Kum 1847 kum a ni a, pa khawhar leh chaurau tak mai chu tuipui kama ruang an paihna tura dawhsan an siamah hian tlai ni tla tur chu thlirin a ding vang vang a. A rilruah chuan hun liam taa an chhungkua hlim taka an awm za laite leh an fanu duh tak maiin mual a liam san hmate kha a rilruah a lo lut a; Pathian rawngbawlna tui taka a thawh laite leh thenrualte nena hlim taka an lenho laite koh kir theih se tiin a van a van a ni. Mahse chutiang chu a ni si lo, natna rit tak hnuaiah a rawngbawl hna pawh chhunzawm thei lovin a awm a, dam beiseina reng pawh a nei tawh lo; khawvel hian hnuchhawn hian a hre tlat tawh a, mite kiangah pawh awm duh tawh lovin hmun khawhar lam chu a pan a a kun tlawk tlawk mai a ni.
Chutia lungchhe vankaia a awm lai chuan Emau daia thian dun pahnih kalte chanchin khan a rilru a rawn chhun eng a, a nunkhua pawh tlaiin a dam chhung nite chu vai liam dawn pawh ni se hnemtu leh thlamuantu Lal Isua nen chuan a ropui zel a ni tih thu chuan a fan a; a lei taksa liam mai tur chu len dunpui turin leh thih hnu khawvelah pawh thlahthlam lo turin Lal Isua chu a sawm thar leh ta a ni. Chu pa derdep tak mai, Rev. Henry Francis Lyte-a chuan chu hmunah ngei mai chuan khawvela Kristian hla tha chuai leh tawh ngai lo tur-“Ka Lalpa duh tak min awmpui ang che, khua a thim dawn min kalsan suh ang che(Eventide)” tih chu Ngawr(TB) natna avanga thi lek lek chungin a lo phuah chhuak ta a ni.
Tlem lai deuh tawh kha a ni a, Mizoram thingtlang khaw pakhatah hian tlangval sa pan ve tak hian –a tuk Pathian ni-a naupangte hla a zirpui tur en lawkin tingtang nen a ri tlang tlang a. chutih lai chuan thawklehkhatah thli a rawn tleh vuk vuk a, khua lah chu a thim khuih khuih mai bawk a; thli thaw avang chuan tual vaivut chuan bang a vawm thawt thawt a, nute chuan an fate tual leng chu an au haw rum rum mai bawk a; thenkhat chuan an puan pho leh thing phote chu an seng sawk sawk bawk a, chutih lai chuan ruah mal chu a rawn tla ta phuar phuar a; rante chuan tawmhul nan in hnuai lam an pan ve ve sung sung bawk a. Chu tlangval rilruah chuan ‘aw rante mai mai paw’n an himna tur an hria a, engah nge mihringte hian kan hriat ve theih loh le’ tiin a ngaihtuah a. Chutih lai tak mai chuan Emau daia thian dun pahnih kalte chanchin khan a rilru a rawn deng dawt mai a- chu tlangval Rev.Vanlalzuata chuan mizo kristian hlaa chuai ve ngai tawh lo tur ‘Emau dai reh’ tih hla chu a lo phuah chhuak ta a ni.
Emau kawng dai reh leh khawhar takah,
Khualzin pahnihte khawhara an kal laiin;
Chhun ni a liam zan thimin a nang dawn a,
Isua an sawm tlai khua varpui turin.
Kan hnenah awm ta che, khua a tlai dawn ta e,
Tlai ni kawla’n a liam dawn hi;
Tlaikhua i var za ang Emau dai rehah hian
Chhun ni a liam zan thimin mi nang si.
Sawmtute hnar ngai lo Lal Isua chuan
Tichuan an zinga chengin a awmpui ta a;
Thlamuanna reh thei tawh lo chu hnutchhiahin
An hnenah chengin a awmpui ta a.
Kei pawh tunah ka sawm che Lal Isu,
Ka khawvel damlai ni a tlak hma ngei hianin;
Min awmpuiin tlai khua min varpui ve la,
Ka thlarau, lo nghak rawh i Lal Isua- tiin.
