A hmasa berin mi(sual) ho zawng zawng Tholeh Krista hmingin Easter chibai vek ule!
“Hetah a awm tawh lo ve; a sawi ang ngeiin a thawhleh tawh kha”. (Matt. 28:6)
Isua Thawhleh ni (Easter) hi kum tin kan lawmin kan serh a, Kristiante thurin innghahna lungphum pawimawh ber pakhat a nih avangin a ropui a, lawm hi a phu hliah hliah reng a ni. Leilung pian tirh ata tumah thihna hneha lo tho leh an la awm ngai lo va, khawvel mi ropui leh sakhaw hmuchhhuaktu zawng zawngte pawh an thi a, an lo tho leh tawh lo. Mihring Fapa, Davida thlah, Nazareth Isua chiah hi thihna hneha tho leh awmchhun chu a ni!
Easter hi engnge a awmzia? Lal Isua, thihna hneha a thawhlehna hi mihringte ngaihtuahna leh chhut phak bakin a ropuiin a namai lo tih hi thil chiang sa a ni. He thawhlehna hi Pathianin ama chatuan finna kal tlanga Setana leh a thiltihtheihna zawng zawng a hnehna ni, a Fapa Isua Krista inpekna hmanga a hmangaih mihringte chatuan atana min neih let lehna ni a ni. Sual bawiha tang, boral mai tur mihringte chu sual thiltihtheihna laka min chhanchhuakin, min bawihtu sual ‘power’ chu chatuan atan min chhut chhiatsak ta a nih kha! Diabola leh a hnathawhte tiboral tura lokal Krista chuan thim thuneihna ata chu min chhanchhuakin, ama ram eng mawi takah chuan chatuan atan ‘mi thianghlim’ leh ‘Pathian fa’ ni turin min hlangkai ta! A va ropui em! Halleluiah! “Krista Isuaah chuan ama rual veka min kaithovin, van hmunahte ama hnenah min thuttir ta a”. (Eph. 2:6) Krista Thawhlehna avang chuan Pathian fa, Pathian roluahtu, Krista ro tawmpuitu, Krista ruala van hmuna thu ve, amah nena roreltu ni thei hial tura duhsakna dawngtu kan lo ni ta! Pathian thilsiam zawng zawng zingah hian Krista avangin kan ropui lawr lak a, van angelte chan ai maha sang chanvo min pe a sin! Ama anpuia a siam, a Fapa nunna meuh pea a leite kan nih hi! Chapona tur reng reng erawh a awm lo va, min hmangaihtu Lal Immanuela ke bula lawma tuiral mai tur zawk kan ni! He Thawhlehna ropuizia, a thukzia leh a rilzia hi mihring tawngte leh vantirhkoh tawngte pawhin hrilhfiah zawh rual a ni lo vang. Chatuan Pathian thinlung chhungril atanga lo chhuak, Maka, Remruattua, Pathian Chaka, Chatuan Pa, Remna Lal, Sipai hote Lalpa, Israelte Mithianghlim thiltih a ni a, a ropui em a ni e! Thihna ata Krista kaitho lehtu Thalarau Thianghlim thiltihtheihna chu keimahniah hian a rawn dah a, chu Thlarau Thianghlim ngei chuan min chenchilh a ni tih te han ngaihtuah phei chuan a mak tulh tulh a, sawi ngaihna pawh hriat a har a nih hi! Lal Davida angin, “Aw ka nunna, LALPA chu fak la; Ka kawchhunga awm zawng zawngte u, a hming thianghlim chu fak rawh u,” (Sam 103:1) tih loh theih a ni lo ve!
