mi(sual).com

A then in babel an ti a, a then in babylon an ti a, a then in confusion an ti a, kein’in BUAINA kan ti thung.

Tawng hrang lo piang hi Pathian perfect plan a ni lo tih chu Bible ringtu chuan kan hrethiam vek in rinawm. Tuilet hnu ah, Shinar phaizawl ah chuan khawpui hmasa ber chu Nova tupa Nimrod-a(human hunter) lalna hnuai ah din alo ni ta a, tuilet leh mahse an inhumhimna tur leh an hming tithang tur in insang an sa ta a, a nihna ril zawk ah chuan false belief, zirtirna leh rindan diklo lo pian tanna a ni a, an religious monument a ni bawk, a hming dang chu Ziggurat a ni.

Chu chu Pathian in a dodal a, a dodal ber chu paganism, zirtirna diklo rawn kuitiak kha a ni. Pathian in zirtirna diklo a huatzia chu Genesis atangin a do tan a, Thupuan  a do thleng rak a ni. Thupuan a Babylon tih hi, Genesis 6 a kuitiah, zirtirna diklo,  thuk em em a zung kaih, kung lian em em a lo thanglian, zar tam em em chhuaha inzarpharh ta, religion leh denomination te hi anni.

Chu zirtirna diklo chu sakhaw dang ho hi anni ngawt lo, christianity hi a fihlim bik reng reng lo, vawiin ni a dik emaw kan tih, kan tradition leh doctrine te hi Babylon atanga rawn intan, christianity a kan baptis , kan pawm tak hi awihawmloh khawp in a tam a ni. Hei hi part II ah ka rawn thet ang.

Pathian chuan an tawng/lei chu a zuk khawih sak ta a, an lo buai zo ta a, chu chu babel, buaina(confusion) lo intanna chu a ni a, tawng an lo inhriatthiam sak tawnloh tak ah chuan an lo chengho thei ta lo a, an lo darh ta a, ram leh hnam(rise of kingdoms/countries and nations) a lo piang ta a ni. Chuta tang chuan zirtirna diklo lak atangin hnam pakhat chu a khunghrang ta bik a, Israel hnam chu, a hmangaih bik leh a duhsak bik lam a ni lo a, thiltum dang a nei a ni zawk.

Tawng hi hnam siamtu chu a ni . Chuan tawng chu Pathian anchhia leh Pathian hremna avangin a fuh zik tluak ta ngai reng reng lo a ni. A pawizia kan hriatfiah theih dan tur awlsam ber chu tawng inanglo  a Bible ziah leh chumi hnu ah tawng hrang hrang a lehlin a nih hian a tum tak a phawk chhuak thei ta ngai lo va, hrefiah thiam a, buaina (babel anchhia) mental blockage phelh tur chuan Pentikos Thlarau Thianghlim chauh lo chu engmah dang a hmantlak ta lo a ni.

Pentikos ni ah chuan  pindan chungnung ah zirtirte an awmkhawm laiin Thlarau Thianghlim chu a lo thleng ta a, a hnathawh, a thlen dan, a thawh dan, a tumram zawng zawng chu kan sawi tum a ni lo, heta kan sawi tum ber chu BABEL anchhia chu a rawn sut leh ta a ni. Shinar phaizawl a mihring Lei(tongues) anchhia a lo lawh tawh chu meialh in a rawn  halral ta a, a rawn purify leh ta a, chutah an hnam tawng theuh vin an tawng a, an lo inhrethiam tawn leh thei ta vek a ni.

Tawng ziak a dah hi logos chu a ni a, Thlarau Thianghlim a tih nun a nih loh chuan  logos hi rhema a tling ta reng reng lo a, a babel ta reng mai a, ka chhiar a, a tum kan man thei chuang reng reng lo. Tun lo haw lo se, Thelogical college leh Seminaries tamber a logos  zirna ah hian Bible message hi hriathiam rual a ni lo, Pentikos Thlarau neilo a zirve ringawt phei chu a bul vel ah an phebuai em em ringawt. Mark erawh an hmu sang zek tho ang. Thlarau Thianghlim tanpuina tello chuan a confusing(babeling) em em mai a ni, Ethiopia mi tilreh pawh khan a chhiar a chhiar a, a hrethiam thei reng reng lo. Vawiin ni ah pawh kan hrethiam lo a, chauh thu barawh ah, grep te chu a thur thur nen tih ang deuh in RIN mai hi a tawk, NUNPUI mai tur kan ti tawi tak mai a ni.

