mi(sual).com

Zofate Chanchin hi hman deuh khan tu emaw atangin ka nei ve nawlh mai a, a ngaihnawm pawh ka ti hle. Tunlaiah, Mizo hnam, sakhua na (huai nei  ‘mihring tinatu ‘ ni a anlo hriat tihlawm tuma inthawi na anlo neih thin- inthawinan Bawlpu in a sa ei chak zawng zawng a chawh thin) awmze neilo, Chhandamtu Krista Isua kan lo neihtak a vanga kan lo kalsan tawh kaihthawh thar leh tumna niawm tak te pawh a lo awm leh ta, Mizo history hi a dikber hriat a har na-in, mithiam zawk leh ril zawk te lo chhui dan te hi,  ilo ti ri ve leh mai mai dawn teh ang.

Pi leh pu te hun lo paltlang dan te, an khawvel lo hman dan te kha, Lal Isua hnawlnan em a thar thawh tur chuan a at thlak deuh. History ang zawng hian nei ta mai mai zawk ila, a hlu a ni mai.

Thenkhat thu post chen zet a sei a ni ve awm e…mahse a tui te tan chuan chhiar a manhla ve tho awm e.

1.  Zofate Tobul

Zofate (Chin) chu khawvel hnam hlawm lian pui pathuma then zinga Mongolian thlahte an ni. Monglia-ho chu Asia khawmuala China ram, Yangtse lui leh Huangho lui hnar tlangram zawl (Plateau) chu an pianna leh an chenna bul niin an ring. Mi an lo pung a, an inthen darh zel a; tawng kalhmang leh an thawnthu neih inhnaih dan azirin hnam hlawm lian tak pathumah an then a. Chung te chu: (1) Tibet-Myanmar (Tibeto – Burma), (2) Thai – Chinese, (3) Mon – Khmer (Mun Khama) an ni. Heng hnam hlawm atangin hnam peng (group)- ah an then leh a. Tibet – Myanmar chu group pathuma then chawngin (1) Chin/Kachin, (2) Burmese/ Proto Burmese ( Kawl leh hmasang Kawl) (3) Lolo/ Mohso an ni.

Zofate chu Tibet- Myanmar thlah Chin/Kachin group an ni. Chhuitu hrang hrangte chhui dan a inang deuh vek a. Chiang zawka hriat theih nan an in kungkaih dan chu a chunga chhuitu chhui dan angin thlirna siam i la:

Mongolian thlahte chu China ram hmar lama awm China-hovin an run avangin an tlan darh niin an ring. Hmun hrang hrangah an kal a; chhim lam panho chuan ramngaw leh ruam tam tak paltlangin hun rei tak hnuah Kawlramah an lut a ni. Thai- Chinese leh Mon-Khmer ho chu hmar chhak atangin Kawlramah an lut a. Shan- ho tuna Shan State leh Kawlram hmar lamah hmun tam tak an luah a ni. Mi thenkhat Thailand leh Cambodia ramah an lut.

Tibet- Myanmar thlah Kawl leh Lolo-te chu Irrawady (Iravadi) lui hnar atangin an lut. Chin ho chu Tibet- ram atangin Assam ramah her kualin hmar thlangah Hukhawng phaikuam an pan a, Chindwin lui hnar atangin luipui chhak lam phaiah an kal thla zel a; Chindwin leh Irrawady luipui inkarah awm darhin awmhmun an khuar ta ni. Chumi hmuna an sulhnu hmuh theihte chu: Sagaing khaw bulah Chinywa (Chin khua) a awm a, chutah chuan Meitei hnahthlak an la awm niin an sawi.