Sawi tur a va tam em, a sei ang tih a hlauhawm si. He thu avanga hla lo piang kan sawi bakte nen lam hian a va ropui hlawm tak em. Kei mi hnuaihnung ber pawh hian khawhar taka hnemtu nei lova manganna vawrtawp, lusunna ka tawrh lai pawhin sawmtute hnar ngai lo Isua chuan thlamuanna hriatthiam phak rual loh chu min pe ve tawh a ni.
Kan hnenah awm ta che: Isua hi kan hnena awm tur hian kan sawm duh em? Len dunpui atan kan iai em le? Kan hnena awma kan in chhung min hmuhpui a, kan sumpai che vel min hriatpui a, kan computer folder nen lam min hmuhpui vek atan hian kan sawm ngam ang em le? Kan ngam a nih chuan chu tluka hlu chu a awm ngai lovang. ‘Kan hnenah awm ta che’ tiin i sawm ang u hmiang.
Khua pawh a tlai dawn ta a, ni pawh a tlak dawn tawh hi: Kan nunkhua hian tlai lam a pan zel, khawvel hi awm zel pawh ni se kan awm zel dawn lo. Kan hun a lo la thleng ve dawn, kan hma lam hun kan hre lo; natna tuarte hi thi hma tur an ni kher lo, thi hma turte hi thi hma tur an ni mai. Kan dam lai ni hi a tlak ni tur kan hriat loh avangin Lal Isua hi kan hnena awm tur hian a tha ber, anin min hruai zel ang ral lehlam thlengin.
Sawmtute a hnar ngai lo: Sawm sawm ila min hnar si se a hrehawm ngawt ang, mahse min hnar ngai si lo. Min hnar phal lo, min thlamuan duh loh zan hi a nei lo va, min thlahthlam ni lah kan hre ngai lo. Kan kal thui hle tawh pawh ti ila min ngaidam tur hian min lo la ban pha zel mai hi a lo ni. ‘Lal Isua’n kan hrehawm a hria a, ni tlak thlengin min hruai dawn si’ tih hlate kha a va dik em! Kan sawm phawt chuan kan hnena awm a tiam, tu pawh a hnena kal chu a hnawtchhuak dawn lo; ‘Kan hnenah awm ta che’ i ti mai zawk ang u-tih takzetin.
Chhang a phel: Juda danah chhang pheltu chu chhungkhata pa ber an ni. Mikhual an sawm chawpin chhang a phel hi a mak a ni; mahse a mak leh si lo, pa ber dinhmun, hotu ber nihna an pe tihna a ni. Lal Isua hi kan hnena awm tura kan sawm a nih rau rau chuan hotu nihna leh Lalna pe chungin i sawm ang chu-Lal Isuan no.1 nih a duh si a.
Similar Posts:
- “Ka hnenah han la rawh u” – Krista sawmna aw mawi chu(Sunday Pual)
- Krista sawmna aw mawi chu (Sunday Pual)
- Kan Lalpa chu Thlan atangin a tho leh ta ngei a… Engtik ni ah nge?
- Ka nun hian Lalpa a ngai (Sunday pual)
- Bethlehem Arsi leh Khawchhak Mifingte.
May 1st, 2011 at 7:15 am
chhiar a man hla hle mai. good post
Report this comment
May 1st, 2011 at 7:15 am
A va han ngaihnawm dap dap tehreng em! Ka var uarh ta mai
Report this comment
May 1st, 2011 at 7:28 am
A va ropuiin a va ngaihnawm em! Thinlung a tiharh sawng sawng e!
Report this comment
May 1st, 2011 at 7:31 am
I ziak ngaihnawm hle mai
Report this comment
May 1st, 2011 at 7:37 am
vakul rawn hram tha lauh lauh ngei mai,,,,mahse, he thu chhiartu tam zawk hi chu inkhawm lo an nih ka ring nghal..kan hria ang a…tlangval rev.vanlalzuata…a rawn nih thut dan khi a mawi ka ti…i no1 chu i nih tir ve don em?
