mi(sual).com

A nui sen sen reng a, a nun kha a awhawm êm êm reng thin. Mahse, a hlim lai a rei lo khawp. Khatiang reng renga nun beihvai leh runthlak kha hmang dawn tih inhria se zawng, he khawvel hi a lo hnuchhawn daih tawh ang.

Kan inneih atanga kum tam a ral hnuah pawh, fa kan nei thei lawk lova. A chhul lampang a that loh avangin a ni telin a danglam chho tan a, damdawi leh damdawi thiamte nên tangkawp ve bawk mah ila, Khuanu remruat kan dal thei si lo. Kan hmalam hun thlira hlimtaka kan suangtuah dun thinte pawh up bo an lo ni zo ta.

A ni telin a buai chho tan a. Engpawh ti ila, ka tel lova chaw pawh ei duh ngai lo kha hlimtakin kan kil dun thei ta meuh lo. Intithianghlim peih êm êm thin kha atawp tial tial a, mumal lo leh awmze nei lo takin a vei ang ang a sawi fova. Min ti zak lek lek reng fova, a â tan a ni ber.

A chhul paih sak a, a pangngai leh mai ka beisei tlat a. Mahse, doctor ten awmzia a nei tawh chuang lovang an ti tlat bawk si. A damdawi leh injection chi hrang hrangten hnathawk ve bawk thin mah se, damdawi thiltihtheihna a kian meuh chuan namen lovin a buai zual sauh zel bawk si. Bible meuh chhiar a, a lu chunga kut nghata ka tawngtaina thinna chuan awmzia a nei thui hek lo.

Hnathawkin ka chhuahsan lo thei si lo. Chau leh hahtakin ka hawng a, peih leh peih lova chhuanchhum a ngai a. Bungbel hmun hrang hrangah an let rem rum a, patling lu a hai thin. Heng hunah hian hmangaihna dik a lo lang dawn chauh a lo ni.

Ka rilru tina zualtu chu, Pathian hmaah meuh a pasal tana min tiam tu khan- pawngsual tum ang a min puh tlat thin kha a ni. Chhuat laia awmze nei lo baksaka a let reng chu ka chawikang a, khumah han mut tir ka tum a. Pawngsual tum leh sawisa turah min ngai tlat a. Aw, a va lungchhiat thlak thin em.

Zingah thingpui tui tak siam sakin a kiangah eitur nen ka han chhawp a, a vawthlep sil nan leh infiam nan mai mai a hmang a. A hnuah engmah pe duh lo leh atana ui tlatah min puh leh hnuhnawh a. Chaw ei naa, nutling meuh a zung nam rum rum thin kha a mak hranpa lova. Zual lam a pan zel a lo ni tih ka chiang si a.

Chhungkaw harsat a zual a, suangtuahna thui tak a vak thin. A chang phei chuan, patling meuh pawh duhthusam a nep thei khawp. Mi hausa khama tla tur chhanchhuak hlauh ila, ka nupui a dam thlenga enkawl min tiam se ti mai maia duhthusam a awl khawp. Thluak a buai a, mi â dahkhawmnaa dah chu ka phal ngai dawn si lo. Dah chu sawi loh, a suangtuah pawh ka phal ngai lovang.

Ka chhuah loh chuan ei tur kan nei dawn si lo. Ka chhuahsan hlan chuan kan buhfai neih chhun tlemte, sazu ek nena inpawlh niai te chu nilengin ar chaw atan a lo pe leh ang a. Blanket bal miah lo kha tui tlemte awmchhun khan tul lo takin a lo chiah huh hnup bawk ang. Intifel zetin ka pho a ti ang a, chhuat lai takah a lo pharh leh diai duai dawn a. Bungbel a lo darh leh nuai dawn tih ka hre bawk si. Duhthlan tur avang khawp.

Van malsawmna ruahtui ringa nung ve mai mai thin leh sei lian, kan in bula thingkung awmte kha tuipek ngai tlat nia hriat tlatna a nei a. Bucket khat luau-in a khai ang a, tui a han pe leh lawp lawp ang. A chang leh thenawmte pangpar nen lam tui a han pe bawk ang a, a tui pek zawh chuan pangparte chu a en vang vang a. ” I nui ti raw?Thinrim reng reng suh aw, ka enkawl reng ang che. Ka hmangaih che asin, nang lo chu thian pawh ka nei tawh lo.” A tawngkam atang chuan mi pangngai a ang a, a buai tlat si.

Zingkhat chu ka chauh tawh em avangin thawh ka hai chiang kher mai. Ka han harh meuh chuan, ka nupui chu a lo awm tawh hauh lo. Hmanhmawhtaka ka thawh chuan, choka lamah ka tlan phei nghal a. Dawhkanah chuan fel taka thingpui lum sa diam a lo awm a, mak ka ti ngei mai. Mak tia ka din reng lai chuan ka nupui ngei mai chu a rawn nui lut sen sen a. Ka mitvai a ni mawlh lo, ka nupui ngei a ni si.