Sagaing khawpui chhungah Chinsuh ( Chin thutkhawmna hmun) a awm bawk. Tin, Monywa atanga hla vak lo Chindwin phaiah tun hmain Fit 13-a sang lungphun a awm a, chu chu Kawlhovin ‘Chin Phaya’ (Chin Pathian) an ti niin an sawi. Tunah chuan chu lung chu a kehsawm tawh. (Dr. Vumson, Zo History p.34-35)

Kachinho chu Chin sulhnu zuiin Kawlramah an lut a, Chinho an kal hmasak tawh avangin hmar lamah an chambang ta a ni. Tibet-Myanmar zingah Kado/Kantu ho chu Kawlram lut hmasa ber an ni. Anmahni chuan ‘Sak’ an inti a. Proto Burmese an tih kha a ni awm e. Irrawady luipui chhak lamah Kado-ho chak tak an awm avangin Zofate chu thlang lam (Ni tlakna lam) panin Chindwin lui an kan a. Kale-Kabaw phai chu kum zabi 8 na lai vel khan an thleng ta a ni an ti. (B. Lalthangliana M.A.History of Mizos in Burma, p.28. Ani hian Dr. Than Tun M.A.;B.L.; Ph.D.(Lond.) Prof Early Burmese History a belhchhan). Kabaw Phaiah chuan mi an pung zel a, khaw dang dang dinin an inzar darh zel a ni.

2.  Shinlung:

Zofate pianna chu Shinlung (Chhinlung) a ni a, chu chu Lungpuk kawrawng zau tak chhin nei a ni a. Chu lungpuk atang chuan Zofate hi a chi chiin nupa kawp tuak te tein an chhuak zung zung a ni tih hi pi pute titi chhawm zel a ni chawk ang a; Mizo chanchin ziaktu hmasate’n an tarlang zel a. Lungpuk atanga mihring pian tak tak thu awm hek lo; Shinlung an tih chu engnge a nih a, khawiah nge a awm? tih hi an buaipui theuh a ni. An chhui dan a inang lo va, sawi dan pakhat chu: “ Zofate hi China lal Chinlunga thlahte an ni a; chu chu pi puten ‘Chinlung chhuak, an lo ti’ a ni ang” tih hi a ni. Zofate chu china hnam an ni lova, chu bakah Chinlung lal hun chu hun hnuhnung a ni a, Zofate chu tlangram an thleng daih tawh awm e.

Tin, Chui dan pakhat chu: “Awksatlang (Aukpataung) ah khawpui an din a, Chinlunga a lal avaingin chu khua chu ‘Chinlung’ an ti ta a ni” an ti. Tahan vela miten Awksatlangah khua an din a, mi tam tak ram vakin an kal fo bawk a, ram tin an fang kual vek tawh a; pi pute sulhnu hmu an awm lo.

Hetianga sawi an awm bawk: ‘Luseiho chuan an pianna bul Chinlung puk niin an ring a, Mara thawnthu nen a inang hle,’ tih a ni. (Dr. Vumson. Zo History. p.56) Zofate zingah hnam dangin Shinlung an sawi ve lo a ni awm e. Hmarho erawh chuan Shinlung an sawi nasa a ni. Chhui dan pakhat leh chu; Hmasang mihringte puka an khawsak lai thu fiah lo taka an hriat riai ruai an sawina niin an ring (B. Lalthangliana. Mizo in Burma. p.34). Sawi dan dang leh chu: “Pi pute hi hnam dangin Chin emaw, Chinlung emaw an tih thin avangin an pianna ‘Shinlung’ tiin an sawi mai a ni” an ti ve bawk.

Chhui dan dang leh chu: Kawlram Kachin State Bhamo khaw daiah kham rangpui a awm a; chumi hmuna lo cheng tawh thin niin an ring a, heti hian hla hlui an tarlang bawk

1.         I thei maw Chinlung liama mi’n?

Ar zaiah chhing nghilh lem ing maw!

2.        Pianna han hril ila Chhak tiang Kawl leh Vaiah,

Chinlungah tang hmasa ka pu e Lianngaia.

