ziaktu- J.Malsawma{Thanpuii Pa}, ziah kum – 1960
Kristian ram, tualthat, suamhmang, rukru, bumhmang, mitdawihvaih thiam, nawhchizuar leh kutdawh awm ngai lohna, Ram Thianghlima cheng MIZO te mizia dik tak hi ka ngaihtuah vang vang thin a.
Hnam hnufual em em, mahse hnam fing anga lan tum lui tlat, neih zawng zawng nena tuallaia lenga inpenparh mi, buh leh bal leh sumdawn kawnga pachhe hle si, mahse khawsak rel thiam lo ber, nei hlei lo, ren hlei lovate kan ni.
Mi dawihzep, awmhmuna inhrosa vak vak mi, min thelhtu tur an awm tih hriat chhung chu pawngpawrh tur tur a, a sa seh meuh erawh ngam hauh lo, mahse huaisen ber anga lan tum tlat mi kan ni. Thenawm khaw-vengte hmangaih hle anga lang si, aruka an chhiatna zawng ruai si, ‘Ka mei rap se, chu ila’ ti thrah. Tunlaite hian mautam tampui a thleng mek a, thenawm khaw-vengte riltamin an thi ang tih hlau hliah hliah awm, buh man a la san tawk loh avangin hralh phal lo, inngaitlawm leh thuhhuairawlh fu anga lang si, mahse chapo ru riau kan ni. Zu hi hnam hmelma a ni ti si a, zu tihbo phal hauh si lo.
Kristian inti si, Krista mizia reng reng zir duh lo mi, Pathian thuhriltu inti si a, sual lawm mi, rilru taka sakhaw hmang lo va, vangtlang ngaiha mawi tur chauhva sakhaw ngaihsak mi, a tawi zawngin “Rilru fai si lova puan chang tivar,” te kan ni.
Mi awm laia an laina ber, mahse an awm loh hlana rel hmang em em, mi chanchin titi tui bera neih mi kan ni leh a. Tualthahte hi sual anih vanga duh lo ni lo va, dawihzep vanga ti ngam lo chauh, a remchan chuan suam leh ruk pawh pawisa miah lo; thatchhe hle si, taima tak anga lan tum, mahni hlawkna turah chuan mi bum hlum thak pawh hreh lo, mi rinawm anga lan tum theuh, mahse tehna leh bukna dik pawh hmang duh miah lo, tihdik tumtute pawh haw zel si, mi depde tak kan ni.
Nawhchizuarte hmusit hle si a, a ruka zawrh ching, kutdawh anga insawi duh miah lo, mahse dawh si. Thamna hi bawlhhlawh e tia iak iak si, tham ching ber bawk si, aia upa zah der a tha tih hre renga mi pawisak nei miah lo, mahni hotu tur duh thlang zut zuta an thu awih tum leh si lo. Induhsakna leh hleihneihnate hi a tenawm e, ti si a, mahse hleih neia te. Mahni hma sial em em, thiante kuta rul kaw zen tum, thiante phatsan mi kan ni.
Mahni chipui hotute zah nei miah si lo va, vai hotute hlau hlum dawn. Inpawihfak haw hle si a, fak der ngaina em em, mahni thiam channa turah chuan dawt pawisa miah lo. Taksa, rilru leh thlarauva hausa inti hle si a, a eng a kima pachhe ngawih ngawih zawk kan ni. TICHUAN A SUAK VEK KAN NI A, HMAITHINGHAWNG KAN VUAH THEUH A NI.
post tu thuchah :- a bold hi tunlai khawvel nen inhmeh ka tih vang in ka ti bold kher anih khi.
June 5th, 2011 at 8:23 pm
A DIK IN AVA THA EM.
Report this comment
June 5th, 2011 at 8:43 pm
A rawn Quoted tupa(Fonz) tana a ziah ni awm tak ani… Fiamthu
Nui ru 
A thra hle mai 1960 a ziah ni mahse,tun thleng in ala dik reng nih hi. Mizia/Nungchang hi chu a thlak theih an ti na a,thlak a har deuh aniang nge.
Report this comment