Report this comment
May 1st, 2011 at 7:43 am
A va ril teh raih ve…Amen
Report this comment
May 1st, 2011 at 7:43 am
eL, hetah chuan Inrinni zan dar 10:13 inkhawm hun anilo hrim2 ale ale
Report this comment
May 1st, 2011 at 8:09 am
A lawmawm tliar tliar hle mai.
#5 eL ka no.1 atan chuan ka thlang ve tawh chu nia; kei ang hian rinawm lo ve se chu han inkawp zui chi kan ni lo, a rinawm em em mai hi ka innghahna a ni fo.
Report this comment
May 1st, 2011 at 8:09 am
‘Kan hnenah awm ta che…’ a va ril raih raih em! Ka thinlungah Lalber ni ang che tihna tlukah ka ngai.
Report this comment
May 1st, 2011 at 8:10 am
#Hv Emau dai reh hla hi Z.A.Kapmawiate nupa khan an sa tiraw kha.?
Report this comment
May 1st, 2011 at 8:13 am
Sermaon kulmuk deuh tur emaw ka tia ka lo hel ka lo hel vel a, chhiar a lo nuam leh hle si.
Good post, sunday zinga chhiar atan chuan a tha hle tak mai
Report this comment
May 1st, 2011 at 8:16 am
Emmau awmzia hi tui sa chik chhuak tihna a ni, tholeh Messian thenthilhlan tuka phal thar hmasa a hlan zawha a zinna a ni kher hi, thawhlehna chanchin tha hi tuma hup beh theih a nih lohzia lantirna chiang tak a ni. Kleopa hming awmzia hi pa challang tìhna a ni a, Messia chunga beiseina beidawng nei ta mai, Zealot rilrema Israel lalram beisei khu ruai a ni. Zawlnei Isua thìh leh thawhleh thu chu hmeichìate report a dawng sil nual. Chhunzawm atan.
Report this comment
May 1st, 2011 at 8:17 am
#Triple keini-te chuan sermon kulmuk hi kan sawi thiam ve hlei nem, thu nawi tete hian kan inawmtlei a, thianpa zoho hian engtiangin nge min rawn lepse sak dawn erawh ka hre lo. Pathian thu pawh ni mang bar lo hian min rawn chhuahsak leh ang a, kan hawi vak vak mai ang tih chu ka hlau deuh.NOI.
Report this comment
May 1st, 2011 at 8:24 am
Hemi ni hi April ni 9,30AD a nih hmel a. Sabbath hmang zo an beisei ber thi ta si chu an cool viau a nih a rinawm.
‘Kan hnenah awm ta che’ tih hi lehlin tharah chuan ‘kan hnenah riak ve mai rawh’ tiin an dah a, a mizo teh tawh khawp mai. Patling han inbiak nan chuan a awihawm zaw mah a; mahse ‘kan hnenah awm ta che’ tih erawh hi chuan lung a kuai.
Report this comment
May 1st, 2011 at 8:25 am
@vakul, hetiang a ziah hi chhiar a nuam a lawm, sermon sei pui pui ai chuan ka chhiar duh zawk, a thu ken a dang chuang lo. A dang pawh han ti zel teh khai, inkhawm thulh thakin lo chhiar ila a ni mai a lawm he he
Report this comment
May 1st, 2011 at 8:31 am
A va ngaihnawm ve le…Mi fa te hi chuan an nun hi thu leh hla te hian an phawrh chhuak thiam bik thin e…Good Post.
He thu ka chiar a ka rilru a lo lang chu,’I hnen a kan rawn thlen a piang lawmtakin i chhang thin’tih hi a ni.Min chhang mai ni lo a ;lawmtakin min chhang thin hi a ropui ka ti.
Report this comment
May 1st, 2011 at 8:51 am
Thenthilhlan tuka Puithiam rawngbawlna leh PAWMNA (acceptance) hi a inzawm tlat a, buhthal hmasa phal khat Pathian hnena hlan hmasak te teah lova buh dangte ah (sickled) thiang a ni thin a, Tholeh Messia inhlanna, kan aiawh puithiam lalber, min leina ama thisen kenga a inhlan tuk, kan aiawh puithiam leh Pa Pathianin a lo accept tak azarah Messia kaltlangin Pa Pathian chuan keini phal dangte hì min accept ta a ni, chung thìl chu khualzin pahnìh thaw lian ve tak tak te hian an hre pha si lo. Messia hian TANAKH atanga a chanchin inziak a hrilhfiah kawng tluan a. Chhunzawm atan.
