mi(sual).com

Love comes softly…

He lemchan (film?) hi kan en tawh in ka ring. Mi rilru nem deuh te luaithli nul tir hial khawp a lemchan tha a niin ka hria. Lemchan hun chhung reilote ah, hmangaihna mawi leh duhawm, thuk leh ropui; hringfa te nunkawng a pawimawh em em a tarlang a. He lemchan aia lemchan dang, hmangaihna chungchang a thuchah ropui leh thuk nei zawk hria pawh an awm ka ring tho, mahse ka phak ve tawk ah he lemchan hi tha ka ti thlawt. A bawplawka la duh tan erawh, he lemchan a hmangaihna hi nuthlawi leh pathlawi kara hmangaihna ti paw’n a sawi theih. Englekhawle, kei zawng ‘a dum ka tih chu, a var pawh nise a dum ka ti tho tho’ tih ang deuhin ka luhlul chhuahin ka tan na ngai ah ka tang ve tlat thung.

A lemchan kal dan hre tawh mah ila, kan sawi tur a fiah zawk nan ‘Love comes softly’ lemchan hi tawi te in sawi ila. Nupa in nei hlim hlawl, inhmangaih leh inthlahlel em em te’n he lemchan hi an tan a. Hun reilo te ah a pasal in tawhsual a tawh vang in a boral ta mai a. A nupui, la naupang ve tak mai chuan a vahvaihna lamtluang a zawh tan nghal der. Nu leh pa pan tur lah nei tawh chuang lo, tin a pasal a sun dan lah ram palaileng, chinchang a hriat ngai miah lohna hmun ah a ni bawk nen.

Chutia a pasal sun a tanpuitu a ngaih em em laiin leh, a pasal thlan a lungngai tak a a tah lai in mi pakhat (pathlawi, a nupui in a boral san ve thung) fanu hram tak nei tawh nen in tawngin chawpchilh deuhin an in nei ta mai a. Ama’rawhchu hun engemaw chhung chu, an ‘tiam tlat e’ tih in an nitin nun ah ah awmzia a nei lem lo. An la inhmangaih ang tih reng an ngaihtuah ngai lo, tin ngaihtuah ta ni se uire ah an in ngai hial ang le. Chu-achhap-ah hmeichhia zawk lahin a pasal hmasa lakah fa a pai hman khanglang bawk nen.

Mahse maw, hun leh ni a vei zel a, inchungkhur khata khawsa dun ta chu inhriatthiam tawnna te, in zahtawnna te, inngaihpawimawhtawnna te’n kan thupui hmangaihna hi an in karah hringchhuak ta. Inhmangaih tawn si, an inhmangaih tih in hre tawn silo in; inthenna ni an thleng ta. Mahse chu an in kara hmangaihna kuhmum, mawi taka parchhuak mai tur tawnmang iang a thamral mai tur in a pamhmai lua. Zep theih loh leh thup bo theih rual loh hmangaihna chu an inthen hnu lawkah a mipa zawkin a bialnu (nupui?) hmangaihna kut ziak ngei chu a hmuchhuak ta hlauh mai le. Hmanhmawh baklengin a nupui an khaw lam pan mek chu a um zui leh ta. An han in tawng hlim leh lawm hmel tluka hmuhnawm kha he khawvel hian hlimna dang a pe zen zen lo asin, hmangaihna chuan inhmangaihte chu kumtluang atana then rual loh turin a suihfin ta.

Kan pi leh pute kha…

Hmangaihna la run leh la na tak tak an tam hle. Sawi sen an ni lo hial ang, tin keini tawngkam ve hian kan sawifiah thiam hek lo’ng. Lianchhiari’n a hmangaih Chawngfianga, an in kara palai rinawm lo phiangsen vang a an khaw thenawm raltlan ta, tualleng lai thlahlel takin a thlir nitin a. Siahthingzar te hial in a lairil luahtu a thlir chu an hliah palh ang tih hlauin an kur siau siau thin an tih te. Fam-Lalzoa, a thinlung lalnu in khiang a awihsan dawn zana Lunglei bawrhsap pisa tlang a rilru baihvai tak a zai a vawr tlaivar zak chanchin te hi a ropui ka ti thin. Amah vang a a bialnu in nunkawng hrehawm a zawh ai chuan tiin hmangaih vangin kian zai a rel a ngai si. Mahriak a tawrh atan zawng a na ngaih ngaih khawp ang.

