mi(sual).com

Tho la ding ta che, i hliam a dam e,
I tha thum te a kiang e,
Hnutiang hawi lovin ram kal siam ta che,
Khuavel i la chhing ngei ang.

 India Cricket Team te hian he thu hi an hre thiam kher lovang, he hla tak phei hi chu a ngaih thlak pawh an la ngaithla kher awm love. Mahse, India ram mipui tan hian chak lohna ata leh sawiselna hliam an tuarna ata hi tho se la, an hliam te hi dam se ka tihna hi Mizo zinga Cricket ngaisang tute hriatah kan tarlang ve reng reng teh ang.

 Tu nge tlu a, tu nge tho tur chu :

Khawvel a test cricket an khel atanga  a match 2000-na, India leh England test khelh vawi 100 na tur ni bawk chu,  cricket hmun pui bera  sawi, Lord  Cricket Ground-ah July ni 21-25 chhung khan an khel a.  He match hi an ngaih ropui em avangin in buatsaihna pawh an ti ropui  hle a.

England leh India Cricket thuneitu lam pawh in an ngaipawimawh a  hriatrengna function pawh an siam a nih kha.  Kha test match chhinchhiah tlak tak kha India tan chuan hriat reng a va chak awm loh tak em.  Kha match-ah khan India team thiampuipa te che  nawi hle a, run 196 laiin an chak lo ta pang mai a nih kha.

A thawh hnihna (2^nd Test) tan a nih leh hma in India chanchinbu lar, Times of India chuan India hi mi ramah (away) hian second test-ah an che tha chauh  thin ang in a  chhuah a.  Ni danga anga nih chuan India tan chuan beiseina sang deuh. An inkhelh ni hmasa ber  chuan India lamin England chu run 300 pawh tling lo ah an vawm out  ta vek mai a.

Rilru chuan India 2^nd  test chet that thin kha a  dik dawn ta emaw ni aw tiin beisei a sang chho  viau mai. Mahse, India pawh chu a ni hnih ni chuan an han out kim ve vek ta thova. Second  inning  an khel chiah phei chu ‘a vaw tu in an cheh’ tih zawng zawng an nei zo emaw tih turin  India bowler laka chuan England batsman te chuan ni khatah  run 400 chuang te  zuk siam thei a,  target chu khi ah khi a nih ta vung mai

India team tan chuan  ngaituahna buai lo thei lo. Eng tinge chakloh theihna ata hi an chhuah theih ang tih chhanna chu ‘RUAH’ a ni tawp mai. Mahse, ni hnih chhunga inkhel theih miah loh a sur tur em chuan  beisei ngam chi a nilo ang.  Chak lohna dal tura run siam pawh tum lem lova ball lo dan kheuh keuh mai tur emaw ni dawn le?

Mahse, ruah a sur lova, ball an dang keuh keuh lova, run 319 in an han chak lo leh a nih chu. Khi ti zat zat khian an chak lo a ni mai lova, a ni nga na tur pawh thleng zo lovin ni li naah mualpho takin ke pali vawr a, tukhum lei vaw chawrh khawpin a tlu ta ruah mai a ni.

India team tantu tan chuan a na a ni satliah mai lova, a run thlak em em a ni.  Khawvel a test cricket khel thiam bera in chhal, Cricket ram a in puang mipui tam tak tan chuan a zahthlak tak meuh meuh a ni.

Eng kan ti nge keini chhung hi.

Eng an ti nge India team te hi tak mai an chetchhiat tak mai le ?  Hman ni lawka World Cup a champion team te kha khawiah nge an awm tak le? Khawvel a batsman tha ber a ngaih Sachin Tendulkar an nei a, One Day International leh Test ah run a siam hnem ber ve ve a, International match a century vawi 99 siam tawh a ni a, test dam rei thei tak ‘The Wall’ an tih fiam, Dravid awm bawk a.

