mi(sual).com

Khuarei an chang zo ta…thinlai mu hnu a tho leh thin…

Kum 1991  July thla kha a ni ta awm e. Kum 20 lai a lo liam ta a nih chu….

Guwahati atang a motor, Maruti van kan lei chu khalhin, Shillonga kan chhungte inah tlai chaw kan ei chho a. Pa ber Pa Saitawna’n tawngtaina a min thlah hnu chuan, zawi zawiin Zoram lampanin, Alukudam kan tlan pel chho ta a.

Ka kalpuite pahnih, zinga pakhat zawk hi SOG Team a kan rawngbawpui Zothangpuia chandmari veng a ni a. Pakhat zawk hi chu, Davida, ka u fapa a ni.

Reivaklo kan tlan leh hnu chuan, kawngsir zau laiah chuan ding-in, motor chhungah tawngtairualna kan nei a. Zothangpuia hian a hnu khar na neiin, tawngtaina a ti tawp ta a.

Kan Amen a, kan han men chuan, kan din na zawn kawngpui ah chuan, TMB la thar hmel tak, a bang sang chi hi alo ding deuh hrut hrut a, a hnung (body) a tanga  a seat lam sira lo chhuk thlakna ah chuan tlangval cher ria sang lam deuh, jacket hring dal ha hi alo chhuk dawn mek a. Ngaihthatlohna hranpa nei chuang lovin, kan tlan san ta mai a.

Ruah a tla seng seng e tih mai loh chu, tluangtakin kan tlan a. Khlehriat kan thlen chuan thingpui dawrah chawlin thingpui kan in a. Ruah pawh a rawn tam tial tial a, a hnu deuh phei chuan ruahpui- van- awm a sur ta tluk tluk mai a. Ruahban tur hun a hriat bawk si lova, sana ka han en a, zan 12:30 a.m alo ri ta bawk nen, kal zel mai zai kan rel ta a.

Motor ah lut in kan tlan leh tan ta a. Ruah chu a sur nasa hle mai, chhum a tel nual bawk a. Chutia kan tlan mek lai chuan truck pakhat hian chak fe hiam min rawn tlan pel a,  a bang san danah leh a rawng ah, Shillong dai a, rawn ding deuh dut dut kha a ni tih ka va hre mai a. “ An va hmanhmawh ve aw” kan ti liam sa tliah a, kan tlan ve zel a.

Khlehriat atanga km 25 (a nih tawh hmel), mualpawng helna kawnghlui paihin, a mualpawng chu an tan a, leitan thar chhungah chuan kawngthar chu a kal tawh a, mahse a la thar deuh avangin kawng kual hlui pawh chu a la lang ruak tho va, mahse kawngthar leitan chu miin an zawh vek tawh a.

Chu leitan thar chhungah chuan kopang sir tawn tawnah chuan lei a lo min thlak avangin, kawng pawh a zim raih mai a, ruah a nasat em avangin, tuihawk pawh kawnglai ah chuan an luang nasa hle.

Zawi zawiin leitan chhungah chuan kan tlan lut ta a, mahse kan hma ah chuan truck body sang, a hma a chak deuh a min tlan pel tu ngei chu, kawnglai tak maiah chuan alo ding ta tlat mai a. A sir tawn tawn lah leimin in a rawn hnawh a, hel ngaihna a awm dawn ta hauhlo mai le!

Ka thiante pahnih lah chu, thlamuangtakin pakhat ka sirah, pakhat a hnung seat ah an hnar sak sak mai a. Motor light chuan truck hnunglam, chu chian takin a va chhun ta a. Tlem a ka va hnaih deuh hnu chuan, truck, a chhia an siam mek pawh ni silo, chutia kawnglaia lo ding ringawt ta chu, engemaw thutah va hnaih chilh lutuk loh a tha in ka hre ta thut a, ka back let ta a.

Chutia ka back let ta chu, truck body chhung atang chuan, Shillong dai a truck atanga lo chhuk tum, lo far thla hman tep Jacket hringdal ha ngei mai chu, truck bangsang atanga au khek ruai ruai chung alo  zuang thla tur mek leh truck body chhung atang a mi 20 rual vel zel lo ding chhuak, an hriamhrei ken ..chem, leh chain, thir chi ka motor light in a va chhun fuh chu a tle zawk zawk mai a, motor atang chuan anlo far thla tuam tuam mai a.

Kei lah chuan lo nghak ta nge ti bik lovin, a rang thei ang berin, ka back chak sauh a…an ni lahin ke a lo tlan pheiin min rawn um phei tawh.

Kawnghlui kual intanna (leitan tawntirh) chu ka va back thleng a, rangtakin first gear ah ka benglut leh a clutch thlah a hmalam hawia phih tir ka rual nghal a. A hma hruai chuan min rawn nang ching hman chu a ni mai e…Ka motor kawngka (driverside) darthlalang frame (thir) chu ri chawrh mai a, second khat chuan tlai ila, a darthlang rawn sat keh darhin min rawn hliam hman awm e, mahse Pathian zahngaihna avangin darthlalang frame chuan min chhan hman ta chiah a ni.

Motor chu hmalam hawi a speed sang thei ang bera dawk kan ni na a, a hnung darthlang, leh a sir darthlalang te chu a ri pawp pawp mai a, darthlalang keh them nawi chu motor chhungah chuan a rawn darh chuai chuai mai.

A hnung seat a mu, leh ka sir veilam a thu muhil pawh anlo harh ve ta…A hnung seat a mu Davida (ka u fapa) harh chiang manglo chuan lo thawhchhuah pah chuan, “Pute, truck in min su a law”  a rawn ti a, “ I mut ngai khan mu rawh rawn tho chhuak suh” ka ti a, theih tawh a chak chuan Khlehriat lam pan bawk chuan kan tlan let leh ta a.

An motor kha, Silchar lam hawi a an dah avangin leh kawngsir tawn tawn a a hnawh hmuk a vang in, inher mai ngaihna a awm dawn lova, min rawn umzui dawn pawh nise, leiverh tlanchhuak a khutah an zu inher angaih dawn avangin,  min rawn um nghal mai theilo tih ka hria, ka thla a muang deuh, mahse muangchan chi erawh a ni lo….

(Awmzel tur nge maw tur lo le….)

Similar Posts:

• Thlahrang
• Kan Himna Kulh
• Suam Hmang kan tawk ve tawh a sin – part 2
• Before and After Accident
• Kawng kam thil thleng.

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, September 3rd, 2011 at 6:00 pm and is filed under More than words, Travel. You can follow any responses to this entry through the RSS 2.0 feed. You can leave a response, or trackback from your own site.