Ka thianpa pakhatin a sawi ka hre reng thin, nuih a tih zat rualin, a tawng tawh tu tan chuan a dik thei in ka ring bawk. Heti hian a ti, ‘Hmangaih ber (tak tak) han then chiah hi chuan artui chhung mu tak ngial pawh hi thial chip a har’ a ti. Nia, ‘Nang ngaih vang hian zan mu ka chhing thei lo’ min ti hnap tu (min hmangaihtu tak tak) te hi han tawng ve ta thut mai ila, keini ang val to lo chu kan buaichhe viau ang a! Exam-na anga mark pek tur ni ta se, full mark hi a tlem ka ti ngawt in ka ring 

Hringfate hmangaihna…

He hmangaihna hian tawp chin a nei fo thin ti raw? ‘A bikin nula leh tlangval kar a hmangaihna phei chu hmel induhna leh tisa inhiptawnna vangin a piang zung zung a, sakhmel tawn loh kar a rei phei chuan a daih rei ngai lem lo’ an ti, rual u te’n Mi thenkhat, in hmangaih em em; ni khat pawh in hmu lo a awm thei lo hial, an han in nei ta lang a, kum a vei erh awrh tih ah, ‘Zawng’ an hmu hnai thei lutuk an tih te hi dikna mual mual chu a awm ang. A tawng tawh te chauhin, ‘a dik/diklo’ an ti thei thung! Tin vai, nu leh pa zawn hmuh sa nupui/pasal in nei hi chuan hmangaihna (nupa inkar bikah) hi piangchawp, awmdun leh khawsak dun hnu awm leh pungchho ta zel zawk niin an sawi thung. Dik vek kher lo mahse a dik na lai erawh a awm in a lang. Fiamthu a an sawi fo thin chu ‘Khawpui nula/tlangval sawrkar hnathawk in thingtlang a an awm hian, a tir ah chuan an thawhna khua nula/tlangval hi eng teh ual ah an ngai thin lem lo a ni awm e; mahse thla a vei a, kum a han vei hial takah chuan phuloh hi pahnih khat tal an awm thin’ an ti…, dik tak maw?

Hei vang hian nulat-tlangval hmangaihna hi a nep ka ti miah lo, thil awm thei/thleng thei ka sawi na mai a ni e. Mi thenkhat erawh, he hmangaihna kal sual pui palh vang a nun hrehawm taka hmang zui an awm bawk. Tu han dem theih lah ni hek suh. Kan thianpa pakhat mizo tawng thiam nal lutuk lo pawh a nula bemin a lo duh silo, a tuar na ang reng khawp mai a. A thianpa in hnem a’n tum sa sawi a. Mahse hnem theih rual a ni lo; a thianpa’n ‘Nula dang an tam em mai’ a ti dek dek a, rang mangkhengin ‘Mangaih (hmangaih tih na) chu mangaih a ni mai’ a tih khum hmak asin!

Tin I hmangaihna kha a chhe/diklo zawng in hmang lo hram ang che (a bikin tlangval tan, kei telin). I bialnu I hmangaih em em phei kha chu a thianghlimna zah sak ang che. Tlang rawt in sawi ila, saptawng a ‘Love-making’ an tih hi dik ka ti thin. A chhan chu nupa inkara mipat hmeichhiatna a zahawm leh thianghlim zia, nupa inhmangaihna ti zual tu a nih laiin, inneih hma hman erawh chuan sual a ni thung. Tunlai ah kan ngaihdan a dang tial tial a, kan ngai zam tual tual bawk. Mahse Bible zirtirna zawm kan nih erawh chuan hmangaihna hian kawng engkim ah, dan bawhchhelo zawng a nung turin min khuahkhirh zawk tur a ni.

Pathian hmangaihna…

Sawi tam ngailo in kan hre vek e. He hmangaihna hi chu khawvel piantirh ata eng dang nen a khaikhin theih a ni lo. Hla siamtu pakhat chuan, ‘Tuifinriat zawng hlo tui chang se, ziak na atan thingzar tingreng; lehkhapheka’n van khi chang se, ziaktu atan chuan mi tinreng. A hmangaihna puang dawn ila, a kang zo ngei ang e; a leng dawn lo a hlai tawk lo, an hril seng chuang lo’ng e’, a ti hial a ni.

Ka ngaihtuah let a, he film ‘Love comes softly’ tih mai pawh in kan mittui a far tir theih chuan Pathianin min hmangaihna hian vawi eng zat nge kan mittui a far tir tawh le? A thukzia, ropuizia, zauzia, sei zia, san zia leh mak zia hi chhut chiang ila, kan phu hlawl lo; mahse Ani chuan kan tlin lohna leh fellohna zawng zawng hai derin in a hmangaihna tawp thei lo in min pawm a. Nitin hian ‘Isu ka hmangaih che, ka hmangaih zual zel ang che’ ti fo ila.

Engtinnge chu hmangaihna chu kan lantir ang? Chhanna awlsam tak, mahse nunpui khrih ve tak a awm: ‘A thupekte kan zawm hian’ tiin Bible-in min hrilh. Pathian hmangaihna hrethiam in pawm ila, chu hmangaihna ang chuan kan mihringpui hmangaih bawk ila, hringnun hi a va nuam dawn em!!!

Similar Posts:

• Hmangaihna Dik
• Khawinge Hmangaihna zawk niang le?
• Hmangaihna – Naupang ah
• Hmangaihna hi enge a awm zia aw?
• Hmangaihna!

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, February 26th, 2011 at 8:01 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.