Kan naupan lai chuan, Television te hi eng ang nge ni ang? Tih kan suangtuah thiam ngai lova. “Sap ramah chuan, an Radio-ahte hian a zaitu lem a hmuh theih vek, an ti” tih vel kha a vengva pawl titi a ni. Telephone te chu khawi lamah! Kan rawlthar chhuah hnuah pawh Shillong-a lehkha kan zir lai pawhin, PCO te chuan ka tan hlutna leh awmzia reng an nei ve ngai lo; kan khuaah telephone awm ve miau hek lo. ‘Tir’ man fuh changin, Restaurant-ah a tui tinreng kan tlan ve thin a. Kan khua chu sawi loh, Aizawl leh Lungleiah pawh Chinese Restaurant changkang deuh awmte chu kum 1990 hnu lamah chauh a ni si a, Mizoram tana rualawh a na duh thin ngawt mai.
Taksaah chuan puitling ni ve tawh mah ila, Nu leh Pa rilruah chuan Naupang duhawm tak, an enchim loh kha ka la ni reng si a. Thian pawh nei lo va, mahni a hmelhrtiatloh ram a kan han pil bo vang vang mai kha chu; min lo ngaihtuah thin awm ngawt mai. Heng hunlai hian a lawm, Tripura Ramthim naupang pakhat lehkha zir kan awmpui pawh, Mizoramah kum 10 dawn lai mai a pil bo veng veng mai si a, a chhungten a thi daih tawh amaw an lo ti a, an han inhmu leh chu, an lawm awm teh a sin.
Nu leh Pa, chhung leh khat laina tumah hmuhphak a awm ta lo chu, mitmei ven tur awm hek lo, thian changkang tak tak ka kawm a, Shillong thlertin fangin, Tleirawlho mit latu kanni a, keiber emaw intiin kan theuleu vel thin kha a nia. Thiante tih ang tih ve theih zel tum a lo ngai tel a, (Restaurant-ah thian kawmten(chhas ho telin), a senchi leh beer te an in lai a, Cold drinks ringawt lo tih reng bik kha a fello tlat a). Kan hunlaia Rimawi khawvela Lar ho zawng zawng hla kan sak ho chang a tam a, Rock Music phirpui tih telve zeuh zeuh a lo ngai tan bawk a. Zawi zawiin khawvel sualnate chuan min lo bawm ve ta hlek hlek a ni. Chung hunlai chuan a lawm, thil pahnih min chelh tlattu awm thin; Ka Nu tawngtaina leh a Hmangaih Lehkhathawn ka lo hmuh thin chu a ni.
Ka Nu hmangaih lehkhathawn ka hmuh chang chuan, ka hnuk a ulh teuh thin a, chu chuan Sual tuipui a ka pil bo tak tak tur kha min pawt kir leh thin a ni. Ran (Bawng emaw Kel emaw ang hi) phul hmun a hrui sei tawk taka thlun; kal bo tumin, engemawchen chu han kal sawn thin mahsela, hla lutuk leh pawi thei tur chin kal thei miah lova, thlun ang hian; Ka nu tawngtaina hian khawvel sualna tuipuia ka pil bo tur leh, ka vak bo tur hi min thlungbet tlat thin a, A hmangaih Lehkhathawn hian ka awmna ngaiah min pawt kir leh thin a ni.
Pathian zarah engemaw ti ti chuan, kan lo graduate ve ta a. High School-ah kum 3 vel ka thawh hnuin, kohna ka dawng miau si a, kan khua, ka chi leh kuang leh ka pa in chhuahsana hriatloh rama kal a lo ngai ta si a. Ka Pa hi tlangval lai atanga Kohhran Upa lo ni tawh a ni a, Ka hriat phak chin zawngah chuan, kan kohhran (Local church) ah Chairman ani deuh reng thin a, Pastor Bialah Secretary hlun a ni. Ka kal chhuah chu a remti miah lo tih ka hre reng na a, tawngkam khat mahin min khap lova, min fuih hek lo. Kan kohhran hovin min thlah zana kan thlalakte ka han thlir kir leh chang hian; Ka Pa hlim loh zia kha ka zuk hrechhuak leh thin a ni.
