mi(sual).com

A rei hman fu tawh, hriat zui hlawh turin a khawsa tawh si lo! Ani kha a awm tawh si lo. A hming chu KHUANGHINA a ni a. Tlungvel leh Darlawng chhehvela cheng kual thin a ni. Buai hma (196o) atang daih tawh khan Darlawng khaw chhimlam khaw tawntirh, NH 54 ni ta chung deuh maiah khian hriatrengna lung a phun tlar thin a. Tam tak phei zawng a phun lo. John F. Kennedy, Mizo hausa ber Pachhunga Lung te, Japan Emperor Lung etc., a phun tlar nual. A mi ngaihsan deuh deuhte pualin a phun mai thin a ni.

Buai hma khan ka pa ngei hian Khuanghina leh a Lungphunte chu thla a rawn lakpui tawh a. Khuanghina pawh a lawm hle. Midum nihliap lianpui mai hi kap parhin a khum a. Ka pa chu a zawn a. Ruah a sur lo va, ni lah chuti em ema sa vawl vawl a ni hran chuang lo. Chhan dang a nei a –Khuanghina kha Aizawl pa hausain Aizawl-a zinah a sawm a, a zu zin ta ngei a. A thil duh ber a thlantir a. Nihliappui dum chu a thlang a, thil dang engmah a thlang lo. Thil hlu tak tak thlan tur a tam ve awm tawh vei nen! Chu nihliap chu a roh hle a. Thlalaknaah pawh chuan a lan loh a hlau hle a. A kap parh a, a khum a. A nihliap chu a lan ngei a duh tlat a ni.

March 13, 2011 khan Darlawng-ah ka chawl ti-tuai zuai a. Thil hriatchhuah ka nei a. Ka zawt chiang a. Khuanghina chanchin pawh a hriaten min lo hrilh var a. Amah chu  damin awm tawh lo mah se, a sulhnu chu hmuh ka duh ve tlat a. Nu pakhatin min hruai ta a.

Darlawng khaw tawp, kawngpui chung lawk, pen sawm emaw vel lek lawn chhoh ngaiah, hnim bawn tak karah lungphun chu a lo intlar diat hlawm a. Arsi ekin a lo bawm hneh hle tawh a. Ka chemte pai chuan a hmunhma chu thlalak a theih hram nan ka vai eng chawp a. A thla ka la ta a, min hruaitu-nu pawh a lan tel hi! Min hruaitu-nu hi a hming ka lo zawt hauh lo pek a …

He thu ka ziak lai hian ka pa ka zawt hial a, ka pa lah chuan nui hawk hawk chungin min hrilh zui ta a. “Khuanghina kha an sawi danin Burma ram atanga raltlana Mizorama rawn chhuk … Hualngo, Chhawrtui, Puilo leh a khaw chhehvela arva lawrkhawm, Tlungvel leh khaw hnaivai Hotel-a supply kual thin … pawisa a khawl hnem ta deuh tihin a mi ngaihsante hriatrengna lung phun zel mai mi a ni … a thil tih ka ngaihsanpui a, a hlim hle a. Tlungvel-ah ka zawng-chhuak a, Jeep-ah ka phur ve ta a, a lungphunte ka thlirpui a, thla ka lakpui lai chuan a hlim zual hle a, a khi seng reng mai,” tiin vawiin April 10, 2011 hian min hrilh.

Khuanghina khan nupui-pasal neih lam a ngaihsak eih lo, lung phun lam ringawt a buaipui thung. A tih tawh lamah chuan “dai-hnaia thangchhuah” a ni ve hliah hliah a ni. A sulhnu hian cheibawl a hlawh lo hle a, Art & Culture lam pawh hian Pachhunga te, John F. Kennedy etc., an ngaihsan phak chuan Khuanghina sulhnu pawh hi enkawl zui ve amawi chu a ni e! Tun tlai-khawhnuah hi chuan lungphun atchilh bera ka ngaih chu Professor Dr Laltluangliana Khiangte, Ph D., Padma Shri Awardee a ni ta!

Tih tawh lama a pumpuhluma inpete hi ngaihsan zui chi an ni a, thangtharte infuihna atan pawh thil atthlak a ni lo hrim hrim. Khuanghina khan a tha leh zung, sum leh pai zawng zawngin khawvel mi hmingthangte a lo ngaisang a, amah pawh hian hriat reng a hlawh ve ngei hi kan duhsakpuiin a rinawm. Darlawng hi ‘tai-kher’ lama hming chher tawhin an sawi a, Khuanghina sulhnu lam hawia hming thar a chher hi a mawi zawk daih awm e. Darlawng khaw chhehvelah hian pipu sulhnu humhalh tur a awm, chung chu tlawh turin hun ka nei hman ta si lo.

Similar Posts:

• Taikheri’n mual min liam san ta!
• Hlakungpui Jubilee lawm hun tur chiang ta
• Lung Nupa : N. Bualpui
• Tlungvel mipuite tui in tûr hrai a ni
• Pasaltha Khuangchera lungphun

Recent Posts:

• June 2016, Mizo(ram) Diary
• The reason we have bad roads in the North East
• INNGHAHNA TLING THURIL CHU
• Essay on Amen
• A MAKIN AVA ROPUI EM…!!

This entry was posted on Monday, April 11th, 2011 at 7:32 pm and is filed under Mizo Society & Culture, Travel. You can follow any responses to this entry through the RSS 2.0 feed. You can leave a response, or trackback from your own site.