mi(sual).com

Thu leh hla ngah mi ka ni lova, hla phei chu ka ngah lo leh zual. Ka naupan chhiat ka la bansan thei ngang lova, chawtlang lian tak tak ka la lollipop khalh reng fova. Dik tak chuan ka inkhawm khat em na chhan pawh, ti tak runa awm ka thei thlawt lo a ni ber. A chang phei chuan mi zingah pawh, ka la inrulpuiludin ûr ûr fo tho mai.

Ka nausen lai thlalakah kha chuan ka pangngai ve fu si a, tuna taka ka chhiat tak em na chhan hi ka hriatchak thuruk ril a ni. Ka tet laia hnute ka nghei aimah khan, tunhnua hnute nghei hi harsa ka tihpawl a ni. Hei vang pui rohte pawh hi ni ta ve ang, ka cher tak êm êm na chhan pawh hi. Sawrkar pasarih pawn min chawm mah se, ka thau leh kher pawh ka inring pha ta meuh lo. Body fit ka ha phe hlarh hlarh ta fo mai.

Hmelchhia min han ti thei hlawm rem rem khawp a, keipawhin chhia ka inti ve tho. Piang nawn leh thei chu ni ila, nang teh thlawt ai chuan ka tha ve khawp ang. Vawikhat min hmuhnaa min nel nghal mai ka tawng khat khawp. Min nel lotu chu ka nel duh bik therte lo, ka induh ve tlat dawn. Mahse, hre rawh-Barking dogs seldom bite. Greek tawnga lehlin kher a ngai lo, hmelchia nazawng an rilru a chhe vek kher lo tihna nih chu ka u.

Kan thenawm te tak tak pawh hian, min hmuh zin fe tawh hnuah min be ngam chauh. A hmelchhiat hmingthan puitu Saichawnkhupa ka tluk lo hlauh erawh ka chapo rukna a ni. Hmeltha hmingthang Lianchia ka iang hek lova, hmelchhe hmingthang Saichawnkhupa leh hmeltha hmingthang Lianchia te leh ni leh thlakara leng Modern Saichawnkhupa ka ni pha hrim hrim pawh hi induh lah tur ka ni.

Hmelchhiata ha hmai bal tawh nak alai a, ka bahsam a kir tel kher hi chu Siamtu pawh hi ka dem lek lek thin. Mi faten an hmelthatnaa ei an zawn laiin, ka la chawi belh char char.

Ka nu khan retheih luatah min hring lawk duh lovang a, thla 13 zet te hi min lo pai a ni ang a. Ka nu pawh hi a ti mak ka ti ve reng reng, a thla kua naah khan min sawrchhuah ve mai awm. An fa hmasa ber heti taka min chhuah chhia hi chu nâ ka ti ve lek lek.

Ka lo len deuh hnu pawh khan he nau chu a van tha roh ti lovin, a va mak roh min titu ka tawng hnem khawp.

Ka thianpa phei kha chuan Zawng thlah i ni min ti tlat a. Ka ni lo ka tih pawhin, i ni min ti tlat si a. Chuti chu mei sei tak ka nei lo leh thingzara ka ban tui tui lohna hi ka vanneihna a ni anga te ka ti ta mai mai. Darthlalang ka haw ber a, awm lo mah se ka dam tho awm em mai. Ka thianpa khan sikul vela fiamthu thawhnan taka min hman chang phei kha chuan, “Hual-Reu” khum chiam kha ka chak thin. Mi hmelchhe ve te.

Ka pa pui roh vangte pawh kha a ni ta ve ang. A boruak deuh chan phei kha chuan, ka nu hnenah khan, artui hi kan loh tur i kang a, rawt loh tur i rawt ti tlat thin mi kha a ni miau. A ruih tawh chuan e- let the ordinary people do ordinary things, NLUP uak thui, ka thenawm pa eiru thin khi ka zu man tal min tum se, U.S Pentagon tih vel kha awmze nei lo baksak khan a sawi ang a. Amah vang vek ka chhiat phah a ni ang. Ka pet tawk nang a.

Ka piantlai tak êm avang khan thu leh hla ka ta tur zawng zawng Shakespeare leh John Keats ten an pumbilh zova. An aia lar fe tur ka nih laiin, an thu leh hla min ti lunghnurtu an lo ni letling a. Zahzelah Maurawkela zawng khuang ka zawng ta chung a nih hi. Nei thei ta chiah ila chuan, kei aia mi chungchuang an vang ve khawp ang.

Ka nu’n min pai lai khan, ka pa hrilhlawkna dawnah chuan thla leilung rap hmasa ber tura tih ka ni a. Duh aia rei min pai tak avang khan Neil Amstrong te’n min han tlangnel khalh a, tun thlengin thla leilungah ka zun loh phah. Aw, thla thar chu Zokhawtharah ka zin ve dawn khawp.

Ka la ti fo dawn, ka run riau. Ka thiante thian leh chhawng zel pawhin min lo ralkhat hlauh ringawt zel pawh kha a mak ka ti, ka lo va han chhe awm rem rem ve aw. Ka thianpa’n i hmelchhia min tih tlat avang khan alawm ka chhiat phah. Tha min ti sela chuan, tha awm in ka awm ve mai mai awm si a.

Min nuihzat reng reng suh, ka thih hunah i la chawh chai chai khawp ang maw le. Chubakah, pi leh puten,” Piansual leh phar charin tlai luat a nei lo” an ti thin a nia. I hmelthatna laiah tak khan in Vawkpui vulh cher ve zet khan a seh thei che a, i inchhuan rukna kha i tlukpui thei ka ti ve tlat dawn. Ka fuih che nih chu…

Ka heti zel a nih chuan, chi thlah lovin sârah ka zam ral tak ngial dawn. Thing delh loh lungdelh loh na na na chu, hmel duh zawng a neih loh theih si loh. Ka kawm nel hma hauhvin, i rapthlak roh min ti zel leh nghal. NLUP an sem zawhah NULA pawh an sem ve chek ang chu a ka ti ta mai. A zun theih ser ser chuan a tha mai. Duhtawk daih ang, laih loh Bui chhia ka inpuang zo tak ngial dawn.

Similar Posts:

• Mimal holam
• Eichhiat = Cancer?
• A theih em?
• August Rush
• Upa kan inti hma lutuk em?

Recent Posts:

• Khawel a chhe lo, a tha tulh tulh zawk!
• TUN HUN HI
• U Ama
• A LO DIK RENG SI
• MIZOTE LEH THIHNA

This entry was posted on Sunday, September 18th, 2011 at 11:00 am and is filed under HAHAHA. You can follow any responses to this entry through the RSS 2.0 feed. You can leave a response, or trackback from your own site.