Kan bialtu Pastor lah chuan, “Nangnite in kal ve zel a ngai lo; Helaiah I Pa rawngbawlna hi puibawmin chhunzawm la, I tangkai zawk daih ang” min lo ti daih bawk si. Kan Kohhran a Crusade Speaker Evangelist lar tak lah chuan,Pulpit tlang atang a ka hminghmerh meuhvin, “Pk-a pawh, Mission Field-ah kal a tum ve ringawt a; Pathian kohna ni lo, ama chakna ringawt a nih chuan, Field tibuaitu mai a ni ang” min tihkhum bawk si. Rei tak chhung chu ka rilru hi a buai a, ka ke pen pawh a buai deuh nak reng a ni.
Mahse, heng hunah tak hian a ni, Ka pa hmangaih Lehkhathawn hlu em em mai chu ka dawn tak ni. “Mama, hetianga Sawrkar hna bansan a, damchhunga Lalpa rawngbawl I lo thlang ta mai hi, a tirah kha chuan ka hrethiam lo viau a. Mahse, a rei tial tial a, I tidik a ni tih hi ka hrechiang tial tial a ni. Chuvangin, rilru nghet takin awm tlat la, I damchhungin rinawm takin Lalpa rawng chauh bawl zel ang che. I nu nen kan lo tawngtaipui reng thin ang che” tih Lehkha ka han chhiar ta mai a nih chu! Mitthi Thlarau Hawilopar thliak a, Lungloh tui dawn ang hlauh ka lo ni ta. Tunah chuan Missionary Ordained dik tak ka lo ni ta a, ka phei chheh pawh a zangin a dik ta zaih mai a ni. “Aw, Hmangaih Lehkhathawn; Kei ka tan hian i va hlu em!.
Tunlaiah zawng, chhungtin deuhthawin Landline Telephone kan lo nei ta a. Mahnia thawhchhuah la nei lo thalai naupang te te thlengin, Cellphone changkang tak tak kan hum ta fur mai. Kan Cellphone te lah chu, duh hun hunah Message a inthawn theih a, Hla a ngaihthlak theih a, Video a dah theih a, Camera tha lutuk anih bakah, Video thlengin a lak theih vek a. Tunah phei chuan, Internet a connect theih vek tawh a, khawi hmun atang pawhin, hunawl hnawhkhah nan kan online zung zung thei tawh a nih hi.
Hmun hla tak tak a Lehkhazir te pawh, Thla khat a Lehkha vawi khat emaw chauh inthawn tawn thei thin kha, tunah chuan eng hunah pawh chawei lai pawhin, TV en lai paw’n, Khum atang paw’n a.. Daikal lai pawhin thu(message) a inthawn zung zung theih tawh anih hi. Lehkhathawn ziak peih kan awm ta lo!!. Nu leh Pa Lehkha, Hmangaihna dik tak nena ziak chhiar tur a awm ta lo. Telephone ah hi chuan, thu tha leh thlum tak tak infah a remchan meuh loh bakah beng rawngah a lut mawh dawn si. Chu lo rengah, hun leh pawisa a lo ren awm bawk nen.
Nula-Tlangvalte pawh, duh takte Lehkhathawn, hmangaih mittuiin a far val kalh mai leh, sticker mawi tak tak inbel, rimtui chak mai(chhas te rim nam ngei mai), lukham hnuaia dah a, lunglen chang apiang leh rinhlelhna a lo luh chang apianga, ‘Rinna leh beiseina’ thar min pe leh tur a phawrhchhuah leh a, chhiar leh thin tur a vang pharh tawh ngei ang. Hmaichhana tawngkaa sawi ngamloh tha zawng zawng hi hmeichhe tleirawl zakzum berte pawhin an ziak ngam thin a sin!! A pawi ta ber mai chu; heng lehkhathawn hlu tak tak ka dawn thinte hi, lo dahthat nachang ka hre miah lo hi a ni. Hmuh leh theih nise, ka va han lei huai ngam rua mai em.
