Ziaktu: Lalhmangaihzuala
Zirtirtu hna hi ‘hna tha, hna thianghlim, hna zahawm’ tiin an sawi fo thin. Mahse ngaihsan erawh an hlawh lem lo. Mizopa thinlungah chuan J.E., Cashier, Range Officer te’n ngaihsan an hlawh fe zawk. Hna sang zawk lam ah lah college zirtirtu ai chuan E.E., SDO, BDO ten ngaihsan an hlawh fe zawk bawk.
Zirtirtu te aia heng hna dang te kan ngaihsan zawk na chhan hi enge ni ta ang le? Mahni hlawh bakah pawisa dang nei thei dinhmuna an din vang zawk anih ka ring. Officer eiru miah lo te chu tawngkam chauhin kan ngaisang a, hnunglam atangin ‘a mawl em mai’ tiin kan sawi zui fo thin. Chutiang bawkin, eiruk tur nei ve lo Zirtirtu te chu rilruin a dah hniam thei thin khawp mai.
Zirtirtu hna hi hnamdang chuan an lo ngaisangin an dah chungnung thiam khawp mai. Kan chhehvela cheng Chakma te phei chuan an dah chungnung thiam asin aw. Mipui mimir hian an en dan a sang tlat. Mizopa thinlungah erawh zirtirtu hna chu ‘hna hmui lo / hna mawm lo’ a ni kumkhua dawn anih hmel.
Zirtirtu ni tur chuan thiamna lamah pawh qualified ngei nih ve a ngai a. Tin, ama qualification bakah proffessional degree a neih tel a ngai bawk. Zirtu tan chuan nalh lo leh mawilo taka inchei a rem ve lo va. Nitin, darkar tin deuh thaw naupang hmaa ding chhuak tur anih avangin a nalh thei ang bera a inchei a tul thin.
Dar 9:00 am ah sikul tan anih chuan dar kua rik hmain sikul a thlen ngei ngei a ngaih avangin zingkar ah hmanhmawh takin inbualfai, thawmhnaw nawh fai, pheikhawk tihfai, etc a tih vek a ngai. Tukchhuak fuh loh a sawi ve theih loh va, pafa, nupa, inhauh tuk ah pawh naupang hmaah hlim hmel put luih hram hram a ngai thin. Luna leh luhai ber bur chunga class lak tum pawhin hlim hmel put hram hram a tul thin.
Zirtirtu chu a voice a clear tha tur a ni a. Minute 45 chhung vel class laa hrawk na vek khawpa a au chhung hian “aw tial leh hnawk” a awm tur a ni lova. Chuti anih loh chuan nuih duh rual tete naupang an nui ham ham a ni mai. Zirtirtu chuan tawngtheilo khawpa vanduaina a lo tawk anih chuan a hna atangin a chawlh a ngai a ni mai.
Office a thawk erawh tawng theilo khawpa natna khirhkhan a tawk anih pawhin a thawhpuite an fel anih chuan an thup mawi thei zel tho. Peon chuan a damloh nikhuain a aiah a nupui emaw a fapa emaw a tir thei mai a (an pu te’n an remtih chuan), zirtirtu tan erawh fapa B.A. emaw tal a neih a ngai thung.
Kumtluanin naupang, thahnemngai takin a enkawl a, naupang sual an awm chuan mitha ah chher chhuah hram a tum thin. Naupang thasa reng enkawl chu a nawm viau rualin naupang tam tak erawh luhlul leh sual tak tak an awm thin.
Naupang sual, an sualna simtira, nunkawngtha kawhhmuh te, naupang thiamthei lo, thiamtir tuma theihtawpa beih te hi zirtirtu chuan a tum hram hram thin. Naupang tha tam tak a chher chhuak thei anih ngai chuan zirtirtu hi khawtlang siamtha tu pawimawh tak ani ngei ang.
Hna hahdam leh awlsam a ni em?
Zirtirtu nih hi, zirlai hmangaih tak taktu tan lo chuan hna hahdam pawh a ni mahna. Zirtirtu tha chuan nitin thahnemngai takin naupang a zirtir a, an hriatthiam lohte hrilhfiahin notes a siam sak a, a vawn tir bawk a.
An thiam theih loh leh an luhlul changin a zilhhau va. Question a set a, a type bawk a.Exam answer paper a check a, result a siam vek bawk. “Zirtirtu te chuan chawlh an ngah alawm, vocation te an nei a,” an ti thin. Mahse vocation hunlai hi answer paper check, attendance record evaluation leh result siamna hun atan an hmang thin.
Answer paper check a zan rei tak tak thleng an meng thin te hi kan hriatpui leh chuang si lo. Chawlh an ngah viaua kan hriat lai hian atakah chuan chawlh an ngah reng reng hleinem maw le.
Zirtirtu chu mitha, minunmawi, kohhran leh khawtlangah pawh mientawntlak ni turin kan beisei tlangpui thin. Police leh excise zurui te kan thlir liam mai mai theih laiin zirtirtu zurui erawh kan helh hle si a. Rin aiin an nun hi a chep teh mai ania. Next generation atana kan tu kan fa chher thatu, mihmantlak leh mipuitlinga chhuahtu kan Zirtirtute kan endan leh kan hmuhdan te hi thlak ve tawh a va hun tak em.
