mi(sual).com

Tun lai khua a har em mai.Ka dairy bu chhung a mi ka rawn thehchhuak ang nge.Finna leh hmasawnna lam erawh a vang viau mai thei.Heading-ah khian Sawrkar zemzen ka rawn ti ve ngawt a,hna thawk lo a nitin mai,a thlawna chaw min chawm avangin Sawrkar zemzen ka rawn ti mai,hriatthiamna nen Khawhar phenah le..

Lal Isuan,”inring rengin lo awm rawh u”a tih kha kan lo mangnghilh a ni ngei ang.Feb17,2010(3:00pm vel)khan kan hnathawhna(The 2 Cafe-Restaurant)ah oparasi an rawn lut ta thut mai le.Thingpui siama ka lo tulbuai lai tak a nih avangin engmah boruak ka lo hre lawk ve lo a.

Ka hriat ve hnu/tlai khaw hnuah ka thep ka thepa kawmchar lam atang Thailand pa pa1 nen kan intih tlanchhuak.Mahse immigration mi 2 an lo hrang lua.Tlan suh u,in tlan veih…pistol phawi tur ang takin action an han la,thu awih takin kan lut leh.Hmun khatah min thut khawm tir a,kan rinchhan ber kan UN card te an check lawk te te a.

Mahse chu mi ni zet zawng kan UN Card chuan chhanchhuahna dar a khawng ri thei ta ngang lo.Ngun duhawm lo zet min bun tir thliah thliah hnuah,savawm bawm kan tih mai thin,(mi man ho an phurna trusk )chhungah hmanhmawh lo zetin kan inhlangchho dial dial.Phurna leh thlamuannaten zamual min liam san.Kan nghahfak leh beisei ram ni lo,an sawi Terengganu Ajil( lung in )lam pan chuan min phur phei ta vuah vuah a.

Zan dar 11:30pm velah Lung in chu kan thleng a.Tlang mi 11,Thailand mi 3 te chu hmunkhat chhuak kan ni hlawm a,hmun dang atanga an rawn man mi 6 te nen chuan kan vaiin mi 20 kan ni.Mi 130 vel leng tur bulding in 7 a lo in tlar ruih mai a(A block,B block……..G block tiin).

Mahse kan thlen zan chuan in pakhat,room chep takah min khung khawm a.Kei leh Tahan khaw mi U.Hranghuliana chu mutna kan chang lova,thu chungin kan muhil.A tuk khua a lo var,thawh kan hei lo ching ngei e.Breakfast( biskut phek 8 leh coffee ‘O’ )min hluih hnuah min ko chhuak a,office pakhatah body card min siam sak te te a.Body card tih awmzia chu kan hming aiah number min siam a,A block-a awm tur kan nih chuan e.g,A/73.Tu emaw ten min rawn kan duh a nih pawhin he kan body card an hriat phawt a ngai a ni.

Kan hming hmanga rawn kan mi rwn tum chuan immigration ho lu a hei duh ngei ang le.Chuan chingfel ngai zawngte chin fel a nih hnuah puanthuah 2,hanawhna(tooth-brush)inch 2 vel leka sei( toothbrush hmanga invihhlum an hlauh vanga tanbung an ni),hasiai(tooth-paste)bur te tak te,sahbawn phel min pe ve hram a.Thawmhnaw pawh kan hak lai leh inthlakna tur hak khat chauh ken luh an phal.

Office pakhatah min hruai leh lawk a,Mi pathum te tein inchhungah min ko lut.Enge min tih tir le?Kawr phelh rawh u min ti,kan phelh.Kekawrtlawn phelh rawh u min ti leh,kan phelh leh.Underpant phelh rawh u an ti leh chiah chu kan nui ringawt.Kan inenkual hrek hrek lawk a thuawih chu a sualna a awm loh thin kha tiin kan phelh leh a.Kan thawmhnaw leh kan taksa engkim min check zawh hnuah ban min phartir leh a.Threi-Thrah(stand up/sit down)vawi 10 ti rawh u an rawn ti leh zel zel.

Mahni thu tih lalna hmun ni tawh hek lo le,Adama suit ngatin banphar phahin Threi-Thah vawi 10 chu kan han ti ta hlawm a.A inthen duh hle.Pawn kan chhuak chu fiamthu inhrilh awm der si lo chuan kan nui nasa.Thianten:-engvanga rawn nui chhuak nge innih hlawm le?Keinin:-Inlut anga inhre ve mai ang.kan zavaia check zawh kan nih hnuah chuan kan riah run turah kan lawi lut ve ta a.La inti mikhual ve hlawm sia,Adama suita inbual kan ngam ve lo.Inhliahkhuh theih dan dana inhliah chungin kan inbual ve hlawm a.Mahse kar hnih vel a han liam ve meuh chuan engmah zah tur awm tawh lo.Vak then leu leu tawh mai maw le.