( Ex. Jem. Thanglinga, Mizo chanchin P.8)

Hla No. 1-na hi “ Kan ngaih e lenlung liam a mi’n” tia sawi an awm ve bawk. Heng hlate hi tlangram an kai hnua phuah a ni a, Seinlung Kaba khua hi khawpui hlui a ni lo va, heng velah pi pute lo chenna hlui a awmang pawh a awm lo niin hmutute’n an sawi.

Tin, chhuitu pakhat chuan, “ Zofate chu khu (lungpuk) atanga piang an tih hi Zofate Run khawm leh Kawlpui ram chhunga cheng tihna a ni.” a ti (J.Gin Za Tuang, Zomi innkuan laibu P.13) Run khawm leh Kawlpui ram a tih hi Kalewa leh Kalemyo ram a sawina a ni.

1. Kan siengna Sinlung ram hmingthang,

Ka nu ram ka pa ram ngai;

Chawngzil ang kokir thei chang sien,

Ka nu ram ka pa ram ngai.

2. Ka pa lam tlak a than dang,

Sinlung lam tlak aw a than dang

Shan khuo ah tha po in vang,

Tuoi chawngin hranlu a tlunna

(Rochunga Pudaite, M.A; The Education of Hmar People. p.21).

Heng hlate hi tlangram kai hnua an phuah niin a lang. Sinlung leh Shan hi hla fing khat chhungah a awm. Mi thenkhatin Zofate chu Shan State-ah Shanho nen lo chengza tawh niin an ring a, Yunan ram Nanchoa lal rama lo chengzaho an nih ring an awm bawk. Zofate chu Shan State leh Yunan ramah an cheng lo hrim hrim a, Zofate leh Shanho chenkhawmna chu Kabaw phai ni zawkin a lang.

Shan chanchin zeh tel hlek a ngai ang. Shan chu Thai-Chinese thlah an ni a, anmahni chuan ‘Tai’ an inti, Chinaram Yunan biala Nancho Shanho chuan AD.832-ah Pyu khawpui Hanlin an tichhia a, an mi mante nen an kir leh a. AD.1253 ah Nanchoa Shan khawpui Tali chu Kublai Khan-a Mongol sipaiten an tihchhiat avangin Yunanram chhuahsanin tunah Shan State-ah an lut a ni an ti. (U Kyi, Essential of Burmese History. p.12) Kublai Khan-a Sipaiten AD 1280-ah Kawl lalna Pagan khawpui an thihchhiat hnuin an kir leh a.

Chumi hnu chuan “Shan unau thum” an tih Tihathu an AD 1312-ah Pyinzah khawpui; a fapa Saw Yun- an  AD 1365-ah Sagaing khawpui, Saw Yuna tupa Minphia-an AD 1365-ah Ava khawpui an din. An thlahte zinga lal Soa Saw Ke (1367-1401) hnuah phei chuan an ropui hle a, Kawlram hmar lam zawng zawng an thu hnuaiah an dah vek niin an sawi. (Dr. Kyaw Thet, Burmese History . P. 112).

Lal Soa Saw Ke-a hun lai chuan Kale bial (Kawlpui) a do va, a hneh hnuah ram awp turin a tute chu Sawbua(Reng lal) a thuttir ta a. Sawbua lal chuan a chipuite hruaiin Kale-Kabaw phai chu thuneihna sang tak nen a thut ta a ni an ti. (Dr. Vum Son, Zo History p.37). Chutan chuan Zofate chu Shanho nen an chengkhawm a, Sawbua thu hnuaiah an awm ta a ni.

Kawl phaia Shanho sulhnu chhui theih a ni. Shan tawng khaw hming vuah khaw 10 vel a awm: Khampat, Nam Sawngpuh, Namhanwe etc. leh lui hming: Namkate, Namphalaung etc. a awm bawk. Shan chuan lui/ tui hi ‘Nam’ an ti. Chhuitu pakhat chuan, Khampat khua leh Kalemyo leh Tangsa(Tinta) khuate Shan Sawbua-in a thut thu a tarlang (Zaruma, Thu Ro Bu. p. 14) Vai len lai pawhin Kawl phaia chengte chu Shan an nih thu Mr. Carey & Tuck ziak The Chin Hils lehkhabu-ah hmuh theih a ni.

