Hemi thu-ah hian inhnialna leh ngaihdan inang lo fe fe pawh a lo awm nual tawh thin a. Tharthawh leh thut lam ni chuang lovin ngaihdan han sawitlan ve hrim hrim pawh a tha a lawm mawle! Ka rilrua awm lai ber chu Saptawnga “The Lord’s Prayer” tih Mizotawnga kan dah dan leh a hnu khar dawn lama a tam zawkin ‘Ram te, thiltihtheihna te, ROPUI TE…” tia kan sawi thin lai tak hi a ni. A hming Mizotawnga sawi danah hian a then chuan “Lal tawngtaina” an ti mai a, a thenin “Lalpan tawngtai dan min zirtir” ti deuh kher an awm bawk a, a thenin “Lalbiakna” an ti et bawk. A eng ber hi nge pawmfel deuh atan tha ang le tih hi ka ngaihtuah mai mai thin. ‘Ropui te’ tihah pawh hian a thenin a dik nia an hriat laiin, a then chuan Mizotawng kalhmang dik tak turah chuan ‘NA’ a tel tur a ni tiin, “ROPUINA TE” tih tur a ni, an ti bawk.
Mimal ngaihdan han thawh chhunzawm ta ila. A hming chungchangah chuan awlsam taka hming lam awlsam tura kan sawi dawn chuan awmze nei dik thlup leh Mizotawng dik thlap khera ziah a ngai lem lovin ka hria a. Entirnan Newspaper-ah pawh a thupui (Headline ) ah chuan Chief Minister-in Hall a hawn chanchin kimchang ziahna turah a thupuiah chuan “Chief Minister-in hawng” tih ringawt te dah a ni thin a. Vai, Mizotawng thiam lovin an sawi awm vel lek chu niin a lang naa, a thu-in a ziah fiah tho avangin a pawi lem lo nia ngaih a ni. Chutiang deuh chuan Lalpan tawngtai dan min zirtir mah nise, “Lal tawngtaina” tih hming hi put tir fel then mai ila a fuh ber mai chuan a lang. Tichuan Lal tawngtaina chu sawi rualin, Lalpan min lo zirtir chu kan sawi dual dual mai dawn alawm.
Tin, ‘Ropui te’ tih leh ‘Ropuina te’ tih chungchangah hian ka phak ang tawka bengsika ka ngaihtuahin “ROPUINA TE” tih hi a dik niin ka hria. Gramatically-in ka sawifiah kelh thiam chiah lo naa ‘NA’ a tel loh chuan Mizotawng a kim chiah lo deuh niin ka ngai. A hma chiaha ‘Thiltihtheihna te’ tih pawh hi ‘NA’ a tel loh chuan langsar takin a dik lo tih a hriat nghal theih a. ‘Ropui’ tih tak maia hi tlem chuan a danglam ta deuh va, mahse ‘NA’ a tel hian a kalh a kim bik riau niin ka bengah chuan a rik dan a ni. Eng nge in ngaih ve dan?
Pawm tlan kan neih theih chuan tih dan thuhmunin kan sawi tlang ang a, a tha phian ang tih hi ngaihdan awm thei a ni. ‘NA’ telh leh telh loh thu-ah hian Kohhran tihdan a inang vek lo va, Kohhran lian ber Presbyterian hian an telh lo va, Kohhran thenkhat dang telh an awm thung a. Mahni Kohhran huangchhungah chuan sawi rual tlang thei mah ila, Kohhran pawn lama function thenkhatah kan sawirualin ‘NA’ telh leh telh loh chauh avang hian a tawp lam hi a kat ve deuh nak thei tlat nia.
Upa tawngkam takin a hniak tam lam lam zui mai tur nge, a dik ber zawn chhuaha pawm tlan dial tur? ‘NA’ tih ringawt telh leh telh loh mai hi chu a enga pawh a harsa lem lo va, tih dan thuhmun neih chu a tha mang e aw. Kohhran tih dan lam ngaihtuah lovin Mizo kan nihna zawnah a dik ber anga sawi tlan dial dial chu a tha mang e.
Similar Posts:
- Katholic Kohhran hi
- “Chhakchhuak” or “Hualngo” ?
- A sakhming kan sêl e
- Eng Kohhran thurin hi nge dik ber….?
- Eng Sakhua hi nge dik ber?
April 6th, 2011 at 2:20 am
@#49 (Terema Chhakchhuak): I thil sawi chu a dik tho mai. Mahse ka comment hmasa #40-ah khian Mizo tawngah chuan adjective hi noun-ah a lamdan thlakin a chantir theih a, hei hi hman deuh laia an chin tam zawk a ni a, tawng mawihnai zawkah ngaih a ni thin. ‘Ropui’ tih kha a diklohna a awm hauh lo. A lamdan ka hre dik lo mai mai a ni e.
Report this comment
April 6th, 2011 at 12:50 pm
@51, hmanlai deuha an chin thin hi Zosap te Zotawng ani duh khawp nia…ROPUI tih hi NOUN dik tak ani chiah lova,mahse GERUND ang chuan a ngaih ve theih…ROPUI tih hi a dik dawn anih chuan THILTIHTHEIH tih hi GERUND tho a ni a, a dik ve tur ani dawn lo’m ni? Mahse zotawng Grammar kan bosal tihna a niang..:)
Report this comment