Report this comment
May 1st, 2011 at 9:14 am
@hv biakin kawtah ka thu vung tawh mai….ka lut tep..mi(sual).com tak hi chu aw….
Report this comment
May 1st, 2011 at 9:20 am
An mit tìhvaìhsak a ni bawl a, Tholeh Isua an bawl, tu a nìh an hre si lo! Ni tlak dawn thuakah chuan an zinga cham turin an sawm, sawmna a dawn hmasak ber a ni ve ta, Emmanuel, kan zinga Pathian awm chuan a tlansate sawmna a dawng ve ta. Kalhlen kut hun lai, chhangdawidim telh loh kut lai a ni a, matzah phela an kil laiin an thìnlung hawnsak a ni ta, a romance lam aia kan hlawkpui atan.
Report this comment
May 1st, 2011 at 9:25 am
vakul #10 ka hre hauhlo mai a.
eL, biakin chhung atang em chuan i type lo vang chu
Report this comment
May 1st, 2011 at 9:25 am
Edited…
Report this comment
May 1st, 2011 at 9:32 am
A va han tha em!
‘Emau kawngdai reh leh khawhar takah’ tih hla mawi leh lungrun tak hi Rev.Vanlalzuata phuah niin, Z.A Kapmawia khan radio ah mawi takin a sa.
Report this comment
May 1st, 2011 at 9:34 am
Amen
Report this comment
May 1st, 2011 at 10:21 am
Eh! Vakul, Pathian thulo deuh ah ka chhuah ngai em ni? I sual hle mai.
Heng hla 2 te hi ka hria, mahse a phuahtute chu ka lo hre miah hleinem. Hla background han hriat a, a phuahtu phuahchhuahna thinlung leh rilru zuk tawmpui thiam hnu a han sak hian a fiah kuarh kuarh mai thin. Good post
Mahse, a thu hlawm hnihna erawh hi chu a typo, a emo, ka sawisel a ni lo va, ka duhkhawp tawh lo tihna a ni zawk e. Isua hi lal ah, No.1 ah kan sawm thin, mahse, kan ‘mahse’ leh thin, a chhan, a natna zuk chinchhuah hi kan mamawh tawh takzet. Chuvang chu a nia Sual bul kan sawi dan, thei ei cc te pawh DNA, gene lam zawk a ni ka tih tak ni.
Hetiang chiah hian Bible pawh hi a ziaktute khawvel, a hunlai a an thlirdan,an beisei,adt,adt…. zuk hriatloh chuan a text atang ngawt chuan an sawi tum miahloh in a ngaih kawih theih khawp mai.Tin,kan ngaikawi nasa em em bawk. Messia chungchangte, Vanram chugnchang te, hremhmun chuang changte hi a hunlai Juda concept atanglo chuan a fiah thei ngailo ang.
Report this comment
May 1st, 2011 at 10:54 am
Ngaihnawm khawp mai…
Report this comment
May 1st, 2011 at 11:23 am
Acceptance khingpui chu REJECTION a ni. AD 30, Abìb 19 khan chhandamna hnathawh hlenchhuah fel hman a ni a, Johana 20 kan chhiar chuan THLAMUANNA tholeh Isuan a sem ta nghe nghe, van hmun rawngbawlna kaltlang tawh puithiam lalber azarah. Reject kan ni lo va, accepted kan ni ta. Kleopa leh a thianpa pawhin an hrethiam zui ve ta a nih kha. Thìsen bua ringawta inthawina a kimchang ngai lo, thisen theh inthawina hi a tel ngei ngei thin.
Report this comment
May 1st, 2011 at 11:33 am
A va han tha tehreng kher em..tun good friday vuakvet vela ka sermon ngaihthlak zawng zwang aiin ka rilru a hneh yawk..thanks, vakul.
Report this comment
May 1st, 2011 at 12:12 pm
Good post. Ngaihnawm bok si.
