Vai i hua em? I haw viau lo a nih pawhin an thuhnuaia awm chu i chak kher lo mai thei. Mizoram chhungah ngat phei chuan vai thuhnuaia awm chu i hreh hle ṭhin lo’m ni? Mahse tuna hma i lak vat loh chuan duhthlan tur dang i la nei lo thuai ang.
Hnam dang thuhnuaia kun hi eng hnam mahin, mahni duhthu chuan, an thlang ngai awm lo e. Hman deuhah British-hoin sipai chakna hmangin khawvel ram tam tak an thuhnuaiah an dah a, India ngei pawh chung zingah chuan a tel. Ram tam tak chu thi leh thau pawlha ṭangin, nunna tam tak sengin an tal chhuak leh thei hram a nih kha.
Asia-ah pawh Japanese-hoin an ram hnaivai, China leh Korea te sipai chakna hmang bawka tudaiin an thuhnuaiah an dah a, kawng hrang hranga sawpin an tinawmnah ṭhin a nih kha. Tun thlengin Chinese leh Korean zingah Japanese-ho hua an la tam hle.
Keini Mizote hi kan inenchian a ngai ve takzet asin! Sipai chaknain vaiho hian min rawn runin min rawn nghaisa tawh kher lo maithei. Mahse sorkar inrelbawl dan en hian an thuhnuaiah kan kun thuk telh telh ang tih a hlauhawm a ni. Han ngaihtuah ve teh mah…
1960’s leh 70’s chho vel kha chuan Mizo te hi India ram tribal zingah All India leh Central Service-ah an tam lawr viau ṭhin. Chung kan officer chhuanawm tak tak te chu tunah hian an hun a liam a, an retire zo dawn titih ta der mai! Mizoram sorkar hmunpui, Secretariat hi han thlir ve teh.
Mizoram sorkar website-a a lan danin June 9, 2011-ah khan Secretary/Commissioner 21 an awm a, an zingah chuan Mizo IAS officer direct-a lut 3 chiah an awm! (chu pawh Chief Secretary leh Special Secretary pakhat chhiar telin). Post dang te hi IAS conferred 3, IFS (Forest) 2 leh Central Service (IRS) 2 bakah Mizoram chhung service hrang hrangin an luah a, chu bakah chuan hnam dang hming a awm leh ta nual mai. He mi hnu hian vai officer dang rawn zawm thar an awm leh tawh bawk. District-ah pawh vai DC leh SP an awm fur hi.
IAS conferred te hi sawi hniam tur an ni chuang lo a, officer fel leh IAS nih ve phu tak takte an ni. Amaherawhchu direct-a lutte nen chuan kawng tam takah an inang ṭhin lo. Central sorkar leh ram dang, hmun dang dawr tur pawhin duhthawhna ṭawngkam hriat tur a awm fo a, chutiang chu political level aṭang ngei pawhin a ri ṭhin.
Chu chang a ni lo, a tam zawk chu an service hmasaa an senior tawpkhawk, an retire dawn hnaihah IAS confer an ni a, IAS-ah an senior chho vak hman tawh lo a, chutih laiin department lian leh pawimawh te chu officer senior deuh te laktir an ni leh fo bawk si. Central sorkar lam han dawr pawhin bureaucracy-ah chuan seniority a lo pawimawh lo thei lo a, ‘eng batch nge i nih?’ han intih mai te hi a awm fo a, junior deuh tan chuan nuam lo hi a awm fo thin.
Tunah hian Mizo IAS officer direct recruit hi 15 emaw chauh an awm a, a senior deuh te lah chu retire hnai tawh tak tak an ni lehnghal. IPS lamah phei chuan an tlem lehzual a, pathum-pali lek an awm tawh. All India leh Central Service dangah hian tlem tlem an la awm pheuh pheuh. Hetiang zela kan kal chuan rei lo te-ah Mizoram administration hnukpui, Secretariat-ah hian vai officer senior pui pui an la ngir khup mai dawn asin.
Vai pi leh pu hrawn hi nuam kan ti meuh na maw chu? Meeting han ko se Mizo ṭawng an thiam ve miau loh avangin sapṭawng hman a lo ngai a. Keiniho lah hi sapṭawnga ṭawng hreh tak, a ṭul tawpkhawkah lo chuan ngawih thlang zawk deuh vek kan ni si. Kan ngaihdan leh kan hriat dan te sawi chhuak lovin, kan vai pi leh pu te thu thuin kan sorkar hi a then vel mai ang tih a hlauhawm takzet a ni.
Chu chang a ni hleinem! Vai officer Mizoram-a an post tam zawk hian hremna angah an ngai a, hrehawm an ti ngawih ngawih reng mai. A theih anga tam phai lama zin dan an ngaihtuah a, duty-in a daih bak rei tak tak chawlh la-in an thang bo ṭhin. Dem viau tur an ni lo. Tunge hremna tuara lunghnur chungin ṭhahnem ngai takin hna thawk peih ang? Kan ram hmasawnna erawh chu min enghelhpui ngai mawlh lo ang!
Misual.com chhiar ṭhin zingah hian zirlai bright tak tak in awm ṭeuh ang. Rilru thar puin thapui han thawh hlawm teh u. Hawh u, ṭan la thar i la, All India leh Central Service lamah hian i lut ṭeuh ṭeuh ang u. Chuti lo zawng vai thuhnuaiah duh lo chung chungin kan kun kumkhua palh ang e! Mi pawhin an theih chuan eng vangin nge kan theih loh bik ang le?
Similar Posts:
- Mizo pa-fa All India/Central Service-a lutte
- Mizoram a sorkar hnathawk hlawh hi a tam lutuk em, Tax pe ve dawn ta ila
- Hlawha lungawi lo sorkar hnathawk pung zel
- State government surrenders again
- Sorkar hnathawkin budget sum ei tam
August 18th, 2011 at 12:44 pm
Fuihna tha tak a ni. A tha khawp mai. Hna dang hrim hrimah pawh infuih thar kan ngai hle mai
Report this comment
October 30th, 2011 at 11:35 pm
Report this comment
October 30th, 2011 at 11:48 pm
Report this comment