Chung Shan-ho chuan Kawl sa an phun zo tawh a, Shan-Bama (Shan-Kawl) Kawl an inti ta a ni. ‘Kabaw’ tih pawh hi Manipur- hovin Shan-kawl an tihna a ni an ti. Chuvangin Kabaw phaiah Zofate leh Shan-ho an chengkhawm tih chu rinhlelh rual a ni lo.

Shinlungah bawk lut leh t ila: Pi pute hian China ram chu sawi loh – Chindwin lui chhak lam thu pawh hi an sawi thei lo va. Mizo History chhuituten Chindwin piah lam an chhui hi chu Kawlram History tanchhana ziak an ni a. Chuvangin Shinlung chu ram hla takah an dah daih thin hi a dik lo a ni. A chunga tarlan thu leh hla te thlirin chik chiang ta ila: “SHINLUNG” an tih chu – pi leh puten an chhuahsan tak tlang sang tak liama Shan ho nen an lo chenho tawhna leh an lo thihna hmun KABAW PHAI niin a lang.

Kabaw phaiah pawh tukkhuma sam zialho chenna bik nia an ngaih Khampat bial chhunga awm lungpuk ni lovin, ram hming emaw, khaw hming emaw a nih a rinawm. Pi leh puten an hriat phal tawk tawk hi pianna bulah sawi an ching fo va, lungpuk atanga piang niin an inngai tlat bawk. Tlangram an kai hnua thu mah: “Lailun puka piang, Cimnuai puka piang, Seipui lungpuia piang” an lo ti mai thin a ni.

3. Zofate Kawlphai chen lai:

Kawlphai an tih chu, a tirah Kawl hnam chenna a ni lo va, tun hnuah an rama chengte hian Kawltawng an hman avangin a ram pawh Kawlphai hming a pu ta ni awm a ni. Sagaing Division huap, Chin State ramri bula awm a ni. Phaizawl dung sei tak a ni a, mel 150 vela sei, mel 10 vela zau (150×10) a ni. Hmar lam chu Tamu bial a ni a, ‘Kabaw Valley,’ tih a ni. Chhim lam chu Kalemyo bial a ni a, ‘Kale Valley’ tih a ni. Zofate chu he phaiah kum zabi pariatnaah an thleng niin an sawi. AD 1375 thleng an awm niin an ring. Zofate Kawlram an luh hnuah Kawlho an lut a, Tagaung khua an din a, AD 1044 ah Anawratha-an Pagan khua a din a. AD 1287 thleng a ding. Pagan lal hun chhung chu Zofate Kawlphaia awm hun a ni a. Nimahsela, Pagan lalin Zofate awmna Chindwin tlang lam an awp thu hriatna a awm lo.

Kan pi leh pute hian Kawl phaia an chen lai chanchin sawi tam thei an awm lo va, an hun hnuhnung lam chanchin chu an hre riai ruai thei chauh a ni. Zofate zingah lal ram din thei khawp awm ni sela, an chanchin leh lal hming hriat theihin a awm ngei ang. Lianngaia hming sawi lang an awm a; Pu Thanglianga’n Sinlung hlaah a tarlang. Chhuitu pakhat chuan, “Run khawm awm laia hming langsar deuh chu. Duhliana thlaha mi Lianngaia a ni,” (Hrangthiauva, Mizo chanchin. P.6) Lianngaia chu Shanho thlen hmaa an lal langsar deuh chu a ni mahna! Phurhhluma hming sawi lang an awm bawk. Shanho sulhnu tih loh Zofate sulhnu hmuh tur leh hriat tur a vang hle a. An sulhnu hriat theih awm chhun chu hengte hi an ni:

An khawpui hriat ber pakhat chu. Kalemyo thlang lama awm Tangsa (Tinta) a ni. Shan Sawbua-in a thut a; a bial chhungah hian Zofate chu an cheng a, Angteng (India) khua pawh an sawi tel ve bawk thin. Tangsa chu an hriat phak tawka khaw lian ber, ni pawh chu khua atanga lo chhuak nia an ngaih thu leh lal ropui tak a awm thu heng Bawivung hlate hian a tilang thei ang.