He article ka ziah lai hian, Times of India-ah India Cricket khel thiam, kum 24 mi lek Yuvraj Singh-a thlalak hlui tawh tak ka hmu a. India leh West Indies ODI inkhel tum 2 naah India Team a chakpui tep tawh a; ball 3 la awmin, run 2 chauh siam a ngai tawh a ni. Anni ang player ropui tan chuan, India Team chakpui chu, “Nga-sa” ang a ni tawh a, “Man of the Match” pawh ni ngei tur a ni. Mahse, West Indies ball vawm thiam Bravo-an a beisei dan loh lutukin risk a rawn la a, a out ta!! India an ‘All out’ a, an tlawm ta zawk a ni.
Yuvraj Singh-a hrilhhai leh rilru na lutuk chu a bat rinchhanin a thu tung a, a indawmkun ta tlawk tlawk mai lai ngei mai chu a ni. A nu chuan, “Ka Fapa khati em a a lungngaih laia a sam chula, amah hnem thei lova ka awm kha, ka rilru a na em em a ni”, a tih thu ka han chhiar chuan, ka rilru a dek zar mai. Aw, Nu hmangaihna tak hi chu aw!! Ka mittui a hnai mai dawn ka ti. A sawizawm zel a, “Ka Fapa hi ka hrechiang a, Ralhrat(fighter) dik tak a ni a, khatiang thil kha chu a chungah a thlen tir leh tawh lo vang” a ti bawk. The Passion of Christ film a,. Isuan a Kraws put zo lova a tlukpui laia a nu Mari’n a naupan laia a tlu palh lainat em ema a kaihthawh lai a hrechhuak a, duat taka han kaihthawh a chak em em lai an rawn lantir nen khan rilru a khawihin Nuten an fapa tlangval uaih tawhte hmangaihna mita an en dan a tilang chiang ngawt mai. Yuvraj-a nu pawh hian, “My baby” tih a hmang ngat nia.
Similar Posts:
- Ṭiavuta Hmangaih Biahthu
- Lehkhathawn Hmasa Ber
- Lehkhathawn Hnuhnung
- Ka nau lehkhathawn
- Ka hmangaih che, ka hmangaih fo ang che.
September 4th, 2011 at 11:01 am
post tha tak ani
Report this comment
September 4th, 2011 at 11:19 am
tha pangngai
Report this comment
September 4th, 2011 at 11:34 am
Ni,Pathian hmangaihna tluk teuh ber chu Nu hmangaihna ngei hi a lo ni
Report this comment
September 4th, 2011 at 11:36 am
Tha hle mai. Pa te aimah hian nu te hian min hmangaih zawk em ni aw ka ti hial…Khawvelah hian min hmangaihtu Nu ka la nei ve tek tek hi a hlut zia ka hre ve tan mek a ni.
Report this comment
September 4th, 2011 at 11:37 am
Nu Hmangaihna lehkhathawn in a nunsual daitur a lo khalhngil ve tawh thin ka ni bawk a, he post hi tha ka ti kher mai. Ka nu hian kum 7 vel zet Mizoram pawn a lehkha zira ka awm ve lai khan kartin lehkhathawn vawi khat tal min thawn ziah thin a, nitin ka hming lamin min tawngtaisak ziah thin bawk a, a lo hlutzia kha ka la hriatbelh zel a ni tunthleng hian.
Report this comment
September 4th, 2011 at 11:40 am
Chanchin sawi tur ropui tak i nei bik hi i va’n vannei bik ve le! A ropui ka tiin post tha tak niin ka hria.
