mi(sual).com

Good Friday ni ka zawhnaah khán “Le Petit Prince” hi Mizo ṭawnga lehlin tawh a nih leh nih loh ka rawn zâwt tawh che u a. Tûmahin in hre lo. “Lehlin tawh ni sé chuan ka chhiar tawh ang” ti te kha in awm ta hialin ka hria. Hei hi mihring nun chungchǽng inzirtírna lehkhabu ṭha tak a ni a. Khawvêla lehkhabu chhiar hlawh berte zínga mi a ni. Engtinngê ka hriat? Hetah hian en rawh:  https://en.wikipedia.org/wiki/List_of_best-selling_books

Tichuan kei hian a Ferên ṭawng aṭanga lehlin ka tum mék a ni, mi(sual)ho tán liau liau. Ka hman cháng apiangin bung khat të tëin ka rawn dah ṭhin ang a. In commentho hmangin kan inkawm hlim leh dawn a ni. In chhiar peih loh emaw, ṭawng letlingtlâk nia min ngai lo emaw a nih pawhin ka hrethiam a. Lehlin mawi theih ka châk lutuk a. Mahsé ka tlin tâwk bâk hi ka ti thei sï lo a ni. A thu mawina lam aiin a ṭhatna ka rawn uar zâwk dáwn a ni, chauh thubarawh a ni lo va nia!

Kan dam zël ang a, ‘O Alquimista’ tih pawh kha min lehlin khalh an awm loh chuan a Brazilian Portueguese aṭang ngei lehlin chhoh kan la tum zël dawn nia.

Hetiang (lehkhabu lehlin) hi mi(sual).com history-a a hmasa ber a ni mai thei a. Dànin a phal leh phal loh lam ka ngaihtuah buai hman lo a ni.

Ka han ti tak nâ a, hun hi a duh rei deuh mai thei a, min lo hrethiam dawn nia.

Mawi taka letling tawh an lo awm chuan, “Ka che chhe dêr”, that’s all! Pawi ka ti lëm lo. mi(sual).com-ah an post vè loh teh êih! Kan nun chhung rei lo tëah hian zir tùr hi a tam êm êm a, vawi khat hlawhchham vàng mai mai a beidawng tùr kan ni lo!
Mawi lo tak tak pawhin rawn comment u la, ZoIITian ka zäm ngäi lo tih in hrîat kha! Ha hai!

Hei le!

Bung Khatna

Kum 6 mî lek ka nih láiin vawi khat chu tukloh ramngaw chanchin ziahna bû pakhat ‘Kan Nunhluite’ tihah hian milem nalh êm êm mai ka hmu a. Rülpuiin sapui a dawlh lái lem a ni. Chu lemziah chu hei hi a ni :

Chu lehkhabûah vëk chuan, « Rúlpui ho hian an chaw te hi a ṭhial pawh ṭhial miah lovin a pumin a dawlh ṭhin a. An pai ṭawih hun chhung thla ruk zet chu a chêt pawh che thei lovin an mu tlawk tlawk mai tawh ṭhin a ni », tiin a inziak a.

Chumi ka hmuh aṭang chuan ramhnuaia ram chhuah leh rammut chungchang te , ngaw kara thil hlauhawm chi hrang hrang te ka ngaihtuah nasa ta hlë mai a, pencil rawng nei hmangin ka milem hmasa ber chu ka ziak hlawhtling ve ta nghé nghé a. Ka Milem 1-na. Hetiang deuh hi a ni :

Ka kutchhuak chu puitlingho te hmuhin an hlauh leh hlauh loh te ka zâwt a.

« Engvang chuan ngê maw lukhum te kan hlauh vang le ? » tiin min chhang hlawm a.

Ka lemziah chu lukhum lem a ni awkawng lo ; rúlpuiin sáipui a dawlh a, a ṕai ṭawih léi mék lem a ni. Puitlinghovin an hriatthiam vé theih nán rulpui kawchhúng lem chu ka ziak lang tel ta nghé nghé a. Hrilhfiah chawp zël an ngai a ni. Ka lemziah 2-na chu hetiang deuh hi a ni :

Mipuitlingho chuan rulpui inhawng leh inkhär tih angreng ziah bànsan a leilung chanchin te, nunhlui chanchin te, ṭawng hmandàn dik zirna te leh chhiarkawp te zir zâwk tùrin thü min ràwn a. Chutiang chuan a ni, lemziakthiam hna ropui tak chu kum ruk ka nih láia ka lo bànsan tâk ni. Ka lemziah 1-na leh 2-na hlawhchhamna te chuan min tihnual a. Mipuitlingho hian anmahni pualin engmah an hrethiam thei lo va, naupangho tán puitlingho hrilhfiahsak hrilhfiahsak hi a chauhthlâk êm êm a ni.

Chutichuan hna dang thlan a ngai a, thlawhna khalh ka zir tâ. Khawvêl hmun zawng zawngah hian ka thlâwk kual deuh vek tawh a. A dik-a-dik chuan leilung chanchin zirna te chu ka chhawr ta hlë a ni. Vawi khat en thuak ringawtah Arizona aṭang China ram ka hre hrang thiam a ni. Zàna kawng bo chángin a ṭangkái viau mai.

Tichuan ka nun ram kawng chhuk chhovah hian mi un pui pui vawi tam tak ka lo hnim hnäi ve tawh a. Mipuitlingho kiangah ka khawsa vè nual tawh. Awmhmun meuhvah ka lo hmu hlawm tawh a ni. Chûngte chuan ka ngaihdán engti teh vakin an tihmasâwn lo.

Nèlawm leh tlang deuh hlek nia ka hriat ka hmuh ṭumin, ka lemziak 1-na ka dah ṭhat reng chu ka hmuh a. A hrethiam tak tak ngê tak tak lo ka hre duh a ni. Mahsé, « Lukhum a nih hi » tiin min la chháng ta cheu mai. Rúlpui leh tuk loh ngawpui leh arsite chanchin sawipui chhunzawm lovin a ban phâkah ka inhung hnäi ta zâwk a. Lẹi dawh chanchin te, inbawlvawm chungchang te, khawtláng inrelbawlna chanchin te leh nghawngawrh chanchin tih vêl te ka sawipui ta mai mai zâwk a. Chu puitling chuan chutiang taka mi rilru fím a titipui thei chu a lungawipui hle nghé nghé a ni.

Bung khatna chu a tàwp ta phawt mai le!

He lehkhabu zîaktû hi a hmá-a ka sawi tawh angin Antoine de Saint-Exupery a ni.

All comments are welcome.

Similar Posts:

• Le Petit Prince – Part 2
• Le Petit Prince – Part 3
• Krista leh Mizo Literature
• TUKDAWL TAWH HNEHTU
• Ka hmangaih ber kan Bible

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, May 7th, 2011 at 10:30 am and is filed under Information. You can follow any responses to this entry through the RSS 2.0 feed. You can leave a response, or trackback from your own site.