Sual thiltihtheihnain kan chungah ro a rel thei tawh lo: Krista Thawhlehna tawmpuitute nunah chuan sualin ro a rel thei tawh lo va, sual thiltihtheihna chu Krista thawhlehna chuan a lo chhutchhiatsak vek tawh a ni. Tunah chuan Setana leh sual bumnate chuan Lalpa ringtute ama bawihah mi siam thei tawh lo va, duh duhin min sawp rethei dawn tawh hek lo! Thil kan tisual leh thei tawh lo tihna lam ni lovin, thil tha ti tur leh thil sual ti lo turin Lal Isuaah chuan ‘power’ kan lo nei ta tihna zawk a ni. “Amaherawhchu mitthi zing ata nung leh angin Pathian hnenah inpe ula ….sualnain in chungah thu a nei tawh dawn si lo”. (Rom 6:13&14)
Beiseina nung min siamsak: Lal Isua chu amah ringtute thawh hmahruaitu niin, amah zuitute chu thihna hnehin kan la tho leh dawn a ni tih min kawhhmuh a. “Nimahsela Krista chu mitthi zing ata kaihthawhin a awm tak zet a ni, muhilte thawh hmahruaitu a lo ni ta”. (1 Kor. 15:20) Thawhlehna chuan beiseina nung nei turin min hring leh ta bawk a ni. “Ani chuan a khawngaihna nasa tak ang zelin, mitthi zing ata Isua Krista thawhlehna avangin beiseina nung nei turin min hring leh a, rochan chhe thei lo, bawlhhlawh kai lo, chuai thei lo, vana in tana khek chu hmuhna turin”. (1 Pet. 1:3&4)
Krista thawhlehna hi i tan a ni e: Tun hmain vawi tam tak Easter hi lo serhin lo hmang tawh mah la, nangma tan ngei a ni tih i lo la hre fiah lo a nih chuan vawiinah hian ka han hrilh nawn leh a che: Lal Isua thawhlehna hi i tan ngei a ni e. “Chu Isua chu kan sual avangin mantirin a awm a, thiam kan channa turin kaihthawhin a awm bawk a”. (Rom 4:25) Lal Isua thawhleh rual chuan thiam loh changa boral mai tur kha thiamchangin kan lo tho ve leh ta! Pathian thu chuan Lal Isua thihna leh thawhlehna chu kan tan a nihzia heti hian a sawi: “A thihna anpuiin amah nen kan inzawm tawh si chuan a thawhlehna anpui pawhin kan inzawm bawk ang”. (Rom 6: 5)
He Pathian thu hian a tlang i lo kawm teh ang:
“Thawhlehna hmasa bera telte chu an engthawlin an thianghlim a ni; chung ho chungah chuan thih hnihna chuan thu reng a nei lo va, Pathian leh Krista puithiamte an ni ang a, amah nen kum sangkhat rorelin an awm zawk ang”. (Thupuan 20: 6)
Amen!
Similar Posts:
- Tih nun kan ni (Easter pual)
- THAWHLEHNAA TIHNUN KA LO NI TA
- NAZARETH ISUA KRAWS-A AN KHENBEH KHA A THO LEH TA (Easter Sunday Sermon)
- Beiseina siamtu thawhlehna
- Thihna
April 24th, 2011 at 5:06 am
Amen! Mu phawt teh ang, muang mar in ka la chhiar ang.
Report this comment
April 24th, 2011 at 5:20 am
An van reh phir phiar ve aw…..
Report this comment
April 24th, 2011 at 5:32 am
THIH NA HNEHIN A THO TA! Chu thawhlehna nun chu tawmpui ve turin vawiin hian sual thihsanin Krista rualin i tho ve ang u.
good post
Report this comment
April 24th, 2011 at 5:44 am
post tha khawp mai, kan hriat hnu pawh nise inhrilh nawn fo kan ngai a,kan intuaithar a pathian hnaih reng hi ringtu te tan a pawimawh khawp mai….
Report this comment
April 24th, 2011 at 5:55 am
Amen
Report this comment
April 24th, 2011 at 6:02 am
A ropui teh asin.
Report this comment
April 24th, 2011 at 6:42 am
Thihna hneha tho leh Isua ka ring a, Amaha ka rinna ka nghah nasat lai apiangin leh Amah duh zawng ti tura ka rilru ka pek nasat zual chang a piangin ‘sual’in min hel thin..( That ka tum ve leh ka sual leh thin !!)…’Sual thil tih theihnain kan chungah ro a rel thei tawh lo’ tih lai khi sawi dan dang deuhin fiah deuh hlek a ngaihthlak va chakawm em..? HAPPY EASTER to all mi(sual). commers!!!
Report this comment
April 24th, 2011 at 6:54 am
AMEN.
Tho leh Kan Lalpa ISUA KRISTA hmingin chibai vek u le.