Naupan lai sawi takah chuan keini thianho pawhin TV hi duh duh en theihna ni turah kan ngai a. Television chu han nei na ila chuan aw, tunah hian ka piin enge a tih mek ka en hrim hrim ang te kha kan han ti a, a thenin pi Hangi lunglen tlang hi ka en tlang ang a, Sapramah enge an tih ka en loa le leh! te kha kan han ti ta hlawm thin a nia!
Report this comment
September 4th, 2011 at 11:41 am
I rawngbawlna Lalpan malsawm zel rawh se, nangmah leh i chungte nen.
Nu leh pate hi an va hlu em.
Ka lehkhathawn dawn te kha ka dahtha reng thin a, mahse lehkhabu hlui dahkhawm naah ka dah tawh a, remchang hmasaah hai chhuah leh ngei tur a nih hi.
Hriat zauna tha tak min hnu chhiah leh ta.
Report this comment
September 4th, 2011 at 11:45 am
Nu hmangaìhna hlut zia tak hi…!! Post chu missionary challenge na atan poh tha khop mai…
Report this comment
September 4th, 2011 at 12:09 pm
Gud post
Report this comment
September 4th, 2011 at 12:15 pm
I pa lehkhathawn i sawi khi a ngaihnawm ka ti khawp mai. I dinhmuna rawn indahin a lawmawm tur zia ka ngaihtuah a, ka lawmpui khawp mai che. Mahse, Evangelist pakhatin Biak In meuhva khitianga a rawn ti che khi chu ka ngaithiam hlek lo mai a. Pathian kohna chu NANGMAH aia hre chiang tur tumah an awm lovang. A lo inrawlh thuk mah mah a ni ka ti ve tlat.
Report this comment
September 4th, 2011 at 12:30 pm
Report this comment
September 4th, 2011 at 12:59 pm
kei zawng kati leh thin ang, nu hmangaihna ropui zia an sawi thin, ka hrethiam lova, ka suangtuah thiam lova, mahse ngaihnawm ka ti. Pa hmangaihna rilzia erawh ka hrechiang, zurim kan namve chang a, kalu a kut nghat a tawngtaina leh tette atanga missionary rilru minpek, vawiinni a a fate tana a duhsakber rawngbawlna kan thawkve thei hi, Post ropui hle mai
Report this comment
September 4th, 2011 at 1:00 pm
Pathian rawngbawl tur ka ni tihah hi chuan, ka chiang khawp mai a. Mahse, Ramchhung a rawngbawl tur nge ka nih, ram pawnah? Tih hi ka buaina chu a ni. Medical fitness certificate ka lak dawn pawh hian, Doctor hi ka thian tha tak a nia, “Pk, i hrelo a ni, helai a i tangkai ang hian, ram pawnah i tangkai thei chuang lovang” min lo ti a. Tin, Pasighat a sikul thar din tur a Principal hna dil kha ka nia. Ka liam fel hnuah midang an rawn dah lehnghal. Mizoramah ka han chhuak a, kan bial leh unit/branch thalai pawlin hruaitu tha an tlakchham zia ka hmuh phei chuan, rilru hi a buai map map mai a ni. (ka chhuah lai hian kum 24 ka ni a, bial Thalai Pawlah Secretary ka ni a, Group YMA branch 14 intel khawmah asst.secy. Ka ni bawk. Min hrechiang leh min hmangaihtu tak tak ho chuan, min ui ve lutuk a ni ber mai. (ka pa tactic pawh a ni thei bawk).
Report this comment
September 4th, 2011 at 1:33 pm
Tawngtaina hian thil hi a ti thei khawp mai.
Post thra thruai2 thrin hle mai.
Report this comment
September 4th, 2011 at 1:40 pm
A ngaihnawm khawp mai. Van lam kohna miin a dawn dan hi mite hriattheih tura chiang fek fawka sawi a tul fo ania.
I tisual lovang. Kal zel rawh…
Report this comment
September 4th, 2011 at 1:45 pm
WOW… tih bak sawi tur ka hre lo. Keia lo komen leh lo sawizui phak rual a ni lo. Lukhum phawk meuha zahna chibai buk chungin, chawimawina nopui ka hlan a che.