Feb24 niah UN lam atang palai an rawn kal.Chhuak nghal ve mai turah kan lo inngai a,kan bungrua sahbawn,hasiai pawl kha tanpui thiante kan lo sem derh vek hman.Mahse mi rawn koh tih reng reng awm ve ta lo.Kar hnih awm hnuah chuah UN palai rawn kalte hmuh phal a lo ni lek fang a.Tum khat chu lukham nei hek lo i.Sawnglaia lehkhabu chhah deuh deuh saw,engvanga mi hmasa ho hian lukham atan an hman loh le tiin inti remhre fahranin an thiante mutreh tawh hnuah bu hnih ka la a,lukham atan ka hmang.A ni leh,a tuk khua a lo var chu immigration pakhat a rawn lut.He lehkhabu hi lukhamah i lo hmang a maw?Muslim Bible,lehkhabu thianghlim a nih hi mi ti.

Indosia ho chuan khawih min chak hlawm hle a.Ka hriatloh vang a nia,min ngaidam rawh u tiin ngaihdam ka dil a,eng em awm lo chuan kan inthen thei hram.Ka va han zak chiang em.Hriatlohna hi chuan mi a lo ti aa thin reng a ni.Chuan UN palai an vawi 4na rawn kal tum june8,2010 ni chuan Terennganu Ajil,,,Bye bye kan ti ve ta a.Ka pian,ka hriatphak chinah kha mi ni ngei kha ka thawven,rilru zalen ber tum a ni ngei ang..Mahse chhuak hmasa hovin kan pheikhawk an lo bun haw vek avangin kethiahte nen pawn kan chhuak ta a nih kha..

Nb:-
1 na.Phone hman tur hi an dah ve a,mahse kar khat vawi khat minutes 10 chhung vel a ni.

2 na.Nikhatah chaw vawi 3 min hrai ve.Mahse an chaw min pek ei zawh rualin ril a tam tan chauh thin niin ka hria.A hmasa ber chu breakfast ang a ni a,chaw tak pawh a ni lo.Chhangthawm leh biskut a ni thlakin ni mai.

3 na.Hmun dangah chuan ka hre hauh lo mai.Mahse kan tanna hmunah chuan hmeichhia ho chu mipa ho awmna nen inhlat ve tawk tak,block hranah an dah a.Vengtuten kawngengkimah an venghim viauin ka hria.

4 na.Tuna hma a kan ram mi an mante chu Thailand Ramah an thawn thina,Thailand atang tu tute emaw vang khaw lam hawng tlang emaw Malaysia rawn let leh emaw kha a theih thin a.Tunah chuan Thailand Rama inthawn a awm tawh loh avangin,mithen hawna nei lo,UN in refugee a an pawm duh loh,khawngaihthlak tak tak an awm teuh mai.Tawngtainaah i hre reng thin dawn nia.

5 na.Damloh hritlan changin dam dawi mum khat te ngah tur pawh hian dil fan fan an ngai.Mi then khat phei chu damdawi an pe har thei tuk a,an rawn pek hmaa lo dam leh daih an awm.Dam lo zual pui tak tak te damdawi in ah an inti hruai ve thin.Mahse rawn let tawh lo sawi tur an lo awm nuk tawh a ni awm e.Kan awm ve lai pawh chuan mi 2,kan Ram mi leh Irak lam mi chutiang boruak tawng an awm.Damdawi in kal ngai khawpin kan na ang tih hi kan hlauh ber chu a ni.

Seitea
Malaysia

Similar Posts:

• Aizawl District-ah Job card diklo 763 hmuchhuak
• Tanpuitu Ngaiin…
• Chatuana Pawi Hlen Tur
• Off la, on leh rawh
• Jaipur IOC Fire

Recent Posts:

• June 2016, Mizo(ram) Diary
• The reason we have bad roads in the North East
• INNGHAHNA TLING THURIL CHU
• Essay on Amen
• A MAKIN AVA ROPUI EM…!!

This entry was posted on Thursday, June 9th, 2011 at 1:07 pm and is filed under Information. You can follow any responses to this entry through the RSS 2.0 feed. You can leave a response, or trackback from your own site.