India in Captain a neih tawk zawng zawnga tha ber a ngaih Dhoni in a hova, Duncan Fletcher, England Cricket siamtha tu ropui coach-ah an hmang bawk a. Heti chung a he ti tak mai a sawp an ni ta mai hi engvang nge ni ta ang le? Eng nge dik lova, an chhungkua ah hian enge dik lo ta ni ang le ?

India player te hi an chhia a ni hauh lo, an in buatsaih tha hman lo chu thuhran  nise la, a dik tak chuan India player te hi an chau tak zet a, an kulcho a ni ber e. World Cup a zova, IPL-ah hun tam tak, tha leh zung an sen hnuah hmanhmawh bak lengin West Indies an  kal leh nghal a, player te an chau tawngkhawng a, hahchawlh an mamawh tak zet a ni.

 Player te an hah em vangin an in fit lova, an taksa a chak lova, an inhliam pheng phung a ni. IPL-ah pawisa a tam a, tu mahni khel lo phal lova, chutih laiin ram tan a ti tur a lo awm leh si a. Inkhel mi te hi mihring ve tho, hah theih, chau thei hliam thei, an ni ve tho si a. India ram chhunga kan intihhlim chauh hnu a ram tan thawh chhuah meuh chu a dan a dang lo thei lo a ni. Kan India cricket chhungkua hi kan in en let a ngai ta ni lo maw ?

Thawnthu hlui chu min hrilh leh rawh :

A nih leh India hi a tluk sawpna ata hi a tho leh thei ang em ? Tho leh tura in chawh phur a ngai a, a hliamte tidam tur hian fuih phur a ngai a ni. Hm…. thawnthu hlui, kum 10 liam ta a mi khan in hrilh nawn leh kan ngai tlat. Kum 2001 khan khawvel a cricket team tha ber a ngaih, Australia vanglai khan India ramah an lo zin a. Mumbai -ah  India  nen test an khelh hmasak ber tum in India  an tlawm a nih kha.

Australia vanglai a ni bawk a, chak lo pawh nise a awm ve tho mai. Mahse, test vawihnihna Kolkata-ah khelh a nih khan India mipui rumna leh hlauthawng taka awm te tan hlimna leh lawmna nasa tak min rawn thlen ta. Mi pahnih lek, Laxman a leh Harbhajan Singh chet that fal avang khan game a danglam zo ta vek a nih kha.

Kha game mak leh dangdai takah khan Harbhajan Singh an India tan a test hat-trick hmasa ber siamin  India  mipui sang tam tak  te min va han ti hlim tak em.  Mumbai test-a India tluksawp hnu a, Kolkata test a an rawn dinchhuah dan leh an hliam a dam tak dan  kha kei chu a ropui ka ti a, theihnghilh leh mai mai chi niin ka hre lo.

Kha Kolkata test avang an hliam dam hnu khan Chennai test-ah pawh chak in, India chu  2-1 in an chak a nih kha.  Ih e, kha test series ah khan India bowler neih that ber  Javagal Srinath khan Kolkata-ah khan a khel thei lo tih i hria em ? Kha mi lai a India dinhmun chhiat leh beidawn thlak dan tur kha hre reng ang che.

Tunah hian Kolkata test a HERO pahnih te khan an la awm pui che a.  Kha mi tum a, thilmak tihna hmanrua  nei te kha i la kawl tih in hre reng ang che. Chu mai bakah thangthar leh mawng  zang zawk te belh chhah in i awm bawk a ni.  Tuna hian mualpho takin 2-0 in England hian hma hruai mahse la, i hliam leh i rumna hi nasa hle mahse la, i hliam te ti dam tur in i thawh a ngai a ni.

Nang mah avang hian mipui vaibelchhe tel kan rum a, kan zak a, kan thin a rim a sin. Chuvangin hlim tak a kan nuih leh theih nan, i thawh kan a ngai a, i ding a ngai a, i tha thum te i tih kian a ngai tak zet a ni.