Report this comment
May 1st, 2011 at 12:13 pm
Emau dai reh a phuah dan, Rev. Vanlalzuata sermon hi ka ngaithla tawh a, tlangval a pumpa kan men pur mai mawle. Mizo hla-ah chuan ka duh ber pawl a la ni ta reng.
He hla a phuah hian Pu Zuata hian chang 1 na leh a thunawn chiah hi a dawng a, tawi a ti ngang mai a, bakah a hla thu hi a duhthu a sam lo nasa niin a sawi. A tukah naupang ho a zirtir a, biakina an sak pawhin mipui rilru a hneh hle a ni.
Inkhawm bang ho in an chibai a, a hla a nung tih an hrilh rualin a tawi hret a ni an ti ta zel a. Chumi zan la la chuan chang 3 ngawt amahin a phuah belh a, a hlathu pawh a duhthusamin a phuah. Mahse a han sa thin a, ama irawm chhuak a a phuah chin chu a ro tlat hian a hria a, a hlathu nalh zawk nia a hriat ni si kha a thinlungah a thawk nep zawk tlat hian a hria a, a phuah belh chin chu a paih leh ta a ni.
Chang 2 na leh chang 3 na hi chu a hnu deuha a dawn a ni. He hla a dawn hian a thluk nen a dawng vek a, semi colon leh comma nen lam hian ka mitthla-in ka hmu vek a ti. A dangdai a, a hlathu a nalh a, a thluk hian lung a kuai riau bawk. Pawl 12 kan zir lai khan amah ngei hian min zirtir a, biakinah kan sa ve tawh.
Report this comment
May 1st, 2011 at 12:32 pm
#24 zoho ka tlawm e ka tlawm e.
I chhutril peih a nang zawng Pathian hian kan phak tawk zel hian min pawl theuh a, chhut ril thiamhoin a hmangaihna an hriat dan a kual mawi deuh a, keini a ril lem lo ho tawnah a a vantlang thung a.
Han post ve leh tawh teh, chai luaih tur.
Chawnghilh hian a hranpa ngata post tham a nei reng a, ka post comment-a min rawn hlui duh hi a mak ka ti. I la post ngei ang chu.
#27 i ti lawmawm hle mai, heti te chuan kan post ngam tawh nang le.
#29 kei aiin i hre daih a, keiin ka ziak chhuak mai chauh a lo nih hi- a tha vek e. A ropui a lawm he hla hi chu.
Report this comment
May 1st, 2011 at 1:04 pm
by vakul tih atang khian chhiar a chakawm nghal. Rawn phawrh chhuak tha leh hle mai. Ruahsur karah insawn buai hah nen a inrem ltk. Rev Vanlalzuata phuah tih ka lo hre reng2 hleinem. Good post.
comment chhiar thlak hian ka nuih a za lek2..NOI
Report this comment
May 1st, 2011 at 1:43 pm
Tha hle mai. Emau dai reh hla Rv. Zuatan a phuah dan a sawi hi amah ngeiin a sawi Biak inah ka ngaithla tawh a;chuta tang chuan tha ka ti zual…
Report this comment
May 1st, 2011 at 1:46 pm
Hman deuh khan Pu Zuata hi ka zawt a, ‘Kristian Hla bu in revise lai khan ngatinge in telh ve loh” tiin. A mi chhanna chu ‘kha thlangtu comt.ah khan chairman ka ni a, telh atan an rawn rawt a, mahse ka awm laia han telh kha ka ngam lo va, ka tang tlat a ni’ a ti.
Report this comment
May 1st, 2011 at 1:52 pm
Ringtu kan nih tawh chuan; Pathian in awmpui loh lai min nei tawh lo hi a hahdam thlak! Kan hnenah a awm reng tawh.
Report this comment
May 1st, 2011 at 2:46 pm
#33, a van ti uihawm mai mai tak em. A inthlahrung lutuk a nih chu mawle.
Report this comment
May 1st, 2011 at 3:08 pm
Kei pawh KHB ah hian tel ve ngei se ka ti hle a ni. A thu i rawn post tel hi ka lawm khawp mai. Keini ang dtang chuan a thu pawh kan lo hrechhuak pek hleinem.