1. A hawng suaki Tangsa ni khir lang kawlrawnah,

Kipmen zun ul lang e samal sawm bang len.

2. Za zawng zo bang kan a tian a fah hi nang le kei,

Tangsa khua tiang thang seh kan bia zing ririai.

3. Ka lung kheng val che an um lo Lai rawnah,

Tangsa Mang, nan runah intuan rel ning naw.

‘Mang’ awmzia chu: lal hi Kawlin ‘min’ an ti a, Yaw leh Zofate’n ‘Mang’tiin an lam ri a ni. Heng hlate hi tlangram an thlen hnu daiha an phuah a ni a. Tangsa khua leh a chhehvelah an lo awm tawh avangin he khua hi an ngai ropui a, an hre reng a ni tih hla atang hian a hriat theih a ni.

Khampat chu Zofate khawpui hlui a ni a, kulh ropui tak an siam a, An chhuahsan dawnin Luseite chhuan Bung an phun’ tiin an sawi thin. Bungpui hi ti-ti a ngah hle a, hla pawh a nei bawk.

Ka phun Bungpui dawi ai ka sanna,

Mi khawih loh sa khawih loh tein;

Thangin lian la khuanuleng hualin

I tang zar piallei a zam tiakah;

Seifate’n vangkhua rawn din leh na’ng e.

Hla thu thlir hian hla upa a ni lo va, a phuahtu pawh an sawi thei a, ‘Ruah tham loh hla’ an tih angin an phuahna a la rei lo hle a. Khampat chu Kalemyo leh Tamu inkar motor kawngah a awm a; Kalemyo atangin mel 50 dawn vela hla a ni. Shan tawng a ni a,  “Rangkachak” tihna a ni. Kawlphaiah hian kum zabi 14-naah Shanho an thleng a, Khampat khua an din a, Sawbua lalin a thut a ni. Lehkhabu ziaktu pakhat chuan: “Shan Sawbua Saw Ni Khan chuan Khampat khawpui a siam a; Sawbua Saw Khan Ti chuan Tinta (Tangsa) khua a siam. Tin, Sawbua Saw Maing Khan chuan tuna Kalemyo-ah khawpui a din a ni” a ti. Zaruma Thu Ro Bu P.14. Ani hian Kalemyo lal hlui Ina mi tumhnah lekhabu ‘Nwe pat Rajawin, an tih chu 1973 kum a hawh atanga a hriat a ni).

Khampat bialah chuan Zofate an awm a, an awmna hmun chu Natmiang lui leh Meitei Run kam vel-Rajagyu khua leh a chhehvel hi niin an ring. Chu chu Kalemyo leh Tamu ikara awm ani. Ram awptu awmna khawpui chu a bial chhunga mite chuan ‘Kan khawpui’ tih theuh ngai a ni. Tin, Bungpui chu phun a nih leh nih loh hriat a ni lo va. Pi leh pute chu Bung phun ching mi an ni a, Bung phun thu chu titiah an sawi thin a ni mahna.

Nimahsela, kum 500 chhung zet a kal liam tawh hnuin hnam dang khuaah Bungpui ropui tak kan hmuh avanga ‘Ka pu Vawma tui’ tih ang mai a, ‘Ka pu phun’ tia sahuai thing vawn tlut mai chu kan ti likin a rinawm lo. Chhuitu pakhat History lama mi thiam pawhin. “Bungpui ber thih tawh avangin hmasang Mizote phun a nih leh nih loh engti kawng maha finfiah theih a ni lo,” a ti. (B. Lalthangliana, Mizo in Burma. P.52).