Report this comment
September 4th, 2011 at 2:02 pm
I pa tactic pawh chu lo ni ta se, kei chuan i pa hi ka dem miah lo. In unau engzat nge in nih a, eng chen nge i lakah beiseina a lo neih tih kha mihring lamah chuan ngaihthah ngawt chi a ni lo ang. Chutih laiin Pathianin a Fapa mal neih chhun pawh ui loa, duh duha nghaisak tura kan sual thawina tura rawn tir phalin, chatuana nunna min pek hlut zia min ngaihtuah tir pha ta tlat a. Tin, Pathin tan a tha ber zel pe phal tur kan nih laia kan phal mai lem loh zia leh, tap chunga buh chi feh chhuahpuituten hlim taka an buhphalte nena an hawn leh si ziate, Pathian hruaina hi a tirah hrethiam nghal mai lo mahila, hriatthiam loh theih loh leh nun hlimna nasa tak min siamsaktu a nih thin si ziate i post phenah hian hmuh tur a awm tlat. A ropui ka ti hle mai, Pathianin thuhnuairawlh tak leh inngaitlawm taka a rawngbawl zel turin malsawm che rawh se.
Report this comment
September 4th, 2011 at 2:05 pm
Ngaihnawm hle mai mai…..’Ka nu’ thi tawh hnu min ngaihtuah chhuah tir vang vawng …….
Report this comment
September 4th, 2011 at 2:07 pm
post tha tak a nih hi…
Report this comment
September 4th, 2011 at 2:32 pm
Report this comment
September 4th, 2011 at 2:40 pm
Ngaihnawm dangdai hle mai…
Report this comment
September 4th, 2011 at 3:15 pm
5.awmawmpuia, Nu tha tak i lo nei chu ka lawmpui hle mai che. A hlut zia i hrechiang telh telh ang. 12.muansangi pa khawlhring, nangpawh, Nu leh pa nih tling Pa tha tak i nei chu i nihlawh e. @ 17. Boiha pa, i comment hian ka rilru a khawih bakah, Dallas holmes-a hla, “i am what i am” tìh kha ka hriat chhuah phah. Remchangah a video emaw, a article zawngin emaw rawn tìhchhuah ka tum dawn nia. “God, it must have broke your heart, to send your Son away; knowing all the time the final price He’s to pay” tih ngei mai kha.
Report this comment
September 4th, 2011 at 4:44 pm
A ropui hle mai…
Kut ziak ngei a lehkhathawn hi chuan mi a deh dan hi a dang zar mai ni.:D
Report this comment
September 4th, 2011 at 5:30 pm
OT lawk: IAAF World Championship, Daegu S. Korea a neih mek ah, Will Claye (USA) chuan Triple Jump ah Bronze medal a la a, camera hma ah leh mipui hma ah Holy Bible chhuang takin ti lang a. A ropui ka ti em a ka rawn ot lawk ani(inthlahrung).