Hnutiang hawi lovin :

Khua vel chhing tur hian i thawh a, i din leh i hliam a dam mai a tawk lova, hnutiang hawi lova i kal a ngai a ni. Khawvel a Cricket Board  hausa ber kan nih thu te, ICC President hi India mi a ni thu te, IPL ropui zia sawi a hun  ta lo.  Hman ni lawka World Cup trophy in eng mah a ti thei ta lo.

Tun hma lama India ramin Cricket mi ropui a neih Ranjinshiji, Pataudi, Mankad,  Gavaskar, Kapil Dev leh kum 1984 World Cup a England a thil mak ropui titu  te sawi chhuah a hun ta lo.  Tun ah chuan England nen a test vawi thumna leh vawi li na ah hian kan chak ang em tih chiah sawi a hun ta. Player tha te an inhliam a, mahse eng nge kan tih theih chuang le? England Coach hlui kan hmanga enge min thleng pui le ?

India ram a Captain tha leh ropui ber a ngaih in a ho a mahse kan chak theih si loh chuan enge ni ta….Hma lam en a, i hliam damna tur i thawh a ngai ta a ni e. Tin, heng bakah thil dang, i tum ti buai thei tur eng mah awm phal suh ang che.  I ram ngeiah harsatna chi hrang hrang khawkheng te, tui lian leh tam tuar te, ei rukna leh politics dinhmun nghet loh avang harsatn thleng hian rawn thlir duh suh ang che.  I hma lam chauh en la, huaisen takin  i tum chu hlen ang che.

 Khai le ….tho a hun ta, i hliamte  a dam dawn nia.

India team, tlu silawng tawh mahla, tho leh ta che. Khawvel a test cricket khel thei ram zinga a thiam ber i nihna hi vawng nung zel turin, i ropuina neih thin hi han chang  nawn leh ta che. Kum 2008  October atang khan test series hi vawi 11 khelh a ni tawh a, vawi  8  chak in, vawi  3 chu in inhnehtawk (draw) a nih kha i theihnghilh mai dawn em ni le.

I ram chhungah hian nangmah ngaichanga i chet dan uluk tak tlirtu mi vaibelchhe tel teh meuh in tho dep depin in kan lo tlir reng che a sin. I chakna sawm khawm leh la, mipui vaibelchhe chuang te hlimna min pe turin i tluksawpna a tang hian tho la ding ta che. Hmanni lawk a World Cup a i chakna kan lawmna ri pawh bengah a la reh lova, kan mittla ah chuan nimin a thil thleng angin kan la hria asin.Kawng leh lam ah hnehna hla do i chham a thangchhuah diar tial i khim lai hian kawng  dangah mualpho takin mi hmuhsit in in awm mai dawn em ni ang le?

Tho kang a, ding chhuak turin inbuatsaih rawh le. Eng tin nge i hliam a dam ang. He chak lohna ata hi tha thar in bei la, chakna rawn chang leh rawh le.  He test hma bak ah (3^rd and 4^th  test) hian chakna rawn changin rawn THO LA. I rawn thawh chuan khawvela test cricket khel thiam ber ram nihna dinhmunah i DING leh thei ang, chu mi hunah chuan mi tamtak ten an sawiselna, an hmuhsitna leh an cheksawlna HLIAM te hi a dam tawh ang. Tun tum a i chak theih chuan a hnu leh (test vawi 4-na) ah pawh huphurh lovin, I THA THUM te a lo kiang zel ang. Hnutiang hawi lovin Khawvel ramah i hminga thang leh dawn zuk nia….. Tho la, ding mawlh teh le.

Similar Posts:

• Sachin-a’n Century vawi 100 a siam tling ta!
• Kumpinu a hrang e, kan tawnah
• Cricket World Cup 2011 Quarter Final lineup
• Kan Ngai Dawn a Che, Pu Ricky Ponting!
• Cricket WC Quarterfinal : India vs Australia

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Thursday, August 4th, 2011 at 6:00 am and is filed under Sports & Games. You can follow any responses to this entry through the RSS 2.0 feed. You can leave a response, or trackback from your own site.