Report this comment
May 1st, 2011 at 3:54 pm
He hla hi ka va han duh thei tak e aw. Sawmtu te hnar ngai lotu Lal Isua hian ka lak atang hian sawm a va hlawh lo thin tak em.
Report this comment
May 1st, 2011 at 4:32 pm
Z.A Kapmawia(fam) sakpui kha an nu nilovin a thian niin ka hria. Tin, vanduaithlaktaka a thih hnu lawk khan, a thiannu hi rilru lam harsatna a nei. A khawngaihthlak hle mai. He nula lainatawm tak hi kei pawh ka hmu ve tawh a. He hla ka hriatchhuah apiang hian ka rilru-ah a lo awm ve zel thin! La dam tak maw? Lalpan awmpui zel mawlh teh se.
Report this comment
May 1st, 2011 at 4:33 pm
Z.A Kapmawia(fam) sakpui kha an nu nilovin a thian niin ka hria. Tin, vanduaithlaktaka a thih hnu lawk khan, a thiannu hian rilru lam harsatna a nei. A khawngaihthlak hle mai. He nula lainatawm tak hi kei pawh ka hmu ve tawh a. He hla ka hriatchhuah apiang hian ka rilru-ah a lo awm ve zel thin! La dam tak maw? Lalpan awmpui zel mawlh teh se.
Report this comment
May 1st, 2011 at 5:12 pm
Nikum ah Luka 20:13-35 ka chhiar laiin min hneh lutuk a, he hla hi a thu ka hre chiang si lo….Misual member Nl Riangtlei hi ka email tawp a, a nin min rawn pe hlauh a.
A ropui ka tih em em bawk chu, Luke 20:32 ami kha ” kalkawnga min biak laia Pathian lehkha thute min hrilhfiah lai khan kan thinlung a harh huai reng lawm ni kha?”an inti a.
Bible commentary ami paste zuai ang e:
Verse 32
They asked each other, “Were not our hearts burning within us while he talked with us on the road and opened the Scriptures to us?”
The study and meditation upon the word of God is ever the cause that produces the glowing heart in mortal men; and if ministers of the Lord’s gospel would have audiences of burning hearts, the means of achieving such a thing is here. The exposition of the Holy Scriptures exceeds in importance all other tasks of the ministers of Christ.
source: https://www.searchgodsword.org/.....hapter=024
Report this comment
May 1st, 2011 at 5:13 pm
very good post indeed, Vakul
Report this comment
May 1st, 2011 at 6:04 pm
Ava tha teh reng em aw. Kristian kan nihna ah hian Pathian awmpuina kan chang hi a thlamuan thlak em em a ni.
Tin,mihring nunphungah hian ‘REJECTION’ hi tuar a hreawm ber ka ring. Mahse Isua hian tumah a hnar ngai lo.
He hla thatzia hi aw. Ngaihthlak tur ka zawng ngial a kala hmu thei lo.
Bible chang han dah lan teuh hi chuan chhiartu hi an tlem thin a,tun ami hi chuan chhiartu pawh a ngah viau ang.
Good Post…
Report this comment
May 1st, 2011 at 8:55 pm
E va ziak tha ve aw, rilru tak takin ka chhiara,a hlawkthlak hle mai,thinlung khawihpha thu ropui i rawn ziahchhuah avangin ka lawm hle mai.rawnziak leh fo turin ka ngen a che.
Report this comment
May 1st, 2011 at 10:32 pm
post tha hle mai, emau daih reh vel hi chuan lung chu a ti leng deuh a ni!
Report this comment
May 2nd, 2011 at 1:18 am
I ziak lunglenthlak thiam hle mai, a ngaihnawm ka ti lutuk
Report this comment
May 2nd, 2011 at 10:04 am
@ BMW : “hearts burning” tih lai tak hi ka la thutak asin, ‘thinlung harh huai’ tih nan mai chuan ka ui! A inmut kang sa huam huam hle hian ka hriatpui tlat si!
Report this comment
November 4th, 2012 at 12:43 pm
Sawmtute hnar ngai lo Isua chu …..
https://www.youtube.com/watch?f.....a73Gv25KQk
Report this comment