Chu chu hrethiam in hmelmapa pawh in Gnosticism a rawn duangchhuak ve nghal vat a. Divine revelation, divine wisdom leh secret knowledge te hi  ngaihpawlh loh tur, kan ngaihpawh tur atana hmelmapa thangkam a ni. Ngaihpawlh chu babel thlarau atanga pentikos Thlarau in a la then thianghlim lohte anni.

Chu chu vawiin ni a kan buaina chhan tak pawh a la ni ta zel a ni. Hebrai tawng a SOUL tlukpui teuhber chu NEPHESH a ni a, chu chu a tlukpui chiah chiah Greek ah a awm lo , a teuh ber PSYKHE ti a dah leh lehlin a ni ta a, chu pawh chu Greek philosopher Plato zirtirna pawmdan sa a lo awm lawk tawh avangin, Greek pa thinlung ah chuan Judapa in nephesh a hriatthiam dan leh a pawmdan a phawkchhuak zo tawhlo a, a  babel deuh nghal ta der mai a ni. Chu chu sap tawng in soul an ti a, khawbung a ti ta deuh deuh spirit nen an ngaihpawh ta pek a, chhechhawnga te vai dawr chu nepte, Mizo tawng ah phei chuan kan ngaihpawlh mai pawh a ni tawh lo, KAN LEHLIN PAWLH VEK TAWH ZU NIA.

Chu lehlin pawlh chuan logos level ah buaina(babel) a siam a, lehlin pawlh loh pawh ni ta mahse, mizo hnam sakhua in thlarau khawvel suangtuah dan kan lo neihsa chuan rhema level ah buaina(babel) a siam bawk a ni, hriatthiamdan hlui kangraltu tur Pentikos Thlarau a ngai tho tho.

Mizo tawng in kan titi a, kan inhnial a, kan sawiho va, kan inhrethiam tawn theilo hi a mak lo asin, a phen ah thawklo tur thawktu a awm a, a thawktur diktak changlo kan awm bawk.

He post pawh hi kan hriatthiam dan a inanglo leh dawn in ka ring. (Inti)thlarau taka pakhat logos(text) hnawl a, a pakhat rhema(insight) laklen pawh a hlauawm a, Academic deuh a rhema(insight) hnawl a, logos(text) laklen pawh a dikloh zia leh a hlauawm zia kan ram kohhran hian kan hailo e. Buai lova kan kal ngil dawn chuan  ke pahnih kan mamawh a, an inchenloh chuan kan kal buk a, pakhat chauh a kan kal phei chuan kan tlu hma, kan chau hma, ka tum ram kan thlenglo in kan thenhar phah in a hlauawm be- kan inchhuihthla hma em em ang deuh chiah hian Pathian thu hi chu logos leh rhema te hi an kal dun tur a ni.

Thatchhiat vang a rhema uar hi a theih a, a hlauawm. Kan  thiamna leh finna leh theihna hmachuan a logos uar pawh hi a hlauawm. Taima tak in, tuihalna dik nen, chapona hlip thla in, pentikos Thlarau hnuhnung awmpuina nen Pathian thu, kan nunna chaw hi  i kilho zel ang u. Dik tak chuan kan la inhnial peih te hi a lawmawm, chhiar pawh chhiar peih tawh lo, midang sawi pawh ning, a Pathianthu ning top leh tuihal theih tawhlohna hun ah kan lut mek a ni si a.

(In beisei lam kha ka hul tlat, priority ka pe thei tlatlo , hei hi kan thaichawp ta mai, lo thleng miau hek, ka ngaihtuah lawk miah loh, computer hma ah ka thu a, aliens kha bitum kan tum ngial a, hei hi a lo thleng chawp tlat, mak ka inti khawp mai, rhema rem rem.)  

Similar Posts:

• BABEL II
• Mihringin thlarau a neilo !!
• Mizo leh Mizo tawng
• Immortality of soul
• Juda hoin thlarau hi an mitthla ngailoh zia

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, July 6th, 2011 at 6:00 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.