Khampat leh Bungpui titi leng vel hi Lusei ram atanga pem lutte’n changela sawi bel ang mai ni lovin, phai ramah betthlapa awm tumin pi pute ram hlui lo ni si chu, an sulhnu an hai vel atanga thu lo chhuak niin a lang. Chuti lo ni sela, chutiang hun chu 1960 bawr vel a ni. Kulhbing an sawi pawh hi Zofate tlangram kai hnua Shanho kut chhuak a ni ang.

Tin Zofate zinga hnam hrang hrang hian thawnthu iang tam tak neih a ni a, Thawnthu leh hla chu ro inchhiah theih zel a ni. Entir nan: Thlanrawkpa khuang chawi, Ngaitei, Chhurbura, Tlingi leh Ngama, Zawlpala leh Tualvungi, Liandova te unau etc. Heng hi Kawlphai an chenho laia an neih tawh a ni ngai ang. Tlangramah an chhawm a, mahni awmna hnaia tlang leh ram awmang deuh leh inhmeh deuh kha thawnthu awmna hmunah an puh zel a nih a rinawm. Tlingi leh Ngama chu Pawi leh Paite chuan hlaah an chuantir theuh va Liandova te unau thawnthu phei chu Tedim mi(Paite) chuan an sawi ngun hle a; an hnampui niin an sawi nghe nghe a ni.

Kan pi leh pute Kawlphai an chen lai chanchin kan tarlan theih chhun hi khaikhawm ta i la, Hla leh hmasang titi han chhutin an hun hnuhnung lam ah chuan chi leh hnam an inthen tawh a, an chenpuite azirin sam zial dan te a lo hrang ta a; tukkhum lama sam zial Mar-ho hi, Khampat bialah, hmalama sam zial Pawi ho hi Tangsa bialah an awm ni in a suangtuah theih. Tin, bengchunga sam zial an awm bawk a, Asho-ho an ni a; Kalemyo bial chhim lama awm an nih a rinawm.

4. Hnam Hming:

Zofate hian mahni hnam bul sawi lovin hnam peng zawk (clan) an sawi thin a. Zofate zinga hnam hlawm lian deuh deuh chu: Asho, Lai leh Zo a ni. History chhuttu hmasate chuan Tibeto Burman thlah Chin hnam tiin an ziak theuh va; Zofate chanchin chhuitu thenkhat chuan, an tanchhan lehkhabuin ‘Chin’ tia a ziahna hmunah Zo emaw, Mizo emaw, Laimi emaw tiin an thlak mai a. Pianna bul ber chu ‘China ram’tih a ni a, China rama cheng hnam hming an ziah chhuahnaah Yeo, Jou, Khyang, Chian, Lais a awm niin titi-ah an sawi thin a. Zo, Chin, leh Lai tiin duhna lam apiangah pawhfan theih a ni. Asho pawh Zo lamah pawhfan theih a ni. Vai a lo lian a, Vai lian chuan ‘Chin’ arawn ti a, an thlen hmasakna phai ram miten, tlangrama chengho chu ‘Chin’ an ti a ni tih chu a lang chiang a. Chin sulhnu chhui ta ila:

Chindwin leh Irrawady Luipui inkarah Chinywa (Chin khua) Chin Phaza (Chin Pathian) Chin suh (Chin thutkhawmna hmun) a awm thu chu kawlram luh thu-ah tarlan a ni tawh a. Kale- Kabaw phaiah Chin hming a lanna a awm lo.