Tunge zirtirtu tha ni ta ang le?
Kan rama kan sikul neihte a inang lo hlawm hle a. Thenkhat sikul chuan zirlai tha tha an lawrkhawm theih laiin, sikul thenkhatah chuan zirlai tha vak lo, pawl rawn sawn ve phak chang chang te chauh an awm thin. Pass percentage tha nei sikula thawk zirtirtu chauh zirtirtu thaa ngaih hi a tihchi miah lovang.
Zirtirtu tha chu a incheina ah teh tur a ni lova, sikul pass percentage that lam ringawta teh chi pawh a ni lovang. Thiamlo leh bil ve tak tak te pawh dawm kang hram hram a, an thiam ve theihna tura theihtawpa tan la a, tha taka pass thei tura chher chhuak theitu zirtirtu ngei hi zirtirtu tha ah kei chuan ka ngai.
An hlawh erawh a that tawk leh that tawk loh ka hre lova, hlawh an lak regular leh ‘lar loh pawh ka hre lo. Zirtirtu hian an hna erawh an thawk chiang hle a ni tih ka hre ve thung. An tihtur, an duty tha takin an hlen tlangpui. Tu te emaw angin hna pending an nei ve vak lo. Office thenkhata thawk, biak nuamlo leh hrehawm tak tak kan tawn fo thin ang hi Zirtirtu pangai chin zingah chuan hmuh tur an awm meuh lo.
(Tunlai chu chhangchhiat nen, ka hun a tight a, ka kekawr kawng a tight a, keimah hrim hrim pawh hi ka tight bawk a, thu leh hla lamah lah thlaler hmuna dil an sawi ang maiin ka ro em em bawk; misual.com ah pawh ka mikhual hru ta mai. Post khat em em manah tiin thiam leh thiam lo chungin ka han ziak ve leh hluai anih hi. A chhiartu lam paw’n ngaihdan chintawk min lo neih sak mai dawn nia)
Similar Posts:
- Zirtirtu
- Zirlai leh Zirtirtu
- Zirtirtu nge pawimawh zirlai?
- Sorkarin September thla thleng bak zirtirtu hlawh tur a nei lo?
- Ka Zirtirtu
July 30th, 2011 at 12:49 am
Caribou hi thu a ziak ngaihnawm thiam zek a nia, a thuziak ho pawh hi belhchian a dawl viau zel mai. Zirtirtu te tluk a mi puitling chherchhuahna kawnga mi pawimawh hi an awm kher lo ang
Chuan phek thar ka hawng
Report this comment
July 30th, 2011 at 12:51 am
cari 49# @Saitawk chu va siam rang ve, hmanni lawk maw ka lo tia
Report this comment
July 30th, 2011 at 1:56 am
Post of the month-ah ka thlang e. A tha ka ti kher mai!
Report this comment
July 30th, 2011 at 6:22 am
September 5 all round year in India.
PWD outdoor laborer side income i hre duh em? Ruah leh rial, nisa rum tak, thlipui… pute thu lo pawhin an tawmna an pan ve phat thin.
Zirtirtute vacation leh zirlaite vacation a innawm hleih ngawt ang!
Report this comment
July 30th, 2011 at 6:46 am
School KG to 12 bika zirtirtu te leh college zirtirtute hi chu an dinhmun a in ang lo tak zet, generalise ngawt theih an ni lo. Lecturer ho te hi chu an hlawh tam ang ai hian an thawh erawh tam lem lo tak an ni. Kar 1 a 45mins period 3 chauh nei thenkhat te leh private school a nitin a period 6-8 la thin te in hahthlak hleih tak ani ang.
School ah phei chuan mahni tan a thahnem ngaihna la hre lo a tam zawk an ni a, performance naupang te ah a lan awl sam avangin zirtirtu te tran pawh tan a ngai hle, college ah erawh chuan puitling a chhiar theih tawh an ho thung.
Keimah ah chuan school kal lai a min zirtirtu te kha ka rilru ah ka dah lian zaw mah emaw aw, ka ti thin.Min zirtirtute zawng zawng kha ka la sir in ka la madam thin.
Teaching talent ka tlachham ve ang reng si a, ka thawh chak loh tak proffession ani..lecturer ah hian ka tang ve thuak tawh a, ka ngaihtuah let hian in adapt phei chu a theih nang in, ka tang ta lo kha pawi ka ti lo khawp mai…chu mai te chu
Report this comment
July 30th, 2011 at 8:53 am
Zirtirtu kan ngaihsanloh nachhan ah hian-Kan hnam mentallity a lang berin ka hria. Miin Pawisa a ngah chuan-engtinnge-khawi atangin nge tih aiin an Sum neih avang khan kan ngaisang ringawt thin a lawm..
Post tha tak a ni e..
Report this comment
July 30th, 2011 at 9:50 am
A va tha kher em! he post zet chu, kawmen zawng zawng nen ka chhiar chhuak vek a, a manhla ngei mai.
Zitirtu tha i tehna leh Ignatia kawmen ho khi.
Zirtirtu rau rauah pawh pawl hniam lam a kan zirtirtute kha aw.. an ngaihawm thin teh e. Tin, a zirtute hian zirtirtu tha leh thalo chu kan hria, kan theihnghih tawh ngai lo.
Report this comment