Report this comment
September 4th, 2011 at 10:28 pm
Rawn ti mawlh teh khai. Thusawitu pakhat chuan a tia lawm, “Kan thianpain, ‘zan khat chu Pathianin zawhna harsa tak mai min zawt a, ‘in ram leh hnam sual zia i vei em em a,thahnemngai takin ka thu i hril thin a, a nih leh hei fapa pahnih i nei a, pakhat zawk hi Bungkawn lai takah khian khaikan ni sela, a thih thlengin mi veivak velin diriam taka an nghaisak turin pe la, tichuan in ram leh hnam pumpui hi chhandamin in awm dawn a nia.’ min ti a. Ka han ngaihtuah thin a. Ka fapate pahnih chu tui takin an muhil sak sak mai a. An pahnih chuan ka’n entawn thin a, chuti anga nghaisak tur chuan loh theih loha pek tur pawh lo ni ta se, a tu zawk mah mah chu ka phal thei ngang lo a, ka mittui hi a surin a sur nguah nguah ta mai a. Ka han ngaihtuah chiang leh zual a, Pathian chuan Fapa pakhat chauh a nei a, mahse min hmangaih avangin nasa taka tihduhdah leh nghaisak a tuar a, mualpho tawpin krawsah khenbeh a la ni zui a, kei chuan fapa pahnih ka nei a, chu pawh Aman ka rochan tura min pek liau liau a la ni leh ta nghal a. Aw Lalpa ka Pathian, i mi hmangaihna hi ka va’n lo chhang let lo nasa tak che em! Ka engkim hi i ta a ni a, a zavai hian ka pe phal tawh ang che ka ti ta a. chuta tang chuan lawmna thuruk sawifiah hleihtheih loh hian min chenchilh ta reng a ni’ a ti e” a tia lawm
Report this comment
September 4th, 2011 at 10:42 pm
25. boiha pa chu, thil post chi tak inih ka ring mang e. Post han siam teh a. I thil sawi a fiahin a chiang thei riau mai. Ka la hman tangkai ngei ka ring e.
Report this comment
September 4th, 2011 at 11:21 pm
a ngaihnawm hle mai a , . @25
ka rilru a khawih hle mai i comment chuan ,
Report this comment
September 4th, 2011 at 11:34 pm
In bialtu Pastor, i pa leh Evangelist te hi ka dem miah lo. Pathianin min dahna theuh hriat fuhloh palh hi a hlauhawm reng a ni. Ka thianpa hi Missionary nih tum em em a ni a, mahse eng eng emaw avangin a kal thei tlat lo mai a. Tunah hian kan Kohhranah Missionary te tlawh peih ber leh tawngtaisak peih ber a nih bakah Missionary te harsatna chi hrang hrang te Kohhran memberte min hrilhkual a a chinfel theihdan tur daptu ber a ni a. Tuna a awmna hi Pathianin a dahna alo ni zawk a ni ang a ka ti ta deuh tlat a ni.
Report this comment
September 5th, 2011 at 12:13 am
A dik khawp mai. Ka pa pawh hi, tum 2 lai pathianthu zir a dil a, a chhan ho te te avangin a zir ta lova. Mahse kohhran enkawlna lamah hian a inpumpek tak meuh a, tunah hian kum 78 ani tawh a, bial, ABC(Presbytery) leh Local church ah Chairman hna a la chelh reng a ni. Pastor tamzawk ai chuan a thawhhlawk zawkin ka hria. Kan veng rawlthar ho kha a tul hunah ka chhan hlawm bawk a, ka mithmuh lai a rui leh au thler mai mai an awm ngai lo.
Report this comment
September 5th, 2011 at 4:03 pm
I rawngbawlna leh nangmah leh i chhungte Lalpa’n Malsawm che u rawh se
Report this comment
September 6th, 2011 at 12:00 am
# 27..Maya Pathian hmangaihna chuan i thinlungah thu sawi zel se la, midang tan malsawmna nasa tak kengtu ni mawlh ang che. PKfanai, hunte a la rawn inher rem ve chek anga post pawh la rawn post ve mahna. Tunah erawh chuan in thil post lo comment ve hi ka tih duh tawk a la ni rih a ni awm e. Kei pawh ka nu hi tlaivar thak thakin ka tan a tawngtai fo thin asin. Kei chu vanglai nei ve deuh chi, vengkhat tlangval ngat kha ka ni ve thin a. A a chi leh nu leh pate timangang chi, huiham buaithlak thei thin lutuk mawle. Che chhe zawka tan chang chuan vung ber bur zel mai mawle. OT quit vek loh nan- hmagaihna lehkhathawn aia hlu zawk lehkhathawn dang a awm thei ngai lo tih tichiangtu em em chu, Tirhkoh Paula leh Tirhkoh dangte lehkhathawn, chatuan nunna min kawhhnuha nun dan tur min hrilh zui zel thei lehkhathawn hlu tak tak te hi an ni ve ngei mai.
Report this comment