Thla tam tak hnuah a nui hmel ka hmu kha mak ka tih rualin, ka lawm bawk si. Ka kiangah lo kal hnaiin, “Duhtak, ka dam tawh niin ka inhria a, tawngtai turin Biak Inah ka kal asin.” Ka kuah chawt a, a ni pawhin nghet takin mi kuah vawng vawng a. ” Dam tha ila chuan, hetiang reng reng hian i buai leh i hah hi ka phal ngai lovang.” A dam lova, a harh thei si lo a ni tih a inhria a lo ni. Dan rual lohvina biangah mittui a sur zawih zawih a, mi kuah nghet sauh va, ka awmah mittui a luang a. Mittui hlu tak chu a va han ni em.

Kar khat zet a damthat hnu chuan, ka lawm em avangin a chhungte leh ka nu leh pate chaw ei ah ka sawm a. Hlimtaka chaw kan ei lai chuan, engmah pe phal ngai lo leh ka vuak reng thu a sawi leh ta heu mai le. Mak tiin min en thap a, a buai leh tan a ni tih ka hai mawlh si lo. A chaw thleg a beng baw thuai a, a tho nawlh mai le. Chutia a han awm takah chuan an hrethiam ve ta mai a. Kan hlimlai ni a va rei lo tak em. Patling thinlung mittui a sur leh thin.

Hmanhmawh taka Pastor kohvin, a tawngtai nghala. A awmthat duh tlat loh avangin ka kuah bet tlat a. “Lalpa….” a sawi zawm hmain hnunglamah kan let dun thak a. Theihtawpa kuah betin a tawngtai zel a, hmasawnna a awm thei si lo.
A buai belh sauh in ka hria a, that lam ai chuan chhiat lam apan zel a lo ni. Ngaihtuahna mak deuh ka put chang phei chuan, tairaw tiangin a kawngah hlap thawt ila, a natna atang hian a harh hlenphah ka ring rum rum a. Suangtuahna atthlak mai a ni si.

A buai belh zel takah chuan a kiangah ka awm ta chawt a. Chutia veng reng e ti lo chuan, ka hriat loh laiin a lo bo daih mai a. Pawngah hmanhmawhtaka ka tlan chhuah chuan, varanda atangin a lo tla reng mai a. “Mami” tia koh tuar tuar chung chuan ka zuk pawm tho vat a. A lu leh a nak a lo sawh reng mai.

Rangtakin in chhungah ka pawm lut a, ka kohna hria niawm tak hian a lo meng riai riai a. Mittui nena ka thlir reng lai chuan, mi nuihsak hian ka hria a, a mit a chhing leh riai riai a. He khawvel chhuahsanin thlamuang takin Pathian hnenah min lo haw san ta. Ka tap hleithei tawh lova, ka aw rawl tawpin ka bu vak thawmah chuan thenawmte an lo thleng thuai a. Chhan tlak leh chhan tur a awm ta si lo a ni.

A thlahna hnuhnung kan hman ni chuan e, mipui ngawi thap karah patling pakhat a lo dingchhuak a. “He ka fanu thihna leh an nupa inkara hmangaihna mak tak, harsatna tinrenga a bawm lai pawha inhmangaihna ka hmuh hian, hmangaihna dik tak ka chharchhuak ta” tia mittui far fap fapa a sawi chuan e- tap lo reng an awm lo.

A lei taksa thlanmuala kan thlah liam naah chuan, Pathian chhiahhlawh a lo ding leh a. ” Lei vaivuta siam kan ni a, vaivuta kir leh vek tur kan ni. Kumhlun tur kan awm lova, nikin niah Lalpa khawpuiah inthen leh tawh ngai lo turin kan intawk leh ang”

Ka tawrhna zawng zawng leh aw chhang niau chuan, “Mami, Mangtha aw…” Ka sawi zawm thei ta lo. A lei taksa tawmkai lo chu kal hmasate chawlhna ah chawl tawh turin kan thlah liam ta a ni.

Heng ka tawrhna zawng zawng hian ” Hmangaihna dik” min zirtir reng a lo ni.

Kapzâwna hla-
Si-ar chawngmawipuii chuanin,
A di val hrang chuan then mah se;
Tawn leh chang ni a nei,
Kei erawh chuan he khawvelah,
Tawn leh ni reng ka nei dawn lo;
Aw ka di ve kha.

Sualin tling lo mah i langin,
Ka rawn dil zel ang a Lalpan,
Min ngaidam ve ang a,
A buatsaihsa chatuan ramah,
Kan la intawng leh dawn nia aw,
Thapui nang nen chuan…

tiin a tlang ka’n tlip ang e.

Similar Posts:

• Ka Pa Fam Chan Ni Kha
• Kumtluang atan..
• The Best Chrismas Present
• VAI BAWNG Vrs ZO BAWNG
• Pa hnen a lehkhathawn

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Thursday, September 22nd, 2011 at 3:00 pm and is filed under Fiction, Luangliam. You can follow any responses to this entry through the RSS 2.0 feed. You can leave a response, or trackback from your own site.