‘Chin’ tih chu Kawlin “Thiana,” Mahni leh mahni tihnaah, “Tange chhin,” “a chhin chhin” an ti a, chuta tanga lo kal a ni an ti. Heng hian kawng leh ro a nei lo va, Kawl tawnga ‘Chhin’ lamrikna apiang an hai khawm mai niin a lang. Tin, Kawl leh kha hlui-ah ‘Khyang’ an tih chu ‘Chin’ tiin an lam ri a ni tia sawi an awm bawk. Zofate chu em an phurh thin avangin Kawlin ‘Chin’ an ti tia sawi an awm nual a, Kawlin em chu ‘Chhin’ an ti ngei tak na a; Kawlphai an awm laiin an chenpuiten em an phurh loh chuan anni bikin an phur lo vang. Tlangram an kai hnu ah em an phur a, chuvangin ‘em’ an lo ti ni sela, tlangram an kai hmaa an hnam hming kan sawi thei si loh chuan belhchian a dawl lo a ni. Em tihna leh hnam hming ‘Chin’ tihna chu Kawl lehkhaah hawrawp hman dan (spelling) a hrang a ni.

Zo sulhnu chhui thung ila, Chindwin leh Irrawady luipui inkarah Zo hming a lanna chu chhuitu pakhatin heti hian a ziak. “Tang Chinese lal laia an ram palai (diplomat) Fanchoa ziak, The Manshu lehkhabua-ah, ‘Chindwin lui hi Chinahovin, Mino an ti a, Chindwin phaia chengte chu ‘Mino mi’ an ti. Mino mi chu an ngova an hmai a tung a ni. Mino mi chuan an lalte chu ‘Zo’ an ti a, nungchang mawi leh zahawm tak an ni,’ tiin a ziak,” a ti. (Dr. Vumson., Zo. P.34). Kum zabi 8-na vela chanchin ziak na ni a, Zo lal chu an changkang viau siin a lang. Kum zabi 18-na pawha la mawl rih Zofate an ni ang em? tia ngaihtuah tur a awm a ni.

Kale – Kabaw phaiah Zo sulhnu a lanna a awm lo. Chhuitu pakhat chua, “Kawlram lai takah Chinho an lut thla zel a, Sagaing khaw thlengin an awm darh a . Heng mite hi Kawl hnamah an chang zo tawh a ni. Zoho chu Tuikang (Chindwin) thlang lamah an lut thla zel a, Mawlaik Runkhawm, leh Kawlpui ramah an khawsa ta a ni. Midangin Chin hming min puttir a, kan hnam tak chu Zo kan ni zawk,” tiin a ziak. (Gin Za Tuang, Zomi….Laibu p.16). Hei hian a tanchhan a tarlan loh avangin pawmpui a harsa a ni.

Lai pawh lailuna cheng an nih avangin ‘Lai’ an ti a ni an ti. Mi thenkhat chuan lailun atanga ‘Lai’ tih a ni mai lo va, hmasangah Lai a ni daih tawh a ni an ti ve bawk.

‘Chinho chuan anmahni chu ‘Chin’an inti lova, Chin tih pawh an duh lo,’ tiin lehkhabu thenkhatin an ziak. Mahniin ‘Chin’ inti bawk si lo; hmasang chanchin han chhuiin Zo hming lang mumal bawk si lo chu- hnam hming finfiah turin thangthar mi thiam chet a ngai a ni.

Sam zial dan azirin inkoh dan a awm leh a. Tukkhuma sam zial chu, ‘Taicheng, Mar’ an ti a; ‘Duhlian, Paite’ tih an awm bawk. Hma lama sam zial chu, ‘Hrumtung, Hrum-sawm,’ an ti a, Pawi tih a ni bawk.

(Source han dah tel ka tum a, ka hre ta mai lo…..apologise)

Similar Posts:

• Tahan awmna khawpui Kalaymyo tuilian
• Luseiho chauh hi em ni Mizo?
• Chin/Mizo, Zofa Norway ram Talent Show ah telve.
• Zofate Chanchin leh Vai Len Thu
• Mizo Hnam Ṭobul

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Sunday, June 5th, 2011 at 7:03 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.