Report this comment
April 24th, 2011 at 7:16 am
ka ngaihtuah zui chu, thawhlehna hmutu theuh theuh, thlan vengtute leh Mari Magdalini te din hmun kha in anglo tak ani, thlan vengtute chuan hre reng siin tangka tam tak an lak hnuah atho leh lo ani anti a,Mari Magdalini te erawh chuan an hmu fiah ngei mai,Vawin ni ah pawh hian A tholeh ani tih hre theuh pawh hi kan in angleh dawnlo mang e tihthu ka rilruah an awm tak tlat chu.Easter hman nuam vek ule…
Report this comment
April 24th, 2011 at 7:39 am
Tukin chu kan kohhranin zing kar easter sevice kan nei a, thingpui lumah ka awm ve a. ka rilruah Lal Isua thihna leh sual a hneha a thawh lehna thu hi alo lut a, kan ngaihtuah thin a a ropui in avan mak tak em. Hei tak hi khawvel sakhua dangte pawn a rin theih loh chu. Ka mittui a tla hial a. Lalisua thihna leh a thawh lehn a tawmpuitu zawng zawng te easter chibai vek ule…
Report this comment
April 24th, 2011 at 8:02 am
Easter Chibai vek ule
Report this comment
April 24th, 2011 at 8:06 am
Isua Krista thihna leh Thawhlehna zar zotu ni ngei thei theuh ila a va lawmawm dawn em ! chhandamna chu mtin tan buatsaih nimahsela- a duh tute tan a ni deuh ber si a. Ruai chu buatsaih a ni a, ei lovin kan puar ngawt thei lo. Chhandamna ruai ei turin tih tur kan nei a ni.. MISUAL HO THAWHLEHNA CHIBAI VEK U LE….
Report this comment
April 24th, 2011 at 8:10 am
@Mi(khual)pa, #7, lo nghak hram rawh. In khawm tura kal a ngai tlat a, inkhawm ban veleh sei zawkin kan sawi zui dawn nia!
Report this comment
April 24th, 2011 at 8:53 am
Krista Thawhlehna Niah hian Chibai vek u le..
Report this comment
April 24th, 2011 at 9:11 am
I ziak tha hle mai
Report this comment
April 24th, 2011 at 10:26 am
Ephesi 1:19-21 leh Rom 6:4 i chhiar chuan Isua Krista thawhlehna hi keini Amah rungtute tan kan thiltih theihna a ni….. Oh the power of resurrection….
A ngaihnawm mawlh mawlh hle mai..
Easter chibai mawlh mawlh u! Isua Krista thihna leh thawhlehna aia hlu thil dang reng a lo awm love….
Report this comment
April 24th, 2011 at 11:10 am
Thawhlehna sermon ropui tak a ni e. Kan Lalpa thawhlehna hriatpuitu kan ni ngam dawn em?
Easter chibai ka buk a che u.
Report this comment
April 24th, 2011 at 11:54 am
a tha e
….A sawi ang ngeiin thihna chelh beh zuah rual lohin a tho leh ta…
Report this comment
April 24th, 2011 at 2:42 pm
Chhiar a kal zaih mai, a ngaihnawm e
Beram chu hling ah a tanga a pu chuan ava zawng chhuaka, hlingin a phuarna nghet tak chu a phelh sak taa, a ti zalen a, mahse hling erawh ala paih bo lo a, hling a chhandam telve lo bawk ang hian kan Pathian chuan kan tanna sual ata min chhandama, kan tanna hling erawh a la hal ral loa a thil hip theihna te leh a tha chakna a chhu chat chauh a ni. Min bat tang hlen thei tawhloa keimahni kan in bat tang chawp ta zawk thin a ni. Chu chu chhandamna awmzia chu a ni, sual a bo lo a, thenfai pawh ala ni hek lo, keimahni kan in vet a nih loh chuan min vet thei tawh hek loa zalen kan ni tawh.
He thawhlehna hian sual phuarna zawng zawng ata min tal chhuah sak ta, ava ropui em, LALPA chu fak in awm rawh se. Amen
Sual phuarna ata kan Thawhlehna chibai ka buk vek a che u
Report this comment
April 24th, 2011 at 5:59 pm
@mi(khual)pa, #7, Asteric #19 hian kei ai maha chiangin a sawifiah e! Sual thiltihtheihna chu Krista thawhlehna chuan a hneh ta a, sual erawh a la awm reng rih. Krista ringtute hi Pathian chuan Krista ruala thi, Krista rual veka tho leh angin min hrilh a, Krista kraws-ah khan kan mihring hlui chu tihhlum a ni a, sual pu taksa chu tihboral a nih tawh avangin sualin bawih tur a nei tawh lo. Thawhlehnaah mihring tharin kan tho leh a, chu mihring thar chu dan hnuaiah ni lovin khawngaihna hnuaia awm niin, tisa dan ni lovin Thlarau dan zawkin a nung ta a ni.
Rom 6:1-14 kha han chhiar teh le, a chiang kuar mai ang.
Tin, Pathian thu reng reng hi rinnaa mahni tana kan lo seng luh chiah hian a takin a thiltihtheihna a lo lang chauh thin.
a thihnaa
Report this comment