sawi lovin a nawrin a nawr tawh ang che. I lo thlan sual hlauh chuan…Entir nan Engineer nih tum ta la, i zir zawh huna i thiamna zawn atanga i thawh theih tur tlangpuite chu JE/AE/SDO…..etc, Company, I.E.S, Airforce leh Navy-ah Commisioned officer te a ni. Heng hna te hi thawk dawn ta ila, ka dam chhunga ka hna atan ka pawm thei ang em? Ka lungawi meuh ang maw….? inngaihtuah chiang phawt ang che. Chutiangin Doctor lam tumte pawhin.

Degree falls, everything is Performance :

Professional line-a i kal a, i zawh hnua hna i thawh hunah chuan (Private company-ah) i degree ropui tak takte kha chu hman lohvin a tla hlawm tawp dawn! I awih emaw awih lo emaw a dik a ni tih chu i la hre thuai ang. I degree kha chu hna hmuhna atan i hmang ve chauh a lo ni, i thawh hnua i kaisan zelna te leh i hlawh a pun leh pun loh te thlengin i thawh that leh thawh that lohvah a innghat vek tawh dawn a ni. I thawh that viau chuan junior zawk ni mah la nang aia senior hlawh aia tam i hlawh thei a ni tih i hre dawn nia.

Kan ram hmalam hun thui tak hi Technical mite kuta innghat a nih miau avangin nangma kutah ngei pawh kan ram chhiat-that a innghat ve a ni tih hi i thinlung khan Sibuta lung ang churha nghetin lo pawm se, i duhthlanna i hman sual khan i nun a tih chhiat theih bakah ram tan khuareiah a la pawi thei a ni.

Hun hman dik/that a pawimawh :

Hlawhtlinna tur atan thil pawimawh ber chu hun hman dik hi a ni ngei ang. Engkim mai hi hun hian a thunun vek a, thil tha tak pawh hi a hun lova tih a nih chuan a tha chuang lova, ruahman lawkna awm lo hmasawnna phei hi chuan beisei a phak lo fo. Chutiang thovin zirnaah pawh a ni. Hunbi neia zirin i zir chhunah chuan rilru zawng zawng seng thin rawh. Chutiangin thil dang i tih hunah pawh hlim taka tih tum la chu chuan i hriat loh karin i rilru kha a lo refresh leh anga, lehkha i zir leh hunah hlawk zawkin i zir thei ang. Hunawl insiam nasat lutuk hi thil pawi deuh mai a ni a, thil tangkai engmah ti lova hunawl neih hi chin loh tawp tur a ni; a aia chuan in leh a velah tih tur ho te te pawh zawng chawp mai rawh.

Hrehawm tawrh inhuam rawh :

Zirlaiin zirlai a ni tih a lantir lohvin a hlawhtlin theih ngai loh. Rual pawl lo ngam la, miten an sawi sep sep che pawhin pawi ti lo ngam la, chut lutuk an tih che pawhin pawi ti reng reng suh. I damchhung atana hun pawimawh lai berah i ding mek tih hi eng lai pawhin hre reng ang che. Lehkha zir hi a hrehawm zawnga lak chuan thil hrehawm deuh mai a ni a, mahse i hrehawm nasat poh leh i zir chhuah hunah i lawmna a nasa ang. Hrehawm tuar lo an hlawhtling ngai lo. Zir tlem chunga titha thei nih ai chuan nasa taka zira titha thei mi nih hi a hlu zawk a, a chhuanawm zawk bawkin nakin zelah mite tan an tangkai zau zawk zel. Chuvangin thiante thil tih nikhuaa lehkha zir a ngaih avanga tel ve loh kha zak suh, tun atanga kum sawmah chuan zangkhua a bungbu ang.

Dawnthleng insiam rawh :

Kum 2000 kaltaa Kalvari tlang thil thleng kaltlanga Vanram pakhata kai tum thiau, a kalkawng inzirtir dan leh rin dan erawh dang teh nuai site awmna rama pianga seilian i nih ve miau avangin chaw ei dawn leh mut dawnah kher lo pawh i tawngtai ve tawh ngei anga; eng nge i dil thin le? Thawhrimna te, taimakna te, thiamtheihna te, tumruhna te, zir peihna te hi i dil kur nguai ve tawh ngei ang. A tha vek e, mahse, i zir peih phah ta em? I thiamthei ta sawt em? I tumruh ta sawt em?…etc Thil pakhat i hmaih a ni mai thei asin…nangmah lamah dawnthleng i insiam lo a ni mai lo maw?

Thiamtheihna nei turin i zir nasa reng em?…A chunga i thil dil thin zawng zawngte khi a hranpaa pek lehchuan i ngai hleinem, he khawvel i rawn rah dawn khan i Siamtu khian zirna kawng atana i la mamawh turte a ni tih hi a hre lawk kara, i pian chhuah rual khan i duha i hman mai theih turin nangmahah khan a lo dah sa diam tawh e. A va lawmawm ve tiin hriselna dil la, a dangte khi chu hmang hmiah hmiah mai rawh. Chutia kan tih avang chuan tawngtainaa dil a ngai love kan ti a ni lova, lawmthu sawi chungin dil thin zawk ang che.

A pawimawh ber chu thawhrimna :

A chunga kan sawi tak zawng zawngte khi thawhrimna tel lo chuan pakhat mah khi a hman tlak loh chauh ni mai lovin a hman theih loh hulhual. Duh tak taknain bul a intan a, tumruhna a lo piang a, Thawhrimnain engkim a ti thin thung kan tih tawh kha.

Chuvangin hlawhtling tur chuan engkim chunga thuneitu chu Thawhrimna a ni e. Tlemte zira tha taka pass mai thinte hi pawl sang zawkah an zuih ral duh hle, a nih loh vek pawhin an thiamna quality a sang lo fo. Chuvangin zir vak mai rawh le, thih huamin zir rawh; i thi chuang lovang…!

Similar Posts:

• Mizo tawng diklo nge a hausakna zawk?
• Thupêk pathum
• Motorcycle Taxi ah a tha angem?
• Kawlhawka Thurawn 10 (Nupa hlimna)
• Pathian hian mi zawng zawng nun dan tur hi a hre lawk vek ang em?

Recent Posts:

• June 2016, Mizo(ram) Diary
• The reason we have bad roads in the North East
• INNGHAHNA TLING THURIL CHU
• Essay on Amen
• A MAKIN AVA ROPUI EM…!!

This entry was posted on Sunday, January 16th, 2011 at 9:00 am and is filed under Education. You can follow any responses to this entry through the RSS 2.0 feed. You can leave a response, or trackback from your own site.